Read Sembeleke Kini Pieke 42 Bible Online

Kini Pieke 42 - Sembeleke bible

Kini Pieke 42

¹Dieikopema꞉ta꞉ mo Idiepi nane widi ula꞉me leekeeki opu hao ipika꞉ eiyeke tonu pa꞉ta꞉ alota꞉ Ikana꞉ma꞉ta꞉ ekipeke hau ma꞉nda꞉ na pitelemepe.

²Oni Idiepi kenke pa꞉ta꞉ widi ula꞉ma꞉ aleke opitolo loa꞉ma꞉ do niki tea꞉ma꞉ homaama꞉na꞉ma꞉ koto nane pua hamba꞉pee leekeme.

³Koto ekina꞉ta꞉ Diosepena꞉ hameke tonu paeyao kiki yaapo weki tonuta꞉ Idiepi nane widi hambolo pemekeme.

⁴Pate Dieikopema꞉ta꞉ mo Diosepena꞉ hameke wetepe nane weki Benisaminita꞉ mo hameke tonu ame̱le̱ na tapaeyekeme. Pa ekipeke ipika꞉ honema꞉ta꞉ mo weki pa꞉ta꞉ hau ma꞉nda꞉ peaama꞉na꞉e hone wiekeme.

⁵Mo Keinani kenke paeyao pa꞉ta꞉ta꞉ tea꞉ ki tieke pambeke handaata꞉ mo Dieikopena꞉ eiyeke tonu ame̱le̱ mandane wanda꞉hali make apa꞉tao widi hambolo pemekeme.

⁶Mo Idiepi kenkena꞉ kapomani handeteke hayeke some Diosepema꞉ta꞉ mo kenke honiki wanda꞉hali paeyao pa꞉ta꞉ widi tapatiki piekeme. Koto ekina꞉ mo ipika꞉ hameke tonuma꞉ta꞉ Diosepe pa꞉ta꞉ leke popeleke oni kenkena꞉ wataaso haena꞉ a꞉pa panda꞉ puniaemekeme.

⁷Diosepema꞉ mo ipika꞉ hameke tonuta꞉ handeekepate kone ipikana꞉ma꞉ pa na handeke nono pea hayekeme. Ipikana꞉ma꞉ mo tapake pa꞉ta꞉ pi taka꞉lakema꞉ lota꞉ pitolo alota꞉ Ikita꞉ hanema꞉ epelemepe leekeme. Koto leeke mo tapakema꞉ hombo peaaso alota꞉ Nikita꞉ mo Keinani hao ne hambuluekema꞉ a꞉pa puma꞉me lemekeme.

⁸Mo Diosepema꞉ta꞉ ipika꞉ hameke tonue laa handa꞉ wiekepate mo hama̱la̱꞉ hama̱la̱꞉ma꞉ta꞉ ika꞉ kamee laa na handa꞉ wimikime.

⁹Ipikana꞉ma꞉ mo amba꞉ handa꞉ ikina꞉ pieke upamanu niminaaso hata꞉ alota꞉ Ikita꞉ kika ikiki haliwekie. Ikita꞉ mo nika꞉ kenke hando pa꞉ta꞉ damako pa꞉la꞉pe laa handolo a꞉pa pelememe leekeme.

¹⁰Koto leeke mo tapakema꞉ alota꞉ Tiekeo. Dia꞉me. Nikita꞉ naka꞉ e pa hameke e pokaasa꞉ tapake au laa ne hambolo epoma꞉me.

¹¹Tiekeo. Nikita꞉ hama̱la̱꞉ hama̱la̱꞉e. Nikita꞉ kika ikiki haliweki dia꞉me. Nikita꞉ ota꞉ hau pu haloma꞉ haliwekie lemekeme.

¹²Pate Diosepema꞉ mo tapake pa꞉ta꞉ alota꞉ Dia꞉me. Ikita꞉ mo nika꞉ kenke hando pa꞉ta꞉ damako pa꞉la꞉pe laa handolo epelememe leekeme.

¹³Mo tapakema꞉ alota꞉ Tiekeo. Nikita꞉ paeyao kiki yaapo paeya ankena꞉ yaapo hama̱la̱꞉ hama̱la̱꞉ ya꞉me. Mo Keinani kenke pa꞉ta꞉ hala꞉ some homekena꞉ wekitonue. Pate weki homeketa꞉ homea꞉me. Kutupa mo wetepe nane wekita꞉ nika꞉ apa꞉ yaapo hala꞉me lemekeme.

¹⁴Diosepema꞉ hombo peaaso alota꞉ Pa mo hande I̱ma꞉ loa꞉ handa꞉e. Ikita꞉ kika ikiki haliwekie.

¹⁵Ameta꞉ dota꞉ iki yokaalo polo tupa꞉e. I̱ma꞉ta꞉ mo kinina꞉ bikina꞉ keke pi alo alota꞉ Ikita꞉ a̱i̱ na peke pa haota꞉ ika꞉ wetepe nane weki epea꞉ka꞉na꞉ta꞉ pelimikie.

