Read Sehwi 1 Samuel 6 Bible Online

1 Samuel 6 - Sehwi bible

1 Samuel 6

¹AWURADE alaka ne lili bosome nzoo wɔ Filistifoɛ aseɛ so.

²Afei Filistifoɛ tole asaa bɛfrɛfrɛle b’ahɔmeɛ ne bɛ musueyelɛfoɛ, na bebisale bɛ kyɛ, “AWURADE alaka ne, yɛ́yɛ ye sɛ? Nikye horɛ bɔ ɔsɛ kyɛ yɛfa yɛboka so ná yafa yaasie ye boso ne, ɛmɔhã behyire yɛ.”

³Na bebuale kyɛ, “Sɛ ɛmɔye Yisrael Nyameɛ apam alaka ne befi wa bɛkɔ a, ye de nnɛma ɛmɔfa ye mbaen bɛkɔ, na mmom ɔsɛ kyɛ ɛmɔfa foɛlilɛ afɔleɛ bɛboka so bɛkɔma ye. Na ɛhe kɔma ɛmɔ anwonyerɛ ne kɔhɔ, na ɛmɔkonwu bɔ yiti yeɛ ɔmma ye amaneɛ piri paa he omvi ɛmɔ so ye.”

⁴ Na Filistifoɛ bisale kyɛ, “Nzikyɛ foɛlilɛ afɔleɛ yeɛ yɛfa yɛɛma ye ɔ?” Bebuale kyɛ, “Ɛ́mɔfa sikaa kɔkorɛ bɛ́yɔ mbɔmbɔ nnu ne mmurokuruwa nnu, kyɛbɔ Filisti ahemvo mɔ somaa te ɔ, ofikyɛ amaneɛ komapɛ ne ala yeɛ wawa ɛmɔ amukoraa ne ɛmɔ ahemvo mɔ so ɔ.

⁵Yiti mbɔmbɔ ne mmurokuruwa mɔ bɔ bɛ́sɛkye ɛmɔ maen nen, ɔsɛ kyɛ ɛmɔyɛ bɛ sɛso, ná ɛmɔfa animnyam bɛma Yisrael Nyameɛ ne. Ebiaa amaneɛ piri paa bɔ wafa wato ɛmɔ ne ɛmɔ nyameɛ mɔ ɔne ɛmɔ aseɛ so ne, ɔkɔyakyi.

⁶Nzu ati yeɛ ɛmɔyɛ asoserɛ kyɛbɔ Misraimfoɛ ne Faro yɛle asoserɛ ne? Oguale Misraimfoɛ nyunu ase yiele nen, aso bamma Yisraelfoɛ ate ma bangɔ?

⁷Yiti ɛ́mɔyɔ teaseɛnam monɛ kamee ko, ná ɛmɔfa nandwie mmeleɛ nyɔ bɔ bɛma bɛ mma nyɔfone, bɔ bɛffale kɔnnua bɛttole bɛ kɔme le ɔ. Ɛ́mɔfa bakaa bɛ́sosɔ nandwie nemɔ bɛ́bɔ teaseɛnam ne, nakoso bɛ mma nemɔ de, ɛ́mɔte bɛ béfi bɛ ni mɔ anwo bɛɛfa bɛ begua tuin nu.

⁸Ɛ́mɔfa AWURADE alaka ne bésie teaseɛnam ne aso. Na sikaa kɔkorɛ nningyein bɔ ɛmɔfa bɛyɛ foɛlilɛ afɔleɛ bɛma ye ne de, ɛ́mɔfa bégua alaka bie anu bésie apam alaka ne anwo berɛ. Na afei ɛ́mɔyakyi ye ate ma ye bɔbɔ ɔhɔ ye atee.

⁹Afei ɛ́mɔfa ɛmɔ nye beli ye si. Sɛ ɔfa atee ne aso ɔkɔ Bete Semese ɔkɔ ye bɔbɔ ye maen nu a, ye de AWURADE yeɛ wafa amaneɛ piri he wato yɛ so ɔ. Nakoso sɛ wangɔ dɔ a, ye de yɛkonwu ye kyɛ nna AWURADE yeɛ wafa amaneɛ piri he wato yɛ so ɔ, na mmom asane bie mbaen yeɛ wato yɛ ɔ.”

