Read Sehwi 1 Samuel 3 Bible Online

1 Samuel 3 - Sehwi bible

1 Samuel 3

¹ Né abɛɛmaa Samuel wura Eli ndeteyɛɛ bo yeɛ ɔso AWURADE ɔ. Sɔ mmerɛ ne, né AWURADE dwirɛ nwo yɛ nna paa; yeɛ né mmenia koso bɛndaa bennwu nyekyire.

²Sɔ mmerɛ ne, né Eli nye ahyɛ ye bo wayɛ wusiwusi bɔ onnwu nikyee yé ɔ, na né ɔla ye sua nu.

³Né Nyameɛ kanea ne onnya nnuane. Né Samuel la AWURADE asɔneyɛɛ sua ne anu, wɔ nekaa bɔ Nyameɛ alaka ne gyi ne.

⁴Na AWURADE frɛle Samuel kyɛ, “Samuel! Samuel!” Na osurole kyɛ, “Me ɛhe.”

⁵Na ole amirika hɔle Eli berɛ oosele ye kyɛ, “Ɛfrɛle me, me ɛhe.” Nakoso Eli buale kyɛ, “Mmvrɛle wɔ, sa kɔla.” Yiti osa ɔɔlale.

⁶Na AWURADE sa frɛle Samuel kyɛ, “Samuel!” Na Samuel dwɔsole hɔle Eli berɛ oosele ye kyɛ, “Ɛfrɛle me, me ɛhe.” Nakoso Eli buale kyɛ, “Mma, mmvrɛle wɔ, sa kɔla.”

⁷Né AWURADE onnya ɔyyele ye nwo ali ohhyirele Samuel, yeɛ né onnya ɔttele AWURADE noa dwudwolɛ.

⁸AWURADE sa frɛle Samuel ye pɛen nza so. Na odwɔsole hɔle Eli berɛ ɔɔhane kyɛ, “Ɛfrɛle me, me ɛhe.” Na Eli nwuni kyɛ AWURADE yeɛ ɔ́frɛ abɛɛmaa ne ɔ.

⁹Yiti Eli sele Samuel kyɛ, “Kɔ ná kɔla, na sɛ ɔfrɛ wɔ a, ka kyɛ, ‘AWURADE, dwudwo, na wɔ somvoɛ ótie.’ ” Na Samuel hɔle ɔɔlale nekaa bɔ né ɔla ne.

¹⁰AWURADE wale oogyinane berɛ. Na kyɛbɔ olili moa yɔle ne ala, ɔfrɛle kyɛ, “Samuel! Samuel!” Yeɛ Samuel surole kyɛ, “Dwudwo, na wɔ somvoɛ ótie.”

¹¹Na AWURADE sele Samuel kyɛ, “Tie, mebaayɔ nikyee bie wɔ Yisrael, na ebiala bɔ ɔkɔte sɔ dwirɛ nen, ye kunu kɔte ye.

¹²Sɔ kyẽa ne, edwirɛ biala bɔ mahã kyɛ ɔkɔto Eli abusua nen, ngɔmaa okosi fite ye bo koodwu ye ayieleɛ.

¹³ Mahã mahyire ye kyɛ mebaatua ye abusua so kerɛ afebɔɔ, ɔnate amumuyɛɛ bɔ ɔse ne ati; ofikyɛ ye mma nemɔ yɔle nningyein bɔ ɔte akyiwadeɛ wɔ AWURADE nyunu ne, wanyɔ bɛ huu.

¹⁴Na ɔnate sɔ ati, meta Eli abusua nwo ndaen kyɛ, kaka afɔleɛ anaa aleɛ afɔleɛ biala nne berɛ bɔ ɔkɔhora kɔpata kɔma Eli abusua amumuyɛɛ ɔ le.”

¹⁵Samuel lale mane aleɛ hyene ngyerɛmɔ; na afei obukyebukyele AWURADE awuro berɛ anoa nemɔ. Né Samuel suro kyɛ ɔkɔha nyekyire ne kohyire Eli ɔ.

¹⁶Nakoso Eli frɛle Samuel kyɛ, “Mma Samuel.” Na osurole kyɛ, “Me ɛhe.”

¹⁷Na Eli bisale ye kyɛ, “Nzikyɛ dwirɛ yeɛ ɔha hyirele wɔ ne? Nnɛfa fea me. Edwirɛ amukoraa bɔ ɔha hyirele wɔ ne, sɛ ɛfa nu bie fea me a, Nyameɛ tua wɔ kerɛ maa ɔbo so!”

¹⁸Yiti Samuel fale ye mukoraa nwo amaneɛ bɔle Eli, na wamva bie wamvea ye. Na Eli sele kyɛ, “Ye yeɛ ɔte AWURADE ɔ, maa ɔyɔ bɔ okuro ɔ.”

¹⁹Na Samuel de onyi ne, AWURADE gyinane ye si, na edwirɛ biala bɔ Samuel hane ne, AWURADE maa ɔwale nu.

²⁰Na Yisrael amukoraati, fite Dan bɔ ɔkwaadwu Beɛ Hyeba, benwuni kyɛ Samuel te AWURADE ngɔmhyɛlɛniɛ amba.

²¹AWURADE hɔle so yele ye nwo ali wɔ Silo, ofikyɛ AWURADE nate ye bɔbɔ ye dwirɛ so yele ye nwo ali hyirele Samuel wɔ Silo.