¹⁶Iki homeke ma꞉nda꞉ma꞉ mo weki handa꞉ mulu pua꞉pa꞉peke. Paeyaota꞉ dipula pitaota꞉ mo ika꞉ aleme ekita꞉ ota꞉pe laa amba꞉la꞉ yokaalumeke. Dia꞉ ya꞉ka꞉na꞉ta꞉ kota꞉ mo nika꞉ kini ota꞉ hala꞉ ekina꞉ta꞉ ikita꞉ kika ikiki haliwekie laa peneme ya꞉lieke leekeme.

¹⁷Kutupata꞉ mo tapaketa꞉ hoto tepo dipula pitaeyekeme.

¹⁸Mo tepo natena꞉ Diosepema꞉ mo tapake pa꞉ta꞉ alota꞉ I̱ta꞉ Koda꞉ paala꞉ haso hali ya꞉la꞉ ekina꞉ hau homeke homeketa꞉ iki homaama꞉na꞉ I̱ma꞉ tamba꞉ mulueke.

¹⁹Ikana꞉ma꞉ta꞉ ota꞉ pi lelemepe laa handa꞉ uluekema꞉ta꞉ iki homeke ma꞉nda꞉ta꞉ dipula pa pitina꞉e. Kutupa iki paeyaota꞉ pa la꞉ka꞉la pua mo hande hambeme widi manuta꞉ ika꞉ tea꞉ma꞉ homa꞉la꞉ tapake pa꞉ta꞉ mea poemena꞉e.

²⁰Kutupa ika꞉ kame wetepe wekita꞉ I̱ pa꞉ta꞉ hatuku a꞉pa꞉pa꞉peke. Koto hau pilimi ekima꞉ta꞉ ikana꞉ma꞉ ota꞉ pi lelememe laa iki na lu homalueke leekeme. Ikana꞉ma꞉ta꞉ do pina꞉ a꞉pa꞉la꞉me laa

²¹ika꞉ ika꞉ kone alota꞉ Aowe. Ameta꞉ mo hande nika꞉ kame pa꞉ta꞉ puma꞉ hauna꞉ kiliki kone taloloma꞉me. Nikana꞉ma꞉ta꞉ mo ipiki ka꞉nda꞉ tieke minolo hata꞉ ipiki tamba꞉ mipee laa honke lea꞉ ekita꞉ handolo hata꞉ kone na opuma꞉me. Kutu puma꞉ ekina꞉ta꞉ ame nikita꞉ do ka꞉nda꞉ pa꞉ta꞉ haloma꞉me lemekeme.

²²Lubenima꞉ alota꞉ Kota꞉ I̱ma꞉ iki pa꞉ta꞉ta꞉ mo weki na lia꞉pa꞉pee loa꞉pate ikana꞉ma꞉ta꞉ yaka pi na opimime. Koto ekina꞉ ameta꞉ ipika꞉ homa꞉la꞉ ekina꞉ yenkita꞉ niki pa꞉ta꞉ a꞉pa꞉la꞉me leekeme.

²³Diosepema꞉ta꞉ mo tapakema꞉ lemeke ekita꞉ opiekepate mo tapakema꞉ta꞉ kotoeki hone na wimikime. Pa ekipeke ikana꞉ma꞉ta꞉ mo pi la꞉ka꞉laeya꞉ some pa꞉ta꞉ laa ipikana꞉ma꞉ la꞉ mea hala꞉tiki pia꞉ ekima꞉ piekeme.

²⁴Diosepema꞉ta꞉ mo tapake mina꞉pa꞉lao pua e̱ leekeme. Kutupa ipikita꞉ pi ana꞉na꞉ lapeke yeketa꞉ paa la꞉ka꞉la a꞉pa mo ika꞉ leke popelekena꞉ Simiono ma̱leke lia mina mea tonkaena꞉ leekeme. Diosepena꞉ hameketonu Keinani la꞉ka꞉la pemekeeki

²⁵Diosepema꞉ta꞉ mo e pokaemeke haliweki pa꞉ta꞉ta꞉ mo ipika꞉ hameke tonuna꞉ nu manuta꞉ mo widi napeke manuma꞉ tumbao mo homeke homekena꞉ widi hambemeke manita꞉ mo nu kakena꞉ paa mendiama꞉ mendiama꞉ peaata꞉ mo ika꞉ pota꞉na꞉ nolo pimiki ne make hala꞉pa꞉peke leeke handa ota꞉ kutu pimikime.

²⁶Kutupa mo hama̱la̱꞉ hama̱la̱꞉ma꞉ta꞉ mo widi nu manuta꞉ ika꞉ donki manuna꞉ hokina꞉ atula atula pea mea wia pemekeme.

