Read Sembeleke Maka 12 Bible Online

Maka 12 - Sembeleke bible

Maka 12

¹Koto laa Yesuma꞉ onkoluma꞉ laa iki pa꞉ta꞉ alota꞉ Hali ma꞉nda꞉ma꞉ waini e pokaata꞉ pape pea mo waini kilikimanu dikili pulu pieke alena꞉ kenke awaata꞉ ti hokulu mea a꞉meiyao noka꞉pa oli manda hata꞉ e handeteke haena꞉ da a꞉eyekeme. Dupa pea ipika꞉ e pokaaseme haliweki mea haena꞉ laata꞉ kenke ma꞉nda꞉ nane peekeme.

²Bapina꞉ mo e teke halima꞉ ipika꞉ e pokaasa꞉ hali ma꞉nda꞉ hande e pokao haemeke haliweki pa꞉ta꞉ kilikimanu mandaneeki meaena꞉yeke tapaeyekeme.

³Koto haliwekima꞉ mo e pokaasa꞉ hali meaata꞉ yombua bao kiki hameke tapaemekeme.

⁴Kutupa e teke halima꞉ e pokaasa꞉ hali ma꞉nda꞉ tapaeyekepate mo haliwekima꞉ koto somena꞉ amboke yombua baota꞉ hoke tupa꞉ yaala꞉ tieke homaemekeme.

⁵E teke halima꞉ paa ma꞉nda꞉ tapaeyekepate ota꞉ limikime. Koto haliwekima꞉ mandaneeki wopu pa꞉ta꞉ make kutu pimikime. Mandane ekimanu yombua baota꞉ mandane ekimanu ota꞉ limikime.

⁶Mo e teke hali yaapota꞉ homeketa꞉ pa hayekeme. Ipika꞉ puki piki weki homeke pa hayekeme. Paeyaaso hata꞉ mo haliweki pa꞉ta꞉ ipika꞉ eiyeke tapaaso hata꞉ alota꞉ Yaka wekina꞉ pi opua homu pea halimikie leekeme.

⁷Koto leekepate mo e pokao haemeke haliwekima꞉ ika꞉ ika꞉ kone alota꞉ Dota꞉ e teke halina꞉ anke teke mulu pa꞉la꞉ halina꞉ alema꞉ Lumana꞉ bape lemekeme. Kutupa ipika꞉ mulu pa꞉la꞉ ekita꞉ nikana꞉ma꞉ mumana꞉e lemekeme.

⁸Kutupa mo hande halina꞉ eiyeke mea ota꞉ liaata꞉ ipika꞉ loke mo e tikene nane mea baemekeme leekeme.

⁹Yesuma꞉ alota꞉ Mo e teke halima꞉ eki pilia꞉pe laa Ipikana꞉ma꞉ a꞉paata꞉ mo e pokao haemeke haliweki ota꞉ lia paeyaota꞉ mandane haliwekima꞉ta꞉ ipika꞉ e pokao haena꞉ lelieke laata꞉

¹⁰Kota꞉ mo Baibolo bukana꞉ wape pea ula꞉ pi do ekita꞉ na yata꞉pelemepe.Mo da a꞉eyo haemeke haliwekima꞉ baemeke toopita꞉ da keneme nane ota꞉ teke toopi ula꞉me.

¹¹Kutu pia꞉ ekita꞉ Tekehalima꞉ pia꞉me. Kutupa nikana꞉ma꞉ handaata꞉ penkili poloma꞉melaa wape pa꞉la꞉me leekeme.

¹²Mo hande yeni peao haemeke teke haliwekima꞉ make mo wape pea wala꞉tiki pu haemeke haliwekima꞉ make tondiki haliwekima꞉ make paeyaoma꞉ do onkoluma꞉ pita꞉ niki pa꞉ta꞉ lea꞉me hone witolo hata꞉ Yesu minina꞉ loluekema꞉ taapemekepate wanda꞉hali pa꞉ta꞉ paala꞉ma꞉ homemeke handaata꞉ Yesu mina꞉pa꞉lao pemekeme. Sisana꞉ dakisi mani

¹³Pate ikana꞉ma꞉ mandane Pa꞉tisi haliweki make Hetodina꞉ hoki nane telimiki haliweki make Yesuna꞉ pi ta molo pena꞉ Yesu pa꞉ta꞉ tapaemekeme.

