Read Sembeleke Ma꞉tiu 1 Bible Online

Ma꞉tiu 1 - Sembeleke bible

Ma꞉tiu 1

¹Dota꞉ mo hande Yesu Ketisona꞉ apa꞉meina꞉ bikimanu wape pa꞉la꞉ekie. Deipidita꞉ Yesuna꞉ meiyeke hayekeme. Kutupa Eipoloha꞉ma꞉ta꞉ Deipidina꞉ meiyeke hayekeme.

²Eipoloha꞉ma꞉ma꞉ta꞉ Aisa꞉ke mondu wiekeme.Aisa꞉kema꞉ta꞉ Dieikope mondu wiekeme.Dieikopema꞉ta꞉ Diuda hama̱la̱꞉ hama̱la̱꞉ mondu wiekeme.

³Diudama꞉ta꞉ Petese pita꞉ Seta yaapo mondu wiekeme. Ipilika꞉ ama꞉na꞉ bikita꞉ Tama.Petesema꞉ta꞉ Hesotono mondu wiekeme.Hesotonoma꞉ta꞉ La꞉mi mondu wiekeme.

⁴La꞉mima꞉ta꞉ Amina꞉da꞉be mondu wiekeme.Amina꞉da꞉bema꞉ta꞉ Na꞉sioni mondu wiekeme.Na꞉sionima꞉ta꞉ Sa꞉limoni mondu wiekeme.

⁵Sa꞉limonima꞉ta꞉ Boa꞉si mondu wiekeme. Boa꞉sina꞉ ama꞉ta꞉ Leiha꞉pe hayekeme.Boa꞉sima꞉ta꞉ Obedi mondu wiekeme. Ipika꞉ ama꞉ta꞉ Luti hayekeme.Obedima꞉ta꞉ Diesi mondu wiekeme.

⁶Diesima꞉ta꞉ mo hande kini halo pieke hali Deipidi mondu wiekeme. Deipidima꞉ta꞉ Solomono mondu wiekeme. Koto Solomono ipika꞉ ama꞉ta꞉ titina꞉ Yutaeyama꞉ miekeme.

⁷Solomonoma꞉ta꞉ Leoboeme mondu wiekeme.Leoboemema꞉ta꞉ Abidia mondu wiekeme.Abidiama꞉ta꞉ Asa mondu wiekeme.

⁸Asama꞉ta꞉ Dia꞉hosapa꞉ti mondu wiekeme.Dia꞉hosapa꞉tima꞉ta꞉ Diehotami mondu wiekeme.Diehotamima꞉ta꞉ Asaiya mondu wiekeme.

⁹Asaiyama꞉ta꞉ Diota꞉mi mondu wiekeme.Diota꞉mima꞉ta꞉ Eiha꞉si mondu wiekeme.Eiha꞉sima꞉ta꞉ Hesikaiya꞉ mondu wiekeme.

¹⁰Hesikaiya꞉ma꞉ta꞉ Ma꞉na꞉se mondu wiekeme.Ma꞉na꞉sema꞉ta꞉ A꞉mono mondu wiekeme.A꞉monoma꞉ta꞉ Diosaiya mondu wiekeme.

¹¹Diosaiyama꞉ta꞉ mo hande Isulai wanda꞉hali Ba꞉biloni dipula hatuku peme natena꞉ta꞉ Dia꞉hoya꞉kini hama̱la̱꞉ hama̱la̱꞉ mondu wiekeme.

¹²Ba꞉biloni nane hata꞉ta꞉ Dia꞉hoya꞉kinima꞉ta꞉ Sieletieli mondu wiekeme.Sieletielima꞉ta꞉ Setubabele mondu wiekeme.

¹³Setubabelema꞉ta꞉ Abiudi mondu wiekeme.Abiudima꞉ta꞉ Eliakimi mondu wiekeme.Eliakimima꞉ta꞉ Aso mondu wiekeme.

¹⁴Asoma꞉ta꞉ Sa꞉doki mondu wiekeme.Sa꞉dokima꞉ta꞉ Akimi mondu wiekeme.Akimima꞉ta꞉ Eliudi mondu wiekeme.

