Read Sembeleke Luku 7 Bible Online

Luku 7 - Sembeleke bible

Luku 7

¹Kutupa Yesuma꞉ mo wanda꞉hali pa꞉ta꞉ koto pimanu lo paeyaota꞉ mo Kapeneami daoni nane peekeme.

²Koto pa꞉ta꞉ mo Loma꞉ ami haliwekina꞉ you hali ma꞉nda꞉ hayekeme. Koto halima꞉ ipika꞉ pukima꞉ ta꞉na꞉ tieke homeeke e pokao hayeke hali teke pa꞉ta꞉ homuluekema꞉ taapeekeme.

³Kutu pieke handaa mo ami you halima꞉ Yesuma꞉ pieke ekimanu opuaata꞉ ipikana꞉ma꞉ mo mandane Diuna꞉ tondiki haliweki pa꞉ta꞉ Yesuma꞉ mo ipika꞉ e pokao hayeke some a꞉pa epeawaena꞉ yeke handaa mulu pupe laa tapaeyekeme.

⁴Koto tondiki haliwekima꞉ Yesu pa꞉ta꞉ a꞉pa ota꞉ meme piki honke alo hata꞉ alota꞉ Do halita꞉ nakana꞉ma꞉ epeke tamba꞉ mia꞉peke ya꞉la꞉ halie. Pa ekipeke.

⁵Ipikana꞉ma꞉ nika꞉ wanda꞉hali teke pa꞉ta꞉ pukima꞉ wotu homo hala꞉ make ipikana꞉ma꞉ ipika꞉ siki kone nika꞉ pi hotu haloma꞉ da ma꞉nda꞉ a꞉eyaeya꞉me leekeme.

⁶Kotoeki opuaata꞉ Yesuta꞉ mo haliweki ame̱le̱ mandakena꞉ pua mo da teke pa꞉ta꞉ polueke alo pulu haena꞉ mo ami you halima꞉ ipika꞉ yankeke tonuma꞉ Yesu pa꞉ta꞉ dupiki pimanu lena꞉yeke tapaeyekeme. Tekehalio. Pina꞉ pae.

⁷Neke ya da pa꞉ta꞉ epoelena꞉ loluekema꞉ta꞉ I̱ta꞉ epeke hali dia꞉ya꞉la꞉ ekina꞉ na ipilipikie laa Neke hale alena꞉ a꞉pa꞉peke make ota꞉ ana꞉ na pa꞉la꞉me. Nakana꞉ma꞉ta꞉ ipika꞉ yeni pa paena꞉e pi homeke leka꞉na꞉ta꞉ kota꞉ ya e pokaasa꞉ someta꞉ tialieke.

⁸Pa ekipeke. I̱ta꞉ mandane ami you hali oto pa꞉ta꞉ halome. Kutaa I̱ oto pa꞉ta꞉ make mandane ami haliweki halememe. Kutupa I̱ma꞉ ma꞉nda꞉ pa꞉ta꞉ Pue loa꞉ka꞉na꞉ta꞉ pelieke. Ma꞉nda꞉ pa꞉ta꞉ make Epoe loa꞉ka꞉na꞉ta꞉ ipilieke. Kutupa yaka pa hameke e pokaasa꞉ some pa꞉ta꞉ Do e pokae loa꞉ka꞉na꞉ta꞉ kota꞉ ota꞉ pealieke leekeme.

⁹Koto leekeeki Yesuma꞉ opuolota꞉ penkilipa꞉tia pominolo hata꞉ mo hande ipiki telimiki wanda꞉hali pa꞉ta꞉ la꞉ka꞉la꞉ moneao handolo hata꞉ alota꞉ I̱ma꞉ iki pa꞉ta꞉ ota꞉ pi alome. Dupiki hone tulaake some homeke ma꞉nda꞉ a꞉nda꞉ I̱ na handolome. Mo Isulai tapake tukiki pa꞉ta꞉ kone ota꞉ ma꞉nda꞉ a꞉nda꞉ na handa꞉ ulume.

¹⁰Kutupa mo tapaeya꞉ haliweki paa la꞉ka꞉la mo ami you halina꞉ da pa꞉ta꞉ pua mo hande e pokao hayeke halita꞉ pa epeke tupa꞉ tiao pitiekeeki handemekeme. Yesuma꞉ wanda꞉ kinekena꞉ weki mea tiaeyekeeki

¹¹Hosiki siki haota꞉ wetepe nane Yesu ipika꞉ hoki nane telimiki haliweki make wanda꞉hali wotu anekehapu ame̱le̱ Neini daoni pa꞉ta꞉ pemekeme.