¹⁴Ikana꞉ma꞉ ipiki pa꞉ta꞉ a꞉pa alota꞉ Wala꞉la꞉ Halio. Nakana꞉ma꞉ ota꞉ pimanu lo hale halie. Nikana꞉ma꞉ opoloma꞉me lemekeme. Nakana꞉ma꞉ wanda꞉hali pa꞉ta꞉ hone ma꞉nda꞉ ma꞉nda꞉ na u haleme. Nakana꞉ma꞉ wanda꞉hali paeyao pa꞉ta꞉ mandake hau piki wanda꞉halie laaka꞉na꞉ Koda꞉na꞉ ota꞉ hau pita꞉la꞉ pi homeke walo haleme la alota꞉ Mo Kapomani tieke Sisa pa꞉ta꞉ dakisi mani hala꞉la꞉ ekita꞉ a꞉pa꞉la꞉pe o hoela꞉pe. Mani halomonope o na halomonope laa lemekeme.

¹⁵Koto lemeketa꞉ Yesuma꞉ ika꞉ kekeke haemekeeki handolo hata꞉ alota꞉ Ikana꞉ma꞉ ya anke ekipeke yola꞉lemepe leekeme. Toopi poeke homeke handono mea ipupe leekeme.

¹⁶Homeke mea a꞉pa haena꞉ Yesuma꞉ iki pa꞉ta꞉ alota꞉ Koto su̱a̱ su̱a̱ ula꞉ ekita꞉ epina꞉ leke popelekepe leekeme. Ikana꞉ma꞉ ipika꞉ pi hombo peaaso alota꞉ Sisana꞉ ekie lemekeme.

¹⁷Yesuma꞉ iki pa꞉ta꞉ alota꞉ Sisana꞉ ale manuta꞉ Sisa pa꞉ta꞉ pa mea hala꞉pa꞉peke. Kutupa Koda꞉na꞉ ale manuta꞉ kota꞉ Koda꞉ pa꞉ta꞉ pa hala꞉pa꞉peke leekeme. Mo haliwekima꞉ koto pi opuaata꞉ penkili pimikime. Homaa paa tiaalo pa꞉la꞉ pi

¹⁸Mandane Sa꞉dusi haliweki Yesu pa꞉ta꞉ epemekeme. Koto tapakema꞉ ota꞉ homemeke wanda꞉hali paa na tiaalieke lo haemeke haliwekie. Ikana꞉ma꞉ Yesu pa꞉ta꞉ a꞉pa lota꞉ pitolo alota꞉

¹⁹Wala꞉la꞉ Halio. Mosesima꞉ niki pa꞉ta꞉ dupa wape piekeme. Hali ma꞉nda꞉ma꞉ ipika꞉ mupeke hameketa꞉ wanda꞉ pa haena꞉ weki wandiki na mendiki homea꞉ka꞉na꞉ta꞉ kota꞉ koto wetepe nane halima꞉ wanda꞉ kosa꞉piki meaata꞉ ipika꞉ homeeke hamekena꞉ weki wandikimanu mendiao haena꞉ lena꞉ lapa꞉peke wape piekeme leekeme.

²⁰Kutupata꞉ hameketiti watake hata꞉ haemekeme. Mupeke wekima꞉ wanda꞉ meaata꞉ weki wandiki na mendiki homeekeme.

²¹Kutupa hoki nane wekima꞉ mo wanda꞉ meaata꞉ weki wandiki na mendiki homeekeme. Kutupa koto hoki nane weki ma꞉nda꞉ma꞉ kutu piekeme.

²²Watake hata꞉ hama̱la̱꞉ hama̱la̱꞉ paeyaoma꞉ koto tupa꞉ miekepate mo wanda꞉ pa haena꞉ weki wandiki na mendiki pa haena꞉ homeke homeke lo homemekeme. Kutupa homo paeyaeyeke naneta꞉ mo hande wanda꞉ make homeekeme.

²³Kutupa wanda꞉hali paa tialimi natena꞉ta꞉ ota꞉ epina꞉ wanda꞉ haliepe. Pa ekipeke mo watake hata꞉ haliwekima꞉ta꞉ mo wanda꞉ homeke kone mimikime lemekeme.

²⁴Yesuma꞉ iki pa꞉ta꞉ alota꞉ Ikana꞉ma꞉ pi lo hoeyaasememe. Pa ekipeke mo Baibolo bukana꞉ wape pea ula꞉ ekimanu na handelememe. Kutupa Koda꞉na꞉ wele pu hala꞉ ekimanu make na handelememe.

