Read Sembeleke Luku 20 Bible Online

Luku 20 - Sembeleke bible

Luku 20

¹Nate ma꞉nda꞉na꞉ Yesuta꞉ tembolo da pa꞉ta꞉ pita꞉ wanda꞉hali Koda꞉na꞉ mana꞉ pi alo make mo Pi Seliapo walo hayekeme. Kutupa mo yeni peao haemeke haliwekina꞉ you haliweki make mo Lo Pi walo haemeke haliwekima꞉ make mandane da handeteke haemeke you haliweki paeyao a꞉pa

²Yesu pa꞉ta꞉ alota꞉ Do pu haleeki manuta꞉ epina꞉ welema꞉ pie ala꞉eki pu halepe. Kutupa make neketa꞉ epima꞉ honkopu ku haleke pipe laa niki opuomono a̱i̱ la kie lemekeme.

³Yesuma꞉ ika꞉ pi hombo peaaso alota꞉ I̱ma꞉ iki ma꞉nda꞉ lota꞉ pionoe.

⁴Dionima꞉ wanda꞉hali bapitaisi peayeke ekina꞉ honkoputa꞉ wanda꞉halima꞉ haleekepe o Koda꞉ma꞉ haleekepe laa leekeme.

⁵Koto pi opuata꞉ mo haliwekima꞉ ika꞉ ika꞉ kone alo alota꞉ Nikana꞉ma꞉ta꞉ ekipa hombo peamana꞉pe. Hepeni nane ekie loma꞉ka꞉na꞉ta꞉ kota꞉ niki pa꞉ta꞉ta꞉ Dionima꞉ lo hayeke pi manuta꞉ ekipeke na miniki haemepe laa lelieke.

⁶Pate nikana꞉ma꞉ kenke wanda꞉halina꞉ ekie loma꞉ka꞉na꞉ta꞉ do wanda꞉hali wopuma꞉ niki toopima꞉ lilimikie. Pa ekipeke iki paeyaoma꞉ Dionita꞉ Koda꞉na꞉ pi la꞉ mea halo hayeke halie lo halememe.

⁷Koto ekina꞉ ikana꞉ma꞉ Yesu pa꞉ta꞉ alota꞉ Niki na handoloma꞉me lemekeme.

⁸Koto lemeke Yesuma꞉ hombo peaaso alota꞉ I̱ma꞉ make yaka pu halo hau manuna꞉ wele peao hala꞉ halina꞉ bikita꞉ iki pa꞉ta꞉ na la kulueke leekeme. Hoke haliwekima꞉ e handeteke haemekeeki

⁹Kutupa Yesuma꞉ mo wanda꞉hali pa꞉ta꞉ onkoluma꞉ pi ma꞉nda꞉ la halolo alota꞉ Hali homeke ma꞉nda꞉ ipikita꞉ waini pu e pokaata꞉ mo eta꞉ mandane haliwekima꞉ handeteke haena꞉ta꞉ yenki mulu pimiki ekita꞉ hosikima꞉ putupa ipiki pa꞉ta꞉ hala꞉tiki pina꞉yeke halaata꞉ nate hokuluna꞉ papate peekeme.

¹⁰Wetepena꞉ mo waini kiliki talemeke nate opolo epeeketa꞉ mo hande haliwekima꞉ ipika꞉ putu piliki wiaemekeeki meaena꞉yeke ipika꞉ e pokaeyeke hali ma꞉nda꞉ tapaeyekeme. Kutu piekepate hande halita꞉ mo haliwekima꞉ yombua bao ala꞉ta꞉ ma꞉nda꞉ siki make na haleke pa tapaemekeme.

¹¹Kutu pimiki handaata꞉ paa ipika꞉ e pokaeyeke hali ma꞉nda꞉ tapaeyekeme. Kutu piekepate mo haliwekima꞉ta꞉ mo halita꞉ yaala꞉ meao yombua bao ombu ala꞉ta꞉ ma꞉nda꞉ make na haleke pa tapaemekeme.

¹²Kutu pimiki ombu paa tepo peao ipika꞉ e pokaeyeke hali ma꞉nda꞉ tapaeyekepate mo hande haliwekima꞉ta꞉ koto some make lia yombua bao tete tete mea pitao mo e pa꞉ta꞉ yama꞉ mea baemekeme.

¹³Kotoeki ombu pimiki mo hande waini ena꞉ teke somema꞉ alota꞉ I̱ma꞉ eki pulua꞉pe hone wiaata꞉ Yaka pukima꞉ na kepeleke weki kone tapalueke hone wiekeme. Ipika꞉ honema꞉ alota꞉ Yaka wekina꞉ pita꞉ ota꞉ opua pilimikie laa leekeme.