¹²Ipiki pua mo teke da anekena꞉ wieke daoni pota꞉ kake pa꞉ta꞉ opolo polueke alo pulu haena꞉ mandane haliwekima꞉ mo homeeke hali toko mea hoilu poluekema꞉ yeke tia ipulu pitimikime. Mo homeeke halita꞉ kineke wanda꞉ siki ma꞉nda꞉na꞉ ota꞉ homeke weki siki yeekeme. Mo teke da aneke pa꞉ta꞉ haemeke wanda꞉hali woputa꞉ mo kineke wanda꞉ siki ame̱le̱ ipulu pitimikime.

¹³Tekehalima꞉ mo hande kineke wanda꞉ handaata꞉ ipika꞉ pukima꞉ a꞉ta꞉ tiekema꞉ homolo hata꞉ ipikana꞉ma꞉ mo wanda꞉ pa꞉ta꞉ alota꞉ E na lapee leekeme.

¹⁴Kutupa ipikana꞉ma꞉ mo toko tia epemeke bokosi teke pa꞉ta꞉ pua wataeyekeme. Kutu pieketa꞉ mo hande hali toko timiki haliwekima꞉ta꞉ pa tupaleke handeteke haemekeme. Yesuma꞉ alota꞉ Wekio. I̱ma꞉ neke pa꞉ta꞉ loma꞉ tiae leekeme.

¹⁵Mo hande homeeke wekita꞉ paa tiao pita꞉ta꞉ pimanu lombo leekeme. Kutu pieke Yesuma꞉ mo hande wekita꞉ inkiki pa꞉ta꞉ hala꞉ moneayekeme.

¹⁶Koto ekina꞉ta꞉ wanda꞉hali paeyaoma꞉ dupiki hau hando hao pututuma꞉ homolo hata꞉ Koda꞉na꞉ biki mea miniliaaso hata꞉ alota꞉ Ota꞉ aneke potopede ma꞉nda꞉ niki tukiki pa꞉ta꞉ a꞉pa꞉la꞉me. Koda꞉ma꞉ ipika꞉ wanda꞉hali tamba꞉ muluekema꞉ yeke a꞉pa꞉la꞉me lemekeme.

¹⁷Do hande Yesuma꞉ pieke ekina꞉ pi manuta꞉ koto kenke paeyao pa꞉ta꞉ make mo kenke honiki honiki paeyao pa꞉ta꞉manu latia pomimikime. Dionima꞉ Yesu pa꞉ta꞉ tapaeyeke hali yaapo

¹⁸Koto dina꞉ta꞉ Dionina꞉ hoki nane tolu haemeke haliwekima꞉ Yesuma꞉ pieke ekimanu paeyao ipiki pa꞉ta꞉ la halemekeme. Koto leeke Dionima꞉ ipika꞉ disaipolo hali yaapo wi la꞉mea

¹⁹alota꞉ Tekehali pa꞉ta꞉ pua dupa lota꞉ pea꞉pa꞉peke. Neketa꞉ hande Dionima꞉ Ipilieke leeke niki paeyaoma꞉ yu wia haloma꞉ hande hali ya꞉ka꞉ta꞉pe o hali ma꞉nda꞉ epena꞉ yu wia hamonope laa Yesu pa꞉ta꞉ lota꞉ pea꞉pa꞉peke leekeme.

²⁰Mo hande hali yaapota꞉ Yesu pa꞉ta꞉ opolo a꞉pa alota꞉ Mo bapitaisi peao hala꞉ hali Dionima꞉ neke pa꞉ta꞉ diki tapaeyeke handaa epopa꞉me. Neketa꞉ Dionima꞉ hande ipilieke leeke yu wia haloma꞉ hali ya꞉ka꞉ta꞉pe o paa hali ma꞉nda꞉ epena꞉ yu wia hamonope laa lota꞉ pitolopa꞉me lepekeme.

²¹Koto tomona꞉ kone Yesuma꞉ yeni ta꞉ta꞉ ta꞉ta꞉ hake wanda꞉hali make hoke temoko pitieke wanda꞉hali wopu make leke holu piki wanda꞉hali make paeyao mea epeatiki piekeme.

