Read Seimat Matiu 14 Bible Online

Matiu 14 - Seimat bible

Matiu 14

¹Lokon ien, Herod tel masiwi ti Galili hong tunahi menge Jises.

²I kakane teka masiwi laha pupuas hahitakan, “Ie se Jon Baptis i moih aliawen. Aile ape i hina poh ti ailei waliko tenen lalap ti seilon kum pon.”

³Ti imat, Herod talo teka unauan xinoti kalabusiai Jon. Herod tel i xuina Herodias, axoi tel ukalan Pilip.

⁴Aile ape Jon Baptis lawe i to kaakane Herod, “Kumahe wanen sawisawin o uke axoam Herodias!”

⁵Herod pahan i telei Jon, tuahe i mamata teka Ju nake laha ukek Jon i tel kuluiai kakai Haeu.

⁶Tehu ngain ti nameniai telao Herod takah, tel nati Herodias hehin denis hani teka seilon laha apupuha ti angiain. I hamuamua hawane Herod.

⁷Aile ape Herod kak tuoha hani i, “Waliko tenen na paham, nga hani o!”

⁸Ape i usi namili tel tinan i ukek, “Hanima nga pati Jon Baptis. Lohi hanima he tehu kapi!”

⁹Namili Herod sihikuk hawane tuahe i kak tuoha haniwen tel hehin ti puli lawe seilon ka i hani i waliko tenen na pahan.

¹⁰I talo tel unauan nahih hani ingi kalabus ti koti xaxaweniai kinawe Jon Baptis.

¹¹I hana pati Jon leili tehu kapi, i kau hani tel hehin ape i hani tel tinan.

¹²Imuh tesol kahikahi Jon nahima. Lato waxi mewenae tupuan ape tihini auni. Muhin lato nahih hone Jises. Jises axi ani 5,000 seilon

¹³Tataen ti Jises hong tunahiwa waliko ti i sohot hani Jon, i ku he tea koap ape i salili tesol ien hani tesol tahain. Teka seilon leili taon hongoa, laha nahih usi i.

¹⁴Ti Jises mosua he tea koap, i ningahi kilan wanen seilon. I tahane hawane laha ape i haewia teka tinun.

¹⁵Ti ape alohah, tesol kahikahi Jises nahih hani kapin, lato hone i, “Pate ape alohah a tap toan ie. Taloa teka seilon hani toan lehe laha kahui analaha.”

¹⁶Jises hone lato, “Kumahe, laha kum nahih salili kako. Amuto axiwa analaha.”

¹⁷Lato hone i, “I kum pon! Toi amite tepanimawe bret ma huok xixi.”

¹⁸Jises ukek, “Kau hanima nga.”

¹⁹I hone teka seilon to haniai he pahoah. I waxi tepanim bret ma huok xixi. I pax hani patul, i kak kemulik hani Haeu ape i wiki. I hani tesol kahikahin ape lato sei hani teka seilon.

²⁰Laha hatesol ang ahoi hawane. Ape huopanim huohu po moxe an tutuen ti tesol kahikahi Jises apuhiniwa.

²¹Mongohe seilon laha angiang sai 5,000, tai wexe teka hehin ma akaik. Jises nanahih patul he kanitax

²²Muhin Jises hone tesol kahikahin langai imat tetan hani liai tepaun ti kanitax Galili he koap. Ape i talo aliake teka kilai seilon.

²³Mewenae i nahih hani patul he tehu maunten ape i lotu. Ti ape alohah, Jises mewenae i tutuen.

²⁴Lokon ien tea koap ape i xauwen. Laman hapa ahuahu tea koap nake aupol ah suei i.

²⁵Sikole letu ti teik tilokoan tutuen, Jises nahiwa patul he kanitax hani kapi tesol kahikahin.

²⁶Ti tesol kahikahin ningahiwa i nanahih patul he kanitax, lato mamata hawane ape lato tilol ausisini, “Tel manu!”

²⁷Jises hone hamatua lato, “Haxoxoa namilomuto! Se nga. Kum maamata!”

²⁸Pita hone i, “Tel masiwi, na salan wanen o, honema nga nahih patul he kanitax hani kapim.”

²⁹Jises ukek, “Nahima!” Pita mos he tea koap ape i hutui nahih patul he kanitax hani kapi Jises.

³⁰Tuahe ti i ilameniwa kuiai aupol, i mamata ape lehe i taxix. I tilol ausini, “Tel masiwi, hualima nga!”

³¹Kiliwan wanen Jises tuliniwa minan, i akeni Pita ape i ukek, “Nake lahan namilom wakul alia tetak?”

³²Ti lalu ku haniwa he tea koap, aupol mat.

³³Tesol kahikahin he tea koap lokuha hani Jises. Lato ukek, “Salan wanen o tel Nati Haeu!” Jises haewia teka tinun ti texux xux Genesaret

³⁴Ti lato meiwa liai tepaun ti kanitax Galili, lato mos he tea koap hani Genesaret.

³⁵Ti teka seilon ti tesol ien paxai tioiwa Jises, laha sawateni kakain hani teka seilon leili lawe toan. Kilan seilon hakahita teka tinun hani kapin.

³⁶Laha kamei eliel i na ewi teka tinun tua soti ngixi puxuaun. Ape teka laha soti, laha ewi.