¹⁰Filistifoɛ yɔle sɔ ala: bɛfale nandwie mmeleɛ nyɔ bɔ bɛma bɛ mma nyɔfone ne, bɛfale kɔnnua bɛsosɔle bɛ bɛbɔle teaseɛnam ne, na bɛhane bɛ mma nemɔ beguale tuin nu.

¹¹Bɛfale AWURADE alaka ne besiele teaseɛnam ne aso. Na alaka baa bɔ sikaa kɔkorɛ mmurokuruwa ɔne Filistifoɛ mbɔmbɔ mɔ sɛso wɔ nu ne koso, bɛfa bɛbokale so.

¹²Nandwie nemɔ hɔle bɛ nyunu tee bɛfale atimbire komapɛ aso bɛfale bɛ nye behyirele Bete Semese. Na nandwie nemɔ bɛkɔ ne, né besu. Bammakye bamva bɛen anaa famaa; na Filisti ahemvo nemɔ lili bɛ si toonn beedwuli Bete Semese ɛwɛen so.

¹³Sɔ mmerɛ ne, né Bete Semesefoɛ bɛ́te b’atokoɔ wɔ bɔnza ne anu. Bɛmane bɛ nye so ná benwuni alaka nen, ɔyɛle bɛ fɛ kyɛ banwu ye ɔ.

¹⁴Teaseɛnam ne dwuli Bete Semeseniɛ Yosua ye boo ne anu ne, ogyinane berɛ. Né nyɔbotaen bie timu berɛ, na bebubuli teaseɛnam mmakaa ne anu bɛsɔle see. Bɛfale nandwie nemɔ bɛbɔle naen yeralɛ afɔleɛ bɛmane AWURADE.

¹⁵Na AWURADE alaka ne, yeɛ alaka bie bɔ ogyi ye nwo berɛ bɔ sikaa kɔkorɛ nningyein wɔ nu ne, Lewifoɛ ye siele nyɔbotaen ne aso. Na sɔ kyẽa ne, Bete Semesefoɛ bobɔle naen yeralɛ afɔleɛ ne afɔleɛ bɛmane AWURADE.

¹⁶Na Filisti ahemvo nnu ne nwuni bɔ wasi nen, besa bɛwale Ekron sɔ kyẽa ne.

¹⁷Esikaa kɔkorɛ mbɔmbɔ bɔ Filistifoɛ fa yɛle foɛlilɛ afɔleɛ bɛɛmane AWURADE ne, bɛ ɛhe: Asedɔde deɛ ko, Gasa deɛ ko, Asekelɔn deɛ ko, Gate deɛ ko, yeɛ Ekron deɛ ko.

¹⁸Yeɛ sikaa kɔkorɛ mmurokuruwa nemɔ koso, bɛ somaa ne Filisti ahemvo nnu nemɔ bɛ nguro nemɔ somaa pɛ: nguro bɔ bato bɛ nwo fasue ɔne namue mɔ bɔ fasue nne bɛ nwo ɔ. Na nyɔbotaen bɔ bɛfale AWURADE alaka ne besiele so, bɔ ɔwɔ Bete Semeseniɛ Yosua boo nu ne, ɔte adanzeɛ maa waadwu ɛnɛ.

¹⁹ Nyameɛ huni Bete Semesefoɛ nemɔ bie, ofikyɛ bɛneane AWURADE alaka ne anu. Ohuni maen ne anu mmenia aburasoo, na mmenia ne lili aworabɔlɛ, ofikyɛ AWURADE huni maen ne anu mmenia pee paa.

²⁰Afei Bete Semesefoɛ hane kyɛ, “AWURADE, Krongronniɛ Nyameɛ he, nwa yeɛ ɔkɔhora kogyina ye nyunu ɔ? Nwa berɛ koraa yeɛ yɛye AWURADE alaka ne yɛfi yɛ wa yɛkɔ ɔ?”

²¹Yiti betuli ɛbɔfoɛ mɔ maa beesele Kiriate Yearimfoɛ kyɛ, “Filistifoɛ asa afa AWURADE alaka ne bawa. Ɛmɔbra bɛɛfa bɛhɔ ɛmɔ dɔ.”