¹⁴Kutu piekepate mo hande e handeteke haemeke haliwekima꞉ta꞉ mo weki epeekeeki handaata꞉ kota꞉ ika꞉ honema꞉ lombolo alota꞉ Hande e teke halina꞉ anke teke mulu pa꞉la꞉ wekita꞉ koto ipula꞉ handa꞉e. Ota꞉ lumana꞉e la alota꞉ Luma꞉ka꞉na꞉ta꞉ kota꞉ mo eta꞉ ota꞉ nika꞉ eki wilieke lemekeme.

¹⁵Koto laata꞉ ikana꞉ma꞉ mo someta꞉ e tikene nane yola꞉ mea puaata꞉ lia homaemekeme leekeme. Koto pimanu la paeyeketa꞉ Yesuma꞉ mo wanda꞉hali lota꞉ pitolo alota꞉ Do ena꞉ tekehali opolo epea꞉ka꞉na꞉ta꞉ kota꞉ mo e handeteke haleme haliweki pa꞉ta꞉ta꞉ eki haumanu pilia꞉pe.

¹⁶Ipikana꞉ma꞉ a꞉pa mo haliweki liaata꞉ ipika꞉ eta꞉ mo mandane e handeteke halo pa꞉la꞉ haliweki pa꞉ta꞉ hala꞉ monealieke leekeme. Mo wanda꞉halima꞉ doeki opu hao alota꞉ Ota꞉ kutupa dia꞉me lemekepate

¹⁷Yesuma꞉ iki handake witolo hata꞉ lota꞉ pitolo alota꞉ Dia꞉me alemepate mo Baibolo bukana꞉ wape pea ula꞉ pima꞉ta꞉ Mo da a꞉eyo haemeke haliwekima꞉ Hoela꞉me laa kiaemeke toopi kone ameta꞉ keneme pa꞉ta꞉ dana꞉ teke toopi ula꞉me la꞉la꞉ ekina꞉ teketa꞉ alekepe la loa꞉me.

¹⁸Mo koto toopi manda lopilia꞉ hali ma꞉nda꞉ a꞉nda꞉ta꞉ ota꞉ pindi pindi pilieke. Kutupa make mo toopima꞉ hali ma꞉nda꞉ a꞉nda꞉ manda lopea꞉ka꞉na꞉ta꞉ kota꞉ mo someta꞉ yombua bao dokolo au lalieke leekeme. Sisana꞉ dakisi mani

¹⁹Koto leeke ekina꞉ mo yeni peao haemeke haliwekina꞉ you haliweki make hande pi ula꞉eki walo haemeke haliwekima꞉ make Yesu koto kone minuluekema꞉ yeke taapemekeme. Ekipeke ika꞉ hone witolota꞉ Ipikana꞉ma꞉ lea꞉ onkoluma꞉ pita꞉ iki pa꞉ta꞉ kone lea꞉me hone witolo hata꞉ pimikime. Kutu puluekema꞉ pimikipate mo wanda꞉halima꞉ paala꞉ pieke handa paemekeme.

²⁰Koto ekina꞉ yeketa꞉ ikana꞉ma꞉ pota꞉ ma꞉nda꞉ weitolo hata꞉ mandane haliwekima꞉ lota꞉ pita꞉la꞉eki manuma꞉ Yesu tamena꞉yeke ma꞉na꞉ yapa꞉ pimikime. Mo haliweki pa꞉ta꞉ alota꞉ Makeaaso hata꞉ kone ikana꞉ma꞉ homu piki pimanu alememe hone wina꞉ lota꞉ pulu pupe lemekeme. Ika꞉ hone tukiki pa꞉ta꞉ta꞉ Koto lota꞉ pilimi ekima꞉ pa makeaaso hata꞉ Yesuna꞉ kiki tondoliki honda꞉ lia mo Loma꞉na꞉ Kapomani You halina꞉ kiki nane hala꞉ monealumeke laa honema꞉ pimikime.

