Read Sembeleke Ma꞉tiu 10 Bible Online

Ma꞉tiu 10 - Sembeleke bible

Ma꞉tiu 10

¹Yesuma꞉ ipika꞉ hoki nane telimiki 12 haliweki wi la꞉ mea momba꞉lao hata꞉ mo hoke temokomanu tolu lia꞉peke welemanu make hoke yeni tekemanu make wamo pea꞉peke welemanu make iki pa꞉ta꞉ ana꞉na꞉ haleekeme.

²Koto 12 Aposolo haliwekina꞉ biki manuta꞉ doe. Titina꞉ta꞉ Saimono biki ma꞉nda꞉ta꞉ Pida kutupata꞉ Pida ipika꞉ hameke A꞉ndutu make Sepedina꞉ eiyeke Dia꞉mesi Dioni hama̱la̱꞉ make

³Pilipi make Badolomiu make Tomasi make mo hande dakisi mu hayeke some Ma꞉tiu make A꞉lopia꞉sina꞉ eiyeke Dia꞉mesi make Ta꞉dia꞉si make

⁴Saimono Seloti make mo hande Yesu lina꞉ a꞉nda꞉ lombea꞉ hali Diudasi Isekatioti make ika꞉ biki paeyaota꞉ koto wape pea ula꞉ handa꞉pe. Mo 12 haliwekima꞉ e pokaena꞉ tapaa tapaa piekeeki

⁵Koto 12 haliweki tapaaluekema꞉ hata꞉ta꞉ Yesuma꞉ iki pa꞉ta꞉ dupiki pi leekeme. Mo Diendaili tapakena꞉ da yu pa꞉ta꞉manu o Sametia tapakena꞉ da teke pa꞉ta꞉manu make na pua꞉pa꞉peke leekeme.

⁶Pate kutu piteleme tupa꞉ta꞉ mo Isulaina꞉ alu peleme sipisipima꞉ handeleme wanda꞉hali pa꞉ta꞉ pua꞉pa꞉peke leekeme.

⁷Kutupa iki puaata꞉ dupiki pi lapa꞉peke Mo hande Hepenina꞉ Kilu Tombuao Hala꞉ ekita꞉ iki teke pa꞉ta꞉ ta a꞉pa hala꞉ handa꞉pe lapa꞉peke.

⁸Koto alo hata꞉ta꞉ mo yeni haleme wanda꞉halina꞉ yeni wamo peao make mo homemeke tokomanu mea da꞉tao make wanda꞉halina꞉ lokena꞉ hala꞉ kindi yenimanu epeaaso hata꞉ mo hoke temokomanu tolu lu pia꞉pa꞉peke. Do koto pea꞉pa꞉peke alo ekita꞉ pa hameke mimi ekina꞉ ikana꞉ma꞉ make pa hameke hala꞉pa꞉peke.

⁹Ika꞉ pausa pa꞉ta꞉ kolo mani o silipa mani o wepiki toeamanu make na mendia꞉pa꞉peke.

¹⁰Ta pota꞉na꞉ poluekema꞉ta꞉ nu o topo dau o topo ankedake o tumapu make na mea pu pea꞉pa꞉peke. Pa ekipeke. Mo e pokaasa꞉ halima꞉ta꞉ ipika꞉ e pokaasa꞉ alemanu kone hala꞉peke ya꞉lieke.

¹¹Ikana꞉ma꞉ mo daoni pa꞉ta꞉manu o da teke pa꞉ta꞉manu opolo pemeka꞉na꞉ta꞉ kota꞉ koto pa꞉ta꞉ mo epeke tikitiki piki hali ma꞉nda꞉ weiya handaata꞉ koto somena꞉ da topo na piki pa pelia haota꞉ kenke ma꞉nda꞉ pa꞉ta꞉ puluekema꞉ mina꞉pa꞉lao pua꞉pa꞉peke.

