Read Seimat Rom 9 Bible Online

Rom 9 - Seimat bible

Rom 9

¹Nga kaxi hahawane kakain salan. Nga se kahikahi Krais, nga kum puluti wanen amuto. Namilok xoxoan wanen ka waliko ti nga kakak salan nake Holi Spirit pupuas leilok.

²Tiak kawatan wanen. Nga toto leili tatahan.

³Nga tahane hawane teka Israel. Laha se teka akikik Ju. Na ala i tapai laha soh ti Jises Krais, nga kum nomuha na Haeu kak sai nga ape nga selaia ti Krais.

⁴Se teteka Israel, Haeu kilami seilon tetan ma i paxai ukek laha se natun. I lawe kapi laha lokon ti teik xewai maun neneini laha he lohong. I xinoti kakain kapi laha ma hani laha nauna ti usian. I kola hani laha sale usiai saun ti lotuian ma laha se tin teteka Haeu kakawen i hani laha kilan waliko solian.

⁵Abraham, Aisak ma Jekob lato se teka matahaun ti laha a Krais i tin tel Ju ti i sohot seilon hanowi kaha. I se Haeu, Masiwi ti lawe waliko. Hoi liai kaha haxawa hawanewa axan lian tehue. Salan wanen. Haeu pon aile usiai tenen ti pahan

⁶Tuahe kilan teka Ju laha kum soh ti Jises Krais. Kalak masin ien, kumahe ka waliko solian ti Haeu kakawen i aile hani Abraham ma teka nakuama tetan i kum sohot poponowi. Salangawan masin. Kumahe hatesol teka laha nakuama ti Abraham laha nati Haeu wanen.

⁷Tin masin kumahe hatesol teka kahi nati Abraham Haeu namiloi ukek laha se nati Abraham. Ien se salan nake Haeu kakanewen Abraham ka mewenae teka laha nakuama ti tel natun Aisak se nati Abraham wanen.

⁸Haxewa ahekean masin. Kumahe ka seilon se nati Haeu nake i kahi nati Abraham. Mewenae teteka kahi natun ti Haeu kakawen ka liai laha takah, i namiloi ukek laha nati Abraham wanen.

⁹Kako tioi ka Haeu kakane Abraham ukek, “Ahang tehu toma, taun tin tetehu, Sara hatakaha tel akaik wawan usiwa namilok.” (Gen 18:10)

¹⁰Tel akaik ien i se Aisak tel matahaun ti kako. I axoan Rebeka tetel i hanatuale huhua akaik wawan sangasang, Jekop ma Iso.

¹¹Imat ti lalu takah, hoi liai Haeu kakanewen Rebeka ukek, “Tel pamu i hahitake tel komuh.” (Gen 25:23) I aile ukek ien ti puki namilon kumahe ti paxai kolongeniai woulalu. Namilon ti i aile kumahe i ahuma ti soliai puasalalu. I kola ka Haeu kilami seilon ti na pahan i kilami.

¹³Masin ti leili pepai Haeu i ukek, “Nga kilami Jekop. Teka seilon tetak nakua ahuma tetan. Kumahe pahak Iso.” (Mal 1:2-3)

¹⁴Kaie kako kak ukek ia? Nakon kolongenian ti Haeu kumahe sawisawin ti kilamiai seilon? Tap wanen.

¹⁵Masin ti Haeu kakanewen Moses i ukek,“Nga aile kola lalape soliaiak hani tuahe tel ti na pahak nga kola.Nga kola tatahan tetak hani teka seilon ti na pahak nga kola.” (Exod 33:19)

¹⁶Aile ape Haeu kilami seilon kumahe nake ti isiai pahalaha ma na haelielialaha ailei puasain. I aile ti lalape soliaian hani teka ti na pahan i aile.

