Read Sembeleke Dioni 11 Bible Online

Dioni 11 - Sembeleke bible

Dioni 11

¹Bedani da pa꞉ta꞉ hayeke hali La꞉satesi yeni hayekeme. Mo Bedani data꞉ Mada hakepiki Meti yaapona꞉ dae.

²Mo Metima꞉ta꞉ hande Tekehalina꞉ ankena꞉ totopo wotupiki senisi holaota꞉ ipika꞉ itikima꞉ kone honiaeyekeme. Koto wanda꞉na꞉ beliki La꞉satesi yeni hayekeme.

³Koto ekina꞉ mo hakila꞉ma꞉ Yesu pa꞉ta꞉ pi tapaaso alota꞉ Tekehalio. Naka꞉ yankeketa꞉ yeni hao ula꞉me laa tapaepekeme.

⁴Yesuma꞉ koto pi opua alota꞉ Koto yenima꞉ta꞉ hali na homaalieke laa koto yeni a꞉pa hake hauta꞉ Koda꞉na꞉ biki make Koda꞉na꞉ Eiyekena꞉ biki make mea a꞉meiyaena꞉yeke a꞉pa hao pa꞉la꞉me leekeme.

⁵Yesuma꞉ mo beliala꞉ tepo pa꞉ta꞉ta꞉ hone wotu wiekeme.

⁶Kutupa hande La꞉satesi yeni hao ula꞉me leekeeki opuata꞉ pa hoto yaapo koto pa꞉ta꞉ hao

⁷ipika꞉ disaipolo haliweki pa꞉ta꞉ alota꞉ Diudia nane paa la꞉ka꞉la pomana꞉e leekepate

⁸ipika꞉ disaipolo haliwekima꞉ ipiki pa꞉ta꞉ alota꞉ Disao. Amba꞉ numaneke a꞉nda꞉ mo Diu haliwekima꞉ toopima꞉ neke luekema꞉ taapemepate koto pa꞉ta꞉ paa pomana꞉ alepe lemekeme.

⁹Yesuma꞉ alota꞉ Nate homekena꞉ pa yata꞉pea꞉peke nate leke manuta꞉ 12 awamanu dia꞉ya꞉ka꞉ta꞉pe. Hali ma꞉nda꞉ta꞉ oli nate talo haena꞉ pomia꞉ka꞉na꞉ta꞉ do kenkena꞉ pa̱a̱ pa꞉la꞉eki handa꞉la꞉ ekima꞉ ipikita꞉ lopuluekema꞉ taapa꞉tia na pelieke laa

¹⁰Kutu pulu pa꞉la꞉pateta꞉ timba꞉ alo haena꞉ pomia꞉ka꞉na꞉ta꞉ ipiki pa꞉ta꞉ pa̱a̱ na peaasa꞉ ekima꞉ ipikita꞉ lopuluekema꞉ taapa꞉tia pelieke leekeme.

¹¹Yesuma꞉ kotoeki laa pi ma꞉nda꞉ alo alota꞉ Nika꞉ yankeke La꞉satesita꞉ amba꞉ u peila꞉pateta꞉ ipiki mea tiaalo pulume leekeme.

¹²Koto leeke handaa mo disaipolo haliwekima꞉ alota꞉ Tekehalio. U pelia꞉ka꞉na꞉ta꞉ kota꞉ tiaalieke lemekeme.

¹³Yesuma꞉ta꞉ mo La꞉satesi ota꞉ homeeke ekina꞉ leekepate mo haliwekima꞉ta꞉ pa u peileke ala꞉me hone wimikime.

¹⁴Koto ekina꞉ Yesuma꞉ iki pa꞉ta꞉ peneme yao alota꞉ La꞉satesi ota꞉ homeekeme.

¹⁵Koto pa꞉la꞉pate ikana꞉ma꞉ hone tulao hamina꞉yeke iki pa꞉ta꞉ hone witolo hata꞉ ipiki yaapo na haowa꞉ ekima꞉ ta꞉na꞉ma꞉ homolome laa ipiki pa꞉ta꞉ pomana꞉e leekeme.

