Read Sembeleke Maka 13 Bible Online

Maka 13 - Sembeleke bible

Maka 13

¹Yesuma꞉ mo tembolo da mina꞉pa꞉lao hama꞉ nane opolu baaso haena꞉ ipika꞉ disaipolo hali homekema꞉ ipiki pa꞉ta꞉ alota꞉ Wala꞉la꞉ Halio. Handa꞉e. Do toopimanu tieke tiekee leekeme. Do da tiekemanu make seliapo seliapoe leekeme.

²Yesuma꞉ ipiki pa꞉ta꞉ alota꞉ Do da tiekemanu handelepe. Toopi manda ma꞉nda꞉ na tapa꞉ pelia hata꞉ paeyao ota꞉ lopilieke leekeme.

³Yesuta꞉ oli Olipi ti polu peiyene pa꞉ta꞉ mo tembolo da handa꞉moneao pitina꞉ Pida Dia꞉mesi Dioni A꞉ndutu make ika꞉ honumake sikima꞉ Yesu pa꞉ta꞉ lota꞉ pea alota꞉

⁴La kie lemekeme. Hande le ekita꞉ handima꞉ ipiliepe laa lota꞉ pimikime. Kutupa ipuluekema꞉ haena꞉ eki hau pulu pa꞉la꞉eki handuluma꞉pe laa lota꞉ pimikime.

⁵Yesuma꞉ iki pa꞉ta꞉ la halolo hata꞉ alota꞉ Wotu handeteke hapa꞉peke. Hali ma꞉nda꞉ma꞉ iki hatuku pu hoeyaama꞉na꞉ handeteke hapa꞉peke.

⁶Haliweki wopuma꞉ yaka biki alo hata꞉ alota꞉ I̱ta꞉ Ketisoe lelimikie. Kutupa wanda꞉hali wopu hatuku pu hoeyaalimikie leekeme.

⁷Teke pa꞉ta꞉ make papate make a꞉nda꞉ pitelememe pi opimika꞉na꞉ta꞉ paala꞉ma꞉ na homa꞉pa꞉peke. Kutu pulu pelemepate paelo pa꞉la꞉ nateta꞉ a̱i̱ dia꞉me leekeme.

⁸Koto ekina꞉ kenke homeke wanda꞉halima꞉ tiaota꞉ kenke ma꞉nda꞉ wanda꞉hali pa꞉ta꞉ a꞉nda꞉ pilimikie. Na꞉sinolo Kapomani homekena꞉ wanda꞉halima꞉ tiaota꞉ Na꞉sinolo Kapomani ma꞉nda꞉ pa꞉ta꞉ a꞉nda꞉ pilimikie leekeme. Yu kenke ta꞉ta꞉ ta꞉ta꞉ pa꞉ta꞉manu yu momeni wotu pilimikie. Kutupa da ma꞉nda꞉ nane da ma꞉nda꞉ nane halo peleme wanda꞉hali pa꞉ta꞉ tea꞉ ki ipilieke leekeme. Kutupulu pelemeeki manuta꞉ tandama꞉ homolo peleme ekita꞉ kini pu milimikie leekeme.

⁹Koto ekina꞉ta꞉ ika꞉ kone wotu handeteke hapa꞉peke. Pa ekipeke wanda꞉halima꞉ iki mo pi yokaalu pulu pa꞉la꞉ haliweki pa꞉ta꞉ mea hatuku pelimikie. Pi hotu hala꞉ damanu tukiki pa꞉ta꞉ iki yombu mea baalimikie. Kutupa yaka bikina꞉ kapomani you halimanu pa꞉ta꞉ make Kini haliweki pa꞉ta꞉ make hata꞉ ika꞉ pu halemekeeki la halimikie leekeme.

¹⁰Kutu puluekema꞉ haena꞉ titina꞉ amba꞉la mandane wanda꞉halima꞉ mo hande Pi Seliapo kenke ma꞉nda꞉ kenke ma꞉nda꞉ wanda꞉hali paeyao pa꞉ta꞉ walimikie leekeme.

¹¹Kutupa pi yokaalu puluekema꞉ iki mea hatuku pemeka꞉na꞉ta꞉ kota꞉ ika꞉ lolo peleme pi amba꞉la hone bao hapa꞉peke. Koto pita꞉ta꞉ Koda꞉ma꞉ la kia꞉ka꞉na꞉ta꞉ kotoeki lapa꞉peke leekeme. Ika꞉ kone pi na lelimikie. Holi Sipitidima꞉ lawaalieke.

