Read Sembeleke Kini Pieke 6 Bible Online

Kini Pieke 6 - Sembeleke bible

Kini Pieke 6

¹Mo hande wanda꞉hali paeyao kenke honiki honiki paeyaona꞉ putupieke handaata꞉ wandiki titi make mendimikime.

²Kutupa mo wandiki tonuta꞉ seliapo pimiki handaa mo Koda꞉na꞉ eiyeke tonuma꞉ ika꞉ hone pia꞉ tupa꞉ muma꞉ muma꞉ pimikime.

³Kutupa Tekehalima꞉ alota꞉ I̱ma꞉ mo wanda꞉halita꞉ pa na hao haena꞉ lolueke laata꞉ Pa ekipeke ikita꞉ homa꞉peke ya꞉la꞉ loke halemeke handa loa꞉me. Koto ekina꞉ ame do siki kini pea puata꞉ ma꞉nda꞉ 120 bapi haka꞉ta꞉pao na haena꞉ lolueke leekeme.

⁴Koto nate nina꞉ make wetepe nina꞉ make do kenkena꞉ta꞉ mo hande kenke wanda꞉ pita꞉ Koda꞉na꞉ eiyeke yaapona꞉ monduma꞉ monduma꞉ pieke weki titita꞉ ankolomeke haliweki titima꞉ handemekeme. Ikita꞉ you hali tieke tieke hata꞉ ikita꞉ mo amba꞉ kiake haemeke wanda꞉halina꞉ biki kende tupaa wieke haliweki yekeme.

⁵Mo Tekehalima꞉ do kenkena꞉ haemeke wanda꞉hali paeyaoma꞉ hoto paeyao ika꞉ putia peme hoke haumanu make ika꞉ temokona꞉ honemanu u tia peme ekimanu make hando haota꞉

⁶ipikana꞉ma꞉ alota꞉ oni wanda꞉halita꞉ pa ekipeke do kenkena꞉ haena꞉ wepia polope hone wiekeme. Koto ekina꞉ koto hone wotu witolo hata꞉ alota꞉

⁷I̱ma꞉ do wepolo wanda꞉hali make hotekemanu make bamanu make paeyaota꞉ I̱ma꞉ kone homena꞉ lia baalueke laa I̱ma꞉ta꞉ pa ekipeke wepia polope leekeme.

⁸Pate mo Tekehalima꞉ta꞉ Noa yaapota꞉ ta꞉na꞉ma꞉ homeekeme. Noa

⁹Dota꞉ Noa tapakena꞉ pie. Ipikita꞉ weki tepo mondu wiekeme. Seme make Ha꞉me make Dieipedi make yekeme. Noa hayeke natena꞉ ipikita꞉ pu ata꞉ka꞉ peaya꞉eki ma꞉nda꞉ dia꞉yalo hata꞉ ipiki homeke homeke epeke some hayekeme. Ipikita꞉ Koda꞉ yaapo ta꞉ma꞉ni pea hayekeme.

¹¹Pate Koda꞉na꞉ leke popelekena꞉ wanda꞉hali paeyaota꞉ hoke hauma꞉ tumbulu bao make haku na piki hau pita꞉la꞉eki manuma꞉ta꞉ kenke honiki paeyao pa꞉ta꞉ putu piekeme.

¹²Kutupa Koda꞉ma꞉ handeekepate do kenketa꞉ hoeya꞉pa wia wanda꞉hali paeyaota꞉ hokeeki pa꞉ta꞉ haemekeme.

¹³Koda꞉ma꞉ Noa pa꞉ta꞉ alota꞉ I̱ma꞉ wanda꞉hali paeyao ota꞉ hoeyaalueke hone witolome laata꞉ Do kenkena꞉ta꞉ ika꞉ haku na piki hau manuma꞉ tumba꞉la꞉ ekina꞉ iki paeyao siki hoeyaalueke.

¹⁴Kutu pulu pa꞉la꞉ ekina꞉ nakana꞉ma꞉ epeke tima꞉ naka꞉ sisima a꞉eyaa tukiki naneta꞉ da panda꞉manu wepiaata꞉ oni tukiki nane make hama꞉ nane make ota꞉ paeyao koloda lia꞉peke.

¹⁵Kutupa hokulu pulu pa꞉la꞉ ekina꞉ tombota꞉ 133 mida wepiaata꞉ mo petipeke ya꞉la꞉ ekina꞉ tombota꞉ 22 mida wepia haliao halo pa꞉la꞉ ekina꞉ tombota꞉ 13 mida wepia꞉peke.

¹⁶Kutupa mo sisimana꞉ta꞉ holu wepia mo holu tukikina꞉ make pa꞉ta꞉liki yaapona꞉ make waleke 44 sendimida wina꞉ lapeke. Kutupa mo sisimana꞉ tukiki pa꞉ta꞉ta꞉ puku tepo wiaata꞉ tea꞉na꞉ta꞉ pota꞉ kake lombapeke.

¹⁷Pa ekipeke I̱ma꞉ta꞉ do kenkena꞉ haleme pa pitiki ale paeyao siki hoeyaaluekema꞉ yeke ikali tieke a꞉meina꞉ tapaaluekema꞉ loa꞉me. Kutupa do kenkena꞉ haleme aleta꞉ ota꞉ paeyao homilimikie.

¹⁸Pate I̱ma꞉ta꞉ neke pa꞉ta꞉ ya pi la꞉ ulueke. Koto ekina꞉ naka꞉ wanda꞉ ipiliki make naka꞉ weki tonu make ika꞉ wanda꞉weki make oni sisima pa꞉ta꞉ pupe.

¹⁹Kutupa ta꞉ta꞉ ta꞉ta꞉ piki hotekemanu make bamanu make homaama꞉na꞉ wanda꞉eki mea꞉tiki halieki mea꞉tiki pea oni sisima pa꞉ta꞉ mea pupe.

²¹Kutupa ika꞉ ne make mo hoteke ba manuna꞉ make nolo peleme nemanu make mea pua꞉pa꞉peke leekeme.

²²Koto leeke handaa Noama꞉ta꞉ Koda꞉ma꞉ pea꞉peke leeke hau sunu paeya꞉ tapao ana꞉na꞉ piekeme.