Read Sembeleke Kini Pieke 24 Bible Online

Kini Pieke 24 - Sembeleke bible

Kini Pieke 24

¹Eipoloha꞉ma꞉ta꞉ ameta꞉ ota꞉ koke yeekeme. Kutupa mo Tekehalima꞉ta꞉ ipika꞉ piekeeki paeyao epeayekeme.

²Eipoloha꞉ma꞉ma꞉ mo ipika꞉ ala꞉ta꞉ ala꞉ta꞉ paeyao handeteke hayeke titina꞉ e pokaasa꞉ hali pa꞉ta꞉ alota꞉ Naka꞉ kiki yaka paleke yaapo pa꞉ta꞉ wia hata꞉ pi ma꞉nda꞉ la꞉ wie laa alota꞉.

³Yaka hone pa꞉la꞉ ekima꞉ta꞉ nakana꞉ma꞉ mo Tekehali do kenke ya wa꞉pa꞉la꞉ Koda꞉na꞉ bikina꞉ pi la꞉ witolota꞉ yaka wekina꞉ wanda꞉ta꞉ do Keinani wanda꞉ na mealueke laa la꞉ wie.

⁴Nakana꞉ma꞉ta꞉ mo I̱ mendia꞉ alena꞉ pua yaka tapake pa꞉ta꞉ kone mo yaka weki Aisa꞉kena꞉ wanda꞉ meapeke leekeme.

⁵Pate mo e pokaasa꞉ halima꞉ lota꞉ pitolo alota꞉ Mo wandikima꞉ ipika꞉ da mina꞉pa꞉lao I̱ yaapo do kenke nane a꞉pa꞉peke kiaya꞉ka꞉na꞉ta꞉ pa eki puluepe laata꞉ I̱ma꞉ naka꞉ wekita꞉ mo neke epele kenke nane pena꞉ tapaaluepe laa lota꞉ piekeme.

⁶Kutupa Eipoloha꞉ma꞉ hombo peaaso alota꞉ Nakana꞉ma꞉ yaka weki koto nane ota꞉ paa na pena꞉ lapeke.

⁷Mo Tekehali oli hepenina꞉ Koda꞉ma꞉ mo yaka apa꞉na꞉ da kenke make mo yaka tapake manuna꞉ kenke make mina꞉pa꞉lao I̱ hatuku epea꞉me. Kutupa ipikana꞉ma꞉ I̱ pa꞉ta꞉ ota꞉ pi la꞉ witolo hata꞉ta꞉ Do kenketa꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ halueke laa lea꞉me. Koto ekina꞉ ipikana꞉ma꞉ta꞉ mo nakana꞉ma꞉ yaka wekina꞉ wanda꞉ mealena꞉ta꞉ ipika꞉ enisolo amba꞉la tapaalieke.

⁸Pate mo wandiki neke yaapo a꞉pa꞉peke kiaya꞉ka꞉na꞉ta꞉ kota꞉ neketa꞉ do pi la꞉ witele ekita꞉ paka꞉lalipikie. Pate hau ma꞉nda꞉ pia꞉ka꞉na꞉ kone yaka wekita꞉ koto nane ota꞉ na hatuku pua꞉peke leekeme.

⁹Koto ekina꞉ mo e pokaeyeke halima꞉ ipika꞉ you hali Eipoloha꞉ma꞉na꞉ paleke yaapo pa꞉ta꞉ kiki witolo hata꞉ Ota꞉ pulueke laa pi la꞉ wiekeme.

¹⁰Koto laata꞉ mo Eipoloha꞉ma꞉na꞉ ala꞉ta꞉ ala꞉ta꞉ paeyao handeteke hayeke halima꞉ ipika꞉ you somena꞉ kiki yaapo kemelomanu mea mo Neiho hayeke daoni mo Mesopoteimiana꞉ okane nanema꞉ tilao mea peekeme.

¹¹Kutupa ipiki mo daoni hama nane opolo puata꞉ mo kemelo manuta꞉ mo daonina꞉ naku ikali tea꞉na꞉ tumiki yotuao pitina꞉ leekeme. Kotota꞉ nate pambolo pulu haena꞉ta꞉ wanda꞉wekima꞉ ikali nolo a꞉pa꞉tiki pimiki nate yekeme.