²⁷Mo pota꞉na꞉ timba꞉ leeke pua pelimiki alena꞉ mo hameke ma꞉nda꞉ma꞉ ipika꞉ donkina꞉ ne halueke alo hata꞉ mo ipika꞉ nu ma꞉nda꞉ tokiekepate mo nu kakena꞉ta꞉ ipika꞉ mani paa mendipelia hayekeeki handolo hata꞉ alota꞉

²⁸A꞉pa꞉e. Yaka manita꞉ I̱ pa꞉ta꞉ paa la꞉ka꞉la a꞉pa pia꞉ka꞉ta꞉me laa penkilipa꞉tia pominolo hata꞉ ipika꞉ hameketonu pa꞉ta꞉ wi alo alota꞉ Do handa꞉pe. Yaka nu pa꞉ta꞉ menda꞉la꞉me leekeme. Kutupa mo hama̱la̱꞉ hama̱la̱꞉na꞉ puki keapa olina꞉ onina꞉ pitolo pututuma꞉ homolo hata꞉ ika꞉ ika꞉ kone lota꞉ pu alualu pitolo alota꞉ Koda꞉ma꞉ niki pa꞉ta꞉ eki hau pea pa꞉la꞉pe lemekeme.

²⁹Iki mo Keinani nane paa opolo a꞉paata꞉ ika꞉ apa꞉ Dieikope pa꞉ta꞉ mo hande iki pa꞉ta꞉ piekeeki paeyaosiki a꞉pa la halolo hata꞉ alota꞉

³⁰Mo Idiepina꞉ kapomanina꞉ you somema꞉ta꞉ niki pa꞉ta꞉ pi taka꞉lake alo hata꞉ nikita꞉ ipika꞉ kenke handuluekema꞉ kika ikiki haliweki poma꞉me lea꞉me.

³¹Koto leeke nikana꞉ma꞉ hombo peaaso alota꞉ Nikita꞉ kika ikiki haliweki dia꞉me. Nikita꞉ ota꞉ hau pitoloma꞉ tapakee laa

³²Nikita꞉ hali homekena꞉ wekitonu paeyao kiki yaapona꞉ ankena꞉ yaapo ya꞉mee. Weki homeketa꞉ homa꞉la꞉me. Kutupa wetepe nane wekita꞉ nika꞉ apa꞉ yaapo oni Keinani pa hala꞉me loma꞉me.

³³Kutupa mo you halima꞉ hombo peaaso alota꞉ Ikita꞉ ota꞉ pi lo haleme haliwekie laa handuluekema꞉ta꞉ dupulueke. Iki ma꞉nda꞉ hondota꞉ I̱ ame̱le̱ pa hapelia hata꞉ta꞉ mo iki paeyaota꞉ mo ika꞉ tea꞉ma꞉ homa꞉la꞉ tapakena꞉ widi napekemanu mea pupee laata꞉

³⁴Ika꞉ wetepe nane wekita꞉ I̱ pa꞉ta꞉ hatuku a꞉pa꞉pa꞉peke. Kutu pimika꞉na꞉ta꞉ kota꞉ ikita꞉ kika ikiki haliweki dia꞉ma꞉ ota꞉ pi aleme haliwekie hone ulueke. Kutupa do ika꞉ kame iki pa꞉ta꞉ paa kiaka꞉na꞉ ikita꞉ dopate hata꞉ ala꞉ta꞉ ala꞉ta꞉ pa tapamena꞉e laa lea꞉me lemekeme.

³⁵Kutupa ikana꞉ma꞉ ika꞉ numanu tokimi dina꞉ta꞉ homeke homekema꞉ ika꞉ mani nu handa꞉ wimikime. Kutupa mo mani hando haota꞉ ikana꞉ma꞉ make ika꞉ apa꞉ Dieikopema꞉ make paala꞉ma꞉ homemekeme.

³⁶Ika꞉ apa꞉ma꞉ mo wekitonu pa꞉ta꞉ alota꞉ Ika꞉ honema꞉ta꞉ yaka wekiwandiki paeyao alu pano pitelemepe. Diosepe pa꞉la꞉me. Simiono make pa꞉la꞉me. Ameta꞉ Benisamini mea polukuma꞉ alemepe. I̱ta꞉ mo teto minolo somee leekeme.

³⁷Koto leeke Lubenima꞉ ipika꞉ ateke pa꞉ta꞉ alota꞉ I̱ma꞉ Benisamini a꞉nda꞉ paa na hatuku epoa꞉ka꞉na꞉ta꞉ kota꞉ nakana꞉ma꞉ yaka weki yaapo luelena꞉e. Mo wekita꞉ yaka kiki pa꞉ta꞉ wie. Kutupa I̱ma꞉ paa hatuku ipulueke leekeme.

³⁸Pate Dieikopema꞉ alota꞉ Yaka wekita꞉ neke yaapo na pena꞉ lolueke. Ipika꞉ hameketa꞉ homolo hata꞉ ipiki homeke hapelia hala꞉me. Mo pota꞉na꞉ hau ma꞉nda꞉ peaapa꞉na꞉ loa꞉me. I̱ta꞉ koke hali yaalo hata꞉ mo ikana꞉ma꞉ mea ipilimi puki tandama꞉ta꞉ I̱ lu homaliekee leekeme.