Read Sembeleke Kini Pieke 50 Bible Online

Kini Pieke 50 - Sembeleke bible

Kini Pieke 50

¹Diosepema꞉ta꞉ mo ateke toko manda lopa e̱ alo hata꞉ atekena꞉ leke popeleke nunu piekeme.

²Kutupa ipikana꞉ma꞉ atekena꞉ loke tanda꞉ paama꞉na꞉ mulamula yankape laa leekeme.

³Koto mulamula yankaota꞉ mo Idiepi tapakema꞉ pu haemeke tupa꞉ 40 natemanu pu paeyaemekeme. Kutupa mo Idiepi wanda꞉halima꞉ta꞉ 70 natena꞉ Dieikopena꞉ homa꞉ wia pitimikime.

⁴Mo homa꞉ wia pitimiki nate paeyeke handaata꞉ Diosepema꞉ mo kinina꞉ mandane e pokaemeke haliweki pa꞉ta꞉ alota꞉ Pilisio. Do pi mo kini pa꞉ta꞉ mea pupa꞉e.

⁵Yaka apa꞉ homuluekema꞉ pita꞉ta꞉ mo Keinani kenke pa꞉ta꞉ ipika꞉ amu pea ula꞉ tikene da pa꞉ta꞉ pua hoiya꞉peke laata꞉ I̱ma꞉ pi la꞉ wiono lea꞉me. Koto ekina꞉ pilisio. Yaka apa꞉ hoilu pono lae. Kutupata꞉ I̱ paa la꞉ka꞉la ipulueke laa lapa꞉peke leekeme.

⁶Koto pi opua mo kinima꞉ hombo peaaso alota꞉ Mo naka꞉ pulueke laa la꞉ wi tupa꞉ naka꞉ apa꞉ pua hoiya꞉peke leekeme.

⁷Koto leeke Diosepeta꞉ ipika꞉ apa꞉ hoilu peekeme. Mo kinina꞉ handeteke haemeke haliweki paeyao make kinina꞉ handeteke pila꞉ pa꞉ta꞉ haleme tondiki haliweki make mo Idiepina꞉ biki ula꞉ haliweki paeyao make Diosepe ame̱le̱ pemekeme.

⁸Kutupa ipika꞉ wekiwanda꞉ make ipika꞉ hameketonu make mo ipika꞉ apa꞉na꞉ tapake paeyaosiki make ipiki ame̱le̱ pemekeme. Pate ika꞉ hosiki wekiwandikisunu make ika꞉ sipisipimanu make nanikosimanu make kaomanu make homeke oni Kosene kenke pa꞉ta꞉ pa haemekeme.

⁹Mo hosima꞉ yola꞉la꞉ pota꞉ alena꞉ pila꞉ haliweki make mo hosi hokina꞉ pila꞉ haliweki make Diosepe ame̱le̱ mandakena꞉ pemekeme. Mota꞉ tapaketa꞉ ota꞉ tieke kiake yekeme.

¹⁰Mo tapake hande hoilu pimiki ale teke pa꞉ta꞉ a꞉pa mo Diodanina꞉ nate ipula꞉ nanema꞉ tilao mo widi kilikina꞉ ambuku napeke yaapo putupa alu pa꞉la꞉ hama꞉ ma꞉nda꞉ biki Atade opolo a꞉paata꞉ nate hokuluna꞉ anekema꞉ homa꞉ wia e̱ lemekeme. Kutupa nate wataake hata꞉na꞉ Diosepema꞉ ika꞉ homa꞉ wia pita꞉ pu haemeke tupa꞉ piekeme.

¹¹Kutu pimikieki mo Keinani wanda꞉halima꞉ mo Atade da homa꞉ wimikieki handolo hata꞉ alota꞉ Mo Idiepi tapakema꞉ a꞉ta꞉ tiekema꞉ homa꞉ wia pita꞉la꞉ a꞉ta꞉piki hau tieke kiake pitelememe laa lemekeme. Koto ekina꞉ koto pateta꞉ bikita꞉ Abele Miseteimi lemekeme.

¹²Koto ekina꞉ mo Dieikopena꞉ eiyeke tonuma꞉ta꞉ atekema꞉ pia꞉pa꞉peke leekeeki kone pimikime.

¹³Ipika꞉ toko tia puata꞉ mo hande Eipoloha꞉ma꞉ma꞉ hali lapa꞉ wina꞉yeke mo Keinani kenke pa꞉ta꞉ hande Hidi hali Epotonina꞉ e pa꞉ta꞉ wieke tikene da pa꞉ta꞉ mea pua lapa꞉ pimikime. Koto tikene data꞉ mo Ma꞉motena꞉ nate ipula꞉ nanema꞉ Ma꞉ka꞉pila da kenke pa꞉ta꞉ ula꞉ ekina꞉ loa꞉me.

¹⁴Diosepema꞉ ateke lapa꞉ pea paeyeketa꞉ hameke tonu make mo ipiki ame̱le̱ homa꞉ da pemeke tapake paeyao Idiepi nane la꞉ka꞉la paa pemekeme. Diosepema꞉ hameke tonuna꞉ puki epeayekeeki

¹⁵Mo ika꞉ ateke homea꞉ hoki naneta꞉ Diosepena꞉ hameke tonuma꞉ alota꞉ Mo Diosepema꞉ hande nikana꞉ma꞉ ipiki pa꞉ta꞉ puma꞉ hoke hauna꞉ niki pa honditi pea mo nikana꞉ma꞉ puma꞉ ekina꞉ yenki mulueke laa pota꞉manu wepia꞉ka꞉na꞉ta꞉ kota꞉ eki pumana꞉pe lemekeme.