¹²Kutupa ipikana꞉ma꞉ yeni pitolo alota꞉ Tekehalio. Yaka you some Eipoloha꞉ma꞉na꞉ Koda꞉o. Yaka you some pa꞉ta꞉ la꞉ wili pi peneme yaaso hata꞉ ame I̱ma꞉ weitolo ale kie.

¹³Ameta꞉ I̱ta꞉ mo hande daoni pa꞉ta꞉ haleme moputali wandiki tonuma꞉ ikali nolo epolo peleme naku ikali pa꞉ta꞉ do halo handa꞉e.

¹⁴I̱ma꞉ mo wandiki homeke ma꞉nda꞉ pa꞉ta꞉ dupa lolueke. Pilisio. Naka꞉ ikali kanake mina꞉niao I̱ ikali nono lae lolueke. Ipikana꞉ma꞉ alo hata꞉ Ikali nae laa Naka꞉ kemelo manuna꞉ ikali make mea a꞉ponoe lea꞉ka꞉na꞉ta꞉ kota꞉ ipikita꞉ mo naka꞉ e pokaasa꞉ hali Aisa꞉kena꞉ ma̱leke lili wanda꞉ ya꞉na꞉e. Dupiki hau peaeka꞉na꞉ta꞉ kota꞉ nakana꞉ma꞉ mo yaka you some pa꞉ta꞉ la꞉ wili pita꞉ ota꞉ ya꞉ka꞉ta꞉me laa I̱ma꞉ hone ulueke laa yeni koto tupa꞉ piekeme.

¹⁵Mo hali yeni pu paeyaaso haena꞉ta꞉ Lepekata꞉ ipika꞉ peiyokona꞉ ikali kanake tia opolo epeekeme. Mo wandikita꞉ Beduelona꞉ waneke yekeme. Beduelota꞉ Eipoloha꞉ma꞉na꞉ hameke Neiho pita꞉ weteke Milika yaapona꞉ eiyeke yekeme.

¹⁶Mo wandikita꞉ moputali pa pita꞉ ota꞉ seliapo piki wandiki yeekeme. Ipikita꞉ oni naku ikali pa꞉ta꞉ pua ipika꞉ ikali kanakena꞉ ikali no tumbao paa epeekeme.

¹⁷Kutupa mo hande e pokaasa꞉ hali ankeao pua mo wandiki manda꞉hande pitolo hata꞉ alota꞉ Pilisi naka꞉ kanake pa꞉ta꞉ pila꞉ ikali ma꞉nda꞉ nono lae leekeme.

¹⁸Koto leeke mo wandikima꞉ alota꞉ Apa꞉o. Nae laa Koto kone mo ipika꞉ peiyokona꞉ tieke ikali kanake mina꞉niao ikali nena꞉ leekeme.

¹⁹Mo halima꞉ ikali no paeyaeyeketa꞉ mo wandikima꞉ paa alota꞉ Mo naka꞉ kemelomanu make ika꞉ hone pa꞉la꞉ tupa꞉ nena꞉ ikali mea a꞉ponope leekeme.

²⁰Kutupa koto kone mo wandikima꞉ mo ma꞉na꞉na꞉ ikali no haleme kawaso pa꞉ta꞉ ikali paeyao hoelao pototo la oni ikali pa꞉ta꞉ ikali wopu nalo pua꞉tiki piekeme. Kutupa mo kemelo paeyao siki ikali ana꞉na꞉ nena꞉ lo paeyaeyekeme.

²¹Kutu pieke handaa mo halima꞉ta꞉ Tekehalima꞉ ipiki epeala꞉pe laa handuluekema꞉ yeke yopu siki hata꞉ mo wandiki handaake wiekeme.

²²Kutupa mo wandikima꞉ hande kemelo manuna꞉ ikali na halo paeyaeyeketa꞉ mo halima꞉ yenki tieke wiki koloma꞉ wepiki mineke kanake mea mo wandikina꞉ minekena꞉ pankao kutupa koloma꞉ ombu wepiki topa꞉ tieke aneke yaapo mea mo wandikina꞉ kiki yaapona꞉ pitaeyekeme.

