Read Sembeleke Ma꞉tiu 18 Bible Online

Ma꞉tiu 18 - Sembeleke bible

Ma꞉tiu 18

¹Koto toma꞉na꞉ta꞉ mo disaipolo haliwekima꞉ Yesu pa꞉ta꞉ a꞉pa lota꞉ pitolo alota꞉ Mo hepenina꞉ Kilu Tombuao Hala꞉eki pa꞉ta꞉ epita꞉ ota꞉ tieke hala꞉pe lemekeme.

²Koto lemeketa꞉ Yesuma꞉ weki siki homeke wila꞉ meaata꞉ ika꞉ puki nanema꞉ mea haena꞉ leekeme.

³Kutaa ipikana꞉ma꞉ iki pa꞉ta꞉ alota꞉ I̱ma꞉ iki pa꞉ta꞉ ota꞉ pi alome. Ikana꞉ma꞉ ika꞉ hone topo pina꞉ lena꞉ laata꞉ mo weki siki leke na haemeka꞉na꞉ta꞉ kota꞉ ikana꞉ma꞉ hepenina꞉ Kilu Tombuao Hala꞉ pa꞉ta꞉ ota꞉ na honda꞉ pambilimikie.

⁴Epima꞉ ipika꞉ kone panda꞉ puniaaso hata꞉ homu pea do weki siki leke hala꞉ halita꞉ mo hepenina꞉ Kilu Tombuao Hala꞉ ekina꞉ tumiki hali hala꞉me.

⁵Ma꞉nda꞉ epima꞉ dupiki weki siki ya bikina꞉ ta꞉na꞉ma꞉ homolo hata꞉ handa꞉ mia꞉ka꞉na꞉ta꞉ kota꞉ I̱ make ta꞉na꞉ma꞉ homaa handa꞉ milieke.

⁶Hali epima꞉ do I̱ pa꞉ta꞉ hone tulaaseme wekiwandiki sunu homeke ma꞉nda꞉ma꞉ hoke hau pina꞉yeke pu tiaena꞉ lea꞉ka꞉na꞉ta꞉ kota꞉ koto halina꞉ make pa꞉ta꞉ toopi hombeleke mea endiata꞉ homena꞉ mo dawala noka꞉ pa꞉ta꞉ mea lopaena꞉ lea꞉ka꞉na꞉ yoluta꞉ epolo pia꞉me.

⁷A꞉pei. Do kenke pa꞉ta꞉ I̱ paala꞉e. Wanda꞉halima꞉ hoke hau pina꞉yeke ula꞉ hoke haumanu ula꞉me. Dupiki haumanu a꞉pa꞉peke yolo pa꞉la꞉pate a꞉pa꞉e mo hau epena꞉ ala꞉ halita꞉ ota꞉ hoke yenki milieke.

⁸Koto ekina꞉ta꞉ naka꞉ kikima꞉ o naka꞉ ankema꞉ hoke hau puelena꞉ lea꞉ka꞉na꞉ta꞉ kota꞉ koto kiki o koto anke tunkulu baapeke. Kiki homeke o anke homeke homeke hata꞉ deto hala꞉eki mika꞉na꞉ta꞉ kota꞉ ota꞉ epelieke. Pate neketa꞉ naka꞉ kiki yaapo pa haena꞉ lo o anke yaapo pa haena꞉ lo pea haeka꞉na꞉ta꞉ ikana꞉ma꞉ neke mo na paeke ti to hala꞉ ale pa꞉ta꞉ mea lopaemeka꞉na꞉ta꞉ kota꞉ ota꞉ hoelieke.