¹²Da homeke a꞉nda꞉ pa꞉ta꞉ honda꞉ pambolo hata꞉ta꞉ dupiki pi lapa꞉peke Do da pa꞉ta꞉ haleme wanda꞉hali paeyaota꞉ Koda꞉ma꞉ epeaena꞉e lapa꞉peke.

¹³Koto da pa꞉ta꞉ halimi wanda꞉halima꞉ a꞉nda꞉ iki pa꞉ta꞉ ta꞉na꞉ma꞉ homolo hata꞉ A꞉pa꞉la꞉ma꞉ epoe lemeka꞉na꞉ta꞉ kota꞉ koto epeaasa꞉ pita꞉ mo da pa꞉ta꞉ ota꞉ u pelia haena꞉ lapa꞉peke. Pate iki ta꞉na꞉ na homemeka꞉na꞉ta꞉ kota꞉ koto epeaasa꞉ pita꞉ paa yoka꞉ mea꞉pa꞉peke.

¹⁴Kutaa make mandane daoni o da teke manuma꞉ a꞉nda꞉ iki pa꞉ta꞉ Epeke a꞉pa꞉la꞉me laa na handa꞉ mu make o ika꞉ pi na opu pimika꞉na꞉ta꞉ kota꞉ koto da yu mina꞉pa꞉lao ika꞉ ankena꞉ pa꞉la꞉ dokolo tande laa mina꞉pa꞉lao pua꞉pa꞉peke.

¹⁵I̱ma꞉ iki pa꞉ta꞉ ota꞉ ota꞉ pi alome. Mo Koda꞉na꞉ pi yokaalu pulu pa꞉la꞉ nate tieke ipilia꞉ dina꞉ta꞉ mo hande Sodomo da pita꞉ Komoto da yaapo pa꞉ta꞉ halo pa꞉la꞉ hoke yenkita꞉ ota꞉ tieke mulu pelepepate pa koto ikana꞉ma꞉ walimi pi kiaalimi wanda꞉hali ikana꞉ma꞉ mulu peleme yenkita꞉ Koda꞉ma꞉ ota꞉ haka꞉ta꞉pao halieke alome leekeme. Tanda mea꞉pekeeki

¹⁶Opua꞉pe. Ikita꞉ mo honkopu wopu na hake sipisipimanu tupa꞉ ya꞉la꞉pate I̱ma꞉ iki mo tikene iyamanu tukiki pa꞉ta꞉ hamena꞉ tapaasome. Koto ekina꞉ mo hande ketoma꞉ kimelema꞉ pomua꞉la꞉ tupa꞉ iki make kimelema꞉ pomua꞉pa꞉peke. Kutaa make mo hande dokolo ba manuma꞉ epeke tupa꞉ momba꞉la pitu haleme tupa꞉ iki make sembepela hao hapa꞉peke.

¹⁷Mo haliwekima꞉ iki pa꞉ta꞉ pulu peleme ekimanu wopu handeteke hao hapa꞉peke. Ikana꞉ma꞉ iki da꞉ka꞉pa꞉ mina pi yokaaluna꞉ mea pua make mo ika꞉ pi hotu haleme da pa꞉ta꞉manu iki yombilimikie.

¹⁸Paa yanaaso ya biki hoeyaaluekema꞉ ikana꞉ma꞉ ikita꞉ mo kapomani tumiki haliwekimanu pa꞉ta꞉ make mo kinimanu pa꞉ta꞉ make hatuku pelimikie. Kutu pilimi toma꞉na꞉ta꞉ ikana꞉ma꞉ mo Pi Seliapota꞉ koto kapomani tumiki haliweki pa꞉ta꞉ make mo Diendaili wanda꞉hali pa꞉ta꞉ make waloemena꞉ waleke wilieke.

¹⁹Iki da꞉ka꞉pa꞉ minilimi pita꞉ma꞉ta꞉ Do pi yokaalu pa꞉ta꞉ta꞉ eki pi lolua꞉pe o eki pa hombo pealua꞉pe laa hone ti na yoko hapa꞉peke. Pa ekipeke. Mo pi yokaalu tukiki pa꞉ta꞉ ika꞉ pi kini pilimi toma꞉na꞉ta꞉ mo ika꞉ lolo peleme pita꞉ pa peneme yaeya꞉ka꞉na꞉ta꞉ ana꞉na꞉ mea lelimikie.