²³Kutupa alota꞉ Pilisi naka꞉ apa꞉ta꞉ epika꞉ta꞉pe laata꞉ I̱ la kie. Kutupa ipika꞉ da pa꞉ta꞉ta꞉ I̱ make do yaka haliweki make polu polome da panda꞉ta꞉ ana꞉na꞉ ula꞉pe leekeme.

²⁴Koto leeke mo wandikima꞉ alota꞉ Yaka apa꞉ta꞉ Neiho pita꞉ weteke Milika yaapona꞉ eiyeke Bedueloe.

²⁵Kutupa nika꞉ da pa꞉ta꞉ta꞉ taa ma꞉na꞉ma꞉ napeke ambumanu make yama꞉peke ambu sa̱ make ula꞉me. Kutupa make iki pelia꞉peke da panda꞉ ula꞉me leekeme.

²⁶Koto ekina꞉ mo halima꞉ta꞉ Tekehali pa꞉ta꞉ panda꞉ puniao yeni pitolo alota꞉

²⁷Mo yaka you some Eipoloha꞉ma꞉na꞉ Tekehali Koda꞉na꞉ biki mea mina꞉lianoe. Ipikana꞉ma꞉ta꞉ yaka you some pa꞉ta꞉ ipika꞉ pi la꞉ ula꞉ ekita꞉ ota꞉ peneme yala꞉me. Mo Tekehalima꞉ta꞉ yaka you somena꞉ tapake pa꞉ta꞉ kone mea hatuku mea a꞉pa꞉la꞉me laa leekeme.

²⁸Mo wandikima꞉ta꞉ ipika꞉ ama꞉na꞉ da pa꞉ta꞉ pototo la puata꞉ mo hande pia꞉ haumanu paeyao pua leekeme.

²⁹Lepekana꞉ belikita꞉ Leibeni hayekeme. Mo somema꞉ belikina꞉ minekena꞉ pankeeke mineke kanake make kiki yaapona꞉ pitaeyeke topa꞉ make handolo hata꞉ mo leeke pi a꞉pa moka꞉laeyekeeki make opiekeme. Koto ekina꞉ ipikana꞉ma꞉ hande Eipoloha꞉ma꞉na꞉ e pokaeyeke halita꞉ mo naku ikali wieke alena꞉ hayeke handaa poluekema꞉ hama opolu bao pototo laa peekeme. Kutupa opolo poluta꞉ mo hande some ipika꞉ kemelo tonu ame̱le̱ mo naku ikali pitieke alena꞉ haemekeeki pua handolo hata꞉ alota꞉

³⁰(null)

³¹Nika꞉ pomana꞉ a̱i̱ ipupee. Neketa꞉ mo Tekehalima꞉ epeala꞉ halie. Ekipeke do pa꞉ta꞉ hata꞉ pitelepe. I̱ma꞉ta꞉ yaka da pa꞉ta꞉ iki pelia꞉pa꞉peke da panda꞉ amba꞉ amu peala꞉me. Kutupa make ika꞉ kemelomanu hapeke da panda꞉ make ula꞉me leekeme.

³²Koto leeke mo halita꞉ oni da pa꞉ta꞉ peekeme. Kutupa Leibenima꞉ta꞉ mo kemelona꞉ hokina꞉ wieke alemanu mu wia napeke ambumanu make halaa ambu sa̱manu make wiaeyekeme. Kutupa mo Eipoloha꞉ma꞉na꞉ e pokaasa꞉ hali make ipika꞉ haliweki make ika꞉ anke tandepena꞉yeke ikali honke pea haleekeme.

³³Kutupa mo ne mea a꞉paeyeke dina꞉ta꞉ mo halima꞉ alota꞉ I̱ma꞉ lolueke hone witolo pi amba꞉la laata꞉ ne wetepena꞉ nolueke leekeme. Koto leeke Leibenima꞉ alota꞉ A꞉pa꞉la꞉me. Naka꞉ pi lae leekeme.

³⁴Koto leeke ipikana꞉ma꞉ pi kini pu mea alo alota꞉ I̱ta꞉ Eipoloha꞉ma꞉na꞉ e pokaaso halie.