²¹Koto hambemeke ma꞉na꞉ ikiki haliwekima꞉ pua lota꞉ pitolo alota꞉ Wala꞉la꞉ Halio. Nikana꞉ma꞉ta꞉ nakana꞉ma꞉ lo hale pi make walo hale pi make ota꞉ pi lo haleme hone witoloma꞉me. Kutupa nakana꞉ma꞉ mo biki ula꞉ wanda꞉hali pa꞉ta꞉ hone ma꞉nda꞉ na u hake iki paeyao pa꞉ta꞉ mandake hau piki wanda꞉halie laata꞉ Koda꞉na꞉ ota꞉ hau pita꞉la꞉ pi homeke walo haleme laa alota꞉

²²Niki la kie. Mo Kapomani tieke Sisa pa꞉ta꞉ dakisi mani hala꞉la꞉ ekita꞉ a꞉pa꞉la꞉pe o hoela꞉pe. Halomonope o na halomonope lemekeme.

²³Koto lemekepate Yesuma꞉ ika꞉ makeaaso pimikieki amba꞉ handaata꞉ mo haliweki pa꞉ta꞉ alota꞉

²⁴Mo toopi kiliki homeke ma꞉nda꞉ i̱ pa꞉ta꞉ wala꞉pe. Do a̱o̱a̱o̱ pita꞉ biki yaapota꞉ epina꞉eki ya꞉ka꞉ta꞉pe laa lota꞉ piekeme. Ikana꞉ma꞉ alota꞉ Mo Sisana꞉ ekie lemekeme.

²⁵Koto lemeke Yesuma꞉ alota꞉ Sisana꞉ alemanu meatiki pitolota꞉ kota꞉ Sisa pa꞉ta꞉ kone mea hala꞉tiki pu hapa꞉peke. Kutupa Koda꞉na꞉ alemanu ya꞉ka꞉na꞉ta꞉ kota꞉ Koda꞉ pa꞉ta꞉ kone pa hala꞉tiki pu hapa꞉peke leekeme.

²⁶Mo wanda꞉halina꞉ leke popelekena꞉ Yesu mea lopapeke tupa꞉ mateeke handaa mo hande haliwekima꞉ pi ma꞉nda꞉ na leke ipika꞉ hombo peayeke ekina꞉ pututuma꞉ homa pitatia yapemekeme. Homa paa tiaasa꞉ ekina꞉ lota꞉ piekeeki

²⁷Kutupa mandane Sa꞉dusi haliwekita꞉ homemeke wanda꞉hali paa na tialieke lo haemeke haliwekima꞉ Yesu ombu lota꞉ pulu a꞉pa alota꞉

²⁸Wala꞉la꞉ halio. Mosesima꞉ nika꞉ Lo Pi dupa lao wiala꞉me. Hali ma꞉nda꞉ta꞉ wekiwandiki ma꞉nda꞉ na mondu wiki weteke homeke mina꞉pa꞉lao homea꞉ka꞉na꞉ta꞉ kota꞉ mo kosa꞉ piki wanda꞉ta꞉ ipika꞉ hamekema꞉ meaata꞉ mo mendilipi wekiwandikita꞉ mo homea꞉ somena꞉eki mendiaena꞉ laa la꞉la꞉me leekeme.

²⁹Kota꞉ amba꞉ a꞉nda꞉ hama̱la̱꞉ hama̱la̱꞉ watake hata꞉ haemekeme. Kutupa mupeke halita꞉ wanda꞉ mea hao kone wekiwandiki ma꞉nda꞉ na mondu wiki pa homeekeme.

³⁰Kutu pieke handaa mo hoki pa꞉ta꞉ halima꞉ mo kosa꞉piki wanda꞉ miekepate homeke tupa꞉ kone homeekeme.

³¹Kutu pieketa꞉ kota꞉ tepo peao halima꞉ mea ipikana꞉ma꞉ make homeke hau piekeme. Kutupa mo hama̱la̱꞉ hama̱la̱꞉ paeyao pa꞉ta꞉ homeke hau ombu piekeme.

³²Kutu pua꞉tiki pua paelo pulu hata꞉ta꞉ mo hande wanda꞉ make homeekeme.

³³Kutu pimikipate mo wanda꞉hali paa tialimi natena꞉ta꞉ mo hande wanda꞉ta꞉ ota꞉ epina꞉ wanda꞉ haliepe. Pa ekipeke mo hande watake hata꞉ hali paeyaoma꞉ mo homeke wanda꞉ kone mimiki ekina꞉ loma꞉me lemekeme.

³⁴Yesuma꞉ ika꞉ pi hombo peaaso alota꞉ Ame do kenkena꞉ hatia ipula꞉ wanda꞉halita꞉ mu alualu pea tooli hao halemepate

³⁵pa mo homa paa tiao mo wetepe nane ipilia꞉ natena꞉ta꞉ paa hao haena꞉ ana꞉pa꞉la꞉ wanda꞉hali ikita꞉ tooli au na lelimikie.