²²Kutupa Yesuma꞉ mo Dionima꞉ tapaeyeke hali yaapona꞉ pi hombo peaaso hata꞉ alota꞉ Ipiliki paa la꞉ka꞉la puaata꞉ do handepe ekimanu make do opipieki paeyaota꞉ Dioni pa꞉ta꞉ pua la hala꞉pa꞉peke. Dupa lapa꞉peke. Mo leke holu piki wanda꞉halita꞉ ameta꞉ paa handelememe. Mo anke dola꞉pake piki wanda꞉hali make ameta꞉ pota꞉ pulimime. Kutupa mo kindi yeni hala꞉ wanda꞉hali make ameta꞉ epeke tupa꞉ halememe. Mo katake poka꞉la꞉ wanda꞉hali make ameta꞉ pi ana꞉na꞉ opitelememe. Ota꞉ homemeke wanda꞉hali make ameta꞉ paa mea tiao epeke tupa꞉ halememe. Kutupa maketa꞉ mo hande Pi Seliapota꞉ mo natehali wanda꞉hali sunu pa꞉ta꞉ wala꞉la꞉me laata꞉

²³I̱ pa꞉ta꞉ hone yaapo yaapo lo na wimika꞉na꞉ta꞉ kota꞉ koto wanda꞉halita꞉ ta꞉na꞉ma꞉ homo halememe laa lapa꞉peke leekeme.

²⁴Mo hande hali yaapo Yesu mina꞉pa꞉lao pepeketa꞉ Yesuma꞉ koto pa꞉ta꞉ haemeke wanda꞉hali pa꞉ta꞉ Dionina꞉ pi dupa laeyekeme. Ikana꞉ma꞉ mo hapupapeke alena꞉ Dioni handuluekema꞉ pemeke hauta꞉ ota꞉ aleke handuluekema꞉ pemepe. Poma꞉ mo ambu mea anemone pea mekeaasa꞉eki handuluekema꞉ pemepe.

²⁵Ikana꞉ma꞉ koto alena꞉ ota꞉ aleke handuluekema꞉ pemepe. Ikana꞉ma꞉ hali ma꞉nda꞉ma꞉ epeke hamoko aka꞉manu pambao halia꞉eki handuluekema꞉ pemepe. Kutupiki aka꞉manu yama haleme wanda꞉halita꞉ hamoko hali leke hata꞉ kini haliwekina꞉ aneke da epeke pa꞉ta꞉ homeke halimikie.

²⁶Ikana꞉ma꞉ I̱ la kipa꞉e. Aleke handuluekema꞉ pemepe. Potopede hali handuluekema꞉ pemepe. Aowe. Ota꞉e. Kutu pimipate ipikita꞉ mo potopede haliweki paeyao ota꞉ ankulake hali handememe.

²⁷Koto ekita꞉ mo hande Baibolo bukama꞉ Dionina꞉ piekeeki dupa lao ula꞉me. Koda꞉ma꞉ alota꞉ Neketa꞉ a̱i̱ na epeke halena꞉ta꞉ amba꞉ titina꞉ I̱ma꞉ ya pimanu mea epena꞉yeke hali ma꞉nda꞉ tapalueke. Titina꞉ta꞉ ipikana꞉ma꞉ naka꞉ pota꞉ pilawalieke laa la꞉la꞉me laata꞉

²⁸Yesuma꞉ iki pa꞉ta꞉ alota꞉ Opua꞉pe. Dioni ipikita꞉ amba꞉ haemeke haliweki paeyao lu ankulala꞉pate Koda꞉na꞉ Kilu Tombuao Hala꞉ alena꞉ oto pa꞉ta꞉ hala꞉ hali ipikita꞉ Dioni lu ankulao hala꞉me leekeme.

²⁹Wanda꞉halima꞉ koto pi opuaata꞉ iki make mo dakisi mani mu haemeke haliweki ame̱le̱ paeyaota꞉ Dionima꞉ amba꞉ iki bapitaisi peaena꞉ laata꞉ ame dota꞉ Yesuna꞉ pi opitolo hata꞉ta꞉ Koda꞉na꞉ hau manuta꞉ ota꞉ tikitiki ya꞉la꞉me lemekeme.

³⁰Pate mo Pa꞉tisi haliweki pita꞉ Lo Pi walo haemeke haliwekima꞉ta꞉ Koda꞉ma꞉ iki pa꞉ta꞉ hone pa꞉la꞉eki manuta꞉ kiaasota꞉ Dionima꞉ iki bapitaisi peaapa꞉na꞉yeke kiaemekeme.

