Read Sehwi 1 Samuel 9 Bible Online

1 Samuel 9 - Sehwi bible

1 Samuel 9

¹Né biaa Benyaminniɛ bie wɔ berɛ bɔ oli Kise. Ɔse ole Abiɛl, bɔ ɔse ole Sero, bɔ ɔse ole Bekorate, bɔ ɔse ole Afia bɔ ɔte Benyamin bosoniɛ ɔ. Né Kise sa nu le bie.

²Né ole baa bienzua aberandeɛ anwonyemene bie bɔ oli Sɔɔlo. Né sona biala nne Yisrael bɔ ye anwonyemene tra ye ɔ. Maen ne anu, ɔne sona biala gyi berɛ a, ɔwale tra ye.

³Ɛlɛho bie, Sɔɔlo baba Kise afunum mɔ minini. Yiti Kise sele ɔwa Sɔɔlo kyɛ, “Fa somvoɛ nemɔ nu ko boka wɔ nwo so, ná kɔpena afunum nemɔ.”

⁴Oohyinihyinini Efraim mmokaa aseɛ so ne Salisa aseɛ so, nakoso bannwu bɛ. Behyinihyinini Saalim aseɛ so, nakoso né afunum nemɔ bɛnne berɛ. Afei oohyinihyinini Benyamin aseɛ so, nakoso bannwu bɛ.

⁵Na beedwuli Sufe aseɛ so ne, Sɔɔlo sele somvoɛ bɔ ɔne ye nate ne kyɛ, “Maa yɛsa yɛhɔ. Anyɔ a, me baba kɔyakyi afunum nemɔ nwo adwenedwene, na ɔkɔma yɛ nwo adwenedwene kɔtɔ ye so.”

⁶Nakoso somvoɛ ne buale ye kyɛ, “Tie, Nyameɛ sona bie wɔ kuro he aso, na ɔte sona bɔ bebu ye ɔ. Bɔ ɔkɔha biala, ɔba nu. Maa yɛhɔ berɛ, na ebiaa ɔkɔha atee bɔ yawa ye nwo dwirɛ kohyire yɛ.”

⁷Na Sɔɔlo bisale somvoɛ ne kyɛ, “Sɛ yɛkɔ berɛ a, nzikyɛ yeɛ yɛkwaafa yɛma biaa ne ɔ? Aleɛ bɔ ɔwɔ yɛ bɔtɔ nu ne, wayie; na akyɛdeɛ biala nne berɛ bɔ yɛkonya ye yɛkɔma Nyameɛ sona ne ɔ. Nzikyɛ yeɛ yɛle ye wɔ berɛ ɔ?”

⁸Na somvoɛ ne buale Sɔɔlo kyɛ, “Nea, nne ɛdwetɛ sekel ngyɛmuɛ nna nu ko wɔ wa, ngɔfa ngɔma Nyameɛ sona ne, na okohyire yɛ nekaa bɔ odi kyɛ yɛkɔ ɔ.”

⁹(Daa ne, wɔ Yisrael, né sɛ ebie ɔkwaabisa Nyameɛ berɛ dwirɛ a, ɔka kyɛ, “Ɛmɔbra ma yɛhɔ Nyameɛ sona bɔ ɔse ase ne berɛ”, ofikyɛ sona bɔ ɛnɛ ye bɛfrɛ ye ngɔmhyɛlɛniɛ ne, daa ne de, né bɛfrɛ ye Nyameɛ sona bɔ ɔse ase ɔ).

¹⁰Na Sɔɔlo sele ye somvoɛ ne kyɛ, “Bɔ aha ne ɔte paa, maa yɛhɔ.” Na besili nu bɛhɔle kuro bɔ Nyameɛ sona ne ɔwɔ so ne aso.

¹¹Na bɛ́fo bokaa ne bɛ́kɔ kuro ne aso ne, beyiale mmaayaa biemɔ bɔ befi kuro ne anu befite bɛkɔ asue ɔ. Na bebisale mmaayaa nemɔ kyɛ, “Nyameɛ sona bɔ ɔse ase ne, aso ɔwɔ berɛ?”

¹²Bebuale kyɛ, “Yoo, ɔwɔ berɛ, oli wɔ nyunu moa. Ma wɔ nwo yɛ nyera, na bekye ala yeɛ waadwu kuro wa ɔ, ofikyɛ maen ne baabɔ afɔleɛ ɛnɛ wɔ asɔneyɛɛ so berɛ.

¹³Sɛ ɛmɔdwu kuro ne aso ala a, ɛmɔkonwu ye koraka né wafo wahɔ asɔneyɛɛ so berɛ waadidi. Sɛ ɔwwale a, mmenia nnidi, ofikyɛ ye yeɛ odi kyɛ oyira afɔleɛ ne aso koraka ɔ. Na ɛhe asi ne, mmenia bɔ bato bɛ sa bafrɛ bɛ ne, bedidi. Yiti ɛ́mɔfo bɛhɔ, na ɔngɔhyɛ biala ɛmɔkonwu ye.”

