Read Sembeleke Maka 16 Bible Online

Maka 16 - Sembeleke bible

Maka 16

¹Kutupa Diu wanda꞉halina꞉ Hoto Pila꞉ Nate welealo nane paeyeketa꞉ Ma꞉kadala wanda꞉ Metima꞉ make Dia꞉mesina꞉ inkiki Metima꞉ Salomema꞉ make Yesuna꞉ tonka꞉na꞉ yankaalo poluekema꞉ senisi alemanu hambemekeme.

²Sande da ka꞉la꞉paaso siki nate opa꞉la꞉ haena꞉ Yesuna꞉ toko wieke ale pa꞉ta꞉ pemekeme.

³Pulu hata꞉ ika꞉ ika꞉ kone alota꞉ Mo hande toopi ka꞉ka꞉na꞉ a꞉mba ula꞉ toopita꞉ epima꞉ mea a꞉meiyao petepete yawalia꞉pe lemekeme.

⁴Koto lemekepate pa handa꞉liaaso hata꞉ mo hande toopi petepete yawao lumbupa wieke ekita꞉ handemekeme. Kutupa make mo toopita꞉ ota꞉ tieke yeekeme.

⁵Mo toopi lumba wieke alena꞉ honda꞉ pambaata꞉ weki hali homeke handemekeme. Mo wekihalita꞉ hakepiki dau hokulu pikieki pambaota꞉ ika꞉ popeke nane kiki nane pitiekeme. Kutupa mo wanda꞉ manuma꞉ta꞉ penkili pimikime.

⁶Mo hande wekihalima꞉ iki pa꞉ta꞉ alota꞉ Na penkili pea꞉pa꞉peke. Ikana꞉ma꞉ Na꞉sa꞉tete hali Yesu mo a꞉ka꞉tei wapepiki tina꞉ tamendiaemeke hali weitelememe. Ipikita꞉ do pa꞉ta꞉ na ula꞉me. Amba꞉ tia꞉me. Ipika꞉ toko wimiki alena꞉ koto handa꞉pe leekeme.

⁷Kotoeki handaa Pupe laa Pida make Yesu ipika꞉ mandane disaipolo haliweki make Yesuta꞉ mo Ka꞉lili nane titina꞉ amba꞉la pea꞉me lolo pupe. Ipikana꞉ma꞉ iki pa꞉ta꞉ amba꞉ hande lea꞉ tupa꞉ koto pa꞉ta꞉ handilimikie lolo pupe leekeme.

⁸Mo wanda꞉manu hama nane opolu bao mo toko wieke alena꞉ mina꞉pa꞉laota꞉ pututu litolo hata꞉ make penkili pitolo hata꞉ pindi pa puaata꞉ paala꞉ma꞉ homemeke handaa ma꞉nda꞉ pa꞉ta꞉ pi na lemekeme. Yesuma꞉ Ma꞉kadala wanda꞉ Meti pa꞉ta꞉ ipiki waleekeeki

⁹[Yesuma꞉ta꞉ Sande da panake ka꞉la꞉polo haena꞉ tiaota꞉ titina꞉ amba꞉la mo Ma꞉kadala wanda꞉ Metima꞉ handena꞉yeke peneme yaeyekeme. Mo wanda꞉ta꞉ Yesuma꞉ amba꞉ kone ipika꞉ hoke temoko watake hata꞉ tolu lieke wanda꞉e.

¹⁰Mo wanda꞉ma꞉ Yesu ame̱le̱ amba꞉ pomu haemeke wanda꞉halima꞉ e̱ alo haena꞉ Yesuma꞉ leeke pi lolo peekeme.

¹¹Kutu piekepate mo wanda꞉halima꞉ Yesu paa tiao hala꞉me leekeeki opuata꞉ I̱ma꞉ handoa꞉me leekeeki opua kone ota꞉ na opimikime. Yesuma꞉ disaipolo hali yaapo pa꞉ta꞉ ipiki waleekeeki

¹²Wetepena꞉ hali yaapo pota꞉na꞉ pepekepate Yesuma꞉ mo hali yaapoma꞉ handena꞉yeke ta꞉ta꞉ piki hali leke peekeme.

¹³Kutupa mo hali yaapoma꞉ paa la꞉ka꞉la puaata꞉ mandane hoki nane tolu haemeke wanda꞉hali lolo pepekepate ipilika꞉ pi make na opimikime. Yesuma꞉ mo 11 disaipolo haliweki pa꞉ta꞉ ipiki waleekeeki

¹⁴Kutupa wetepena꞉ mo hande kiki yaapona꞉ ankena꞉ homeke pu haliweki kone ne nalo pitina꞉ iki pa꞉ta꞉ ipika꞉ kone waleekeme. Yesuma꞉ mo haliwekima꞉ ipika꞉ tiao hayekeeki handemeke wanda꞉halina꞉ pi na opimiki handaata꞉ Yesuma꞉ mo haliwekina꞉ pi na opimiki ekina꞉ make ika꞉ puki taka꞉laeyeke ekina꞉ make pi leekeme.

¹⁵Yesuma꞉ iki pa꞉ta꞉ alota꞉ Kenke paeyao pa꞉ta꞉ puaata꞉ wanda꞉hali paeyao pa꞉ta꞉ do pi seliapo wala꞉pa꞉peke laa

¹⁶Hali epima꞉ pi mea bapitaisi peawaya꞉ka꞉na꞉ta꞉ koto halita꞉ da꞉ta halieke. Kutu piliepate hali epima꞉ pi na mia꞉ka꞉na꞉ta꞉ ipika꞉ yenki milieke. Koda꞉ma꞉ pi yokaalu pia꞉ka꞉na꞉ta꞉ kota꞉ alu pilieke.

¹⁷Kutupa pi mulu peleme wanda꞉halima꞉ do wele pita꞉la꞉ ekimanu handilimikie leekeme. Ya bikina꞉ hoke temokomanu tolu limikie. Panake pimanu lelimikie.

¹⁸Hoke ketomanu kikima꞉ minilimikie. Hali homaasa꞉ ikali nemeka꞉na꞉ta꞉ na homilimikie. Yeni haaseme wanda꞉halina꞉ ika꞉ kiki wimika꞉na꞉ta꞉ koto wanda꞉hali tiaalimikie leekeme. Yesu oli ya nane hatuku miekeeki

¹⁹Koto ekina꞉ Tekehali Yesuma꞉ mo wanda꞉hali pi la halo paeyaota꞉ Koda꞉ma꞉ Yesu mea oli ya nane hatuku miekeme. Kutupa Yesuta꞉ Koda꞉na꞉ popeke nane kiki nane pitiniaeyekeme.

²⁰Yesuta꞉ oli hepeni nane pua hata꞉ disaipolo wanda꞉halima꞉ kenke paeyaona꞉ do pi seliapo wala꞉tiki pu hayekeme. Kutupa Tekehalima꞉ mandakena꞉ e pokolo hata꞉ wanda꞉halima꞉ ika꞉ pi ota꞉ pie lena꞉yeke wele pieke ekimanu pimikime. Kutu pimikime.]