Read Sembeleke Ma꞉tiu 8 Bible Online

Ma꞉tiu 8 - Sembeleke bible

Ma꞉tiu 8

¹Yesuma꞉ oli hande pote pa꞉ta꞉ hao hola꞉pa꞉niao epeeke handaata꞉ wanda꞉hali tieke ipika꞉ hoki nane teli mea epemekeme.

²Kutupa Yesu opolo ipulu haena꞉ta꞉ kindi yeni hake hali homeke ipiki pa꞉ta꞉ a꞉pa panda꞉ puniaaso hata꞉ alota꞉ Tekehalio. Neke hone pia꞉ka꞉na꞉ta꞉ kota꞉ nakana꞉ma꞉ ya yeni epeawalena꞉e leekeme.

³Koto leeke Yesuma꞉ ipika꞉ kiki tindipao wataaso hata꞉ alota꞉ Aowe. I̱ hone pa꞉la꞉me. Naka꞉ kindi yenita꞉ epeao epeke loke halena꞉ alome leekeme. Koto leeke tomona꞉ kota꞉ mo somena꞉ kindi yenita꞉ hapua mateekeme.

⁴Kutu pieketa꞉ Yesuma꞉ mo some pa꞉ta꞉ Opie la alota꞉ Doeki ma꞉nda꞉ pa꞉ta꞉ amba꞉la na leketa꞉ pa mo yeni peao hala꞉ halima꞉ titina꞉ amba꞉la naka꞉ yeni ota꞉ paela꞉pe laa handena꞉ a̱i̱ ipiki pa꞉ta꞉ pua꞉peke. Kutaata꞉ wanda꞉halima꞉ naka꞉ yenita꞉ ota꞉ paela꞉me hone wina꞉ mo hande Mosesima꞉ la꞉ wieke tupa꞉ Koda꞉ pa꞉ta꞉ lia hala꞉la꞉ ale lia hala꞉peke leekeme. Ami you halina꞉ e pokaasa꞉ some epeaeyekeeki

⁵Yesu mo hande Kapeneami daoni pa꞉ta꞉ opolo pua haena꞉ mo hande Loma꞉ wanda꞉halina꞉ ami haliwekina꞉ you halima꞉ Yesu manda꞉ hande pitolo honke alo alota꞉

⁶Tekehalio. Ya e pokaasa꞉ halita꞉ kiki anke lupa wiki yeni mea pota꞉ pomua꞉peke na yaalo tanda tieke mea ya da pa꞉ta꞉ u peli pelia hala꞉me leekeme.

⁷Yesuma꞉ ipika꞉ pi hombo peaaso alota꞉ Epeaalo pulueke leekeme.

⁸Koto leeke handaata꞉ mo somema꞉ alota꞉ O dia꞉me. Neke ya da pa꞉ta꞉ epo alota꞉ I̱ta꞉ epeke hali dia꞉ ya꞉la꞉ ekina꞉ nakana꞉ma꞉ ipika꞉ yeni pa paena꞉e pi homeke leka꞉na꞉ta꞉ kota꞉ ya e pokaasa꞉ hali tialieke.

⁹Pa ekipeke. I̱ta꞉ mandane ami you haliweki oto pa꞉ta꞉ halome. Kutaa I̱ oto pa꞉ta꞉ make mandane ami haliweki halememe. Kutupa I̱ma꞉ ma꞉nda꞉ pa꞉ta꞉ Pue loa꞉ka꞉na꞉ta꞉ pelieke. Ma꞉nda꞉ pa꞉ta꞉ make Epoe loa꞉ka꞉na꞉ta꞉ ipilieke. Kutupa ya pa hameke e pokaasa꞉ some pa꞉ta꞉ Do e pokae loa꞉ka꞉na꞉ta꞉ kota꞉ ota꞉ pealieke leekeme.

¹⁰Koto leekeeki Yesuma꞉ opuolota꞉ penkilipa꞉tia pominolo hata꞉ mo hande ipika꞉ hoki nane telimiki wanda꞉hali pa꞉ta꞉ alota꞉ I̱ma꞉ iki pa꞉ta꞉ ota꞉ pi alome. Mo Isulai tapake tukiki pa꞉ta꞉ dupiki hone tulaake some homeke ma꞉nda꞉ a꞉nda꞉ I̱ na handolome.

¹¹Koto ekina꞉ I̱ma꞉ iki pa꞉ta꞉ pi ma꞉nda꞉ make dupa alome. Mo nate opa꞉la꞉ nanema꞉ make pamba꞉la꞉ nanema꞉ make wanda꞉hali wopuma꞉ mo hepenina꞉ Kilu Tombuao Hala꞉ ekina꞉ yawe lulu pa꞉la꞉ pa꞉ta꞉ a꞉pa Eipoloha꞉ma꞉ Aisa꞉ke make Dieikope ame̱le̱ mandakena꞉ apa꞉tao pita꞉ nelimikie.