¹⁵Eliudima꞉ta꞉ Eliasa mondu wiekeme.Eliasama꞉ta꞉ Ma꞉tani mondu wiekeme.Ma꞉tanima꞉ta꞉ Dieikope mondu wiekeme.

¹⁶Dieikopema꞉ta꞉ mo hande Meti mieke hali Diosepe mondu wiekeme.Metima꞉ta꞉ mo hande Yesu biki ma꞉nda꞉ Ketiso lo pieke hali mondu wiekeme.

¹⁷Koto ekina꞉ Eipoloha꞉ma꞉ma꞉ kini pu mea pua Deipidima꞉ tombo wia koto pa꞉ta꞉ haemeke apa꞉meita꞉ kiki yaapona꞉ tonkopu haemekeme. Deipidima꞉ kini pu mea pua Ba꞉biloni pemeke ekima꞉ tombo wia koto pa꞉ta꞉ haemeke apa꞉meita꞉ kiki yaapona꞉ tonkopu haemekeme. Kutaa make mo Ba꞉biloni pemeke ekima꞉ kini pu mea pua Ketisoma꞉ tombo wia koto pa꞉ta꞉ haemeke apa꞉meita꞉ kiki yaapona꞉ tonkopu ombu haemekeme. Yesu Ketisona꞉ ma꞉nda꞉la꞉eki

¹⁸Yesu Ketisona꞉ ma꞉nda꞉la꞉ ekita꞉ dupa. Ipika꞉ ama꞉ Metita꞉ Diosepena꞉ tome wandiki hayekepate ipika꞉ da a̱i̱ na peke hata꞉ mo Holi Sipitidima꞉ pitayeke weki mendia꞉peke yekeeki hando wiekeme.

¹⁹Diosepe epeke hali yaalo mo Meti yaala꞉ma꞉ homaaluekema꞉ hone na wieke handaa ipilika꞉ tome haepekeeki a꞉mbao mina꞉pa꞉lalueke hone wiekeme.

²⁰Diosepema꞉ koto piki honemanu witolo haena꞉ta꞉ timba ma꞉nda꞉na꞉ ipika꞉ upa pa꞉ta꞉ yama꞉ Koda꞉na꞉ enisolo homeke opolo a꞉pa alota꞉ Deipidina꞉ weki Diosepeo. Meti naka꞉ wanda꞉ haena꞉ muluekema꞉ta꞉ paala꞉ma꞉ na homa꞉peke. Pa ekipeke mo weki pita꞉la꞉ ekita꞉ mo Holi Sipitidima꞉ kone peawala꞉me.

²¹Mo wekita꞉ hali weki mendilieke. Kutu pia꞉ka꞉na꞉ ipika꞉ wanda꞉hali mea da꞉taalo pa꞉la꞉ ekina꞉ yeketa꞉ ipika꞉ biki Yesue lelipipikie leekeme.

²²Meti pa꞉ta꞉ do haumanu peayeke ekita꞉ mo Tekehalima꞉ amba꞉ titina꞉ ipika꞉ potopede hali pa꞉ta꞉ yama꞉ la꞉ wieke pimanu paeyao peneme yaaluekema꞉ yeke piekeme.

²³Mo potopede halima꞉ta꞉ dupa leekeme. Mo halima꞉ na watake wandikina꞉ weleke pa꞉ta꞉ta꞉ weki weleke lombaata꞉ hali weki mendilieke. Koto wekina꞉ bikita꞉ Imanua꞉le lelieke leekeme. Koto bikina꞉ teketa꞉ Koda꞉ niki ame̱le̱ a꞉pa hala꞉me.

²⁴Diosepe tiaota꞉ mo hande enisoloma꞉ leeke tupa꞉ Metima꞉ ipika꞉ wanda꞉ haena꞉ miekeme.

²⁵Kutu piekepate mo weki pa pita꞉ paleke haena꞉ta꞉ loke na apa꞉taepekeme. Mo weki hamba꞉ mieketa꞉ Diosepema꞉ ipika꞉ bikita꞉ Yesue leekeme.