Read Sembeleke Kini Pieke 8 Bible Online

Kini Pieke 8 - Sembeleke bible

Kini Pieke 8

¹Koda꞉ma꞉ta꞉ Noa pita꞉ mo sisima pa꞉ta꞉ pitimiki tapake paeyaota꞉ hone na yonka꞉laeyekeme. Ipikana꞉ma꞉ po epena꞉ leeketa꞉ mo ikali kini pea o̱ loma꞉ loma꞉ piekeme.

²Mo hande kenke oto nane a꞉liaeyeke ikali pita꞉ oli ya nane lombolu baeyeke ikali yaapo telipina꞉ a꞉mbeeketa꞉ mo lako paeyekeme.

³Kutupa mo ikalita꞉ pa 150 nate ma꞉nda꞉na꞉ta꞉ o̱ loma꞉ loma꞉ piekeme.

⁴Kutupa mo wataake peao kaisepona꞉ pula yaapona꞉ nate tepona꞉ mo sisimata꞉ mo A꞉ta꞉ta꞉de tokona꞉ a꞉pa wiekeme.

⁵Kutupa mo ikalita꞉ o̱ la꞉niatia pua kiki yaapo peao kaisepo opeeke titina꞉ natena꞉ta꞉ mo pote tumikimanu peneme yao waleekeme.

⁶Kutupa nate hali tieke yaapo paeyeketa꞉ Noama꞉ da ka꞉ka꞉na꞉ ma꞉nda꞉ lomba

⁷mo (da꞉e̱i̱nkima꞉ handeke) ba homeke ipika꞉ biki leibeni tapaeyekeme. Mo hande ba paa na la꞉ka꞉la epeeketa꞉ mo ikali o̱ la hala꞉pa꞉ wina꞉yeke pa a̱ya̱ pomu lopo hayekeme.

⁸Kutu pieketa꞉ Noama꞉ mo ikali o̱ la꞉niala꞉pe la handena꞉ yeke paa ba ma꞉nda꞉ melipu tapaeyekepate

⁹mo kenketa꞉ ikalima꞉ pa tote pea wiekeeki yalo mo melipu ipiki pita꞉peke alena꞉ dia꞉yeke handaa paa mo sisima wieke alena꞉ pa la꞉ka꞉la peekeme. Kutu pieke handaa Noama꞉ kiki hama꞉ nane pena꞉ laa mo ba handa꞉ miekeme.

¹⁰Kutupa mo hoto wataake hata꞉ nate pa yu wia haota꞉ mo hande melipu paa pena꞉ tapaeyekeme.

¹¹Kutu pieketa꞉ mo melipuma꞉ta꞉ nate oni pambolo pulu haena꞉ ipika꞉ kake pa꞉ta꞉ mo panake olipi katake hapula Noa pa꞉ta꞉ paa epeekeme. Kutu piekeeki handaa Noama꞉ta꞉ mo ikalita꞉ o̱ la꞉niaya꞉ka꞉ta꞉me hone wiekeme.

¹²Kutupa Noama꞉ wataake hata꞉ natena꞉ pa hao mo melipu paa tapaeyekepate koto natena꞉ta꞉ mo hande bata꞉ paa na la꞉ka꞉la epeekeme.

¹³Mo Noata꞉ 601 bapi mieketa꞉ mo titina꞉ kaisepona꞉ titina꞉ natena꞉ta꞉ mo ikalita꞉ ota꞉ o̱ la꞉niayekeme. Kutu pieke handaa Noama꞉ta꞉ mo sisima a꞉mbaeyeke ale mea bao lekema꞉ lekema꞉ piekepate mo kenketa꞉ hapuma꞉ hapuma꞉ pia꞉eki handeekeme.

¹⁴Mo yaapo peao kaisepona꞉ pula tepo paeya yunki mindiki hata꞉ peao natena꞉ta꞉ mo kenketa꞉ ota꞉ hapupa peekeme.

¹⁵Koda꞉ma꞉ Noa pa꞉ta꞉ alota꞉

¹⁶Naka꞉ wanda꞉ make naka꞉ weki tooli tooli make hama opolu bao yopupe laata꞉

¹⁷Mo ba manuma꞉ make hoteke manuma꞉ make mendiolo mendiolo ombu haya꞉ka꞉na꞉ do kenke honiki paeyao pa꞉ta꞉ sembelena꞉ mea opolu bapee leekeme.

¹⁸Koto leeke Noa tooli make ipilika꞉ weki tooli tooli make mo sisima mina꞉pa꞉lao hama opolu bao pemekeme.

¹⁹Kutupa mo hotekemanu make bamanu make ika꞉ homeke tapake sunu lo mandakena꞉ opolu baemekeme. Noama꞉ hoteke lia haleekeeki

²⁰Noama꞉ta꞉ Koda꞉ pa꞉ta꞉ oloda wepiata꞉ mo ha̱i̱ na ta̱leke hotekemanu make bamanu make tapake tapakena꞉ homeke homeke lo mea tieke tonka꞉na꞉ mo olodana꞉ lu yanka haleekeme.

²¹Kutu pieke handaa mo lia haleeke hotekena꞉ totopo seliapoma꞉ta꞉ mo Tekehali ta꞉na꞉ homa꞉ tiayeke handaa ipika꞉ kone alota꞉ Do wanda꞉halima꞉ pu haleme ekina꞉ I̱ma꞉ do kenketa꞉ esihou pi oto pa꞉ta꞉ ota꞉ paa na wina꞉ lolueke. Pa ekipeke ika꞉ mo panake daeta꞉la꞉me ale pa꞉ta꞉ koneta꞉ hoke honemanu wilimi ekita꞉ I̱ma꞉ hone ulu ekina꞉ loa꞉me. Koto ekina꞉ I̱ma꞉ ame do pua꞉ tupa꞉ mo do kenkena꞉ pa pitiki alemanu paeyao ota꞉ paa a꞉nda꞉ na hoeyaalueke.

²²Kutupa do kenke pa wina꞉ta꞉ noka꞉pa꞉la꞉ nate make ne napeke mina꞉la꞉ nate make wilieke. Kutupa make hoto paeyao kosa꞉ make titipu make nate ki make lako ki make nate make timba꞉ make ota꞉ pa u̱ pelia halieke leekeme.