⁹Naka꞉ lekema꞉ hoke hau puelena꞉ lea꞉ka꞉na꞉ta꞉ kota꞉ koto leke yoka꞉ mea baapeke. Leke homeke homeke hata꞉ deto hala꞉eki mika꞉na꞉ta꞉ kota꞉ ota꞉ epelieke. Leke yaapo pa haena꞉ lo pea haeka꞉na꞉ta꞉ ikana꞉ma꞉ neke mo ti to hala꞉ ale pa꞉ta꞉ mea lopaemeka꞉na꞉ta꞉ kota꞉ ota꞉ hoelieke. Sipisipi alu pieke onkoluma꞉ pi

¹⁰Ikana꞉ma꞉ dupiki wekiwandiki sunu pa꞉ta꞉ pa alema꞉ handali mina꞉ma꞉ wopu handeteke hapa꞉peke alome. Pa ekipeke. Mo wekiwandiki ika꞉ hepeni hala꞉ enisolo tonuma꞉ mo ya hepeni hala꞉ Apa꞉na꞉ leke popelekena꞉ teke pa꞉ta꞉ hata꞉ handeteke hao halememe alome.

¹¹[Wanda꞉halina꞉ Eiyekema꞉ mo alu peleme wanda꞉hali weiya handa꞉ wia da꞉taaluekema꞉ a꞉pa hala꞉me.]

¹²Ika꞉ honema꞉ta꞉ hali epima꞉ ipika꞉ 100 sipisipi ma꞉na꞉ handeteke halia꞉pate homeke hondo alupia꞉ka꞉na꞉ta꞉ eki pilieke hone witemepe. Ipikana꞉ma꞉ pa halia꞉ 99 sipisipimanu mo peiyene tea꞉na꞉ mea haena꞉ laata꞉ mo alupia꞉eki weilu pelieke.

¹³I̱ma꞉ iki pa꞉ta꞉ ota꞉ pi alome. Mo alupia꞉ sipisipi ma꞉na꞉ handa꞉ wia꞉ka꞉na꞉ta꞉ kota꞉ ipikana꞉ma꞉ mo na alu piki pa haleme ekimanu pa꞉ta꞉ ta꞉na꞉ma꞉ homiliepate pa mo handa꞉ wiekeeki pa꞉ta꞉ta꞉ ta꞉na꞉ ota꞉ wopu homilieke.

¹⁴Pa do mandake tupa꞉ kone mo naka꞉ hepeni hala꞉ Apa꞉ma꞉ make do wekiwandiki sunu homeke ma꞉nda꞉ alu pina꞉ hone na pa꞉la꞉me alome leekeme. Hoke hau pilie kame epeaapekeeki

¹⁵Naka꞉ kamema꞉ neke hoeyaasa꞉ hoke hau pia꞉ka꞉na꞉ta꞉ kota꞉ ipiki teke pa꞉ta꞉ puaata꞉ ipika꞉ pia꞉ hokeeki wala꞉peke. Pate peneme na piki ipilika꞉ honema꞉ pea꞉pa꞉peke. Ipikana꞉ma꞉ naka꞉ pi opua telia pia꞉ka꞉na꞉ta꞉ kota꞉ mo kameta꞉ neke nane epena꞉ lelipikie.

¹⁶Pate naka꞉ pi na opia꞉ka꞉na꞉ta꞉ kota꞉ pa pua hali homeke o yaapo ma꞉nda꞉ hatuku ipiki pa꞉ta꞉ paa pua꞉pa꞉peke. Kutu pika꞉na꞉ta꞉ mo nakana꞉ma꞉ titina꞉ ipiki pa꞉ta꞉ le pi alupaama꞉na꞉ handa꞉ ula꞉ hali yaapo o tepona꞉ pima꞉ hone u tiatiki pina꞉ lelieke.

¹⁷Kutu pilimipate iki paeyaona꞉ pi na opia꞉ka꞉na꞉ta꞉ kota꞉ mo ipika꞉ pia꞉ hau paeyao siosi wanda꞉hali mombilimi ale pa꞉ta꞉ la hala꞉peke. Kutaa ipikana꞉ma꞉ mo siosi wanda꞉hali paeyaona꞉ pi na opia꞉ka꞉na꞉ta꞉ kota꞉ nakana꞉ma꞉ koto someta꞉ mo Koda꞉ mataasa꞉ hali o a꞉nda꞉ tunkuliki wanda꞉halina꞉ tamba꞉ mina꞉la꞉ hali tupa꞉ haena꞉ lapeke leekeme.

