Read Sembeleke Kini Pieke 25 Bible Online

Kini Pieke 25 - Sembeleke bible

Kini Pieke 25

¹Eipoloha꞉ma꞉ma꞉ta꞉ wanda꞉ ma꞉nda꞉ biki Ketuta leeke wanda꞉ miekeme.

²Mo wanda꞉ma꞉ta꞉ weki tonu biki Simitani make Diokosani make Medani make Midiani make Isibake make Sua make mondu wiayekeme.

³Diokosanita꞉ Siba pita꞉ Didani yaapona꞉ ateke yekeme. Kutupa mo Didanima꞉ monduma꞉ monduma꞉ pieke tapaketa꞉ A꞉sutimu make Letusimi make Leumimi make yekeme.

⁴Mo Midianina꞉ eiyeke tonuta꞉ Epa make Epe make Ha꞉noke make Abida make Eledaha make yekeme. Do tapake paeyaota꞉ Ketutana꞉ monduma꞉ monduma꞉ piki wekiwandikina꞉ wekiwandikie.

⁵Eipoloha꞉ma꞉ma꞉ ipika꞉ wia hayeke alemanu paeyaota꞉ Aisa꞉ke haleekeme.

⁶Pate ipiki a̱i̱ na homeke pita꞉ta꞉ mo ipika꞉ mandane wanda꞉wekima꞉ mendiaeyeke weki tonu pa꞉ta꞉ta꞉ pa hameke hala꞉la꞉ alemanu haleekeme. Kutupa koto weki tonuta꞉ mo nate ipula꞉ nane Aisa꞉ke mina꞉pa꞉lao pena꞉ leekeme. Eipoloha꞉ma꞉ homeeke hoimikieki

⁷Eipoloha꞉ma꞉ta꞉ koke ya 175 bapina꞉ homeekeme.

⁹Kutu pieke mo ipika꞉ weki yaapo Aisa꞉ke pita꞉ Isima꞉elo yaapoma꞉ mo hande Hidi hali Sohana꞉ eiyeke Epotonina꞉ Ma꞉motena꞉ nate opa꞉la꞉ nanema꞉ wieke Ma꞉ka꞉pila tikene da pa꞉ta꞉ lapa꞉ pipikime.

¹⁰Koto hama꞉ta꞉ Eipoloha꞉ma꞉ma꞉ mo Hidi tapake pa꞉ta꞉ hambeeke hama꞉e. Eipoloha꞉ma꞉ pita꞉ ipika꞉ wanda꞉ Seta yaapota꞉ koto pa꞉ta꞉ lapa꞉ pipikime.

¹¹Kutupa Eipoloha꞉ma꞉ homeke hoki naneta꞉ ipika꞉ weki Aisa꞉keta꞉ Koda꞉ma꞉ epeayekeme. Aisa꞉keta꞉ mo Handa꞉la꞉ Pa Hao Hala꞉ Halina꞉ Naku Ikali teke pa꞉ta꞉ hayekeme. Isima꞉elona꞉ monduma꞉ monduma꞉ pieke tapake

¹²Mo Setana꞉ pa hameke e pokaeyeke Idiepi wanda꞉ Heikama꞉ Eipoloha꞉ma꞉na꞉ mendiaeyeke weki Isima꞉elona꞉

¹³weki tonu dupa mondu wiekeme. Do ipika꞉ weki tonu ika꞉ ma꞉nda꞉la꞉ tupa꞉ biki laala꞉me. Nebeioto make Keda make A꞉debielo make Mibisa꞉mo make

¹⁴Misima make Duma make Ma꞉sa make

¹⁵Hada꞉de make Tema꞉ make Diede make Napisi make Kedema makee.

¹⁶Ikita꞉ mo 12 tapakena꞉ apa꞉meie. Kutupa ika꞉ biki manuta꞉ mo ika꞉ hosiki da sunu make ika꞉ poluma꞉ poluma꞉ pimiki da pa꞉ta꞉manu make tapa꞉ wiama꞉ wiama꞉ pimikime.

¹⁷Isima꞉elota꞉ 137 bapi hao homeekeme.

¹⁸Isima꞉eloma꞉ monduma꞉ monduma꞉ pieke wekiwandikina꞉ wekiwandikita꞉ mo Ha꞉pila kenke pita꞉ Sia꞉e kenke yaapo tukikina꞉ pitiekeme. Koto kenketa꞉ Idiepi nate opa꞉la꞉ nanema꞉ mo A꞉sitia poluekema꞉ pota꞉na꞉ hayekeme. Ikita꞉ mo Eipoloha꞉ma꞉na꞉ mandane monduma꞉ monduma꞉ pieke wekiwandikina꞉ wekiwandiki ame̱le̱ na hake papate haemekeme. Iso pita꞉ Dieikope yaapona꞉ mendiekeeki

¹⁹Do tamenita꞉ Eipoloha꞉ma꞉na꞉ eiyeke Aisa꞉kena꞉ ekie.

²⁰Aisa꞉keta꞉ 40 bapina꞉ta꞉ Beduelona꞉ waneke Lepeka miekeme. Beduelota꞉ mo Mesopoteimia kenke nanema꞉ A꞉ta꞉mia hali hayekeme. Lepekata꞉ Leibenina꞉ beliki yekeme.