³⁶Ikita꞉ enisoloma꞉ handaa paa na homeke hao halimikie. Ikita꞉ Koda꞉na꞉ wekiwandiki halimikie. Pa ekipeke ikita꞉ homa paa tialememe.

³⁷Kutupa Mosesima꞉ta꞉ homeleme wanda꞉halina꞉ paa tiaasa꞉ ekita꞉ ana꞉na꞉ peneme yao wala꞉la꞉me. Mo Baibolo bukana꞉ tunkula ula꞉eki ma꞉nda꞉ pa꞉ta꞉ta꞉ Mosesima꞉ mo ti talo hala꞉ pa꞉ta꞉ pua Tekehali pa꞉ta꞉ alota꞉ Koda꞉ neketa꞉ Eipoloha꞉ma꞉na꞉ Koda꞉ make Aisa꞉kena꞉ Koda꞉ make Dieikopena꞉ Koda꞉ haleme laa leekeme.

³⁸Kota꞉ koto Koda꞉ta꞉ paa hao hala꞉ wanda꞉halina꞉ Koda꞉ hala꞉me. Homeleme wanda꞉halina꞉eki dia꞉me. Ekipeke. Ipiki pa꞉ta꞉ta꞉ wanda꞉hali paeyao paa hao halememe leekeme.

³⁹Mandane Lo Pi walo haemeke haliwekima꞉ alota꞉ Wala꞉la꞉ Halio. Nakana꞉ma꞉ta꞉ epeke tupa꞉ la꞉ka꞉la la꞉neaseme lemekeme.

⁴⁰Koto lemeke ekita꞉ ikana꞉ma꞉ lota꞉ pita꞉la꞉eki ma꞉nda꞉ lapeke ana꞉ na poloma꞉me hone witolo hata꞉ lemekeme. Ketisona꞉ tapake apa꞉ta꞉ epipe

⁴¹Yesuma꞉ iki pa꞉ta꞉ alota꞉ Ekipa wanda꞉halima꞉ Ketisota꞉ hande Deipidina꞉ tapake weki yelieke lapeke ya꞉la꞉pe.

⁴²Pa ekipeke Deipidima꞉ ipika꞉ kone mo Emeli manuna꞉ buka pa꞉ta꞉ alota꞉Mo Tekehalima꞉ yaka Tekehali pa꞉ta꞉ dupa leekeme.

⁴³Naka꞉ a꞉nda꞉ tunkiliki haliwekita꞉ naka꞉ anke oto pa꞉ta꞉ mea pitaluekema꞉ neketa꞉ yaka popeke nane kikina꞉ pita꞉pekee la꞉la꞉me leekeme.

⁴⁴Koto ekina꞉ta꞉ Deipidima꞉ ipika꞉ kone Ketiso pa꞉ta꞉ta꞉ Yaka Tekehalie la꞉la꞉ ekina꞉ kota꞉ Ketisota꞉ ekipa ipika꞉ tapake weki halia꞉pe laa leekeme. Yesuma꞉ mo Lo Pi walo haemeke haliweki pa꞉ta꞉ kinki piekeeki

⁴⁵Mo wanda꞉hali paeyaoma꞉ Yesuma꞉ alo pitieke pi opitolo haena꞉ ipika꞉ disaipolo haliweki pa꞉ta꞉ alota꞉

⁴⁶Mo Lo Pi walo haemeke haliwekina꞉ hau wotu handeteke hapa꞉peke. Ikana꞉ma꞉ta꞉ hokulupiki daumanu pambao pomu hata꞉ta꞉ makedina꞉ hatiki pita꞉la꞉ wanda꞉halima꞉ iki pa꞉ta꞉ homu pitolo pi la halena꞉ hone wotu u halememe. Mo yeni damanu tukiki pa꞉ta꞉ pituluekema꞉ta꞉ wanda꞉halima꞉ iki handena꞉ hone wia mo you haliweki pitina꞉ wepia wiala꞉ epeke seamanu yata꞉pa pitu halememe. Ne pambaasa꞉ ekina꞉ make epeke haupiki seana꞉ pituluekema꞉ hone u halememe.

⁴⁷Kutupa kosa꞉piki wanda꞉wekina꞉ damanu makea makea pea minolota꞉ handaena꞉ hau pea yeni pu hokulu peao halememe. Koto ekina꞉ta꞉ mo haliwekima꞉ ika꞉ mulu peleme hoke yenkita꞉ ota꞉ haka꞉ta꞉pao tieke milimikie leekeme.