Read Seimat Matiu 27 Bible Online

Matiu 27 - Seimat bible

Matiu 27

¹Ti pate letu wanen teka masiwi tuah ti hukuminiai Haeu ma seilon, ma teka masiwi liai ti teka Ju, lato aile ngah namil ti sale teleiai Jises.

²Lato hone teka unaualato xinotian ape laha ati i hani kapi Pailat, tel ti teka masiwi ti Rom. Sale matei Judas

³Ti Judas, tel i hangaini Jises, upia tunahiwa ka teka masiwi ti teka Ju sului Jises waxi laha telei, i towiahu namilon ape i kau atoheni aliake tesol 30 moni silva hani laha.

⁴Ape i ukek, “Nga aile hawane saun lialun nake nga hangaini tel seilon tenen tap teik waliko lialun na i ailewen ape lehe amuto telei.” Lato pahoi i ukek, “Kalahai lehe amite nam waxi? Ien soxiam.”

⁵Judas towi lioiwa tesol moni leili tehu Ingi Haeu ape i nahih hakea telei aliake i.

⁶Tesol masiwi waxiwa tesol moni ien ape lato ukek, “Ie se moni ti i kahuiwen teleiai tel seilon. Lialun na kako hana hani kapi moni ti Ingi Haeu.”

⁷Imuh lato xinoti tenen namil ukek lato hapuasa teik moni ien kahuiai teik pekeun ti teka seilon laha tanomi salek. Tesol ien lato hani tihiniai seilon ti xux liai.

⁸Hanima aope seilon axai teik pekeun Pekeun ti Kaka nake kahuan teik moni ti kahi teleiai seilon.

⁹Aile ape waliko ti Jeremaia tel kuluiai kakai Haeu kakawen sale Jises i sohot poponowi. I ukek,“Laha uke tesol 30 moni silva, lapan ti teka seilon ti Israel kolongeniwen kahi teleian.

¹⁰Ape laha hapuasa tesol moni ien kahuiai teik pekeun ti teka seilon laha tanomi salek, masin ti tel Masiwi honewen nga.” (Jer 32:6-9) Jises tu mate Pailat

¹¹Jises tutu mate Pailat ape Pailat kamei i ukek, “Nakon o se tel masiwi tapein ti teka Ju?” Ape Jises pahoi i ukek, “Se, masin ti o kakawen.”

¹²Tuahe ti teka masiwi tuah ti hukuminiai Haeu ma seilon, ma teka masiwi liai ti teka Ju kak hohokai i, Jises tai wix pahoi.

¹³Ape Pailat hone i ukek, “Nakon o hongohong hatesol waliko ti laha kak susului o?”

¹⁴Tuahe tap tenen na Jises kakawen, aile ape Pailat pate i ongaini. Laha eliel tahi hakeai Jises

¹⁵Leili taun ti Pasova, tehu angiain lalap ti nameniai ngain ti Haeu waxi aliake teka Ju ti Igip, saun ti tel masiwi Pailat i ahuti tel ti teka kalabus, tel ti na teka seilon pahalaha.

¹⁶Ti lokon ien tel seilon leili kalabus axan Barabas, axan lalap wanen ti ailei waliko lialun.

¹⁷Ti teka kilai seilon apuhawa, Pailat kamei laha, “Pahamuto nga ahuti hani amuto Barabas ka Jises, tel laha ukek Krais?”

¹⁸Puki i tioi hawane ka teka masiwi ti teka Ju atoheni Jises hani kapin nake lato watakai kilan seilon sameni i.

¹⁹Lokon ti Pailat hong papaxai kakain, tel axoan hakau hani i teik kakain i ukek, “Kum aile hahalialu tel seilon ien. Tap tenen waliko lialun na i ailewen. Ipong tehu tamusuen, nga tunahi paxangongo tenen lialun wanen sale tel seilon ien.”

²⁰Tin lokon ien, teka masiwi tuah ti hukuminiai Haeu ma seilon, ma teka masiwi liai ti teka Ju hahika teka seilon kameiai Pailat ti ahutiai Barabas ma teleiai Jises.