²¹Kota꞉ Lepekata꞉ weki a̱i̱ na mendieke handaa Aisa꞉kema꞉ Tekehali pa꞉ta꞉ yeni peayekeme. Kutupa mo Tekehalima꞉ ipika꞉ yeni hombo peaasota꞉ Lepeka weki loke lombeekeme.

²²Mo wanda꞉ma꞉ta꞉ hone yaapo wiki weki monduluekema꞉ piekeme. Kutupa a̱i̱ na mendiki hata꞉ pa weleke pa꞉ta꞉ pita꞉ kone tonka꞉neli pipikime. Kutu pieke mo wanda꞉ma꞉ alota꞉ I̱ pa꞉ta꞉ta꞉ dupiki haumanu ekipeke pita꞉la꞉pe laa Tekehalima꞉ hombo peaena꞉ yeke lota꞉ piekeme.

²³Koto leeke mo Tekehalima꞉ alota꞉Tutu yaapota꞉ neke pa꞉ta꞉ pila꞉me. Nakana꞉ma꞉ta꞉ ta꞉ta꞉ hone u alu pulu pa꞉la꞉ tapake yaapo mondu wilipikie. Ma꞉nda꞉ta꞉ honkopu wopu halieke. Mo mupeke halima꞉ta꞉ mo wetepe hali oto pa꞉ta꞉ halieke laa leekeme.

²⁴Mo weki mulupieke nate opolo epeeketa꞉ hone yaapo wiki weki yaapo mondu wiekeme.

²⁵Mo titina꞉ wekita꞉ we pea make ipika꞉ yonkeleketa꞉ po̱ hapeleke dauma꞉ handeke itiki pelipa peekeme. Koto ekina꞉ ipika꞉ bikita꞉ Iso leekeme.

²⁶Mo wetepe wekita꞉ Isona꞉ anke kinuku mina꞉paleke mendieke ekiyalo ipika꞉ bikita꞉ Dieikope leekeme. Aisa꞉keta꞉ 60 bapina꞉ mo weki yaapo mendiekeme. Iso ipika꞉ mulupieke anketeke kone tapaeyekeeki

²⁷Mo weki yaapo daeyaata꞉ Isota꞉ eiya꞉nala꞉ ekina꞉ handa wiki some hata꞉ mo hama꞉ nane pita꞉la꞉ ekina꞉ puki wieke some hayekeme. Pate Dieikopeta꞉ kesema꞉ hata꞉ da hao hayeke some yekeme.

²⁸Aisa꞉kema꞉ta꞉ Iso pa꞉ta꞉ta꞉ pukima꞉ homeekeme. Pa ekipeke ipikana꞉ma꞉ta꞉ mo Isoma꞉ lia꞉tiki pieke hotekemanu tendema꞉ homa na꞉tiki piekeme. Pate Lepekama꞉ta꞉ Dieikope pa꞉ta꞉ pukima꞉ homeekeme.

²⁹Nate ma꞉nda꞉na꞉ Dieikopeta꞉ pota꞉ka꞉ supu yankolo pitina꞉ Isota꞉ eiya꞉na꞉ hao tea꞉ma꞉ homa opolo epeekeme.

³⁰Kutupa Isoma꞉ Dieikope pa꞉ta꞉ alota꞉ I̱ta꞉ tea꞉ma꞉ amba꞉ homoloma꞉ mo wepiki ale ma꞉nda꞉ kie leekeme. Koto ekina꞉ ipikita꞉ Idomo lemekeme.

³¹Dieikopema꞉ hombo peaaso alota꞉ Nakana꞉ma꞉ I̱ mupeke wekina꞉ anke teke mulu polo ekina꞉ a꞉pa꞉la꞉me leka꞉na꞉ta꞉ kota꞉ neke pa꞉ta꞉ kulueke leekeme.

³²Koto leeke Isoma꞉ alota꞉ I̱ta꞉ tea꞉ma꞉ teke pa꞉ta꞉ homoloma꞉ koto mupeke wekina꞉ mulu polo anke tekema꞉ I̱ eki a꞉nda꞉ na piliekema꞉ pa a꞉pa꞉la꞉ma꞉ alome leekeme.

³³Kutupa Dieikopema꞉ hombo peaaso alota꞉ Titina꞉ amba꞉la꞉ naka꞉ mupeke wekina꞉ mulu pele anke teketa꞉ I̱ kulueke laa pi amba꞉la la꞉ wie leekeme. Kota꞉ Isoma꞉ pi la꞉ witolo hata꞉ mo mupeke wekina꞉ mulu pieke anke teketa꞉ Dieikope pa꞉ta꞉ haleekeme.

³⁴Kutupa Dieikopema꞉ta꞉ hameke pa꞉ta꞉ betedi make mandane supu make haleekeme. Kutupa Isoma꞉ mo ne ikali naa mina꞉pa꞉lao tiao peekeme. Kotota꞉ Isoma꞉ ipika꞉ mupeke wekina꞉ anketeke mulu pieke ekina꞉ hone wieke ekita꞉ pa koto yekeme.