Read Seimat Jon 21 Bible Online

Jon 21 - Seimat bible

Jon 21

¹Muhin ien Jises take ulea hani tesol kahikahin. I sohot ukek.

²Lokon ien tepanim hua ti lato pape kanitax Galili, axan liai tenen Taibirias. Lato tetesol ien se Saimon Pita, Tomas tel laha axai Sangasang, Nataniel tel ti Kana ti Galili, hua nati Sebedi ma hua kahikahi Jises liai.

³Saimon Pita kakane tesol liai, “Nga lua teletel xixi.” Lato ukek, “Amite mahoi o.” Ape lato ku hani he tea koap tuahe lato tai tiuk xixi ipong hatehu.

⁴Ti i ninitinile, Jises tutu ngixi peixux tuahe tesol kahikahin kum ila tioi i.

⁵Ape i tilol hani lato, “Tesol teleiai xixi, amuto tai tiuk na tok, kewak?” Lato ukek, “Tap wanen!”

⁶I kakane lato, “Towi uleawa tehu upenaumuto haniwa tepaun sai manau ti tea koap lehe amuto tiuk.” Lato towi haputa tehu upen ape lato kum tei aliake uke nake kilan wanen xixi lato puliwen.

⁷Tel kahikahi Jises lohun xoxoan hone Pita, “I se Jises tel Masiwi!” Ti Pita hongoa ka se tel Masiwi, i talini xioti luhuan tehu puxuaun ape i tautit hani itax.

⁸Tesol kahikahi Jises liai xoxei ititini tehu upen xuhai xixi hani peixux. Lato kumahe pate xauxaun, xawaian sai 100 mita.

⁹Ti lato mos haniwa peixux, lato ningahi xixi patul he ah tenen tuahe nawal. Tin hina bret ien.

¹⁰Ape Jises hone lato, “Kau ngahoma xixi ti amuto tikewen.”

¹¹Saimon Pita nahih hani he tea koap ape itini xaheni tehu upen xuhai 153 xixi hani peixux. Kalak xixi pate kilan ma lalap, upen tai watat.

¹²Jises hone lato, “Nahima ang.” Tap tel ti tesol kahikahin kameawen ka i aita nake lato tioi i se tel Masiwi ti lato.

¹³Jises waxi bret ma xixi ape hani lato ani.

¹⁴Ie se ape he toluhu ti Jises take hani tesol kahikahin muhin ti i moih aliawa ti matean. Jises kamei Pita

¹⁵Ti lato ang kewa, Jises kamei Saimon Pita ukek, “Saimon tel nati Jon, nakon wawahen tetam hani nga pamu i xoini wawahen tetam hani lawe waliko liai?” I pahoi ukek, “A se. Tel Masiwi, o tioi nga waheni o.” Jises kakane i, “Ngahati aluiniwa teka kahikahik masin ti tel ngahatiai sipsip.”

¹⁶Jises kamei ulea, “Saimon tel nati Jon, nakon o waheni hawane nga?” I pahoi ukek, “A se. Tel Masiwi, o tioi nga waheni hawane o.” Ape Jises ukek, “Ngahati aluiniwa teka kahikahik masin ti tel ngahatiai sipsip.”

¹⁷Jises kamei i he toluhu i ukek, “Saimon tel nati Jon, nakon o waheni nga?” Saimon Pita tian i kawat nake Jises kamei i uke he toluhu sale wawahen tetan hani i. Ape i ukek, “Tel Masiwi, o tioi lawe waliko. O tioi ka nga waheni hawane o.” Jises hone i, “Ngahati aluiniwa teka kahikahik masin ti tel ngahatiai sipsip.

¹⁸Nga kakane hawane o, lokon ti o uluha, lawe o aile waliko ti paham ma lawe o nahih hani tesol ti paham. Tuahe ti na o salaimatawa, teka liai waxi o hani tesol ti kumahe paham.”

¹⁹Jises kak ukek ien kilamiai sale matei Pita. Matean i haxawa hawane Haeu. Ape Jises hone i, “Tu xox tatalewa tel kahikahik!” Jises ma tel kahikahin lohun xoxoan

²⁰Ti Jises ma Pita tau nanahih, Pita tohea ape ningahi tel kahikahi Jises liai lohun xoxoan, kakahiti lalu. I tetel i to papalahah hani patanawe Jises lokon ti lato ang tehu angiain ti Pasova ape i kamea, “Tel Masiwi, aita ti amite tel hangainiam hani mini teka seilon teleiam?”

²¹Ti Pita ningahiwa tel i kakahiti lalu, i kamei Jises, “A tel io, waliko la na i sohot hani i?”

²²Jises pahoi ukek, “Sohin uke pahak i moihin tutuen atengi taen nga aliama. O kum namiloi hahakila tenen ien. A o, tu xox tatalewa tel kahikahik.”

²³Ti nake ien, kakain sawata wasole teka kahikahi Jises ka tel kahikahin lohun xoxoan i kum mat. Tuahe Jises tai kak ukek ien. I tua ukek, “Sohin uke pahak i moihin tutuen atengi taen nga aliama. O kum namiloi hahakila tenen ien.” Tiliai kakai Jon

²⁴Tel kahikahi Jises lohun xoxoan i se tetel i ningahiwen ma tai kakaxi tesol waliko ie. Ape amite teka kahikahi Jises tioi ka waliko ti i kakak salan wanen.

²⁵Kilan wanen waliko liai tutuen ti Jises ailewen. Na masin pahalaha tai kongini hatapo tesol waliko ien, nga kum ukek ka hatehu pon ie i tapai tone hatesol pepa ti sale Jises.