³⁵Mo Tekehalima꞉ta꞉ yaka you some ota꞉ anekema꞉ epeao hamoko hali haena꞉ la꞉la꞉me. Kutupa make ipiki pa꞉ta꞉ mo sipisipi wopu make nanikosimanu make kaomanu make silipa make kolo make pa hameke e pokaasa꞉ wanda꞉weki make haliweki make kemelomanu make donkimanu make hala꞉me.

³⁶Yaka you somena꞉ weteke Setata꞉ koke ya pita꞉ kone hali weki mondu wialeke handaa yaka you somema꞉ta꞉ ipika꞉ ala꞉ta꞉ ala꞉ta꞉ paeyao mo weki hala꞉la꞉me.

³⁷Koto ekina꞉ yaka you somema꞉ta꞉ I̱ma꞉ Naka꞉ le pi ota꞉ pulueke laa la꞉ witolo hano loluekema꞉ ipika꞉ pi la꞉ witoloeki pia꞉peke laa dupa lea꞉me. Yaka wekina꞉ wanda꞉ta꞉ mo Keinani kenkena꞉ hala꞉ wandiki tonu na mea꞉peke.

³⁸Kotoeki na pikita꞉ mo yaka apa꞉na꞉ wanda꞉hali yaka tapake pa꞉ta꞉ pua mo wekina꞉ wanda꞉ meapeke lea꞉me.

³⁹Koto leeke I̱ma꞉ yaka you some lota꞉ pitolo alota꞉ Mo wandikima꞉ I̱ yaapo a꞉pa꞉peke kiaya꞉ka꞉na꞉ta꞉ kota꞉ eki pulua꞉pe laa loa꞉me.

⁴⁰Koto loa꞉eki ipikana꞉ma꞉ hombo peaaso alota꞉ Mo I̱ma꞉ hoto paeyao siki ipika꞉ pi opua pu halo Tekehalima꞉ta꞉ ipika꞉ enisolo neke yaapo tapaaso hata꞉ nakana꞉ma꞉ pu epealena꞉ lelieke. Kutupa nakana꞉ma꞉ yaka wekina꞉ wanda꞉ta꞉ mo yaka tapake yaka apa꞉na꞉ wanda꞉hali pa꞉ta꞉ kone mealipikie laa lea꞉me.

⁴¹Kutupa alota꞉ Do naka꞉ pi la꞉ wita꞉la꞉eki pa꞉ta꞉ ka꞉la꞉pa꞉ ta꞉pao halo peleeki homeketa꞉ neke mo yaka tapake pa꞉ta꞉ pelipipate neke kiaemeka꞉na꞉ta꞉ kota꞉ neketa꞉ ka꞉la꞉pa꞉ ta꞉pao halipikie laa lea꞉me.

⁴²Koto ekina꞉ I̱ ame mo naku ikali pa꞉ta꞉ a꞉pa hata꞉ yeni dupa pua꞉me. Yaka you hali Eipoloha꞉ma꞉na꞉ Tekehali Koda꞉o. Pilisi I̱ma꞉ do pitolo ekita꞉ pu epeano lae.

⁴³Ameta꞉ I̱ta꞉ do naku ikali pa꞉ta꞉ do halo handa꞉e. Kutupa mo moputali wandiki ma꞉nda꞉ ikali noluekema꞉ epea꞉ka꞉na꞉ta꞉ I̱ma꞉ ipika꞉ ikali kanake pa꞉ta꞉ pila꞉ ikali ma꞉nda꞉ kie laa honke lolueke.

⁴⁴Kutupa mo wandikima꞉ a꞉pa꞉la꞉me laa make mo yaka kemelo manuna꞉ ikali mea a꞉paeya꞉ka꞉na꞉ta꞉ kota꞉ koto wandikita꞉ Koda꞉ nakana꞉ma꞉ mo yaka you halina꞉ eiyekena꞉ ma̱leke lili wanda꞉ ya꞉na꞉e laa yeni pua꞉me.

⁴⁵Koto yaka onina꞉ honema꞉ yeni pa pitolo hano kone Lepekata꞉ ikali kanake ipika꞉ peiyokona꞉ tia oni naku ikali pa꞉ta꞉ ikali nolo yapea꞉me. Kutu pieke I̱ma꞉ ipiki pa꞉ta꞉ alota꞉ Pilisio. I̱ ikali kie loa꞉me.