²¹Tuahe Pailat kamei ulei teka seilon, “Pahamuto nga ahuti hani amuto aita?” Ape laha pahoi i ukek, “Barabas!”

²²Pailat kamei laha, “Ape nga aile la hani Jises tel laha ukek Krais?” Laha hatesol pahoi i ukek, “Teleiwa i! Tahi hakeawa i he kros!”

²³Ape Pailat kamei laha i ukek, “Nake lahan? Waliko la lialun na i ailewen?” Tuahe laha tilol eliel hawane ukek, “Tahi hakeawa i he kros!”

²⁴Ti Pailat paxaiwa ka laha kum hong waxi i, ma tehu lape hile uke i sohot wasole teka seilon, i waxi kan ape nuhi minan he pulalaha. I ukek, “Tap teik kawatan tetak ti sale matei tel seilon ie, ien se waliko ti amuto!”

²⁵Laha hatesol pahoi i ukek, “Hanima amite ma natumite kaui kawatan ti matean!”

²⁶Ape salan, Pailat ahuti hani laha Barabas ape i hone teka unauan hetiai Jises. Imuh i hani laha tahi hakeai Jises he kros. Teka seilon ti hile soxeni Jises

²⁷Imuh teka unaui Pailat ti hile ati Jises hani leili tehu ingi Pailat ape lato tiloi tesol tuaulato.

²⁸Lato xaxaweni puxuaun ape puxui i tehu puxux weluwelun kakai ati polun.

²⁹Lato alingini ngaxe au ape nihini hana hani he patun. Lato waxi teik pata ape hana hani he tepaun minan manau aile hanowi i tel masiwi. Lato lokuha hanowi ka lato lotui i. Lato ukek, “Tel masiwi tapein ti teka Ju tap tahi mateam!”

³⁰Lato pukeini i ape waxi teik pata he minan ape lato xai patun.

³¹Ti lato heisawa soxenian, lato naxi xaxaweni tehu puxux weluwelun ape puxui aliake i puxuaun. Lato ati i hani tesol ti lehe lato tahi hakea i hani he kros. Tahi hakeai Jises he kros pata

³²Ti lato nanahiwa, lato apatuini tel seilon ti Sairini axan Saimon ape teka seilon ti hile lungei i kaui teik kros ti Jises kakau.

³³Lato tahia hani tesol axan Golgota. Teik kakain ien ukek, “Tetesol tanoman masin kui pati seilon.”

³⁴Ti ien lato axi unumi Jises waen tenen maxaian ti hamongai moloan. Ti i namihini laliwa ape i kum unumi.

³⁵Lato tahi hakea i hani he teik kros pata ape lato halokeni satu ti upiai tetel i uke tetenen ia ti tesol sose Jises.

³⁶Muhin lato to paxai peteni i.

³⁷Teik kakain ti suluian lato tahi hahakea onote patun i kak ukek, “Ie se Jises, tel Masiwi Tapein ti teka Ju.”

³⁸Imuh lato tahi hakea hua seilon lialun xohixohin kapi Jises, tel papan sai manau ape tel sai kalamau.

³⁹Teka seilon ti laha nahiwa nahima laha tohutohuini patulaha ape laha kak soxeni Jises,

⁴⁰“O ukek o toi hamanana tehu Ingi Haeu ape o atai aliake leili ngain toluhu! Na masin o tel Nati Haeu, huali aliakewa o ape mosulih ti he teik kros ien!”

⁴¹Teka masiwi tuah ti hukuminiai Haeu ma seilon, teka hanaui nauna ti Moses ma teka masiwi liai ti teka Ju, tin laha kak soxeni i ukek,

⁴²“I huali seilon liai tuahe i kum pon huali aliakean! Nakon i tel masiwi tapein ti teka Israel? Na masin i mos ti he teik kros aope, kako soh tetan!

