Read Sembeleke Luku 24 Bible Online

Luku 24 - Sembeleke bible

Luku 24

¹Sande da panake ka꞉la꞉ polo nate epolo haena꞉ta꞉ mo wanda꞉ sunuma꞉ Yesuna꞉ lapa꞉ nane mo hande tiki tiki yaemeke totopo wopu piki honkumanu miniki pemekeme.

²Mo alena꞉ opolo pemekepate mo hande pota꞉ pokeeke toopi tieketa꞉ pete pete yao wiekeeki handaata꞉

³honda꞉ pambemekepate mo Tekehali Yesuna꞉ loketa꞉ na wiekeme.

⁴Mo wanda꞉ sunuta꞉ koto pa꞉ta꞉ hata꞉ hone ti yokolo haena꞉ koto kone hake pupapeke leke yala꞉ yala꞉ piki aka꞉ yama꞉ mea hali yaapo a꞉pa haepekeme.

⁵Koto ekina꞉ ota꞉ paala꞉ tiekema꞉ homolo hata꞉ mo wanda꞉ sunuta꞉ kenke nane you mina꞉niao haena꞉ mo hali yaapoma꞉ alota꞉ Ekipeke mo amba꞉ da꞉ta hala꞉ halita꞉ mo hali toko u hala꞉ alena꞉ weitelemepe.

⁶Ipikita꞉ do pa꞉ta꞉ na ula꞉me. Ipikita꞉ amba꞉ tiao pa꞉la꞉me. Mo hande ipiki Ka꞉lili hata꞉ lea꞉eki manuta꞉ niminaasemepe.

⁷Dupa lea꞉me. Mo Wanda꞉halina꞉ Eiyeketa꞉ mo hoke hau pu haleme haliwekina꞉ kikina꞉ hala꞉ moneaota꞉ a꞉ka꞉tei wape piki tina꞉ tame mea endiao liaata꞉ kutupa hoto tepo peao natena꞉ta꞉ paa tialieke laa lea꞉me lepekeme.

⁸Kutupa mo wanda꞉wekima꞉ Yesuna꞉ pi leekeeki niminaota꞉

⁹mo lapa꞉ mina꞉pa꞉lao puaata꞉ hande handemekeeki paeyao mo 11 disaipolo haliweki make mandane disaipolo wanda꞉hali paeyao pa꞉ta꞉ lemekeme.

¹⁰Koto wanda꞉ sunuta꞉ Meti Ma꞉kadala make Dioa꞉na make Dia꞉mesina꞉ inkiki Meti make iki ame̱le̱ haemeke mandane wanda꞉ sunuma꞉ mo pieke haumanu mo aposolo haliweki pa꞉ta꞉ la halemekeme.

¹¹Kutu lemekepate mo aposolo haliwekima꞉ta꞉ mo wanda꞉ sunuma꞉ lemeke pita꞉ apa꞉ta apa꞉ta piki pi alememe laa hone na wimikime.

¹²Kutu piekepate Pidama꞉ta꞉ mo lapa꞉ handulueke alo pototo laa mo toopi ka꞉ka꞉na꞉ pa꞉ta꞉ pua panda꞉ puniao ala꞉ta꞉ ma꞉nda꞉ na handeekepate mo tonkaeyeke aka꞉ hake piki homeke handeekeme. Kutupa moeki handolo hata꞉ penkilipa꞉tia pominolo hata꞉ paa la꞉ka꞉la da peekeme. Yesuta꞉ mo Emeiase pota꞉na꞉ handepekeeki

¹³Koto homeke natena꞉ kone Yesu telia꞉ mea pomu haepeke hali yaapo ma꞉nda꞉ta꞉ oni Emeiase leeke da siki ma꞉nda꞉ pa꞉ta꞉ polueke alo pepekeme. Mo da sikita꞉ mo Diutuseleme daoni mina꞉pa꞉lao 3 aowa tupa꞉ opolo pula꞉ da yekeme.

¹⁴Kutupa mo hali yaapoma꞉ta꞉ hande piekeeki manuna꞉ ipilika꞉ ipilika꞉ kone pi hotipipikime.

¹⁵Ipilikana꞉ma꞉ pi laa hotitia pulu haena꞉ta꞉ Yesuta꞉ ipiliki teke pa꞉ta꞉ leke pua mandakena꞉ pemekeme.

¹⁶Ipilikana꞉ma꞉ ipikita꞉ handepepekepate Yesue laa na handa꞉ wipikime.

¹⁷Yesuma꞉ mo hali yaapo pa꞉ta꞉ alota꞉ Koto pulu hata꞉ta꞉ ipilikana꞉ma꞉ta꞉ aleke pi hotia꞉lepepe leekeme. Mo hali yaapota꞉ a꞉ta꞉ piki leke popeleke hata꞉ poneke ale haepekeme.

¹⁸Ma꞉nda꞉ hondo Keliopasi leeke halima꞉ ipiki pa꞉ta꞉ lota꞉ pitolo alota꞉ Mo Diutuseleme daoni pa꞉ta꞉ a꞉pa haleme kimisu wanda꞉hali ame̱le̱ta꞉ hande ambaneke numaneke pia꞉ hau manuta꞉ neke homeke na opelepe leekeme.

