Read Sembeleke Kini Pieke 49 Bible Online

Kini Pieke 49 - Sembeleke bible

Kini Pieke 49

¹Dieikopema꞉ ipika꞉ wekitonu wi la꞉ mea alota꞉ I̱ hopa꞉lia pita꞉pe laa alota꞉ mo iki pa꞉ta꞉ wetepena꞉ pulu pa꞉la꞉ ekimanu I̱ma꞉ iki la kulukuma꞉ loa꞉me.

²Dieikopena꞉ eiyeke tonuo. Homeke pa꞉ta꞉ a꞉pa taeyao pita꞉ opua꞉pe. Ika꞉ apa꞉ Isulaina꞉ pi opua꞉pe.

³Lubeni neketa꞉ yaka mupeke weki make yaka honkopue. Kutupa I̱ wekihali hata꞉ mondolo mupeke wekie.Yaka weki paeyao ankulake neketa꞉ ta꞉na꞉ ta꞉na꞉ma꞉ homa honkopu wopu haleme.

⁴Neketa꞉ mo hande ta꞉tiki ipula꞉ ikalima꞉ handeleme. Pate neketa꞉ mo titina꞉ halina꞉ biki na wilieke.Pa ekipeke neketa꞉ yaka wetepe wanda꞉ yaapo pelia naka꞉ apa꞉na꞉ da panda꞉ hoeyaeme.

⁵Simiono pita꞉ Lipai yaapota꞉ hama̱la̱꞉e. Ipilikana꞉ma꞉ta꞉ ipilika꞉ a꞉nda꞉ pita꞉la꞉ ale manuma꞉ hali lu homaepeme.

⁶Ipilika꞉ a꞉mbaaso hata꞉ pi pi lo halepeke I̱ma꞉ta꞉ na apa꞉taalueke. Kutupa ipilika꞉ pi hotilipi ale pa꞉ta꞉ make I̱ na apa꞉tiki pulueke.Pa ekipeke ipilikana꞉ma꞉ta꞉ mineke pankolo hata꞉ haliweki lipime. Kutupa telepo alo hata꞉ta꞉ mo hali kao manuta꞉ pa dola꞉pake peaepeme.

⁷Ipilika꞉ mineke pankepe ekita꞉ ota꞉ paala꞉ pikieki ya꞉la꞉ ekina꞉ta꞉ kota꞉ esihou pi wina꞉e. Kutupa make ipilika꞉ lombeipiki mineke pankepe ekita꞉ ota꞉ a꞉ta꞉ma꞉ homa꞉peke na ya꞉la꞉ ekina꞉ loa꞉me.I̱ma꞉ ipilikita꞉ mo Isulai kenke paeyao pa꞉ta꞉ putupa꞉ alu pina꞉ lolueke. I̱ma꞉ta꞉ ipilika꞉ mo Isulai wanda꞉hali ame̱le̱ kone ta꞉ta꞉ ta꞉ta꞉ pea halu pilipikie.

⁸Diuda neketa꞉ naka꞉ kame tonuma꞉ naka꞉ biki yeiya꞉ lalimikie. Nakana꞉ma꞉ta꞉ naka꞉ a꞉nda꞉ tunkiliki tapake manuta꞉ make yola꞉ mea wia haleme. Naka꞉ kame tonuma꞉ta꞉ neke pa꞉ta꞉ panda꞉punialimikie.

⁹Diudata꞉ Laeonoma꞉ handa꞉la꞉me. Ipika꞉ napeke ale liata꞉ oni ipika꞉ da pa꞉ta꞉ la꞉ka꞉la pula꞉me.Kiki anke tindipa tindipa pea polu pila꞉me. Paeyaoma꞉ paala꞉ma꞉ homolo hata꞉ ipiki penkilipa꞉ tiatiki pea꞉peke na ya꞉la꞉me.

¹⁰Diudama꞉ta꞉ mo kinina꞉ minu hala꞉ dolo miniki halieke. Kutupa ipika꞉ monduma꞉ monduma꞉ pilia꞉ wekiwandikina꞉ wekiwandiki pa꞉ta꞉ yama꞉ kini halimanu hoto paeyao handeteke hao hatiki pilimikie.Tutu manuma꞉ta꞉ ipika꞉ dakisi hambuluekema꞉ ala꞉ta꞉ ala꞉ta꞉ mea a꞉palimikie. Kutupa ipiki pa꞉ta꞉ homu pitolo hata꞉ panda꞉punialimikie.