²⁵Amba꞉ homemeke wanda꞉halima꞉ paa tiaemeka꞉na꞉ta꞉ wanda꞉ na miki hali na peke oli hepeni nane enisolo tapake haleme tupa꞉ pa hao halimikie leekeme.

²⁶Kutupa Yesuma꞉ pi ma꞉nda꞉ alota꞉ Mo hande homemeke wanda꞉hali paa tiaalo pelemeeki pa꞉ta꞉ alome dupa. Mosesima꞉ wape pieke bukana꞉ mo hande pa hayeke ti sikina꞉ kone ti to hayekeeki na yata꞉pemepe. Do mana꞉ta꞉ Koda꞉ma꞉ Mosesi pa꞉ta꞉ leekeme dupa. I̱ta꞉ Eipoloha꞉ma꞉na꞉ Koda꞉ make Aisa꞉kena꞉ Koda꞉ make Dieikopena꞉ Koda꞉ make halome leekeme.

²⁷Kutupa Yesuma꞉ alota꞉ Do lea꞉ ekina꞉ kota꞉ Koda꞉ta꞉ homolo peleme wanda꞉halina꞉ Koda꞉ dia꞉me. Deto halo peleme wanda꞉halina꞉ Koda꞉e laa la꞉la꞉pate ikana꞉ma꞉ hone u hoeyaasememe leekeme. Titina꞉ pi ula꞉eki

²⁸Kutupa mo wape pea wala꞉tiki pu hayeke hali homekema꞉ a꞉paata꞉ ika꞉ pi pi lemekeeki opitolo hata꞉ Yesuma꞉ ika꞉ pi epeke tupa꞉ hombo peaaso leekeeki opuaata꞉ Yesu pa꞉ta꞉ lota꞉ pitolo alota꞉ Mo hande pi ula꞉eki manuta꞉ titina꞉ ekita꞉ handoekipe leekeme.

²⁹Yesuma꞉ ipika꞉ pi hombo peaaso alota꞉ Titina꞉eki doe. Isulai wanda꞉halio. Opua꞉pe la꞉la꞉me. Tekehali Koda꞉ta꞉ nika꞉ Tekehali homeke hala꞉me.

³⁰Kutupa mo Tekehali naka꞉ Koda꞉ pa꞉ta꞉ naka꞉ puki paeyaoma꞉ make naka꞉ temoko paeyaoma꞉ make naka꞉ hone witeleeki paeyaoma꞉ make naka꞉ honkopu haseeki paeyaoma꞉ make pukima꞉ homo hapa꞉pekee la꞉la꞉me.

³¹Wetepena꞉eki doe. Neke pa꞉ta꞉ naka꞉ kone a꞉ta꞉ma꞉ homele tupa꞉ da wanda꞉hali pa꞉ta꞉ make a꞉ta꞉ma꞉ homo hapa꞉pekee la꞉la꞉me laa koto hande pi ula꞉eki yaapota꞉ ota꞉ titina꞉ekie. Mandaneeki manuta꞉ wetepena꞉e leekeme.

³²Kutupa mo wape pea wala꞉tiki pu hayeke halima꞉ Yesu pa꞉ta꞉ alota꞉ Wala꞉la꞉ Halio. Ota꞉ aleme. Koda꞉ homeke hala꞉ ekita꞉ ota꞉ leme. Ma꞉nda꞉ dia꞉me ipiki homekee.

³³Kutupa Koda꞉ pa꞉ta꞉ puki paeyaoma꞉ make hone wita꞉la꞉eki paeyaoma꞉ make honkopu hasa꞉eki paeyaoma꞉ make a꞉ta꞉ma꞉ homa꞉pa꞉peke. Kutupa nikana꞉ma꞉ niki pa꞉ta꞉ niki kone a꞉ta꞉ma꞉ homoloma꞉ tupa꞉ da wanda꞉hali pa꞉ta꞉ kone a꞉ta꞉ma꞉ homa꞉la꞉ ekita꞉ ota꞉ titina꞉ekie leekeme. Koda꞉ pa꞉ta꞉ yanka hala꞉la꞉ ekimanu paeyao make liaa hala꞉la꞉ ekimanu make koto ekita꞉ wetepena꞉ekie leekeme.

