Read Sehwi 1 Samuel 7 Bible Online

1 Samuel 7 - Sehwi bible

1 Samuel 7

¹ Yiti Kiriate Yearimfoɛ wale bɛɛfale alaka ne bɛhɔle, na bɛfa bɛhɔle Abinadabo awuro wɔ bokaa ne aso. Na bɛtele ɔwa bienzua Eleasa nwo kyɛ ɔ́nea AWURADE alaka ne aso.

²Ofi kyẽa bɔ bɛfale alaka ne bɛhɔle Kiriate Yearim ne, ɔhyɛle paa wɔ berɛ, kɔyɛ afoɛ aburanyɔ. Na Yisrael awuro ama mukoraa belili aworabɔlɛ bɛpenane AWURADE si atee.

³Afei Samuel sele Yisrael awuro ama amukoraati kyɛ, “Sɛ ɛmɔ ahone nu paa yeɛ ɛmɔsa bɛba AWURADE berɛ a, nzaade ɔsɛ kyɛ ɛmɔye Amaenmaensofoɛ nyameɛ mɔ ne mmosoen Astarote befi ɛmɔ nu begyi begua. Ɔsɛ kyɛ ɛmɔtu ɛmɔ nwo besie berɛ bɔkɔɔ bɛma AWURADE, ná ɛmɔso ye ngome, na okole ɛmɔ kofi Filistifoɛ sa nu.”

⁴Yiti Yisraelfoɛ gyili Baal mɔ ne Astarote mɔ beguale, na bɛsole AWURADE ngome.

⁵Na Samuel sele kyɛ, “Ɛ́mɔma Yisraelfoɛ amukoraa béyia wɔ Misepa, na ngɔfa ɛmɔ mbaeɛ ngɔto AWURADE nyunu ngɔma ɛmɔ.”

⁶Yiti beeyiale nu wɔ Misepa, na bɛsale nzue behwie beguale ase bɛbɔle afɔleɛ bɛmane AWURADE. Bɛhyele hɔen sɔ kyẽa ne, na bɛhane kyɛ, “Yayɔ bɔne yatia AWURADE.” Na Samuel tenane Misepa buli Yisrael maen ne.

⁷Mmerɛ bɔ Filistifoɛ tele kyɛ Yisraelfoɛ baayia nu wɔ Misepa nen, Filisti ahemvo mɔ hɔle kyɛ bɛkwaafa koɛ bɛtoa Yisrael. Na Yisraelfoɛ tele sɔ dwirɛ nen, Filistifoɛ nwo suronyi tɔle bɛ so.

⁸ Na Yisraelfoɛ sele Samuel kyɛ, “Esuɛ bɔ esu frɛ AWURADE yɛ Nyameɛ ma yɛ ne, nnɛyakyi; na srɛ kyɛ ole yɛ fi Filistifoɛ sa nu.”

⁹Yiti Samuel fale boaen ba bɔ otua nyɔfone noa bɔle afɔleɛ mumua yeralɛ mane AWURADE. Afei Samuel sũ frɛle AWURADE mane Yisrael, na AWURADE tiele ye mbaeɛ.

¹⁰Na Samuel gu so ɔbɔ naen yeralɛ afɔleɛ nen, Filistifoɛ pingyele Yisraelfoɛ kyɛ bɛ ne bɛ baaho. Nakoso AWURADE bɔle nu kurudududu serɛserɛ guale Filistifoɛ so sɔ kyẽa ne mane bɛ nye so tanene, na ɔmane Yisraelfoɛ huhuni bɛ.

¹¹Yeɛ Yisrael koɛhonɛfoɛ fili Misepa fitele bɛɛfoane Filistifoɛ, na behuhuni bɛ toonn beedwuli Bete Kare si dɔ.

¹²Afei Samuel fale nyɔboɛ penane Misepa ne Sɛn b’afia, ɔfrɛle nyɔboɛ ne Ebenesa,[3] na ɔhane kyɛ, “Ɛwa yeɛ AWURADE waboka yɛ waadwu ɔ.”

¹³Yisrael brɛle Filistifoɛ ase, na Filistifoɛ ambe Yisrael aseɛ so ko. Na AWURADE tumi tuale Filistifoɛ so kerɛ piri paa wɔ mmerɛ amukoraa bɔ né Samuel te ase ɔ.

¹⁴Yisrael nguro bɔ Filistifoɛ le fili bɛ sa nu ne, AWURADE lele Yisrael nikyee mane ye, fite Ekron bɔ ɔkwaadwu Gate. Nguro nemɔ nwo aseɛ koso, Yisrael le fili Filistifoɛ sa nu. Na asomdwee koso wale Yisrael ne Amorifoɛ b’afia.

¹⁵Samuel buli Yisrael maen ne mmerɛ amukoraa bɔ ɔtenane ase ɔ.

¹⁶Afoɛ biala, né ɔkɔ aporɔ wɔ Betel, Gilgal ne Misepa; na obuli Yisrael maen ne wɔ sɔ nguro nemɔ amukoraa so.

¹⁷Né ɔyɛ a, osa ba Rama, ofikyɛ ye kuro ɛne, na né ɔte berɛ yeɛ obu Yisrael maen ne ɔ. Na osili afɔleɛ bokyea berɛ mane AWURADE.