¹⁶Koto ekina꞉ Diosepe pa꞉ta꞉ pi tapaaso alota꞉ Nika꞉ apa꞉ homuluekema꞉ pita꞉ta꞉ ipikana꞉ma꞉ta꞉ nikana꞉ma꞉

¹⁷neke pa꞉ta꞉ dupa lota꞉ piomono lea꞉me. Pilisio. Naka꞉ kame tonuma꞉ neke luekema꞉ pimi ata꞉ka꞉ peake hauta꞉ pa paeyaapeke lea꞉me. Koto ekina꞉ta꞉ pilisio. Ameta꞉ mo nikana꞉ma꞉ ata꞉ka꞉ peake hau puma꞉eki pa paeyawapeke. Mo hande naka꞉ apa꞉na꞉ Koda꞉na꞉ e pokaasoma꞉ tapakema꞉ poloma꞉ ekina꞉ loa꞉me lemekeme. Diosepema꞉ koto pi mu haota꞉ e̱ leekeme.

¹⁸Kutupa ipika꞉ hameke tonu a꞉pa ipiki pa꞉ta꞉ panda꞉ puniaaso hata꞉ alota꞉ Nikita꞉ ameta꞉ naka꞉ leke popelekena꞉ naka꞉ pa hameke e pokaasoma꞉ tapake do handa꞉e laa lemekeme.

¹⁹Pate Diosepema꞉ mo hameke tonu pa꞉ta꞉ alota꞉ I̱ma꞉ta꞉ yaka kone mo Koda꞉ topo peaka꞉na꞉ I̱ hapeke na ya꞉la꞉me. Paala꞉ma꞉ na homa꞉pa꞉peke.

²⁰Ikana꞉ma꞉ta꞉ I̱ pa꞉ta꞉ hoke hau pimipate Koda꞉ma꞉ta꞉ koto paa topo pea epekeeki au lala꞉me. Kutupa mo koto hau pimi ekita꞉ mo ame pa do haleme wanda꞉hali paeyaona꞉ hao polu pelemeeki epeanoyeke pa꞉la꞉me.

²¹Ikana꞉ma꞉ paala꞉ma꞉ homa꞉pekeeki ma꞉nda꞉ dia꞉me. I̱ma꞉ta꞉ iki make ika꞉ wekiwandiki make handeteke hao halueke leekeme. Koto ekina꞉ mo tapakema꞉ ta꞉na꞉ma꞉ homena꞉ loluekema꞉ ipikana꞉ma꞉ta꞉ mo tapakena꞉ puki liake koto homupiki pi manuma꞉ epeayekeme. Diosepena꞉ homeekeeki

²²Diosepeta꞉ atekena꞉ tapake ame̱le̱ Idiepi kenke pa꞉ta꞉ hao hayekeme. Kutupa bapi 110 haota꞉ homeekeme.

²³Ipikana꞉ma꞉ta꞉ Ipoteimina꞉ wekiwandiki make ipika꞉ wekiwandikina꞉ wekiwandiki make handaa homeekeme. Kutupa make mo ipika꞉ weki ma꞉nda꞉ Ma꞉na꞉sa꞉na꞉ eiyeke Meikana꞉ wekiwandiki mo ipika꞉ tapake pa꞉ta꞉ honda꞉ pambemekeeki handeekeme.

²⁴Ipikana꞉ma꞉ ipika꞉ hameketonu pa꞉ta꞉ alota꞉ I̱ta꞉ homolo poloeki teke pa꞉ta꞉ do ya꞉la꞉me. Pate Koda꞉ma꞉ta꞉ iki ota꞉ epeke tupa꞉ handeteke hao halieke. Kutupata꞉ mo hande ipikana꞉ma꞉ Eipoloha꞉ma꞉ make Aisa꞉ke make Dieikope ameda pa꞉ta꞉ Do kenke kulueke laa la꞉ wieke kenke pa꞉ta꞉ta꞉ ota꞉ iki hatuku pelieke laa leekeme.

²⁵Kutupa Diosepema꞉ ipika꞉ wanda꞉hali pa꞉ta꞉ta꞉ keke pi dupa lape laata꞉ honke leekeme. Ipikana꞉ma꞉ alota꞉ I̱ pa꞉ta꞉ pi la꞉ wipe laata꞉ Koda꞉ma꞉ iki koto kenke pa꞉ta꞉ hatuku pea꞉ka꞉na꞉ta꞉ kota꞉ yaka toko iki ame̱le̱ mandakena꞉ mea polumekee laa la꞉ wipee leekeme.

²⁶Kota꞉ Diosepeta꞉ 110 bapina꞉ Idiepi kenke pa꞉ta꞉ homeekeme. Mo tapakema꞉ta꞉ ipika꞉ lokena꞉ na tanda꞉pa꞉la꞉ mulamula ana꞉na꞉ yankao hali toko pamba꞉la꞉ bokisi pa꞉ta꞉ wimikime.