³⁴Kutupa Yesuma꞉ mo halina꞉ hone wopu wia epeke tupa꞉ leekeeki opuaata꞉ ipiki pa꞉ta꞉ alota꞉ Nakana꞉ma꞉ Koda꞉na꞉ Kilu Tombuao Hala꞉eki teke pa꞉ta꞉ haleme leekeme. Koto lea꞉eki hoki naneta꞉ wanda꞉halima꞉ paala꞉ pieke handaa ma꞉nda꞉ma꞉ lota꞉ paa na piekeme. Ketisona꞉ tapake apa꞉ta꞉ epipe

³⁵Yesuma꞉ mo tembolo da tukiki pa꞉ta꞉ hata꞉ pi walolo hata꞉ alota꞉ Wape pea wala꞉tiki pu haleme haliwekima꞉ Ketisota꞉ Deipidina꞉ tapake wekie la꞉la꞉ ekita꞉ ekipa la꞉la꞉pe laa

³⁶Deipidima꞉ ipika꞉ kone alota꞉ Holi Sipitidima꞉ la halolo haena꞉ alota꞉Mo Tekehalima꞉ yaka Tekehali pa꞉ta꞉ leekeeki dupa.Naka꞉ a꞉nda꞉ tunkuliki haliweki naka꞉ anke oto pa꞉ta꞉ mea pitaanoyeke yaka popeke nane kikina꞉ pita꞉peke la꞉la꞉me.

³⁷Kota꞉ Deipidima꞉ ipika꞉ kone Ketiso pa꞉ta꞉ Yaka Tekehalie la꞉la꞉me. Koto ekina꞉ ipika꞉ tapake wekita꞉ ekipa haliepe leekeme. Mo wanda꞉hali wopuna꞉ Yesuna꞉ pi ta꞉na꞉ma꞉ homa opimikime. Yesuma꞉ mo tapake manuna꞉ haumanu lo kelaeyekeeki

³⁸Ipikana꞉ma꞉ iki pa꞉ta꞉ pi walolo hata꞉ alota꞉ Mo wape pea wala꞉tiki pu haleme haliwekina꞉ hau wotu handeteke hapa꞉peke leekeme. Hokulupiki daumanu pambao pomu hata꞉ta꞉ makedina꞉ hatiki pita꞉la꞉ wanda꞉halima꞉ iki pa꞉ta꞉ pi la halena꞉ hone u halememe.

³⁹Kutupa pi hotu haemeke damanu tukiki pa꞉ta꞉ pituluekema꞉ wanda꞉halima꞉ iki handena꞉ hone wia epeke sea manuna꞉ pitu halememe. Ne pambaasa꞉ ekina꞉ make epeke haupiki seana꞉ pituluekema꞉ hone u halememe leekeme.

⁴⁰Kutupa kosa꞉piki wanda꞉wekina꞉ ala꞉ta꞉ ala꞉ta꞉ pa meaata꞉ kutu pitolo kone handaena꞉ hau puluekema꞉ yeni pu hokulu peao halememe leekeme. Mo haliwekima꞉ ika꞉ hoke yenkita꞉ ota꞉ tieke milimikie leekeme. Kosa꞉piki wanda꞉ma꞉ Koda꞉ pa꞉ta꞉ mani haleekeeki

⁴¹Yesuma꞉ta꞉ mani pambo haemeke bokosi teke pa꞉ta꞉ ti lao pita꞉ wanda꞉halima꞉ koto pa꞉ta꞉ a꞉pa mani lopaemekeeki handeekeme. Hamoko wanda꞉hali wopuma꞉ mani wopu mea a꞉pa lopaemekeme.

⁴²Wetepena꞉ natehali kosa꞉piki wanda꞉ sikima꞉ a꞉paata꞉ manisiki yaapo 2 toeama꞉ handekeeki mea a꞉pa lopaeyekeme.

⁴³Kutupa Yesuma꞉ ipika꞉ disaipolo haliweki pa꞉ta꞉ epena꞉ wi la꞉ mepi pea iki pa꞉ta꞉ alota꞉ Iki pa꞉ta꞉ ota꞉ pi alome. Do natehali kosa꞉piki wanda꞉ sikima꞉ mea a꞉pa lopaeya꞉ eki sikita꞉ tiekee. Mo mea a꞉pa lopaaseme wanda꞉hali paeyaona꞉ ekita꞉ hosiki alesikie.

⁴⁴Wanda꞉hali paeyaoma꞉ ika꞉ mani tieke putupu mea putupiliki wimiki ekimanu mea lopaememe. Kutu pimikipate do wanda꞉ma꞉ ipika꞉ natehali hata꞉ ipika꞉ wia꞉ hayekeeki paeyao mea lopaeya꞉me leekeme. Ipika꞉ ne hamba꞉pekeeki kone mea lopaeya꞉me leekeme.