¹²Pate mo hande Kilu Tombuao Hala꞉eki tukiki pa꞉ta꞉ ota꞉ pua hapa꞉peke yolo peleme wanda꞉hali kone pa mo timba꞉ la꞉papeke pa꞉ta꞉ yolo baalieke. Koto pa꞉ta꞉ta꞉ mo wanda꞉halima꞉ e̱ tieke alo hata꞉ ika꞉ kake nokopa hata꞉ kake lenkena꞉ tieke lo halimikie laa

¹³Yesuma꞉ mo ami you hali pa꞉ta꞉ alota꞉ Naka꞉ hone tulale ekima꞉ kone pealiekema꞉ da pue leekeme. Mo ami you halina꞉ e pokaeyeke halita꞉ koto kone tiaeyekeme. Wanda꞉hali wopu Yesuma꞉ epeaeyekeme

¹⁴Yesuma꞉ Pidana꞉ da pa꞉ta꞉ peekeme. Koto pa꞉ta꞉ta꞉ Pidana꞉ meiyeke wanda꞉ hoputiti yeni hao ipika꞉ da panda꞉ pa꞉ta꞉ polu pitiekeeki handeekeme.

¹⁵Kutu pieketa꞉ Yesuma꞉ mo wanda꞉na꞉ kiki wataaso haena꞉ mo yeni tandeleekeme. Kutu pieke handaa ipiki tiao hata꞉ta꞉ Yesu pa꞉ta꞉ nemanu haleekeme.

¹⁶Nate pambolo haena꞉ta꞉ mandane wanda꞉halima꞉ mo hoke temokomanu pitiki wanda꞉hali wopu Yesu pa꞉ta꞉ mea epemekeme. Mo hoke temoko manuta꞉ Yesu ipika꞉ pima꞉ tolu liaata꞉ yeni haemeke wanda꞉hali ika꞉ yenimanu make tandelaeyekeme.

¹⁷Yesuma꞉ koto wanda꞉hali epeaeyeke hau manuta꞉ amba꞉ hande potopede hali Aisayama꞉ la꞉ witolo hata꞉ alota꞉Ipikana꞉ma꞉ ipika꞉ kone nika꞉ ki yenimanu meao make mo biki ula꞉ yeni tekemanu make yoka꞉ mea baeyekeme laa la꞉ wieke pi yaaluekema꞉ yeke piekeme. Yesu ame̱le̱ poluekema꞉ taapa꞉la꞉ haliweki

¹⁸Yesuma꞉ mo hande ipiki a꞉pa ambulaemeke wanda꞉hali handaa hone wiaata꞉ ipika꞉ hoki nane telimiki haliweki pa꞉ta꞉ alota꞉ Mo ikali leke mone tea꞉na꞉ baape leekeme.

¹⁹Mo hande wape pea wala꞉tiki pu hayeke hali homekema꞉ ipiki pa꞉ta꞉ a꞉pa alota꞉ Wala꞉la꞉ halio. I̱ta꞉ neke hando pa꞉ta꞉ peka꞉na꞉ make ota꞉ teli mea pomuluekema꞉ yeke I̱ma꞉ tikitiki yao halome.

²⁰Yesuma꞉ ipika꞉ pi hombo peaaso alota꞉ Keao hala꞉ kika manuma꞉ kone ika꞉ polu peleme ale ula꞉me. Kutaa ba manuma꞉ make ika꞉ pelia꞉pa꞉peke dakemanu hao hala꞉me. Pate mo Wanda꞉halina꞉ Eiyekema꞉ ipika꞉ you wia pelia꞉peke da panda꞉ ma꞉nda꞉ na ula꞉me.

²¹Hali ma꞉nda꞉ Yesuna꞉ hoki nane telia꞉la꞉ hali hata꞉ kone Yesu pa꞉ta꞉ alota꞉ I̱ta꞉ ya apa꞉ mea hoiluekema꞉ paa la꞉ka꞉la ponoe leekeme.

²²Pate Yesuma꞉ hombo peaaso alota꞉ Ika꞉ toko manuma꞉ ika꞉ kone hoina꞉ma꞉ neketa꞉ I̱ teli mea epoe leekeme. Yesuna꞉ pima꞉ po tilipu tunkulaeyekeeki

²³Yesuma꞉ kawaso homeke pa꞉ta꞉ honda꞉ pamba pitulu peeketa꞉ ipika꞉ disaipolo haliweki make telimea pemekeme.

