Read Sembeleke Kini Pieke 23 Bible Online

Kini Pieke 23 - Sembeleke bible

Kini Pieke 23

¹Setata꞉ bapi 127 miekeme.

²Kutupa ipikita꞉ mo Keinani da kenke pa꞉ta꞉ hayeke kenke ma꞉nda꞉ Hebotoni pa꞉ta꞉ homeekeme. Kutu pieketa꞉ Eipoloha꞉ma꞉ma꞉ homa꞉ wia pitiekeme.

³Ipikana꞉ma꞉ta꞉ mo wetekena꞉ toko wieke alena꞉ mina꞉pa꞉lao mo Hidi wanda꞉hali pa꞉ta꞉ pua alota꞉

⁴I̱ta꞉ da ma꞉nda꞉ hali kone iki ame̱le̱ mandakena꞉ do haloma꞉ma꞉ yaka wanda꞉ hoilu polo kenke ma꞉nda꞉ hambono tapapee leekeme.

⁵Mo tapakema꞉ hombo peaaso alota꞉

⁶Someo. Niki pa꞉ta꞉ opie. Nikana꞉ma꞉ neketa꞉ nika꞉ aneke halie laa handa꞉ lialoma꞉me. Koto ekina꞉ naka꞉ wanda꞉ta꞉ do nika꞉ ota꞉ epeke lapa꞉ ma꞉nda꞉ handa hoie. Niki ma꞉nda꞉ hondoma꞉ naka꞉ wanda꞉ hoiyuelena꞉ lapa꞉ ma꞉nda꞉ pa kuluekema꞉ hone pa꞉la꞉me lemekeme.

⁷Kutupa Eipoloha꞉ma꞉ma꞉ mo tapake pa꞉ta꞉ panda꞉puniao hata꞉

⁸alota꞉ Ikana꞉ma꞉ yaka wanda꞉ do pate hoiyonoe lemeka꞉na꞉ta꞉ kota꞉ pilisi mo Sohana꞉ eiyeke Epotonima꞉

⁹mo Ma꞉ka꞉pilana꞉ tikene da mo ipika꞉ e nepoko nane ula꞉eki lota꞉ peapee. I̱ma꞉ yaka hali hoiyu halo polo hali lapa꞉ wialuekema꞉ do ika꞉ leke popelekena꞉ I̱ pa꞉ta꞉ ipika꞉ tapao yenki mulu pa꞉la꞉ tupa꞉ kone tapaena꞉ loa꞉me laa honke lapee leekeme.

¹⁰Epotonita꞉ mo daoni pota꞉ kake pa꞉ta꞉ pi hotu haemeke ale pa꞉ta꞉ mo mandane Hidi tapake pitieke ale paeyaoma꞉ opitolo haena꞉ hombo peaaso alota꞉

¹¹Someo. Opie. I̱ma꞉ta꞉ koto hama꞉ make koto pa꞉ta꞉ ula꞉ tikene da make paeyao neke kulueke. Do yaka da wanda꞉halina꞉ leke popelekena꞉ mo naka꞉ wanda꞉ hoiyuelena꞉ neke kulueke laa leekeme.

¹²Pate Eipoloha꞉ma꞉ma꞉ mo Hidi wanda꞉hali pa꞉ta꞉ panda꞉puniao paeyaoma꞉ opitolo haena꞉

¹³mo Epotoni pa꞉ta꞉ alota꞉ Pilisi yaka pi opie. I̱ma꞉ta꞉ mo hama paeyao hamboloma꞉ mo kitolo yenkita꞉ na kiake mie. Kutupa yaka wanda꞉ koto pate hoilueke leekeme.

¹⁴Koto leeke Epotonima꞉ hombo peaaso alota꞉

¹⁵Someo. Mo kenketa꞉ pa 400 silipa manima꞉ homeke hamba꞉peke ya꞉la꞉ma꞉ dikita꞉ ala꞉ta꞉ ma꞉nda꞉ dia꞉me. Pa pina꞉ma꞉ naka꞉ wanda꞉ koto pa꞉ta꞉ hoie leekeme.

¹⁶Koto leekeeki Eipoloha꞉ma꞉ma꞉ A꞉pa꞉la꞉me laa mo manita꞉ mo bisinisi haliwekima꞉ tombo mu haemeke tupa꞉ tombo mea mo Epotonima꞉ mo ipika꞉ da wanda꞉hali opu haena꞉ leeke tupa꞉ 400 silipa mani haleekeme.

¹⁷Kotota꞉ mo hande Ma꞉motena꞉ nate ipula꞉ nanema꞉ Epotonina꞉ Ma꞉ka꞉pila kenke Eipoloha꞉ma꞉na꞉eki au leeke ekie. Kota꞉ mo hama꞉ make mo hama꞉ pa꞉ta꞉ wieke tikene da make mo hama꞉na꞉ pu hao naeyeke timanu make ala꞉ta꞉ ala꞉ta꞉ paeyao miekeme.

¹⁸Koto pi hotimiki ale pa꞉ta꞉ a꞉pa pitimiki Hidi wanda꞉hali paeyaoma꞉ta꞉ ota꞉ Eipoloha꞉ma꞉na꞉ ekie laa hone wimikime.

¹⁹Kutupa Eipoloha꞉ma꞉ma꞉ta꞉ ipika꞉ weteke Seta mo Keinani da kenke pa꞉ta꞉ wieke tikene da pa꞉ta꞉ lapa꞉ piekeme.

²⁰Koto ekina꞉ koto Hidi wanda꞉halina꞉ hama꞉ kenke make tikene da make Eipoloha꞉ma꞉na꞉ hali hoita꞉la꞉ kenke au leekeme.