Read Sembeleke Kini Pieke 22 Bible Online

Kini Pieke 22 - Sembeleke bible

Kini Pieke 22

¹Nate ma꞉nda꞉na꞉ Koda꞉ma꞉ Eipoloha꞉ma꞉ la handuluekema꞉ wi alota꞉ Eipoloha꞉ma꞉o leeke Eipoloha꞉ma꞉ma꞉ hombo peaasota꞉ Wae laa alota꞉ I̱ do handa꞉e leekeme.

²Koda꞉ma꞉ alota꞉ Mo ota꞉ naka꞉ pukima꞉ homele homeke weki Aisa꞉keta꞉ hatuku mo Motaeya kenke pa꞉ta꞉ pue. Kutupa koto pate I̱ma꞉ walua꞉ potena꞉ naka꞉ weki lia I̱ pa꞉ta꞉ kuelena꞉ loa꞉me leekeme.

³Da ka꞉la꞉paaso sikita꞉ Eipoloha꞉ma꞉ma꞉ta꞉ mo weki lia halopieke timanu poka ipika꞉ donkina꞉ hokina꞉ mendiao Aisa꞉ke make ipika꞉ e pokaepeke hali yaapo make hatuku peekeme. Ikita꞉ mo hande Koda꞉ma꞉ la haleeke alena꞉ poluekema꞉ pemekeme.

⁴Nate tepo peaona꞉ta꞉ Eipoloha꞉ma꞉ma꞉ mo hande leeke alena꞉ handa꞉ moneayekeme.

⁵Kutupa ipikana꞉ma꞉ mo e pokaepeke hali yaapo pa꞉ta꞉ alota꞉ Do donki ame̱le̱ do pate hape. Mo weki dikita꞉ mo pa pate leke pua panda꞉puniao yeiya꞉ lao ipiliki halipi alena꞉ paa ipulupekema꞉ loa꞉me leekeme.

⁶Eipoloha꞉ma꞉ma꞉ta꞉ mo hau pitolo yankolo pipiki tita꞉ Aisa꞉ke mea tiao ipikita꞉ kaiya make mo ti noya꞉ pia꞉peke ti epeleke make miniekeme. Ipiliki mandakena꞉ pulu hata꞉

⁷Aisa꞉kema꞉ alota꞉ Apa꞉o leekeme. Ipikana꞉ma꞉ alota꞉ Alekeka꞉ta꞉pe leekeme. Aisa꞉kema꞉ lota꞉ pitolo alota꞉ I̱ma꞉ mo ti noya꞉ pulu pele ale ti epeleke pita꞉ ti yaapota꞉ handolopate mo lia halo polopa꞉ sipisipi ikikita꞉ handoka꞉ta꞉pe leekeme.

⁸Koto leeke Eipoloha꞉ma꞉ma꞉ hombo peaaso alota꞉ Koda꞉ma꞉ kone kilieke leekeme. Kutupa telipuna꞉ mandakena꞉ pepekeme.

⁹Kutupa mo hande Koda꞉ma꞉ la haleeke alena꞉ opolo a꞉pa Eipoloha꞉ma꞉ma꞉ oloda a꞉eyaata꞉ ti manda ana꞉ layekeme. Kutupa ipikana꞉ma꞉ ipika꞉ weki tonkao mo olodana꞉ ti manda wiekeme.

¹⁰Kutupa mo weki luekema꞉ kaiya mea mina꞉ liaeyekepate

¹¹mo Tekehalina꞉ enisoloma꞉ ya pa꞉ta꞉ yama꞉ ipiki pa꞉ta꞉ wi alo alota꞉ Eipoloha꞉ma꞉o. Eipoloha꞉ma꞉o leekeme. Ipikana꞉ma꞉ hombo peaaso alota꞉ Wae. I̱ do handa꞉e leekeme.

¹²Koto leeke mo enisoloma꞉ alota꞉ Mo weki na liki ipiki pa꞉ta꞉ hau ma꞉nda꞉ na pia꞉pee. Nakana꞉ma꞉ naka꞉ homeke weki homeketa꞉ na sa꞉sa꞉ pele ekina꞉ ameta꞉ nakana꞉ma꞉ Koda꞉ paala꞉ma꞉ homeka꞉ta꞉me laa hone ulume leekeme.

¹³Kutupa Eipoloha꞉ma꞉ma꞉ lekema꞉ lekema꞉ piekepate sipisipi halieki mo ipika꞉ ekeketa꞉ ti ma꞉nda꞉na꞉ mea hopa꞉liayekeeki handeekeme. Ipikana꞉ma꞉ta꞉ ipika꞉ weki yanka halo pieke tupa꞉ta꞉ mo hande sipisipi ma꞉na꞉ pua mea yanka haleekeme.

¹⁴Kutupa Eipoloha꞉ma꞉ma꞉ koto pate bikita꞉ Koda꞉ma꞉ Ana꞉ Lao Hala꞉me leekeme. Kutupa ame do make wanda꞉halima꞉ta꞉ Mo Koda꞉na꞉ potena꞉ ipikana꞉ma꞉ ana꞉ lao hala꞉me lo halememe.

¹⁵Kutupa mo Tekehalina꞉ enisoloma꞉ ya pa꞉ta꞉ yama꞉ Eipoloha꞉ma꞉ paa yaapo peao wi alo alota꞉

¹⁶I̱ta꞉ Tekehalima꞉ ota꞉ yaka bikina꞉ pi la꞉ witolota꞉ I̱ma꞉ta꞉ neke wopu epealueke. Pa ekipeke. Nakana꞉ma꞉ta꞉ naka꞉ homeke weki kone na sa꞉sa꞉piki I̱ pa꞉ta꞉ kuluekema꞉ taape ekina꞉ loa꞉me.

¹⁷I̱ma꞉ pi la꞉ witolota꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ oli yana꞉ hala꞉ hombulanka꞉ manuma꞉ o mo ikali tiekena꞉ tea꞉na꞉ ula꞉ hou manuma꞉ handena꞉ lolueke leekeme. Kutupa ikana꞉ma꞉ta꞉ ika꞉ a꞉nda꞉ tunkuliki wanda꞉halita꞉ lu bepolalimikie.

¹⁸Mo nakana꞉ma꞉ yaka pi opele ekina꞉ I̱ma꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ yama꞉ta꞉ mo tutu paeyao sikita꞉ epeaasa꞉eki mina꞉ lolueke leekeme.

¹⁹Kutupa Eipoloha꞉ma꞉ta꞉ mo ipika꞉ e pokaasa꞉ hali yaapo haepeke alena꞉ pua mandakena꞉ mo ipiki hayeke ale Biasiba nane pemekeme. Neihona꞉ tapake

²⁰Hao hao nate ma꞉nda꞉ nina꞉ta꞉ Eipoloha꞉ma꞉ma꞉ mo hameke Neihona꞉ weteke Milikama꞉ wekiwandiki ketepo hata꞉ mendiaeyekeeki leeketa꞉ opiekeme.

²¹Mupeke weki bikita꞉ Usu make hameke Busu kutupa mo A꞉tamona꞉ ateke Kemuele make

²²Diesede make Heiso make Pilida꞉se make Didila꞉pe make

²³kutupa Lepekana꞉ ateke Beduelo make koto weki tonu paeyaota꞉ Milikama꞉ Neihona꞉ mendiaeyekeme.

²⁴Kutupa Neihona꞉ yaapo peao mieke wanda꞉ Teumama꞉ta꞉ Diba make Kaha꞉me make Daha꞉se make Maaka make mendiekeme.