¹⁹Yesuma꞉ alota꞉ Eki hau manupe leekeme. Kutupa mo hali yaapoma꞉ alota꞉ Mo hande Na꞉sa꞉tete hali Yesu pa꞉ta꞉ pia꞉ hau manuna꞉ lopa꞉me. Do halita꞉ potopede yaalo hata꞉ Koda꞉ma꞉ make wanda꞉hali paeyaoma꞉ make ipika꞉ pia꞉ hau manuma꞉ make leeke pimanu make honkopu wele pa꞉la꞉ halie lememe.

²⁰Kutupa nika꞉ yeni peao haleme you haliwekima꞉ make handeteke haleme haliwekima꞉ make ipikita꞉ a꞉ka꞉tei wape piki tina꞉ tame mea endiao lu homaena꞉ yeke hala꞉ moneaemekeme.

²¹Kutupa nika꞉ honema꞉ta꞉ ipikana꞉ma꞉ta꞉ mo Isulai wanda꞉hali lombo tapaalo pa꞉la꞉ halie hone uma꞉me. Koto haumanu pa꞉la꞉ ekita꞉ ameta꞉ tepo peao natee.

²²Kutupata꞉ mandane nika꞉ tapake wanda꞉ sunuma꞉ niki penkilipaememe. Ikita꞉ da ka꞉la꞉paaso siki mo lapa꞉na꞉ pemekepate

²³ipika꞉ loke na handa꞉ wimikime. Mo wanda꞉weki paa la꞉ka꞉la a꞉pa alota꞉ U̱ leme leme leke enisolo manuma꞉ Yesuta꞉ tiao da꞉ta hala꞉me laa lemekeeki niki a꞉pa la kimime.

²⁴Koto lemeke nika꞉ mandane tapake pua mo lapa꞉ pemekepate pa mo hande wanda꞉wekima꞉ lemeke tupa꞉ kone pua handa alota꞉ Yesuta꞉ na handoma꞉me lememe lepekeme.

²⁵Kutupa Yesuma꞉ mo hali yaapo pa꞉ta꞉ alota꞉ Meimei liake some yaapoo. Mo hande potopede halima꞉ leeke pimanu homeke a꞉nda꞉ hone a̱i̱ na tulao pipika꞉ta꞉me.

²⁶Mo Ketisoma꞉ta꞉ titina꞉ amba꞉la tanda meaata꞉ wetepena꞉ oli ipika꞉ pa̱a̱ peaasa꞉eki pa꞉ta꞉ honda꞉ pambolota꞉ ana꞉ na pa꞉la꞉pe laa leekeme.

²⁷Kutupa Yesuma꞉ iki pa꞉ta꞉ mo Baibolo paeyaona꞉ ipika꞉ pi lao ula꞉eki paeyao la haleekeme. Ipikana꞉ma꞉ mo Mosesina꞉ buka manuna꞉ kini pea a꞉pa mo potopede manuma꞉ lao wieke ekimanu lo paeyaeyekeme.

²⁸Kutupata꞉ iki paeyao mo polo pimiki da siki teke pa꞉ta꞉ yeketa꞉ Yesuta꞉ mo pateleke peke nono piekeme.

²⁹Pate mo hali yaapoma꞉ sa꞉sa꞉ pitolo hata꞉ alota꞉ Timba꞉ amba꞉ ala꞉me. Diki ame̱le̱ hae lepekeme. Koto lepeke Yesuta꞉ mo hali yaapo ame̱le̱ haluekema꞉ da peekeme.

³⁰Kutupa mo hali yaapo ame̱le̱ ne nolueke alo pitiniaota꞉ Yesuma꞉ mo betedi mea keiyae laata꞉ pindipa mo hali yaapo haleekeme.

³¹Kutu pitolo pitina꞉ mo hali yaapoma꞉ ipilika꞉ hone lombolo Yesu ya꞉ka꞉ta꞉me laa handa꞉ wipiki dina꞉ kone Yesuta꞉ koto pa꞉ta꞉ pitiki nono pea alu paeyekeme.

³²Mo hali yaapoma꞉ ipilika꞉ kone alota꞉ Mo hande pota꞉na꞉ hande Baibolona꞉ la꞉la꞉ ekimanu laa kieketa꞉ dika꞉ tukiki naneta꞉ ti uleke leke na teekea lepekeme.

³³Kutupa koto kone mo hali yaapota꞉ tiao paa Diutuseleme nane pua mo 11 disaipolo haliweki make mandane disaipolo haliweki ame̱le̱ momba꞉la pita꞉

³⁴hande Tekehalita꞉ ota꞉ da꞉ta hata꞉ Saimono pa꞉ta꞉ ipiki peneme yaala꞉me laa hotiolo pitimiki ale pa꞉ta꞉ opolo pepekeme.