²⁴Mo kawaso pua ikali leke tukiki tukikina꞉ haena꞉ penkilipake po tilipu tiekema꞉ mo ikali lekena꞉ ambulaeyekeme. Kutu pieke ekima꞉ mo kawasota꞉ teke pa꞉ta꞉ honki lapeke yekepate Yesuta꞉ u peliekeme.

²⁵Mo disaipolo haliwekima꞉ Yesu teke pa꞉ta꞉ pua ipiki mea tiaaso alota꞉ Tekehalio. Nikita꞉ ikali naa homa꞉pekeeki teke pa꞉ta꞉ ta ya꞉la꞉ma꞉ niki pa꞉ta꞉la꞉e lemekeme.

²⁶Yesuma꞉ hombo peaaso alota꞉ Ekipeke handa paala꞉ tiekema꞉ homelemepe. Ikita꞉ hone wotu na tulake some hombo ya꞉ka꞉ta꞉me laata꞉ Ipikana꞉ma꞉ tia liao hata꞉ mo hande po tilipu pita꞉ ikali ho yaapo tunkulina꞉ pi leekeme. Koto leeketa꞉ mo hande po ikali yaapo tunkula la꞉ma꞉ na piki e pondo na leke wiekeme.

²⁷Kutu piekeeki handolo hata꞉ paeyaoma꞉ penkilipa꞉tia pomimikime. Mo ikali pita꞉ po tilipu yaapoma꞉ ipika꞉ pi ota꞉ opita꞉la꞉ ekita꞉ do someta꞉ eki piki some yekea lemekeme. Yesuma꞉ yaapo halina꞉ hoke temoko tolu liekeeki

²⁸Yesuma꞉ mo hande ikali leke mone tea꞉na꞉ wieke kenke Kedata nane opolo ipulu haena꞉ta꞉ hali hoiyu hayeke tikene da pa꞉ta꞉ haepeke hali yaapoma꞉ Yesu a꞉pa manda꞉ hande pipikime. Mo hali yaapo pa꞉ta꞉ta꞉ hoke temokomanu pitieke ekima꞉ ipilikita꞉ ota꞉ ka꞉la꞉ta꞉ wopu piki some yaapo haepekeme. Koto ekima꞉ta꞉ wanda꞉halima꞉ mo hali yaapo haepeke ale teke pa꞉ta꞉ wieke pota꞉na꞉ pua꞉peke na yekeme.

²⁹Koto hali yaapoma꞉ Yesu handolo hata꞉ koto kone wi la alota꞉ Koda꞉na꞉ Eiyekeo. Niki pa꞉ta꞉ eki hau puluekema꞉ ipulipe laa Mo hande niki hoeyaalo pa꞉la꞉ nate a̱i̱ na epeke haena꞉ niki hoeyaaluekema꞉ a꞉pa pipe lemekeme.

³⁰Iki haemeke ale mo pate leketa꞉ ma꞉na꞉ titima꞉ ne nalo haemekeme.

³¹Kutaata꞉ mo hande hoke temoko manuma꞉ Yesu pa꞉ta꞉ alota꞉ Nakana꞉ma꞉ niki tolueke hone wika꞉na꞉ta꞉ kota꞉ mo ma꞉na꞉ titi pa꞉ta꞉ pitulu pomono tapaapeke laa honke lemekeme.

³²Yesuma꞉ koto hoke temokomanu pa꞉ta꞉ pupee leeke pita꞉ta꞉ kota꞉ ikana꞉ma꞉ mo hali yaapo mina꞉pa꞉lao mo ma꞉na꞉ titi pa꞉ta꞉ pua honda꞉ pambemekeme. Koto ekina꞉ mo ma꞉na꞉ titi paeyaota꞉ mo lombeeke alena꞉ a̱i̱ya hola꞉pa꞉niao ikali leke pa꞉ta꞉ lopaata꞉ ikali naa homa꞉ pitaemekeme.

³³Kutupa mo ma꞉na꞉ titi handeteke haemeke hali manuma꞉ ika꞉ teke da nane pindipa puaata꞉ mo hande pieke hau paeyao make hande hoke temoko pitiki hali yaapo pa꞉ta꞉ pieke haumanu tonka꞉na꞉ paeyao wanda꞉hali pa꞉ta꞉ moka꞉laemekeme.

³⁴Koto ekina꞉ta꞉ mo daoni pa꞉ta꞉ haemeke wanda꞉hali ota꞉ paeya tapaoma꞉ Yesu manda꞉ hande pulu pemekeme. Kutupa ikana꞉ma꞉ Yesu handaa ipiki pa꞉ta꞉ honke alo alota꞉ Nika꞉ da yu mina꞉pa꞉lao pue lemekeme.