⁴³Na masin namilon xoxoan ti Haeu ma salan ka i Natun, kako paxaimu na Haeu pahan i huali i aope!”

⁴⁴Huhua lalu akeak kapi Jises, tin lalu kak soxeni i. Matei Jises

⁴⁵Ti lape ngain, hatehu xux i tilok ti leili aua toluhu.

⁴⁶Ti 3 kilok alohah, Jises tilol eliel hawane, “Eloi, Eloi, lama sabatani?” Teik kakain ien i ukek, “Haeu tetak, Haeu tetak, nakon lahan o lioi hawane nga?” (Ps 22:1)

⁴⁷Teka seilon ti laha tutu ien laha hong ape laha ukek, “I titiloi Elaija!”

⁴⁸Tel ti lato kiliwawa ape waxi teik maia. I xomi hani waen wangingian ape i hana hani tumi teik pata. I tulini hani he awe Jises lehe waxi i sumuxi.

⁴⁹Tuahe tesol liai ukek, “Nutomu, kako paxaimu na Elaija luainima hualian!”

⁵⁰Jises ausini eliel hawane ape i mat.

⁵¹Tataen ien wanen Haeu lexi teik maia i akeak leili tehu Ingi Haeu, ti patul hani taen itan. Xux nuea ape pot lalap takel.

⁵²Amal hea ape teka kilai seilon ti Haeu laha matewen laha xahat alia.

⁵³Laha salili amal ape muhin ti Jises xahat aliawa ti matean, laha soh hani Jerusalem ape kilan seilon ningahi laha.

⁵⁴Lokon ien, tel masiwi ti teka seilon ti hile ma tesol unauan to paxai pepeteni Jises. Ti lato ningahiwa xux i nuea ma hatesol waliko ti i sosohot, lato mamata hawane ape lato ukek, “Salan wanen i Nati Haeu!”

⁵⁵Kilan hehin laha tu siasia papaxai waliko ti i sosohot. Lato kahitima Jises Galili ngahatian.

⁵⁶Leilolato se Mary Magdalen, Mary tel tini Jeims ma Joses ma tel tini Jeims ma Jon tetel axoi Sebedi. Tihiniai Jises

⁵⁷Ti ape alohah, Josep tel seilon kilan wanen soxi, i nahih hani kapi Pailat. I ti tehu taon axan Arimatea ma tel ti teka kahikahi Jises.

⁵⁸I kamei Pailat na i waxi auni tupui Jises. Ape Pailat hone teka unauan haniai Josep tupui Jises.

⁵⁹Ti Josep waxiwa, i puxui talini i teik maia haun weluwelun.

⁶⁰I hana tupui Jises hani leili tehu amal, kemuk teka unauan tanomi he pot patul ti hepekeun. Muhin i hulini tehu pot lalap tiehiai tewau wal ti tesol amal ape i nahih.

⁶¹Mary Magdalen ma tel Mary liai, lalu toto onote tesol amal papaxai waliko ti i sosohot. Teka unaui Pailat peteni amal

⁶²Ti ngain liai telao, tehu ngain ti Sabat, teka Parisi ma teka masiwi tuah ti hukuminiai Haeu ma seilon, lato apuha hani kapi Pailat.

⁶³Ape lato ukek, “Amite nameni ka ti lokon tel seilon ti puputa i moihin tutuen i kak ukek, ‘Nga xahat alia muhi ngain toluhu.’

⁶⁴Amite kamei o honei teka unauam ti peteni aluiniai amali Jises leili ngain toluhu, lehe teka kahikahin kum pon xuinai tupuan ape lato kum hone teka seilon ka i xahat aliawen. Tehu puputa ie i pamu lialuan, i xoini tehu imat ti i ukek i Krais.”

⁶⁵Pailat hone lato ukek, “Waxiwa teka unauak ape peteni aluini hawanewa amali Jises.”

⁶⁶Ape salan, lato nahih hana ngah kikilam he tehu pot lehe lato tioi na hina seilon tohongi lali laha soh. Ape teka unaui Pailat to paxai peteni.