Read Seimat Luk 3 Bible Online

Luk 3 - Seimat bible

Luk 3

¹Leili ahang 15 ti Taiberius masiwi tapein ti Rom, Pontius Pailat i masiwi ti Judia, Herod Antipas i masiwi ti Galili, tel ukalan Pilip i masiwi ti Iturea ma Trakonitis ape Lisanias i masiwi ti Abilene.

²Anas ma Kaiapas lalu hauhua masiwi tapein ti hukuminiai Haeu ma seilon. Lokon ien Jon tel nati Sakaraia toto he lohong. Haeu hani i kakaian lehe i kaxi ahuti hani teka seilon.

³Ape Jon nahih hani tesol tesol ti pape kan Jodan. I kaxi hani teka seilon ka laha uke baptais na laha towiahu ti lialui woulaha hani Haeu lehe i oxoxi laha ti kawatan ti saun lialun ti laha.

⁴I seilon tetel Aisaia tel kuluiai kakai Haeu kakaxi ti kuewen, i ukek,“I titilol he lohong,‘Towiahua ti lialui woumuto lehe tel Masiwi neini amuto taen i tahiama!

⁵Towiahu haniwa Haeu ma teheniwa amuto lehe i kapiti hasolia amuto!Hasawiwa namilomuto ti hasoliai wasolamuto ma Haeu hanowi ti laha taneni aweisal suxasuxan lehe nanahihi soli.

⁶Ape lawe seilon paxai tioi sale Haeu awai laha ti kawatan ti lialui woulaha.’ ” (Isa 40:3-5) Ie tiliai kakai Aisaia ti i kak kilami sale Jon.

⁷Ti kilai seilon nahih haniwa kapi Jon lehe i baptaisi laha, i hone teka woinakon pahalaha lehe laha towiahu ti lialui woulaha, “Amuto lehomuto huoka! Aita hone amuto ka amuto salia uke ti kawatan ti na Haeu hani amuto?

⁸Ailewa saun tenen ti i kola ka amuto lioiwen saun lialun. Kum ukekek ka amuto salia uke ti kaui kawatan nake amuto nakuama ti Abraham. Nga kakane amuto, Haeu pon kolitiniai tesol pot ie hani kahi nati Abraham!

⁹Haeu apeseniwen tea ngolapung. Pata tenen i kum hua alua, i koti hamahusu ape i towi lui hani leili ah.”

¹⁰Teka seilon kamei i, “Ape amite aile la?”

¹¹I pahoi laha ukek, “Teka ti amuto na puxuaumuto huohu, tehu haniwa tel na i tap wanen ape na amuto hina an, sei axiwa teka laha hihitol.”

¹²Tataen teka seilon ti waxiai moni ti teka Ju hani teka masiwi ti Rom, tin laha nahima lehe Jon baptaisi laha. Ape laha kamei i, “Tel masiwi, amite aile la lehe amite salia ti kawatan ti Haeu?”

¹³I hone lato, “Kum pupuluti teka seilon. Kum waxi hahasea moni lapan ti teka masiwi kilamiwen.”

¹⁴Ape teka seilon ti hile tin laha kamei i, “A amite ape lahan? Amite aile la?” I hone aliake lato, “Kum lulungei seilon waxiai moniulaha. Kum hahamatau laha ka amuto aile halialu laha ma na amuto sului laha na laha kum hani amuto moni. Amukewa lape kahumuto ti amuto kewen.”

¹⁵Jon tioi ka kilan ti teka Ju laha to monomon atengiai Krais, laha sokok ka i uke tetel Krais Haeu taloma.

¹⁶Ape Jon kakane laha, “Nga baptaisi amuto ani kan tuahe tel i luluainima muhik, taen i baptaisi amuto i hani amuto Holi Spirit ti kapitiamuto. I pamu masiwian tetak. Masiwiaian ala i kum pon nga unauan.

¹⁷I hiniti seilon masin tel na i hapuasa nuhinuh ti i selai api ti penun. I apuhini api wanen ape i lui xoini penun.”

¹⁸Jon hapuasa kakain tenen tenen ti kaxi haxewai meng solian ti Jises Krais hani teka seilon ape i kak eliel ka laha hong tamaniwa kakai Haeu.

¹⁹Tin i kak nanami Herod tel masiwi ti Galili nake i waxi axoan Herodias, axoi tel ukalan, ma i aile hakilawen saun lialun.

²⁰Muhin Herod aile ulea tenen saun lialun, i hana Jon hani kalabus. Jon baptaisi Jises

²¹Ngain tehu ti Jon baptaisi teka seilon, tin i baptaisi hetekie Jises. Leilon ti Jises lolotu, maun hea.

²²Lokon ien Holi Spirit mos hani kapin hanowi tok pux. Ape tenen kinax wixima ti tone Haeu i ukek, “O se Natuk pate nga waheni, nga amuke hawane o.” Teka matahaun ti Jises

²³Ti Jises hutui ailei puasain tenen Haeu kilamiwen i ailean, ahangun sai 30. Jises nati Josep. Ti Jises he tehu pon ie teka seilon namiloi ukek ka i tel nati Josep. Josep tel nati Heli.

²⁴Heli nati Matat. Matat nati Livai. Livai nati Melki. Melki nati Janai. Janai nati Josep.

²⁵Josep nati Matatias. Matatias nati Amos. Amos nati Nahum. Nahum nati Esli. Esli nati Nagai.

²⁶Nagai nati Maat. Maat nati Matatias. Matatias nati Semein. Semein nati Josek. Josek nati Joda.

²⁷Joda nati Joanan. Joanan nati Resa. Resa nati Serubabel. Serubabel nati Sealtiel. Sealtiel nati Neri.

²⁸Neri nati Melki. Melki nati Adi. Adi nati Kosam. Kosam nati Elmadam. Elmadam nati Er.

²⁹Er nati Josua. Josua nati Elieser. Elieser nati Jorim. Jorim nati Matat. Matat nati Livai.

³⁰Livai nati Simeon. Simeon nati Juda. Juda nati Josep. Josep nati Jonam. Jonam nati Eliakim.

³¹Eliakim nati Melea. Melea nati Mena. Mena nati Matata. Matata nati Natan. Natan nati David.

³²David nati Jesi. Jesi nati Obed. Obed nati Boas. Boas nati Salmon. Salmon nati Nason.

³³Nason nati Aminadab. Aminadab nati Ram. Ram nati Hesron. Hesron nati Peres. Peres nati Juda.

³⁴Juda nati Jekop. Jekop nati Aisak. Aisak nati Abraham. Abraham nati Tera. Tera nati Nahor.

³⁵Nahor nati Serug. Serug nati Reu. Reu nati Peleg. Peleg nati Eber. Eber nati Sela.

³⁶Sela nati Kainan. Kainan nati Arpakad. Arpakad nati Sem. Sem nati Noa. Noa nati Lamek.

³⁷Lamek nati Metusela. Metusela nati Enok. Enok nati Jared. Jared nati Mahalalel. Mahalalel nati Kenan.

³⁸Kenan nati Enos. Enos nati Set. Set nati Adam ape Adam nati Haeu.