¹⁴Bɛtoale so kyɛ bɛ́kɔ kuro berɛ. Na bɛyɛle kyɛ béwura kuro berɛ pambim ne anu ne, benwuni kyɛ Samuel fi kuro ne anu ɔ́ba. Né ye nye kyire bɛ dɔ, na né ɔse kɔ asɔneyɛɛ ne aso.

¹⁵Ɔhale ɛlɛho ma Sɔɔlo ba ne, né AWURADE ali moa waye wahyire Samuel kyɛ,

¹⁶“Ɛhema, bekye sɔa ala, ngɔma biaa bie bɔ ofi Benyamin aseɛ so kɔwa wɔ berɛ, na fa ɛpopalɛ ngoo popa ye ma oli me maen Yisrael so hene. Ɔkɔpepɛ kole me maen kofi Filistifoɛ sa nu, ofikyɛ manwu amaneɛ bɔ me mmenia benwu ye ne, na bɛ suɛ adwu me nyunu.”

¹⁷Na Samuel nye bɔle Sɔɔlo so nen, AWURADE sele ye kyɛ, “Biaa bɔ ngane ye nwo dwirɛ ngyirele wɔ ne, ye ɛne. Ye yeɛ okoli me maen ne nyunu ɔ.”

¹⁸Afei Sɔɔlo pingyele Samuel nwo berɛ wɔ pambim ne anu, na obisale ye kyɛ, “Mesrɛ wɔ ala, Nyameɛ sona bɔ ɔse ase ne, ye awuro wɔ nisua?”

¹⁹Na Samuel buale Sɔɔlo kyɛ, “Me ole Nyameɛ sona bɔ ɔse ase ne. Di me nyunu moa fo kɔ asɔneyɛɛ so dɔ, ofikyɛ ɛnɛ ɛmɔ ne me kodidi. Na edwirɛ bɔ ɔha wɔ ne, ngɔma wɔ ye nwo mmuayɛɛ ɛhema ngyerɛmɔ, ná afei mayakyi wɔ ate maa ahɔ.

²⁰W’afunum mɔ bɔ bamini ɛlɛsa ɛhe ne, nnɛdwene bɛ nwo ko, ofikyɛ banwu bɛ. Na nwa yeɛ Yisrael anwonyadeɛ amukoraa te ye deɛ ɔ? Ɛne wɔ baba abusua nu ama mukoraa, aso nna ɛmɔ deɛ ɔ?”

²¹ Na Sɔɔlo buale kyɛ, “Nde Benyaminniɛ. Yisrael mmusua kure nemɔ, Benyamin yeɛ ɔte kãa paa wɔ nu ɔ. Na Benyamin abusua kure ne, m’abusua yeɛ ɔte awiɛmvoɛ paa wɔ mmusua ne amukoraa nu ɔ. Na nzu ati yeɛ aha sɔ dwirɛ he ahyire me ɔ?”

²²Afei Samuel fale Sɔɔlo ne ye somvoɛ ne hɔle poentolɛ bo wɔ asaso. Na bia bɔ odi mu paa ne, ɔmaa bɛtenane so wɔ mmenia kɔyɛ aburasa bɔ bato asaa bafrɛ bɛ nemɔ anu.

²³Na Samuel sele sona bɔ ɔto aleɛ ne kyɛ, “Naen bɔ mva mane wɔ kyɛ ɛfa sie ne, fa bra.”

²⁴Na sona bɔ ɔto aleɛ ne pagyale naen ne sɔ ne, ɔne bɔ ɔboka so ne, na ɔfa siele Sɔɔlo nyunu. Na Samuel hane kyɛ, “Nea, naen bɔ yɛfa yɛsiele ne, yeɛ bafa basie wɔ nyunu ne. Di, ofikyɛ mva nziele berɛ mane wɔ, kyɛ odwu sɔ mmerɛ ye a, ɛne mmenia bɔ mato asaa mafrɛ bɛ ne kodidi.” Yiti Sɔɔlo ne Samuel tole asaa didili sɔ kyẽa ne.

²⁵Na befili asɔneyɛɛ so dɔ bedwu bɛwale kuro ne anu ne, bɛtole Sɔɔlo mba wɔ sua ne aso nzamsoɛ ne aso maa ɔlale.

²⁶Alebahyene ne, né Sɔɔlo wɔ nzamsoɛ ne aso. Na Samuel frɛle ye sele ye kyɛ, “Dwɔso ma nzoma wɔ ate ma ɛhɔ.” Sɔɔlo dwɔsole, na ɔne Samuel befitele dwaaso dɔ.

²⁷Na bɛ́torotoro bɛ́kɔ kuro ne tiwaa nen, Samuel sele Sɔɔlo kyɛ, “Ka kyire somvoɛ ne ma ɔɔse li yɛ nyunu moa. Na ɔse badi moa a, wɔ de gyina berɛ kãa ma nga Nyameɛ noa dwirɛ ngyire wɔ.”