²⁰Koto mo ikana꞉ma꞉ lolo peleme pi manuta꞉ ika꞉ pimanu dia꞉ ya꞉la꞉pate mo ika꞉ Apa꞉na꞉ Sipitidima꞉ ika꞉ lelimi pi pa꞉ta꞉ yama꞉ la꞉na꞉ yeke epena꞉ ala꞉ekie.

²¹Haliwekima꞉ ika꞉ hamekemanu kone lia homaena꞉ mea halimikie. Ateke tonuma꞉ ika꞉ weki wandiki pa꞉ta꞉ make homeke hau kone pina꞉ lelimikie. Mo wekiwandikima꞉ make paa ateke inkiki pa꞉ta꞉ la꞉ka꞉la꞉ moneao a꞉nda꞉ litolo hata꞉ mo ateke inkiki ma꞉nda꞉ma꞉ lia homaena꞉ halimikie.

²²Ikana꞉ma꞉ ya e pokaaseme haliweki hata꞉ ya biki miniki haleme ekina꞉ta꞉ wanda꞉hali paeyaoma꞉ iki hoki wala kialimikie. Kutu pilimipate kone mo haumanu ipulu haena꞉ kone mo paelo pa꞉la꞉ nate opolo epena꞉ yu wia hata꞉ honkopu hao bepolatiki pu halia꞉ someta꞉ da꞉taa haena꞉ lelieke.

²³Ikana꞉ma꞉ daoni homeke a꞉nda꞉ pa꞉ta꞉ halimipate wanda꞉halima꞉ iki pa꞉ta꞉ tanda kimika꞉na꞉ta꞉ kota꞉ daoni ma꞉nda꞉ pa꞉ta꞉ pindipa pua꞉pa꞉peke. I̱ma꞉ iki pa꞉ta꞉ ota꞉ ota꞉ pi alome. Mo Wanda꞉halina꞉ Eiyeke opolo epea꞉ka꞉na꞉ta꞉ ikana꞉ma꞉ mo Isulaina꞉ daoni paeyao pa꞉ta꞉ pokolo peleme emanu paeyao titina꞉ amba꞉la na mina꞉pa꞉lalimikie alome.

²⁴Mo sukulu pita꞉la꞉ weki o wandikita꞉ ipika꞉ wala꞉la꞉ disa some lombei peao na hala꞉me. Koto tupa꞉ kone mo pa hameke e pokaasa꞉ some make ipika꞉ e teke hali lombei peao na hala꞉me.

²⁵Koto ekina꞉ta꞉ mo sukulu pita꞉la꞉ wekima꞉ta꞉ ipika꞉ hone pa꞉ta꞉ta꞉ Yaka disa some tupa꞉ halueke laa hone pia꞉ka꞉na꞉ta꞉ kota꞉ ana꞉ pilieke. Koto tupa꞉ kone mo e pokaasa꞉ somema꞉ make Ya e teke hali tupa꞉ kone halueke laa hone pia꞉ka꞉na꞉ta꞉ kota꞉ koto make ana꞉ pilieke. Wanda꞉halima꞉ mo da homeke pa꞉ta꞉ pambo haleme tapakena꞉ Ateke pa꞉ta꞉ mo hande hoke biki Bielisibulu la꞉ wiaemeka꞉na꞉ta꞉ kota꞉ ipika꞉ wekiwandiki pa꞉ta꞉ make koto biki ota꞉ lombei piki ota꞉ hoke bikimanu kone la꞉tiki pilimikie.