¹²Kutupa hameke ma꞉nda꞉ma꞉ ipika꞉ kamesiki ota꞉ homena꞉ lelieke. Atekema꞉ make ipika꞉ weki kone ota꞉ homena꞉ laata꞉ weki wandiki tonuma꞉ make tiaota꞉ ika꞉ ateke inkiki yaapo ota꞉ homena꞉ lelimikie leekeme.

¹³Yaka biki menelemeke handaa wanda꞉hali paeyaoma꞉ iki ota꞉ kiaalimikie. Kutu pilimipate hali epima꞉ kima꞉ na homeke paelo pa꞉la꞉ tombona꞉ opolo puaata꞉ deto hala꞉eki milieke leekeme. Hoeyaapeke ya꞉la꞉ ale ipilieke

¹⁴Hoeyaapeke ya꞉la꞉ aleta꞉ mo hoke ale wia꞉peke na ya꞉la꞉ alena꞉ mea wia haena꞉ handemeka꞉na꞉ta꞉ Do pi yata꞉pa꞉la꞉ halima꞉ hone wina꞉e mo Diudia nane halo peleme wanda꞉halita꞉ mo potemanu pa꞉ta꞉ pindipa pena꞉e leekeme.

¹⁵Da holuna꞉ halia꞉ halima꞉ hola꞉pa꞉niao ala꞉ta꞉ ala꞉ta꞉ mea poluekema꞉ da tukiki pa꞉ta꞉ na honda꞉ pambena꞉e.

¹⁶Ena꞉ halia꞉ halima꞉ ipika꞉ dau mea poluekema꞉ hoki na lekelena꞉e leekeme.

¹⁷Weki pitiki wanda꞉weki make andu halimi wanda꞉weki make koto nate manuna꞉ta꞉ a꞉ta꞉e laata꞉

¹⁸koto dina꞉ta꞉ mo kosa꞉ kina꞉ta꞉ na epena꞉yeke yeni pea꞉pa꞉peke leekeme. Koto nate manuna꞉ta꞉ ka꞉nda꞉ma꞉ homa꞉la꞉eki hone matekeeki ipilieke leekeme.

¹⁹Ka꞉nda꞉ma꞉ homa꞉la꞉eki koto tupa꞉ amba꞉ na epeekeme. Koda꞉ma꞉ ala꞉ta꞉ ala꞉ta꞉ wepia haena꞉ la꞉la꞉ dina꞉ kini pa pua ame do make dia꞉me. Wetepena꞉ make ka꞉nda꞉ma꞉ homa꞉la꞉eki koto tupa꞉ na ipilieke leekeme.

²⁰Koto natena꞉ wanda꞉hali paeyao homolo pelemepate Koda꞉ma꞉ koto natemanu tunkulina꞉ la꞉la꞉me. Pa ekipekepe. Ipika꞉ talopu ma꞉la꞉ wanda꞉hali pa꞉ta꞉ hone wiaata꞉ koto natemanu tunkulina꞉ la꞉la꞉me.

²¹Koto natena꞉ta꞉ ma꞉nda꞉ma꞉ iki pa꞉ta꞉ alota꞉ Handa꞉pe. Ketiso do ane hala꞉me o Handa꞉pe. Ketiso mo nane hala꞉me lea꞉ka꞉na꞉ta꞉ na opua꞉pa꞉peke.

²²Yayapiki Ketiso haliweki make yayapiki potopede haliweki make a꞉paata꞉ iki penkilipulu peleme alemanu make wele pita꞉la꞉ ekimanu make walaata꞉ mo hande Koda꞉na꞉ talopu ma꞉la꞉ wanda꞉hali kone kutu pea꞉peke ya꞉ka꞉na꞉ta꞉ hatuku pu hoeyaaluekema꞉ walimikie.

²³Kutu pilimipate wotu handeteke hapa꞉peke. Epolo pa꞉la꞉ haumanu paeyao amba꞉ titina꞉ iki pa꞉ta꞉ la kua꞉me leekeme. Wetepena꞉ Wanda꞉halina꞉ Eiyeke ipilieke

²⁴Koto nate manuna꞉ mo hande ka꞉nda꞉ma꞉ homolo pelemeeki hone matekeeki paeya꞉ka꞉na꞉ta꞉ wetepena꞉ oli nate make timba꞉ lo pambaata꞉ oli sumba꞉ make ipika꞉ pa̱a̱ na pilieke.