³⁵Kutupa ipilikana꞉ma꞉ mo hande pota꞉na꞉ pieke ekimanu make Yesuma꞉ betedi pindipina꞉ handa꞉peke ekimanu make mo wanda꞉hali pa꞉ta꞉ la halepekeme. Disaipolo haliweki paeyaoma꞉ Yesu handemekeeki

³⁶Mo hande hali yaapoma꞉ moeki alo haena꞉ta꞉ koto kone mo Tekehali ipika꞉ kone iki ame̱le̱ mandakena꞉ peneme yao hata꞉ alota꞉ Puki lopaasa꞉eki iki pa꞉ta꞉ wina꞉e leekeme.

³⁷Mo wanda꞉hali paeyao pututu tiekema꞉ homolo hata꞉ ika꞉ honema꞉ta꞉ temoko handoloma꞉me hone wimikime.

³⁸Pate Yesuma꞉ iki pa꞉ta꞉ alota꞉ Ekipeke paala꞉ma꞉ homelemepe. Ika꞉ hone pa꞉ta꞉ta꞉ hone yaapo yaapo ekipeke witelemepe.

³⁹Yaka kiki anke handolota꞉ ota꞉ I̱ ya꞉ka꞉ta꞉me lapa꞉peke. I̱ wataemeka꞉na꞉ta꞉ ota꞉ I̱e hone wilimikie. Watae. I̱ta꞉ temoko yoluta꞉ loke make holiki make na halo pua꞉pate ikana꞉ma꞉ta꞉ I̱ta꞉ holiki hao loke haloeki handa꞉pe laa leekeme.

⁴⁰Yesuma꞉ doeki laata꞉ ipika꞉ kiki anke waleekeme.

⁴¹Kutu piekepate ikana꞉ma꞉ ta꞉na꞉ tiekema꞉ tumbitolo hata꞉ hone ti yokolo hata꞉ hone na tulaemeke handaa Yesuma꞉ iki pa꞉ta꞉ alota꞉ Napeke ale ma꞉nda꞉ wia pilimipe leekeme.

⁴²Koto leeke ikana꞉ma꞉ ta꞉peli teekeeki siki halemeke handaa

⁴³mea ika꞉ leke popelekena꞉ neekeme.

⁴⁴Kutupa Yesuma꞉ iki pa꞉ta꞉ alota꞉ Do hau manuta꞉ hande I̱ ame̱le̱ haeme dina꞉ la kua꞉ ekimanue. Mo hande Mosesina꞉ Lo Pi wape pea ula꞉ ekina꞉ make hande potopede haliwekima꞉ wape pea ula꞉ ekina꞉ make hande Emeli bukana꞉ wape pea ula꞉ ekina꞉ make I̱na꞉ lao ula꞉eki manuta꞉ ota꞉ yaapeke ya꞉la꞉me leekeme.

⁴⁵Kutupa Yesuma꞉ mo wanda꞉halina꞉ honemanu lumbao mo Baiboloma꞉ leeke ekimanu opina꞉ laa

⁴⁶iki pa꞉ta꞉ alota꞉ Dupa wape pea ula꞉me. Hande Ketisota꞉ tanda amba꞉la ota꞉ mea homaata꞉ hoto tepo peaasota꞉ ota꞉ paa tialieke laa wape pa꞉la꞉me. Kutupa make

⁴⁷ipika꞉ bikina꞉ mo hoke hauna꞉ hone la꞉ka꞉la꞉la꞉eki make pa paeyaasa꞉eki make mo Diutuseleme da pa꞉ta꞉ kini pea pua mo kenke honiki paeyao pa꞉ta꞉ haleme wanda꞉hali pa꞉ta꞉ ota꞉ walotia pua꞉pa꞉peke ya꞉la꞉me.

⁴⁸Ikita꞉ do hau manuna꞉ wekitisie.

⁴⁹Kutupa I̱ma꞉ta꞉ yaka Apa꞉ma꞉ amba꞉ kone la꞉ ula꞉ ale iki pa꞉ta꞉ tapalueke. Pate ikana꞉ma꞉ta꞉ do daoni tieke pa꞉ta꞉ mo hande wele pa꞉la꞉eki tieke oli ya nane iki pa꞉ta꞉ epena꞉ yu wia pita꞉pa꞉peke ya꞉la꞉me leekeme. Yesu oli ya nane mea peekeeki

⁵⁰Kutupa Yesuma꞉ mo wanda꞉hali hatuku mo daoni tieke mina꞉pa꞉lao mo Bedani puaata꞉ ipika꞉ kiki mina꞉liao mo wanda꞉hali epeaeyekeme.

⁵¹Kutu pitolo haena꞉ta꞉ Yesuta꞉ iki mina꞉pa꞉lao oli hepeni nane hatuku peekeme.

⁵²Mo wanda꞉halima꞉ Yesuna꞉ biki miniliaaso hata꞉ ta꞉na꞉ tiekema꞉ tumbitolo hata꞉ mo Diutuseleme da nane la꞉ka꞉la paa pemekeme.

⁵³Kutupa ikana꞉ma꞉ mo tembolo da pa꞉ta꞉ Koda꞉ pa꞉ta꞉ keiyae alo hata꞉ ika꞉ nate lekemanu paeyaemekeme.