¹⁸I̱ma꞉ iki pa꞉ta꞉ dupa alome. Ikana꞉ma꞉ do kenke nane ala꞉ta꞉ o hau ma꞉nda꞉ pi wimika꞉na꞉ta꞉ kota꞉ koto pi wita꞉la꞉ ekita꞉ oli hepeni nane make pi wilieke. Koto tupa꞉ kone ikana꞉ma꞉ do kenke nane ala꞉ta꞉ o hau ma꞉nda꞉ pi na wimika꞉na꞉ta꞉ kota꞉ hepeni nane make pi na wilieke.

¹⁹Pa ameta꞉ do pi make apa꞉taaso iki pa꞉ta꞉ alome. Iki paeyao tukiki pa꞉ta꞉ epi yaapo a꞉nda꞉ma꞉ mo pea꞉peke hau homeke a꞉nda꞉ do pate puluekema꞉ epena꞉e laa homeke hone wia hata꞉ yeni pipika꞉na꞉ta꞉ kota꞉ oli ya hepeni hala꞉ Apa꞉ma꞉ opua ipilika꞉ hone pa꞉la꞉ ekita꞉ ota꞉ peawalieke.

²⁰Pa ekipeke wanda꞉hali yaapo o tepoma꞉ ale ma꞉nda꞉ pa꞉ta꞉ yaka bikina꞉ mombelemeka꞉na꞉ta꞉ kota꞉ I̱ma꞉ koto pa꞉ta꞉ iki ame̱le̱ mandake halueke leekeme. Hoke hau hone na yonka꞉laasa꞉ halina꞉ onkoluma꞉ pi

²¹Koto toma꞉na꞉ta꞉ Pidama꞉ Yesu pa꞉ta꞉ a꞉pa lota꞉ pitolo alota꞉ Tekehalio. Yaka kamema꞉ I̱ pa꞉ta꞉ hoke hau pea꞉tiki pu haya꞉ka꞉na꞉ta꞉ kota꞉ I̱ma꞉ tana꞉ ekipu paeyaaluepe. Tana꞉ wataake hata꞉ ana꞉ pa꞉la꞉pe laa lota꞉ piekepate

²²Yesuma꞉ hombo peaaso alota꞉ Dia꞉me. Hoto wataake hata꞉ ana꞉ na pa꞉la꞉me. Pa hoto paeyao ota꞉ pa paeyaaso paeyaaso pu hapeke.

²³Pa ekipeke. Mo hepenina꞉ Kilu Tombuao Hala꞉ ekita꞉ do tupa꞉ ya꞉la꞉me. Kini hali homekema꞉ ipika꞉ e poka꞉la꞉ haliwekina꞉ tondiki manuta꞉ tikitiki yaalueke hone wiekeme.

²⁴Kotoeki kini pu mea pokuluekema꞉ haena꞉ ipika꞉ e pokaeyeke hali homeke hatuku epemekeme. Koto halima꞉ta꞉ mo Kini halina꞉ 10 milioni kina tondiki mea hayekeme.

²⁵Kutupa koto ipika꞉ tondiki paeyaapeke mani na wieke handaata꞉ mo Kini halima꞉ iki pa꞉ta꞉ alota꞉ Do hali ipika꞉ wekiwanda꞉ make ipika꞉ wia hayeke alemanu paeyao make mo tondiki paeyaena꞉yeke mani muluekema꞉ iki paeyao ma꞉nda꞉na꞉ pahameke e pokaasa꞉ tapake haena꞉ hambena꞉ tapaapa꞉peke leekeme.

²⁶Koto leekeeki opuaata꞉ mo e pokaeyeke halima꞉ ipika꞉ Kinina꞉ leke popelekena꞉ tumiki yotuao panda꞉ puniaaso honke alo alota꞉ Tekehalio. I̱ pa꞉ta꞉ a꞉ta꞉ma꞉ homolo hata꞉ waleke kika꞉na꞉ta꞉ mo tondiki paeyao ana꞉na꞉ epeao kulueke laa honke leekeme.

