Read Seimat Hibru 1 Bible Online

Hibru 1 - Seimat bible

Hibru 1

¹Ti kuewen Haeu hapuasa teka kuluiai kakaian kakanei teka matahaun ti kaha. Taun telok telok lato hapuasa aweisal tenen tenen kakanealaha.

²Tuahe tetelok ti ngain tapeinan ti tehu pon itan ie, i hapuasa tel Natun kakaneakaha. Haeu kilami i tame lawe waliko. I hapuasa tel Natun tanomiai tehu pon ie ma lawe waliko ti heihon.

³Puki alia Jises hina lalape pohe Haeu ma soliaian. Lawe namilon, woun ma pupuasan kola hawane ka puki i se Haeu. Lawe waliko i soli hahamalum ti tuahe pohe kakaian. I tetel i mat awaiakaha ti kawatan ti lialui woukaha lehe kaha sohot seilon haun ti usiai nauna ti Haeu. Muhin i to sai manau ti Haeu tel pate pohen, tetesol totone Masiwi. Jises Krais pamu masiwian ti teka engel

⁴Aile ape Haeu hana i pamu masiwian ti teka engel. I hani Jises ax tenen pamu lapan ti axalato.

⁵Haeu tai kaakane tel na engel ukek, “O se Natuk. Nga kilamiwen o ailei puasain tuah.” (Ps 2:7) Tin Haeu tai kaakane tel na engel ukek,“Nga tel Tamam a o tel Natuk.” (2 Sam 7:14)

⁶Lokon ti Haeu taloma tel Natun pate tuah hani tehu pon ie i ukek,“Hatesol engel tetak haxawawa axan.” (Deut 32:43)

⁷Ti Haeu kakak sale teka engel i ukek,“Nga tanomi teka engel unauak. Nga hapuasa lato hanowi ti nga hapuasa aupol ma ah ailei waliko ti pahak.” (Ps 104:4)

⁸Tuahe ti Haeu kakane tel Natun i ukek,“O se Haeu, o tel Masiwi tapein lian tehue. Nenein tetam lawe pate sawisawin.

⁹O waheni lawe waliko solian ma watakai hatesol waliko lialun.Aile ape o tunahi amuam lalap ti nga tel Haeu tetam kilami o pamu masiwian ti teka tuaum.” (Ps 45:6-7)

¹⁰Tin i ukek,“Tel Masiwi, ti hutuiai lawe waliko o tanomi tehu pon itanape ti puki minam wanen o tanomi hatesol waliko patul.

¹¹Tesol waliko ien tapo tamus tuahe o hamalum kapita. Laha masin maia, aneso i wasa.

¹²O sohi laha hanowi na tel seilon sohi tehu puxuaun watata.Tuahe o tap tahi sohiaiam ma tap tahi mateam.” (Ps 102:25-27)

¹³Haeu tai kaakane tel na engel ukek,“Toma papak tepaun manau ti neiniai seilon atengi tataen nga hanawa teka seilon laha pahoxai o hani hahitakam.” (Ps 110:1)

¹⁴Teka engel se tuahe unaui Haeu. Laha se spirit solian Haeu talo hualiai teka seilon tetan, teteka Jises awai ti lawe waliko lialun lehe laha to kapi Haeu lian tehue.