³¹Koto ekina꞉ Yesuma꞉ alota꞉ Ameta꞉ do kenkena꞉ haleme wanda꞉halita꞉ aleke tupa꞉ manda꞉ meanope o ikita꞉ alekema꞉ handelemepe.

³²Koto wanda꞉hali ikita꞉ mo makedi hama pa pitu haleme wekiwandikima꞉ handelememe. Mo tapake ma꞉nda꞉ma꞉ pa mo tapake ma꞉nda꞉ pa꞉ta꞉ wi la꞉moneaso hata꞉ alota꞉ Nikana꞉ma꞉ iki sama꞉ puemena꞉yeke tapeke luma꞉pate ikana꞉ma꞉ sama꞉ na piki kiaememe. Koto ekina꞉ nikana꞉ma꞉ pa homa꞉ emelimanu laoma꞉pate ikana꞉ma꞉ e̱ na leke kiaememe laa lemekeme.

³³Mo hande bapitaisi peao hayeke hali Dionima꞉ hoto paeyaota꞉ hoto ma꞉nda꞉na꞉ nee pi wia꞉tiki piekeeki make waini ikali na na꞉tiki pieke ekina꞉ ikana꞉ma꞉ alota꞉ Ipikita꞉ hoke temoko pila꞉ halie lememe.

³⁴Koto lemepate mo Wanda꞉halina꞉ Eiyeke ipiki a꞉paata꞉ ne make ikali a꞉pa na꞉tiki pieke handaata꞉ ikana꞉ma꞉ alota꞉ Do hali handa꞉pa꞉ ikali ne wopu no hake some ya꞉ka꞉ta꞉me. Kutupa ipikita꞉ mo dakisi mani mu haleme haliweki make mo wanda꞉halima꞉ ta꞉na꞉ma꞉ na homeleme tapekena꞉ yankeke hala꞉me laa lememe

³⁵laata꞉ Koda꞉na꞉ epeke hone wita꞉la꞉eki tolu haleme wanda꞉hali ika꞉ hauma꞉ kone mo hande hone wita꞉la꞉ ekita꞉ ota꞉ epekeekie laa peneme yao halimikie leekeme. Yesuma꞉ Pa꞉tisi hali ma꞉nda꞉ Saimonona꞉ da peekeeki

³⁶Kutupa nate ma꞉nda꞉na꞉ mo Pa꞉tisi hali ma꞉nda꞉ma꞉ ipika꞉ da pa꞉ta꞉ Yesu ne nolo epena꞉ yeke wi leeke handaa Yesuta꞉ ne nolueke alo pua pitiekeme.

³⁷Kutupa koto da teke pa꞉ta꞉ta꞉ hali yolo hayeke wanda꞉ ma꞉nda꞉ hayekeme. Koto wanda꞉ma꞉ Yesuta꞉ mo Pa꞉tisi halina꞉ da pa꞉ta꞉ a꞉pa ne no pila꞉me lemeeki opuaata꞉ ipikana꞉ma꞉ta꞉ a꞉la꞉ba꞉seta꞉ toopima꞉ wepiki kanakena꞉ mo totopo wotu piki oeta pambekeeki mea mina꞉ mo da pa꞉ta꞉ epeekeme.

³⁸Kutupa mo wanda꞉ma꞉ Yesuna꞉ hoki nane a꞉pa ipika꞉ anke teke pa꞉ta꞉ tiao hata꞉ ipika꞉ e̱ tonda꞉pa꞉ta꞉ Yesuna꞉ ankena꞉ lopena꞉ leekeme. Kutupa ipika꞉ itikima꞉ Yesuna꞉ ankena꞉ mo hande e̱ tonda꞉pa꞉ honia nunu peata꞉ mo totopo wotu piki oetata꞉ Yesuna꞉ ankena꞉ holayekeme.

³⁹Mo hande Pa꞉tisi halima꞉ kotoeki handaata꞉ ipika꞉ honema꞉ kone alota꞉ Do halita꞉ Koda꞉na꞉ potopede hali ya꞉ka꞉na꞉ yoluta꞉ ipikana꞉ma꞉ ipikita꞉ do wanda꞉ma꞉ wataasa꞉me laa peneme handolo pia꞉me. Ipikana꞉ma꞉ koto wanda꞉na꞉ pa꞉la꞉ hoke hauta꞉ hone ulu pia꞉me laa hone wiekeme.