²⁷Koto leekeeki opitolo hata꞉ mo Kini halima꞉ ipiki pa꞉ta꞉ a꞉ta꞉ma꞉ homolo hata꞉ pa pina꞉e laa Paota꞉ pa mo hande tondiki tieke make pina꞉ laa kiao hone yonka꞉lao ipiki paa tapaeyekeme.

²⁸Kutu pieke mo hande somema꞉ mo ipika꞉ Kini hali mina꞉pa꞉lao hama peekeme. Kutu pitolo hata꞉ta꞉ ipika꞉ 100 kina tondiki miono leeke haleeke mo Kini halina꞉ e mandake pokaepeke hali ma꞉nda꞉ manda꞉hande piekeme. Ipikana꞉ma꞉ koto e mandake pokaepeke somena꞉ make da꞉ka꞉pa꞉ mina ipika꞉ pendoko teke yoka꞉ minolo hata꞉ alota꞉ Mo ya neke pa꞉ta꞉ kolo tondikita꞉ ma꞉nda꞉ pa na mina꞉pa꞉lake ota꞉ paeyao kima leekeme.

²⁹Mo e mandake pokaepeke some ipika꞉ leke popelekena꞉ panda꞉ puniaaso honke alo alota꞉ Kameo. I̱ pa꞉ta꞉ a꞉ta꞉ma꞉ homolo hata꞉ waleke kika꞉na꞉ta꞉ mo tondiki paeyao ana꞉na꞉ kulueke leekeme.

³⁰Koto leekepate ipikana꞉ma꞉ta꞉ koto pi tombuao a꞉ta꞉ma꞉ na homeke mo somema꞉ ipika꞉ tondiki paeyao ana꞉na꞉ kone pa kina꞉ alo hata꞉ pa dipula mea lopaeyekeme.

³¹Kutu pieke hauta꞉ mo hande Kini halina꞉ e pokaemeke mandane haliwekima꞉ handaata꞉ ikana꞉ma꞉ ka꞉nda꞉ma꞉ homolo hata꞉ ika꞉ Kini hali pa꞉ta꞉ mo hau paeyao pua la haleekeme.

³²Mo Kini halima꞉ koto pi opuaata꞉ mo hande hali epena꞉ wi leekeme. Kutupa ipiki pa꞉ta꞉ alota꞉ Neketa꞉ ota꞉ hoke hau piki e pokaasa꞉ halie. Nakana꞉ma꞉ I̱ pa꞉ta꞉ A꞉ta꞉ma꞉ homee laa honke leeki homeke homekena꞉ta꞉ mo hande naka꞉ tondiki tieke paeyao I̱ma꞉ pa paeyaowa꞉me.

³³Kota꞉ I̱ma꞉ neke pa꞉ta꞉ pa a꞉ta꞉ma꞉ homoa꞉ tupa꞉ nakana꞉ma꞉ naka꞉ e mandake pokaepe some pa꞉ta꞉ make koto tupa꞉ kone a꞉ta꞉ma꞉ homa꞉peke alee laata꞉

³⁴mo Kini halima꞉ mineke tieke pankolo hata꞉ mo hande somema꞉ ipika꞉ mieke tondiki ota꞉ paeyao ana꞉na꞉ kone epeao paeyaena꞉ handeteke hata꞉ panisi pina꞉ dipula mea lopaeyekeme.

³⁵Yesuma꞉ do onkoluma꞉ pi lo a꞉mbolo hata꞉ alota꞉ Ikana꞉ma꞉ ika꞉ yankekena꞉ hoke hau pimiki ekimanu ika꞉ pukima꞉ ota꞉ hone na yonka꞉laemeka꞉na꞉ta꞉ kota꞉ yaka hepeni hala꞉ Apa꞉ma꞉ mo hande Kini halima꞉ pieke tupa꞉ kone iki paeyao pa꞉ta꞉ make koto mandake tupa꞉ kone pilieke leekeme.