²⁶Kutu pu halimipate ikana꞉ma꞉ mo wanda꞉hali pa꞉ta꞉ paala꞉ma꞉ na homa꞉pa꞉peke. Epi pa꞉ta꞉ paala꞉ma꞉ homa꞉peke ya꞉la꞉pe

²⁷I̱ma꞉ iki pa꞉ta꞉ timba nane la kitolo pimanu paeyao natepa nane ikana꞉ma꞉ peneme yao wilimikie. Kutupa ika꞉ honumake siki pita꞉ opimi pimanu paeyaota꞉ mo da holu manda nina꞉ tiao hata꞉ paeyaoma꞉ opina꞉ peneme yao la halimikie.

²⁸Mo ika꞉ loke lia homalo pa꞉lemepate ika꞉ temoko lia homaaluekema꞉ wataapeke na ya꞉la꞉ wanda꞉hali pa꞉ta꞉ paala꞉ma꞉ na homo hapa꞉peke. Pate mo ika꞉ loke pita꞉ temoko yaapo ti to hala꞉ ale pa꞉ta꞉ tapao hoeyaapeke Koda꞉ pa꞉ta꞉ homeke ota꞉ paala꞉ma꞉ homo hapa꞉peke.

²⁹Hosiki ba siki yaapota꞉ makedina꞉ yenki 10 toea sikima꞉ hamba꞉peke ba siki yaapo yolo pa꞉la꞉pate mo Apa꞉ Koda꞉ma꞉ mo basunu homeke ma꞉nda꞉ honda꞉pa pene waleke na wina꞉ lea꞉ka꞉na꞉ta꞉ kota꞉ homeke a꞉nda꞉ kenkena꞉ honda꞉pa na lopilieke.

³⁰Kutaa ameta꞉ ika꞉ ekina꞉ make dupa alome Ika꞉ you itiki paeyaota꞉ amba꞉ kone yata꞉pa ana꞉ lao ula꞉me.

³¹Koto ekina꞉ta꞉ ikana꞉ma꞉ paala꞉ma꞉ na homo hapa꞉peke. Pa ekipeke. Ika꞉ tombota꞉ koto hosiki basunu wopuna꞉ yenki ota꞉ lombei pa꞉la꞉me. Ketisona꞉ biki peneme yaasa꞉eki

³²Ma꞉nda꞉ epima꞉ wanda꞉halina꞉ leke popelekena꞉ peneme yaaso hata꞉ I̱ta꞉ Ketisona꞉ halie lea꞉ka꞉na꞉ta꞉ kota꞉ I̱ma꞉ make mo ya hepeni hala꞉ Apa꞉na꞉ leke poto poto hata꞉ ipiki pa꞉ta꞉ make homeke hau kone pulueke.

³³Pate ma꞉nda꞉hali epima꞉ wanda꞉halina꞉ leke poto poto hata꞉ yaka biki na leke I̱ hoki wala haya꞉ka꞉na꞉ta꞉ kota꞉ I̱ma꞉ make mo ya hepeni hala꞉ Apa꞉na꞉ leke poto poto hata꞉ ipiki pa꞉ta꞉ make kutu pulueke. I̱ pa꞉ta꞉ amba꞉la pukima꞉ homa꞉pekeeki

³⁴Ika꞉ honema꞉ I̱ma꞉ta꞉ do kenkena꞉ a꞉nda꞉ peliaasa꞉eki mea epea꞉me hone na wia꞉pa꞉peke. Dia꞉me. A꞉nda꞉ peliaasa꞉eki na mea epoa꞉pate pa a꞉nda꞉ pita꞉la꞉ kepete mea epoa꞉me.

³⁵I̱ epolo hauma꞉ta꞉ hali homekema꞉ ipika꞉ apa꞉na꞉ a꞉nda꞉ tunkuliki hali haena꞉ lo make wandikima꞉ ipika꞉ inkikina꞉ a꞉nda꞉ tunkuliki wandiki haena꞉ lo make aeyekema꞉ ipika꞉ halikina꞉ inkikina꞉ a꞉nda꞉ tunkuliki wanda꞉ haena꞉ lo make

³⁶kutupa hali homekena꞉ titina꞉ a꞉nda꞉ tunkuliki wanda꞉hali manuta꞉ ipika꞉ da pa꞉ta꞉ haleme tapake kone ya꞉lieke.