¹¹Ipikana꞉ma꞉ ipika꞉ panake donkita꞉ mo waini puna꞉ endi baasa꞉me. Pa pina꞉ma꞉ mo ota꞉ epeke paeyao ankulake piki waini puna꞉ loa꞉me.Kutupa ipika꞉ aka꞉ manuta꞉ mo we au leke wepiki waini ikali pa꞉ta꞉ tandepo hala꞉me.

¹²Mo waini ikali no haleke yalota꞉ ipika꞉ leke we pupa pa꞉la꞉mee. Ipika꞉ kaketa꞉ andu no haleke yalota꞉ hake pa꞉la꞉mee.

¹³Sebulonita꞉ dawala tea꞉na꞉ pelia haliekee. Ipika꞉ dawala tea꞉na꞉ta꞉ mo kawasomanu epeke tupa꞉ a꞉pa pitina꞉ epeke alena꞉ yelieke. Ipika꞉ kilu tumbuao halo pa꞉la꞉ ekita꞉ ota꞉ mo Saidoni da kenkena꞉ pua tombo pilieke.

¹⁴Isakata꞉ mo hone na wiki donkima꞉ handa꞉la꞉ halie. Mo donki ipikita꞉ oni ipika꞉ hokina꞉ mendiaasa꞉ numanu tukikina꞉ pala꞉mba꞉ pelia꞉la꞉ ma꞉na꞉ loa꞉me.

¹⁵Pate ipika꞉ handolota꞉ do hoto pila꞉ alena꞉ta꞉ a꞉pa꞉la꞉me laata꞉ do kenketa꞉ ota꞉ yole pa꞉la꞉me ala꞉me. Koto ekina꞉ mo ala꞉ta꞉ ala꞉ta꞉ tuluekema꞉ yeke ipika꞉ hoki panda꞉puniaasa꞉me. Kutupa ipikita꞉ pa hameke e pokaasa꞉ some tupa꞉ e pokena꞉ la꞉la꞉me.

¹⁶Da꞉nita꞉ ipika꞉ wanda꞉halina꞉ handeteke hala꞉ some halieke. Ikita꞉ mo hande mandane Isulai tapakema꞉ handilimikie.

¹⁷Da꞉nita꞉ mo pota꞉ tea꞉na꞉ pila꞉ keto wilieke. Mo pota꞉ tea꞉na꞉ hali lita꞉la꞉ ketona꞉ loa꞉me. Mo hosi hokina꞉ pita pula꞉ some ya handa꞉liao lopena꞉yeke mo hosina꞉ kilolikina꞉ awa꞉la꞉ keto wilieke.

¹⁸Tekehalio naka꞉ ka꞉la꞉pa꞉ tapaase eki yu wia halome.

¹⁹Ka꞉da꞉ta꞉ mo pake no haleme tapake ma꞉nda꞉ma꞉ lulu pelia꞉pate paa ipikana꞉ma꞉ la꞉ka꞉la mo tapake telipilieke.

²⁰A꞉seana꞉ kenkena꞉ta꞉ epeke epeke nemanu opilieke. Ipikana꞉ma꞉ta꞉ mo kinima꞉ napeke ya꞉la꞉ epeke nemanu opalieke.

²¹Na꞉petalita꞉ mo walekena꞉ pototo la pomina꞉la꞉ dia ma꞉na꞉ma꞉ handa꞉la꞉me. Ipikita꞉ ota꞉ epeke ikikimanu mondu hala꞉me.

²²Diosepeta꞉ mo tunkulupa ula꞉ ikali tea꞉na꞉ hala꞉ tikene donkima꞉ handa꞉la꞉me. Ipikita꞉ mo yueli pa꞉ta꞉ hala꞉ panake hosi hali ma꞉na꞉ma꞉ handa꞉la꞉me.

²³Ipika꞉ a꞉nda꞉ tunkiliki tapakema꞉ta꞉ ipikita꞉ paala꞉piki tupa꞉ a꞉pa a꞉nda꞉ pilimikie. Kutupa ika꞉ semoko a꞉ndeli manuma꞉ ipiki tolutia pomilimikie.

