Read Sehwi 1 Samuel 8 Bible Online

1 Samuel 8 - Sehwi bible

1 Samuel 8

¹Mmerɛ bɔ Samuel yɛle aworowaa ne, ɔmane ye mma nemɔ yeɛ bɛyɛle maenbulɛfoɛ wɔ Yisrael ɔ.

² Ye bamuɛbaa bienzua ne li Yowel, yeɛ bɔ ɔtɔ so nyɔ ne li Abiya. Né bɛte maenbulɛfoɛ wɔ Beɛ Hyeba.

³ Nakoso ye mma nemɔ de, bamva ye suban, na mmom bɛmane bɛ nye borole nikye, belele fea-ase-ma, na bebuale ndɛengyea.

⁴Yiti Yisrael mbanyi mukoraati yiale, na bɛhɔle Samuel berɛ wɔ Rama

⁵ beesele ye kyɛ, “Ayɛ aworowaa, yeɛ wɔ mma nemɔ koso bamva wɔ suban, yiti ye ɛhene ma yɛ ma oli yɛ so, kyɛbɔ maen ngaa nemɔ bɛyɔ ne ala.”

⁶Nakoso bɛhane kyɛ, ‘Ma yɛ hene ma ɔla yɛ noa’ ne, wanyɛ Samuel fɛ. Yiti Samuel fa tole AWURADE nyunu,

⁷na AWURADE buale Samuel kyɛ, “Edwirɛ biala bɔ maen ne fa to wɔ nyunu ne, de to nu, ofikyɛ nna wɔ yeɛ bapo wɔ ɔ, na mmom me yeɛ bapo me kyɛ nnde bɛ so hene ko ɔ.

⁸Na bɔ bafa bali me amukoraa, fite kyẽa bɔ nyele bɛ mvili Misraim mmale bɔ ɔbaadwu ɛnɛ, bɔ bayakyi me si lilɛ baaso nyameɛ foforɛ biemɔ ɔ, sɔ ala yeɛ bɛ́fa bédi wɔ ɔ.

⁹Wɔ de, de b’edwirɛ ne to nu; nakoso kanzo bɛ kitii, ná maa benwu atee horɛ bɔ ɛhene ne kɔfa so koli bɛ so ɔ.”

¹⁰Yiti Samuel hane AWURADE noa dwirɛ ne amukoraa hyirele mmenia bɔ bebisale ɛhene befili ye berɛ ne.

¹¹Na osele kyɛ, “Ɛhene bɔ ɔbaali ɛmɔ so ne, sɔ atee he yeɛ ɔkɔfa ɛmɔ kɔfa so ɔ: ye koɛ teaseɛnam mɔ ne ye mbɔngɔ nemɔ, ɔkɔhyɛ ɛmɔ mma mmienzua maa bɛkɔhã, na ɔkɔmaa bekotu amirika bekoli koɛ teaseɛnam nemɔ nyunu bɛkɔbɔ ye nwo waen.

¹²Ɛmɔ mma nemɔ, ɔkɔbɔ ebiemɔ safohene maa bɛkɔlela mmenia apee apee noa, ɔne mmenia aburannu aburannu noa. Ɔkɔma ebiemɔ kɔso ye boo, ná wama ebiemɔ abu ye fieso aleɛ. Na ye akodeɛ ne ye teaseɛnam mɔ koso, ɔkɔhyɛ bɛ maa bɛkɔyɔ.

¹³Ɔkɔhyɛ ɛmɔ mma mmrasua maa bɛkɔyɔ ye sakyeɛfona, bɛkɔto ye aleɛ, ná bato ye paanoo.

¹⁴Ɛmɔ boo, bobe boo, ɔne olive boo nemɔ, okole nu aleɛ paa ne kofi ɛmɔ sa nu kɔma ye somvoɛ mɔ.

¹⁵Ɛmɔ aburoo ne ɛmɔ bobe mma ne, okole buru nu ngyɛmuɛ ko kɔma ye mbanyi ne ye somvoɛ mɔ.

¹⁶Ɛmɔ nganga ne ɛmɔ afaneɛ nemɔ, yeɛ ɛmɔ nandwie ne ɛmɔ afunum paa nemɔ, ɔkɔhyɛ bɛ maa bɛkɔyɔ ye adwuma.

¹⁷Okole ɛmɔ mmoaen buru nu ngyɛmuɛ ko, na ɛmɔkɔyɛ ye nganga.

¹⁸Na sɔ mmerɛ ne, ɛmɔkosu, ɔnate ɛmɔ hene bɔ ɛmɔafa ye bali ɛmɔ so ne ati; nakoso AWURADE ngɔtɛ ɛmɔ so sɔ mmerɛ ne.”

¹⁹Nakoso maen ne hwi fale Samuel noa dwirɛ so, na bɛhane kyɛ, “Daabi, yɛpena ɛhene bɔ ɔkɔla yɛ noa ɔ;

²⁰amaa ɔnate so yɛ koso yayɛ kyɛ maen ngaa nemɔ. Yɛ hene ne kɔla yɛ noa, na okoli yɛ nyunu maa yɛkɔhɔ yɛ koɛ mɔ.”

²¹Samuel tiele edwirɛ amukoraa bɔ mmenia ne hane ne, na ɔhane ye pɛpɛɛpɛ hyirele AWURADE.

²² Na AWURADE buale Samuel kyɛ, “De b’edwirɛ ne to nu, ná si hene ma bɛ.” Na Samuel sele maen ne kyɛ, “Ebiala osa hɔ ye kuro.”