³⁷Ma꞉nda꞉ hali epima꞉ I̱ pa꞉ta꞉ puki wilia꞉pate pa ipika꞉ pukima꞉ homa꞉la꞉ ekita꞉ ipika꞉ apa꞉ ama꞉ pa꞉ta꞉ titina꞉ amba꞉la wia꞉ka꞉na꞉ta꞉ kota꞉ koto someta꞉ ya disaipolo hali haena꞉ lapeketa꞉ ana꞉ na pa꞉la꞉me. Hali epima꞉ I̱ pa꞉ta꞉ puki wilia꞉pate kone pa ipika꞉ pukima꞉ homa꞉la꞉ ekita꞉ titina꞉ amba꞉la ipika꞉ wekiwandiki pa꞉ta꞉ u haya꞉ka꞉na꞉ta꞉ kota꞉ koto someta꞉ ya disaipolo hali haena꞉ lapeketa꞉ ana꞉ na pa꞉la꞉me.

³⁸Ma꞉nda꞉ hali epima꞉ ipika꞉ a꞉ka꞉tei wape piki ti mea tia ya hau honda꞉ mea na telia pia꞉ka꞉na꞉ta꞉ kota꞉ koto someta꞉ ya disaipolo hali haena꞉ lapeketa꞉ ana꞉ na pa꞉la꞉me.

³⁹Ma꞉nda꞉ hali epima꞉ ipika꞉ honkopuma꞉ kone ipika꞉ da꞉ta꞉la꞉eki muluekema꞉ taapo haya꞉ka꞉na꞉ta꞉ kota꞉ ipika꞉ da꞉ta꞉la꞉eki alupalieke. Pate ya e amba꞉la pokaaluekema꞉ ipika꞉ da꞉ta꞉la꞉eki amba꞉la hone na wia꞉ka꞉na꞉ta꞉ kota꞉ koto somena꞉ da꞉ta꞉la꞉ ekita꞉ pa u halieke.

⁴⁰Wanda꞉hali epima꞉ ta꞉na꞉ma꞉ homolo hata꞉ iki ya disaipolo haliweki handa꞉ mimika꞉na꞉ta꞉ kota꞉ kotota꞉ I̱ kone handa꞉ minelememe. Koto tupa꞉ kone epima꞉ I̱ pa꞉ta꞉ ta꞉na꞉ma꞉ homolo hata꞉ handa꞉ mimika꞉na꞉ta꞉ kota꞉ kotota꞉ mo I̱ tapaala꞉ Apa꞉ pa꞉ta꞉ kone pitememe.

⁴¹Wanda꞉hali epima꞉ Koda꞉na꞉ e pokaasa꞉ hali homeke handaata꞉ Do someta꞉ Koda꞉na꞉ e pokaasa꞉ somee hone witolo hata꞉ ta꞉na꞉ma꞉ homaa handa꞉ mimika꞉na꞉ta꞉ kota꞉ koto somema꞉ mulu pa꞉la꞉ yenki putu piliki kone milimikie. Wanda꞉hali epima꞉ mo epeke hali ma꞉nda꞉na꞉ epeke hau handaa Ipikita꞉ epeke halie laa ta꞉na꞉ma꞉ homaa handa꞉ mimika꞉na꞉ta꞉ kota꞉ koto epeke somema꞉ mulu pa꞉la꞉ yenki putu piliki kone milimikie.

⁴²Epima꞉ do ya hoki nane tolu hala꞉ you hali dia꞉ ya꞉la꞉pate kone pa ya hoki nane tolu hala꞉ hali ya꞉leke handaa mo hande ipi kanake homeke ma꞉nda꞉ halo haeya꞉ka꞉na꞉ta꞉ kota꞉ koto ikali halia꞉ somema꞉ ipika꞉ yenki putu piliki ota꞉ ana꞉na꞉ milieke hone wia꞉pa꞉peke alome leekeme.