Read Seimat Matiu 4 Bible Online

Matiu 4 - Seimat bible

Matiu 4

¹Muhin Holi Spirit kapiti Jises hani he lohong lehe Satan tohongi haputaian.

²Jises tai angiang leili 40 ngain ma ipong ape pate i hitol.

³Satan nahih hani kapin ape i ukek, “Na o tel Nati Haeu, kolitiniwa tesol pot ie haniwa bret.”

⁴Jises pahoi i, “Leili pepai Haeu i kak ukek,“ ‘Seilon ala i hana hatapo namilon hani kakai Haeu kumahe an.’ ” (Deut 8:3)

⁵Muhin Satan hakahita Jises hani Jerusalem ape hatuhi i he teik tumi Ingi Haeu patul wanen.

⁶Ape Satan kakane i, “Na masin salan o tel Nati Haeu, tautit haniwa itan. Ti leili pepai Haeu i kak ukek,“ ‘Haeu talo tesol engelaun tengeni awaiam he minalato lehe kalak taen aem pot kum hamange.’ ” (Ps 91:11-12)

⁷Jises hone i, “Leili pepai Haeu tin i kak ukek, ‘Kum totohongi Haeu tel Masiwi.’ ” (Deut 6:16)

⁸Satan hakahita ulei Jises hani tehu maunten patul wanen ape kola hani i hatesol xux ma soliai waliko ti tehu pon itan ie.

⁹Satan hone Jises, “Hatesol waliko ie nga hani tetam na o lokuha lotui nga.”

¹⁰Jises kak pahoi i, “Nahih xaxaua Satan! Teik pepai Haeu i kak ukek,“ ‘Lotuiwa mewenae Haeu tel Masiwi ma ailewa mewenae puasan.’ ” (Deut 6:13)

¹¹Ape Satan nahih salili Jises. Teka engel ti Haeu tahia hani kapi Jises ape lato ngahati i. Jises hutui puasan leili Galili

¹²Ti Jises hongoa ka Jon kalabusawen, i nahih alia hani texux xux Galili.

¹³I salili Nasaret ape aile tonan Kapenaum, tehu taon xohixohin ti kanitax Galili ma xuxi teka Sebulun ma Naptali.

¹⁴Waliko ie sohot haponowiai kakai Aisaia, masin ti i kakawen,

¹⁵“Teka seilon ti xux ti Sebulun ma Naptali, xux ti pahoiwa kanitax Galili, pape kan Jodan, tewaok ti Galili ti teka kumahe Ju totonai,laha toto he tilokoan ti saun lialun tuahe laha po tunahi lalape xewai Haeu.Laha toto he tilokoan ti matemate tuahe xewai Haeu po haxewa laha.” (Isa 9:1-2)

¹⁷Lokon ien Jises hutui pupuasan ti sawateniai kakai Haeu i ukek, “Amuto towiahua ti lialui woumuto nake xohiwen ti Haeu neini hatesol seilon.” Jises tike waxaini seilon hani kahikahin

¹⁸Ti Jises tau nanahih pape kanitax Galili, i ningahi hua seilon ti tikei xixi, Saimon Pita ma tel ukalan Andru. Lalu totowi upen puliai xixi.

¹⁹Jises hone lalu, “Kahitima nga lehe nga hanau amulu tike waxainiai seilon hani kahikahik.”

²⁰Kakanua lalu hana lioi upen ape kahiti i.

²¹Jises nahih ahewa ape i ningahi hahutalin liai, Jeims ma Jon, nati Sebedi. Lalu he tea koap kapi tel tamalalu apepeseni upenaulato. Ape Jises tiloi lalu.

²²Ape salan, lalu nahih salili tea koap ma tel tamalalu ape kahiti i. Jises kakaxi meng solian ti Haeu ma i haewia teka tinun

²³Jises nahih hani tesol tesol ti Galili hahanau teka seilon leili synagog, ing ti apuhai teka Ju. I kakaxi meng solian ti Haeu neini seilon ape i aile hasolia teka hina nax tenen tenen.

²⁴Menge waliko ti i ailele i sawat kakalini hatexux xux ti Siria. Ape teka seilon atoheni hani i hatesol teka tinun, teka hina moloan lalap, seilon teka spirit lialun kapiti hahalialu, teka lawe laha put xexex ma teka laha kum nahih uke. Jises aile haewia laha.

²⁵Kilan wanen seilon kakahiti i, teka ti Galili, seilon ti huopanim taon axan Dekapolis, Jerusalem, Judia ma teka ti liai tepaun ti tehu kan Jodan.