²⁴Pate ipika꞉ a꞉ndelita꞉ la꞉ma꞉ na pa꞉la꞉me. Kutupa ipika꞉ kiki yaapo honkopu haowala꞉me. Koto hauta꞉ mo Dieikopena꞉ Wele wopupiki Koda꞉na꞉ honkopuma꞉ pia꞉me. Mo hande Sipisipi Handeteke Hala꞉ some Isulaina꞉ handeteke hao hala꞉ Koda꞉ loa꞉me.

²⁵Mo neke tamba꞉ mina꞉la꞉ta꞉ naka꞉ apa꞉na꞉ Koda꞉ma꞉ pita꞉la꞉me. Mo Aneke Wele wopupiki Koda꞉ma꞉ neke epeaasa꞉me.Oli ya nane lakoma꞉ neke epeaasa꞉me. Kutupa oni kenke oto nane opa꞉laasa꞉ ikali manuma꞉ makee. Kaomanu wopu make wekiwandiki wopu make neke epeaasa꞉me.

²⁶Widina꞉ kiliki pita꞉ palawasi yaapoma꞉ make neke epeaasa꞉me. Mo amba꞉ hao haemeke pote manuma꞉ make neke epeaasa꞉me. Kutupa mo pa u tia pu hala꞉ elimanu pa꞉ta꞉ yama꞉ mo ta꞉ta꞉ ta꞉ta꞉ piki epeke alemanu make neke pa꞉ta꞉ ipula꞉me. Do epeaasa꞉ ekimanu paeyaota꞉ Diosepena꞉ ambokena꞉ wina꞉e. Mo ipika꞉ hamekema꞉ handa꞉la꞉ hali dia꞉me laa ma̱leke lila꞉ somena꞉ wenokona꞉ loa꞉me.

²⁷Benisaminita꞉ mo hoke paala꞉ wopupiki tikene kikama꞉ handa꞉la꞉me. Peliolo da kelepolota꞉ pa pitiki alemanu lia ombu na꞉tiki pu hala꞉me laa leekeme.

²⁸Koto mo hande Isulaina꞉ 12 tapakee. Kutupa koto pi manuta꞉ mo hande ateke Dieikopema꞉ ipika꞉ paeyaaso pi alo hata꞉ ipika꞉ weki homeke homeke paeyao pa꞉ta꞉ manda꞉ meaaso hata꞉ leeke pie. Dieikope homeeke hoimikieki

²⁹Kutupa Dieikopema꞉ eiyeketonu taka꞉lakema꞉ pi alo alota꞉ I̱ta꞉ ameta꞉ mo yaka wanda꞉hali ame̱le̱ apa꞉tao homolo pulume. Koto ekina꞉ dupa꞉peke. I̱ta꞉ yaka apa꞉ ame̱le̱ mandakena꞉ mo Keinani kenke pa꞉ta꞉ Ma꞉motena꞉ nate ipula꞉ nanema꞉ tilao Hidi hali Epotonina꞉ Ma꞉ka꞉pila e pa꞉ta꞉ ula꞉ tikene da pa꞉ta꞉ hoiya꞉peke. Eipoloha꞉ma꞉ma꞉ koto apa꞉nda꞉ta꞉ hali hoita꞉la꞉ lapa꞉ wina꞉ mo Epotoni pa꞉ta꞉ hambeeke ekima꞉ pa꞉la꞉me.

³¹Koto pa꞉ta꞉ta꞉ Eipoloha꞉ma꞉ pita꞉ weteke Seta yaapo hoila꞉me. Kutupa koto pa꞉ta꞉ ombuta꞉ Aisa꞉ke pita꞉ weteke Lepeka yaapo make hoila꞉me. Kutupa I̱ma꞉ maketa꞉ koto pa꞉ta꞉ Lia hoiyua꞉me.

³²Mo e make mo tikene da make mo Hidi tapake pa꞉ta꞉ hambeeke ekie. Koto pa꞉la꞉ma꞉ I̱ koto pa꞉ta꞉ hoiya꞉pa꞉peke laa leekeme.

³³Dieikopema꞉ ipika꞉ eiyeketonu pa꞉ta꞉ mana꞉manu halo paeyaota꞉ paa polu hola꞉paka꞉na꞉ homeekeme.