⁴⁶Kutupa ipikana꞉ma꞉ koto kone mo ikali kanake mina꞉niao hata꞉ alota꞉ Nae laata꞉ Naka꞉ kemelo manuna꞉ ikali make mea a꞉palueke lea꞉me. Koto leeke I̱ma꞉ta꞉ ikali noa꞉me. Kutupa yaka kemelomanu make ikali hale hale pia꞉me.

⁴⁷Kutupa I̱ma꞉ ipiki lota꞉ pitolo alota꞉ Naka꞉ apa꞉ta꞉ epipe loeke handaa ipikana꞉ma꞉ alota꞉ Yaka apa꞉ta꞉ Neiho pita꞉ weteke Milika yaapona꞉ eiyeke Bedueloe lea꞉me. Koto leeke kota꞉ I̱ma꞉ ipika꞉ minekena꞉ mo mineke kanake pankao make ipika꞉ kiki yaapona꞉ mo topa꞉ pitaowa꞉me.

⁴⁸Kutupa I̱ta꞉ tumiki yotuao Tekehali pa꞉ta꞉ panda꞉puniao yeiya꞉ lawa꞉me. Pa ekipeke mo Tekehali yaka you some Eipoloha꞉ma꞉na꞉ Koda꞉ ipikana꞉ma꞉ I̱ta꞉ mo yaka you somena꞉ tapake pa꞉ta꞉ kone hatuku epea꞉me. Kutupa ika꞉ wandiki yaka you somena꞉ eiyekena꞉ handa꞉ wiano la꞉la꞉ ekina꞉ ipika꞉ biki mina꞉liawa꞉me.

⁴⁹Koto ekina꞉ ameta꞉ ikana꞉ma꞉ yaka you some pa꞉ta꞉ pea꞉peke ya꞉la꞉ haumanu ana꞉na꞉ kone pulumeke hone wimika꞉na꞉ta꞉ kota꞉ pilisi I̱ la kipe. Dia꞉ya꞉ka꞉na꞉ make I̱ma꞉ pulu polo hau hone wiono a̱i̱ la kipe leekeme.

⁵⁰Koto leeke Leibeni pita꞉ Beduelo yaapoma꞉ hombo peaaso alota꞉ Do hauta꞉ mo Tekehali pa꞉ta꞉ yama꞉ a꞉pa꞉la꞉ ekina꞉ta꞉ kota꞉ dikana꞉ma꞉ dupumana꞉e laa pi ma꞉nda꞉ lapeke na ya꞉la꞉me.

⁵¹Koto ekina꞉ Lepeka do handa꞉e. Ipikita꞉ mo Tekehalima꞉ la꞉la꞉ tupa꞉ naka꞉ you somena꞉ eiyekena꞉ wanda꞉ haena꞉e lepekeme.

⁵²Koto lepekeeki mo Eipoloha꞉ma꞉na꞉ e pokaasa꞉ halima꞉ opu haota꞉ panda꞉puniao Koda꞉ yeiya꞉ layekeme.

⁵³Kutupa ipikana꞉ma꞉ daumanu make loke au laasa꞉ silipa make koloma꞉ wepiki alemanu make mea a꞉paata꞉ Lepeka haleekeme. Kutupa make mo yenki tieke peke pa hameke hala꞉la꞉ alemanu mo wandikina꞉ beliki inkiki yaapo haleekeme.

⁵⁴Kutupa mo Eipoloha꞉ma꞉na꞉ e pokaasa꞉ hali make ipiki ame̱le̱ pemeke haliweki make ne ikali no pelimikime. Kutupa da ka꞉la꞉paaso tiao alota꞉ Yaka you some pa꞉ta꞉ paa la꞉ka꞉la pono lae leekeme.

