Read Seimat Hahatakei Haeu 7 Bible Online

Hahatakei Haeu 7 - Seimat bible

Hahatakei Haeu 7

¹Muhin nga ningahi hinalo engel lato tu tapaiwen hinalosumun ti tehu pon ie. Lato kokongini hinalosol ahoi aupol lehe i kum ah hani xux, kanitax ma tea na pata.

²Haeu hani lato poh ti aile halialui xux ma kanitax. Tuahe tel engel liai i sohotuma sai angiha. I akekeni waliko ti hanai kikilam ti Haeu tel tap tahi matean. I tilol eliel hani tesol hinalo engel ukek,

³“Kum aile hahalialumu xux, kanitax ma na pata atengiwa taen amite hana kewa kikilam ti Haeu he kawe teka unauan.”

⁴Ape nga hong ka mongohe teteka seilon laha hina kikilam ti Haeu 144,000 seilon ti lawe nenex ti Israel.

⁵Teteka laha ahuma tehu nenex ti Juda 12,000 seilon, tehu ti Ruben 12,000, tehu ti Gad 12,000.

⁶Tehu nenex ti Aser 12,000 seilon, tehu ti Naptali 12,000, tehu ti Manase 12,000.

⁷Tehu nenex ti Simeon 12,000 seilon, tehu ti Livai 12,000, tehu ti Isaka 12,000.

⁸Tehu nenex ti Sebulun 12,000 seilon, tehu ti Josep 12,000 ma tehu ti Benjamin 12,000. Teka kilai seilon puxuaulaha papaxaxun a weluwelun

⁹Muhin nga ningahi teka kilai seilon mongohualaha kaha kum pon wexean. Laha ti lawe xux, nenex tehu tehu ma kakaialaha tenen tenen. Laha tutu mateiwai tetel Masiwi i toto he tehu totoan tuah ma totok sipsip uluha kapin. Puxuaulaha papaxaxun a weluwelun ma laha akekeni kai hatoh.

¹⁰Ape laha tilol eliel ukek,“Haeu tel Tamakaha, tetel i toto he tehu totoan tuah ma totok sipsip uluha kapin, lalu se awaiakaha.”

¹¹Hatesol engel laha tu kakalini tehu totoan tuah, tetesol 24 masiwi ma tetesol hinalo seilon. Laha lokuha lakua hani itan mateiwai tehu totoan tuah ien ape laha lotu sameni Haeu.

¹²Laha ukek,“Salan wanen. Kako sameniwa lalape pohe Haeu, anesoan ma kuin.Kako haxawawa axan ma kak kemulik haniwa i lian tehue. Salan wanen.”

¹³Ape tel ti tesol 24 masiwi kamei nga, “Aita tesol seilon ie puxuaulaha papaxaxun a weluwelun? Laha ahuma ia?”

¹⁴Nga pahoi ukek, “Tel masiwi, nga kum tioi, puki o tioi.” Ape i kakane nga, “Teteka seilon ie laha waxainiwen kaui kawatan lalap. Puxuaulaha papaxaxun nake ti matei tok sipsip uluha i nuhi hauniwen laha ti lialui woulaha.

¹⁵“Aile ape laha hahamalum kapi Haeu mate tehu totoan tuah tetan ape ngain ma ipong laha ailele puasan leili tehu Ingan.Ape ngangahat tetan i kalauhi laha.

¹⁶Tap hitolo ti tenen na waliko tunahi ulei laha. Kekei alon ma na waliko liai tin i kum keti laha.

¹⁷I sohot ukek ien nake totok sipsip uluha kapi Haeu i ngangahati ma neneini laha hani Haeumasin ti na kinawe seilon pate paxepaxen ape tel i neini laha hani tehu kan.Ape tatahan kum hatangi ulei laha nake Haeu xaxaweni hatapo lawe kawatan.”