¹⁷Namiloiwa waliko ti Haeu kakak leili pepaun. I kakane Fero, tel masiwi ti Igip ukek, “Nga aile o sohot tel masiwi lehe waxi nga kola kui pohek ti na nga puas ahuxai pupuasam ma tin seilon ti pon hatehu ie laha paxai tioi lalape axak.” (Exod 9:16)

¹⁸Ape kako paxaiwen ka Haeu aile kola soliaian hani teka ti na pahan i kola ma i aile hailaia pati teka ti na pahan i hailaia, seilon tetenen masin Fero.

¹⁹Tuahe teka ti amuto uke laha ukek, “Na masin ien, alahan ka Haeu tieni kaha? Na Haeu pahan ailei tenen na waliko, aita tel pon konginian?”

²⁰Kum kak ukekek ien. Amuto aita lehe amuto kak papahoi Haeu? Kaie waliko ti i tanomawen kamei tel tanomian ukek, “Alahan o tanomi nga ukek ie?” (Isa 29:16, 45:9)

²¹Na tel hehin hapuasa kaini ailei po, i tetel i namiloi na i aile po wanen ma na poxawaha.

²²Tin masin Haeu, pon hawane i kola lengean ma pohen hani teka laha pahoxai i, ma tin pon hawane i kola tatahan ti i paxai lilioi lialui woi seilon teteka ala i tapai hawane Haeu tua halialu tamusuke laha.

²³Tin pon hawane Haeu aile hasolia hani teka seilon ti pahan i kola lalape soliaian hani laha, teteka hoi i kilami peleiwen ka laha to kapin lian tehue.

²⁴Teka ien se tin kako, teka ti Haeu kilamiwen usiai aweisalun, kumahe mewenae teka Ju, tin hetekie teka kumahe Ju.

²⁵Masin ti Hosea tai kaxiwen ka Haeu ukek,“Teka seilon kumahe tetak, nga paxai ukek laha ape tetak.Nga waheni teteka ti imat nga kum amuke.” (Hos 2:23)

²⁶Tin i tai kakaxi,“Ti imat Haeu kakawen ka laha kumahe seilon tetan. Tuahe aope ie Haeu ukek,‘Nga tel pate pohen nga paxai tioi ka laha se natuk.’ ” (Hos 1:10)

²⁷Aisaia, tel kuluiai kakai Haeu kak eliel sale teka Israel ukek,“Kalak teka seilon ti Israel kilaialaha mongohuan puli hepekeun ti peixux, pate palai teteka Haeu awai.

²⁸I sohot ukek ien nake Haeu tel Masiwi liai i kahui koseni seilon ti tehu pon ie ti lialui woulaha masin ti i kakawen ka i aile.” (Isa 10:22-23)

²⁹Tin masin ti Aisaia kakawen imat i ukek,“Na Haeu tel Masiwi pate pohen tai hasalia palaiakaha teka ti kaui kawatan, ala kaha lialu tamus hanowi ti Haeu aile hani seilon ti Sodom ma Gomora.” (Isa 1:9) Teka Ju kum soh ka Jises se Krais

³⁰Kaie ape kako namiloi ukek ia? Teka kumahe Ju, wasolalaha hani kapi Haeu i sawi nake ti xoxoi namilolaha ti Jises Krais, kalak laha tai puas eliel ti hasawian.

³¹Tuahe teka Ju, kalak laha haeliel hawane ti usiai lawe saun ti laha, wasolalaha hani kapi Haeu i tai sawi.

³²Kaie lahan tenen ien? I tai sawi nake namilolaha xoxoan ti soliai pupuasalaha kumahe ti tenen aweisal Haeu haniwen laha. Laha ukek pate hienain na Krais mat he kros, aile ape laha kum soh ti Jises. Masin ka laha tanga he tehu kuku.

³³Masin ti pepai Haeu kakawen sale Jises Krais i ukek,“Nga hatuhi tehu kuku pate tuah leili Jerusalem. Tehu kuku ien laha tanga put.Tuahe teka seilon laha soh tetan tap wanen laha po namiloi tahane aliake.” (Isa 8:14, 28:16)