²⁵Oli hombulanka꞉manu make ya nane hao honda꞉ pa pa pu lopa꞉tiki pilieke. Kutupa oli ya nane wele peaasa꞉ ekimanu la꞉ma꞉la꞉ma꞉ pupa wilimikie.

²⁶Koto natena꞉ta꞉ Wanda꞉halina꞉ Eiyeketa꞉ koa tukiki pa꞉ta꞉ hata꞉ wele wotu pitolo hata꞉ make pa̱a̱ tieke pitolo hata꞉ make epolo pa꞉la꞉eki handilimikie leekeme.

²⁷Ipikana꞉ma꞉ mo enisolomanu tapa tapa peaata꞉ Koda꞉ma꞉ talopu ma꞉la꞉ wanda꞉halita꞉ nate opa꞉la꞉ nane make nate pamba꞉la꞉ nane make oni nane make oli nane make paeyao pa꞉ta꞉ mea mombelaalieke leekeme. Handeteke hapa꞉peke laa onkoluma꞉ leekeeki

²⁸Nose tima꞉ pu hala꞉eki hone wia꞉pa꞉peke. Ipika꞉ paleke ada꞉ pea katake tindiki lia kelepea꞉ka꞉na꞉ta꞉ bapi ipuluekema꞉ pita꞉la꞉me hone u halememe leekeme.

²⁹Kutupa make hande loa꞉ alemanu ipula꞉eki handemeka꞉na꞉ta꞉ kota꞉ tekepa꞉ta꞉ ya꞉la꞉me laa pota꞉ kake pa꞉ta꞉ hande nate kone a꞉pa hala꞉me hone wia꞉pa꞉peke leekeme.

³⁰Iki pa꞉ta꞉ ota꞉ pi alome. Do haleme wanda꞉halita꞉ paeyao na homeke halimi pita꞉ I̱ma꞉ loa꞉ alemanu paeyao amba꞉ ipilieke leekeme.

³¹Oli ya do kenke yaapota꞉ paelo pa꞉la꞉pate yaka pi lo haloeki manuta꞉ na paelieke leekeme. Epolo pa꞉la꞉ nateta꞉ ma꞉nda꞉ma꞉ na handa꞉la꞉me laa leekeeki

³²Kutu piliepate hande loa꞉ nate epolo pa꞉la꞉ ekita꞉ ma꞉nda꞉ma꞉ na handa꞉la꞉me. Nate handopa꞉ta꞉ haena꞉ epolo pa꞉la꞉eki make ma꞉nda꞉ma꞉ na handa꞉la꞉me. Oli hepeni nane haleme enisolo tapakema꞉ make Eiyekema꞉ make na handelema꞉pate Atekema꞉ homeke handa꞉la꞉me leekeme.

³³Ikita꞉ u̱ na peliki yu wia hapa꞉peke. Mo epolo pa꞉la꞉ dita꞉ iki mateleme.

³⁴Do tupa꞉e leekeme. Hali ma꞉nda꞉ma꞉ kimisu pea꞉ka꞉na꞉ta꞉ da mina꞉pa꞉lao ipika꞉ e pokaaseme haliwekima꞉ handeteke haena꞉ laa ika꞉ kaukata walaa tapa tapa pea kutupa pota꞉ kake handeteke hala꞉ halima꞉ wopu handeteke haena꞉ lelieke leekeme.

³⁵Koto ekina꞉ handeteke hapa꞉peke. Hande da teke halina꞉ epolo pa꞉la꞉ dita꞉ iki mata꞉la꞉me. Timba꞉ timba꞉ alo haena꞉pe o buta꞉ hokina꞉pe o koka꞉la꞉ e̱ alo haena꞉pe o da ka꞉la꞉paaso nanepe.

³⁶Ikita꞉ u̱ peliolo hamina꞉ ipikita꞉ kutaa kone a꞉paama꞉na꞉ loa꞉me.

³⁷Kutupa I̱ma꞉ iki pa꞉ta꞉ alo ekita꞉ wanda꞉hali paeyao pa꞉ta꞉ alome. Handeteke hapa꞉peke leekeme.