Read Sembeleke Kini Pieke 20 Bible Online

Kini Pieke 20 - Sembeleke bible

Kini Pieke 20

¹Eipoloha꞉ma꞉ma꞉ta꞉ Ma꞉mote mina꞉pa꞉lao Keinanina꞉ ka꞉wa꞉ nanema꞉ tilao mo Keidese make Sia꞉e kenke yaapo tukikina꞉ pua pitiekeme.

²Kutupa ipikana꞉ma꞉ Kita kenke pa꞉ta꞉ pua hata꞉ Setata꞉ ipika꞉ beliki leekeme. Koto leeke handa mo Kita kenkena꞉ kini Abimelekema꞉ Setata꞉ hatuku ipiki pa꞉ta꞉ epena꞉ leekeme.

³Timba ma꞉nda꞉ta꞉ mo some pa꞉ta꞉ Koda꞉ma꞉ upama꞉ a꞉pa alota꞉ Nakana꞉ma꞉ do amba꞉ ma꞉nda꞉ma꞉ ma꞉la꞉ wanda꞉ mele ekina꞉ neke homilipikie leekeme.

⁴Pate Abimeleketa꞉ mo wanda꞉ teke pa꞉ta꞉ na epeeke ekina꞉ alota꞉ Tekehalio. I̱ta꞉ hokeeki ma꞉nda꞉ na poloma꞉ I̱ make yaka wanda꞉hali make hoeyalipikipe.

⁵Eipoloha꞉ma꞉ma꞉ta꞉ ipika꞉ ana꞉e leeke handa mo wanda꞉ma꞉ make homeke pi kone lea꞉me. Koto ekina꞉ I̱ma꞉ do hauta꞉ yaka honema꞉ tikitiki pieke handa dupiki hau pua꞉me. Kutupa I̱ma꞉ta꞉ hoke hau ma꞉nda꞉ na polome leekeme.

⁶Koda꞉ma꞉ upama꞉ hombo peaaso alota꞉ Ota꞉e. Nakana꞉ma꞉ tikitiki pieke handaa pi ekina꞉ nakana꞉ma꞉ I̱ pa꞉ta꞉ hoke hau pilipiki yeke nakana꞉ma꞉ mo wanda꞉ na wataalena꞉ loa꞉me.

⁷Koto ekina꞉ ameta꞉ mo wanda꞉ ipika꞉ haliki pa꞉ta꞉ paa hala꞉peke. Mo halita꞉ potopede hali halekena꞉ ipikana꞉ma꞉ nekena꞉ yeni peaya꞉ka꞉na꞉ta꞉ kota꞉ neke na homilipikie. Pate mo wanda꞉ pa na haleka꞉na꞉ta꞉ kota꞉ neke kinki pitoloma꞉ laa neke make naka꞉ wanda꞉hali make homilimikie leekeme.

⁸Da kelepeeketa꞉ Abimeleke ipika꞉ you haliweki wi la꞉ mepi pea mo piekeeki la haleeke handaa mo haliwekita꞉ paala꞉ma꞉ homemekeme.

⁹Kutupa Abimelekema꞉ Eipoloha꞉ma꞉ wi la꞉ mea alota꞉ Nakana꞉ma꞉ niki pa꞉ta꞉ dota꞉ ekipiki hau pea pelepe. Nakana꞉ma꞉ I̱ pa꞉ta꞉ make yaka kilu tombuao halo pa꞉ta꞉ do hoeyaapekeeki epena꞉ leke hauta꞉ I̱ma꞉ neke pa꞉ta꞉ ekipiki ata꞉ka꞉ poleke pelepe. Nakana꞉ma꞉ do I̱ pa꞉ta꞉ pele ekita꞉ ota꞉ ma꞉nda꞉ma꞉ na pea꞉peke hau peleme.

¹⁰Koto ekina꞉ ekipeke do hau pea pelepe leekeme.

¹¹Eipoloha꞉ma꞉ma꞉ hombo peaaso alota꞉ Yaka honema꞉ta꞉ do pate Koda꞉ paala꞉piki some ma꞉nda꞉ na halieke hone wia yaka wanda꞉ muluekema꞉ I̱ limikie hone ua꞉me.

¹²Pate mo wanda꞉ta꞉ ota꞉ yaka ana꞉e. Ipikita꞉ yaka apa꞉na꞉ waneke ya꞉la꞉pate ama꞉ homeke ta꞉ta꞉e. Kota꞉ I̱ma꞉ mea polome.

¹³Koto ekina꞉ Koda꞉ma꞉ I̱ yaka apa꞉na꞉ da mina꞉pa꞉lao ma꞉nda꞉na꞉ kenke pa꞉ta꞉ pu leeke puluta꞉ I̱ma꞉ mo wanda꞉ pa꞉ta꞉ alota꞉ Nakana꞉ma꞉ I̱ oto pa꞉ta꞉ haleeki walolo hata꞉ paeyao pa꞉ta꞉ I̱ta꞉ naka꞉ ana꞉e lapeke laa loa꞉me leekeme.

¹⁴Kutupa Abimelekema꞉ Setata꞉ Eipoloha꞉ma꞉ paa halolo hata꞉ make homeke dina꞉ koneta꞉ sipisipimanu make kaomanu make pa hameke e pokaasa꞉ wanda꞉hali make apa꞉tao haleekeme.

¹⁵Ipikana꞉ma꞉ Eipoloha꞉ma꞉ pa꞉ta꞉ alota꞉ Dota꞉ yaka kenkema꞉ naka꞉ hone pa꞉la꞉ alena꞉ hae leekeme.

¹⁶Kutupa Seta pa꞉ta꞉ alota꞉ Mo neke ame̱le̱ haleme wanda꞉halima꞉ neketa꞉ hokeeki na ula꞉me laa waloelena꞉ make hokeeki ma꞉nda꞉ na peleme hone wina꞉ I̱ma꞉ naka꞉ ana꞉ pa꞉ta꞉ mo silipa manimanu 1 daoseni do halolo handa꞉e leekeme.

¹⁷Kutupa mo Eipoloha꞉ma꞉na꞉ weteke Seta pa꞉ta꞉ pieke ekina꞉ Tekehalima꞉ta꞉ mo Abimelekena꞉ kini da pa꞉ta꞉ haemeke wanda꞉manu paeyaota꞉ weki mendia꞉la꞉ hauta꞉ sa꞉sa꞉ piekeme. Koto ekina꞉ Eipoloha꞉ma꞉ma꞉ Koda꞉ pa꞉ta꞉ Abimelekena꞉ yeni peayeke handa epeayekeme. Kutupa make mo ipika꞉ wanda꞉ make mo ipika꞉ pa hameke e pokaemeke wandiki titi make weki mendina꞉ yeke epeayekeme.