⁴⁰Koto ekina꞉ Yesuma꞉ alota꞉ Saimonoo. Neke pa꞉ta꞉ I̱ma꞉ pi siki ma꞉nda꞉ lonoe leekeme. Mo halima꞉ Yesuna꞉ pi litolo hata꞉ alota꞉ Aowe disao. La kie leekeme.

⁴¹Koto leeke Yesuma꞉ dupa leekeme. Nate ma꞉nda꞉na꞉ toopi tondiki halo hayeke hali ma꞉nda꞉ pa꞉ta꞉ta꞉ hali yaapoma꞉ toopi tondiki mipikime. Hali ma꞉nda꞉na꞉ pa wieke tondikita꞉ 100 kina. Kutupa hali ma꞉nda꞉na꞉ ekita꞉ 10 kina pa wiekeme.

⁴²Mo hande tondiki mipiki hali yaapoma꞉ ana꞉na꞉ ambula꞉peke na yeke handaa mo tondiki halo hayeke halima꞉ta꞉ ipilika꞉ tondikita꞉ pina꞉ pa paeyaeyekeme laata꞉ Yesuma꞉ Saimono pa꞉ta꞉ alota꞉ Koto hali yaapo epima꞉ hondo mo tondiki halo hayeke hali pa꞉ta꞉ puki anekehapu halia꞉pe leekeme.

⁴³Koto leeke Saimonoma꞉ alota꞉ Pa mata꞉la꞉me. Ya honema꞉ta꞉ mo ipika꞉ tondiki tieke kone pa paeyaeyeke hali yelieke leekeme. Koto leeke handaa Yesuma꞉ alota꞉ Nakana꞉ma꞉ ota꞉ aleme leekeme.

⁴⁴Kutaata꞉ Yesuma꞉ pa mo wanda꞉ handolo hata꞉ Saimono pa꞉ta꞉ alota꞉ Nakana꞉ma꞉ta꞉ do wanda꞉ta꞉ handelepe. I̱ta꞉ naka꞉ da pa꞉ta꞉ a꞉pa honda꞉ pamboa꞉pate nakana꞉ma꞉ ya anke tanda꞉pa꞉peke ikali ma꞉nda꞉ na kipate do wanda꞉ma꞉ta꞉ ipika꞉ e̱ tonda꞉pa꞉ma꞉ kone ya anke tanda꞉pao ipika꞉ itikima꞉ pa mea honiaeya꞉me leekeme.

⁴⁵Kutupa I̱ do da pa꞉ta꞉ honda꞉ pamboa꞉ dina꞉ta꞉ I̱ nunu na pipate do wanda꞉ma꞉ta꞉ ya anke nunu pia꞉ ekita꞉ hande I̱ epoa꞉ dina꞉ kini peaata꞉ ame do make paa pitolo pila꞉me leekeme.

⁴⁶Nakana꞉ma꞉ta꞉ mo olipi oetata꞉ ya youna꞉ na kitaepate do wanda꞉ma꞉ta꞉ ota꞉ epeke totopo piki oeta yaka ankena꞉ kitawaya꞉me.

⁴⁷I̱ma꞉ neke pa꞉ta꞉ alome. Ipika꞉ pukima꞉ homa꞉la꞉eki tieke I̱ pa꞉ta꞉ peneme yaala꞉ ekima꞉ta꞉ ipika꞉ wopu pa꞉la꞉ hoke hauta꞉ do paeta꞉la꞉ handa꞉e laa wala꞉la꞉me. Koto pa꞉la꞉pate ma꞉nda꞉ma꞉ ipika꞉ hoke hau hosikale siki kone Koda꞉ma꞉ paeyaowaya꞉ka꞉na꞉ta꞉ kota꞉ ipikana꞉ma꞉ Koda꞉ pa꞉ta꞉ta꞉ puki hosikale siki halieke leekeme.

⁴⁸Koto laa Yesuma꞉ mo wanda꞉ pa꞉ta꞉ alota꞉ Naka꞉ pele hoke hau paeyaota꞉ paela꞉me leekeme.

⁴⁹Pate mo teipolona꞉ tilao pitimiki wanda꞉halima꞉ ika꞉ ika꞉ kone pi la alualu pitolo hata꞉ alota꞉ Do hoke hau kone tanda꞉paasa꞉ halita꞉ epi ya꞉ka꞉ta꞉pe lemekeme.

⁵⁰Koto leekepate Yesuma꞉ mo wanda꞉ pa꞉ta꞉ alota꞉ Naka꞉ hone tulale ekima꞉ta꞉ neke pa꞉ta꞉la꞉la꞉me. Puki lopao pue leekeme.