⁵⁵Pate Lepekana꞉ beliki pita꞉ inkiki yaapoma꞉ alota꞉ Mo wandikita꞉ niki ame̱le̱ pula homeke o nate kiki yaapomanu pa hao epena꞉ lolumeke lepekepate

⁵⁶mo halima꞉ alota꞉ Niki pa꞉ta꞉ hosiki hao pomana꞉e pi na lapee. Mo Tekehalima꞉ta꞉ yaka pota꞉ kimisu epoa꞉ ekita꞉ epeaala꞉me. Koto ekina꞉ yaka you some pa꞉ta꞉ paa la꞉ka꞉la pono lae leekeme.

⁵⁷Koto leeke hombo peaaso alota꞉ Kota꞉ mo wandikima꞉ lelia꞉eki opumana꞉ wi lomana꞉ pipee lepekeme.

⁵⁸Koto ekina꞉ Lepeka wi la꞉ mea lota꞉ pitolo alota꞉ Neketa꞉ do hali yaapo ame̱le̱ mandakena꞉ pelimikipe lepekeme. Mo wandikima꞉ hombo peaaso alota꞉ Aowe leekeme.

⁵⁹Koto leeke kota꞉ Lepeka pita꞉ ipika꞉ apa꞉ ama꞉na꞉ amba꞉ kone e pokao hayeke wanda꞉ yaapo mo Eipoloha꞉ma꞉na꞉ e pokaasa꞉ hali make ipika꞉ haliweki ame̱le̱ pena꞉ leekeme.

⁶⁰Kutupa ikana꞉ma꞉ mo Lepeka epeaasa꞉ pi dupa la haleekeme.Ana꞉o. Neketa꞉ wanda꞉hali tapake tiekena꞉ ama꞉ hapekee. Kutupa naka꞉ monduma꞉ monduma꞉ pilipi wekiwandikina꞉ wekiwandikima꞉ta꞉ ika꞉ a꞉nda꞉ tunkiliki tapakena꞉ daonimanu bepolaena꞉e laa lemekeme.

⁶¹Kutupa Lepeka make ipika꞉ moputali wandiki titi tonka꞉na꞉ mo Eipoloha꞉ma꞉na꞉ e pokaasa꞉ hali ame̱le̱ poluekema꞉ yeke tikitiki yaaso hata꞉ mo kemelo manuna꞉ hokina꞉ pitulu puata꞉ kini pea pemekeme.

⁶²Kutupa Aisa꞉keta꞉ hapu hala꞉ alena꞉ mo hande Handa꞉la꞉ Pa Hao Hala꞉ Halina꞉ Naku Ikali ula꞉ alena꞉ mo Keinani kenkena꞉ ka꞉wa꞉ nanema꞉ a꞉pa hayekeme.

⁶³Ipikita꞉ welealo nanema꞉ oni pate nina꞉ leke pota꞉ pomuluekema꞉ peekepate kemelomanu epemekeeki handeekeme.

⁶⁴Kutupa Lepekama꞉ Aisa꞉ke epeekeeki hando haota꞉ mo ipika꞉ kemelo mina꞉pa꞉lao hola꞉pa꞉niaeyekeme.

⁶⁵Kutupa mo Eipoloha꞉ma꞉na꞉ e pokaasa꞉ hali lota꞉ pitolo alota꞉ Mo niki handa꞉ paleke ipula꞉ halita꞉ epi yaka꞉ta꞉pe leekeme. Koto leeke mo e pokaasa꞉ halima꞉ hombo peaaso alota꞉ Ipikita꞉ yaka you somee leekeme. Koto ekina꞉ mo wandikima꞉ ipika꞉ you aka꞉ mea ipika꞉ leke popeleke a꞉mbaeyekeme.

⁶⁶Kutupa mo e pokaasa꞉ halima꞉ ipika꞉ pieke hau paeyao Aisa꞉ke la haleekeme.

⁶⁷Kota꞉ Aisa꞉kema꞉ta꞉ ipika꞉ inkiki Seta hao hayeke palai da pa꞉ta꞉ Lepeka hatuku peekeme. Kutupa mo wandikita꞉ ipika꞉ wanda꞉ hayekeme. Aisa꞉kema꞉ta꞉ Lepeka pukima꞉ homeekeme. Koto ekina꞉ mo ipika꞉ ama꞉ homeeke ekina꞉ ka꞉nda꞉ mieke ekita꞉ Lepekama꞉ ipika꞉ puki ke̱i̱ layekeme.