¹⁶Koto ekina꞉ Tomasita꞉ hande Manda꞉e halima꞉ ipika꞉ disaipolo yankeketiti pa꞉ta꞉ alota꞉ Nika꞉ Disa ame̱le̱ paeyao mandakena꞉ bape laa ipiki ame̱le̱ homomana꞉e leekeme. Yesuta꞉ paa mea tiaasa꞉eki make da꞉taasa꞉eki make hala꞉me

¹⁷Yesu opolo puaata꞉ La꞉satesi lapa꞉ pea haena꞉ta꞉ hoto tonkopu wiekeeki opiekeme.

¹⁸Mo Bedani data꞉ Diutuseleme da teke pa꞉ta꞉ kone hayekeme.

¹⁹Kutupa Diu wanda꞉hali wopuma꞉ Mada Meti yaapo ipilika꞉ ana꞉ homeeke ekina꞉ tamba꞉ minolo hata꞉ pi pi loluekema꞉ pemekeme.

²⁰Madama꞉ Yesu ipula꞉me lemekeeki opuaata꞉ manda꞉hande peekepate Metita꞉ da pa꞉ta꞉ pitina꞉ peekeme.

²¹Madama꞉ Yesu manda꞉hande pea ipiki pa꞉ta꞉ alota꞉ Tekehalio. Neketa꞉ do pa꞉ta꞉ haeka꞉na꞉ yoluta꞉ ya ana꞉ na homolo pia꞉me.

²²Kutu pulu pia꞉pate pa ame do kone nakana꞉ma꞉ Koda꞉ pa꞉ta꞉ ala꞉ta꞉ ma꞉nda꞉ honke lelipi ale Koda꞉ma꞉ ota꞉ kilieke hone witolome leekeme.

²³Yesuma꞉ ipiki pa꞉ta꞉ alota꞉ Naka꞉ ana꞉ta꞉ paa tiaalieke leekeme.

²⁴Madama꞉ hombo peaaso alota꞉ Mo hande paelia꞉ natena꞉ Koda꞉ma꞉ ipiki paa mea tiaalo pa꞉la꞉ ekita꞉ hone witolome leekeme.

²⁵Koto leekepate Yesuma꞉ ipiki pa꞉ta꞉ alota꞉ I̱ta꞉ pa mea tiaasa꞉eki make da꞉taasa꞉eki make halome. Hali epima꞉ I̱ pa꞉ta꞉ hone tulao haya꞉ka꞉na꞉ta꞉ kota꞉ koto hali homea꞉ka꞉na꞉ kone da꞉ta halieke.

²⁶Kutupa hali epima꞉ da꞉ta꞉ hata꞉ I̱ pa꞉ta꞉ hone tulao haya꞉ka꞉na꞉ta꞉ koto halita꞉ ota꞉ na homilieke. I̱ma꞉ do alo pina꞉ homelepe laa leekeme.

²⁷Madama꞉ ipika꞉ pi hombo peaaso alota꞉ Tekehalio. Aowe. Naka꞉ kakema꞉ homolo hata꞉ neketa꞉ hande Ketiso make Koda꞉na꞉ Eiyeke do kenkena꞉ ipilieke leeke halita꞉ hone witolome leekeme. Yesuma꞉ e̱ leekeeki

²⁸Madama꞉ kotoeki laa pa pua hakepiki Meti pa꞉ta꞉ yopu pua alota꞉ Tekehalima꞉ do a꞉pa hata꞉ neke wi ala꞉me.

²⁹Meti koto pi opua tiao Yesu manda꞉hande puluekema꞉ a̱i̱ya peekeme.

³⁰Yesuta꞉ mo hande da pa꞉ta꞉ a̱i̱ na opolo peke Madata꞉ ipiki manda꞉hande pieke alena꞉ pa hayekeme.

³¹Mo mandane Diu wanda꞉halima꞉ta꞉ Meti pa꞉ta꞉ a꞉ta꞉ma꞉ homolo hata꞉ ipiki ame̱le̱ pita꞉ta꞉ Meti a̱i̱ tiao hama peekeeki handaata꞉ ipiki telia꞉ mea pemekeme. Ika꞉ honema꞉ta꞉ Metima꞉ mo lapa꞉ pieke ale pa꞉ta꞉ e̱ lolo pula꞉me hone wimikime.

³²Metima꞉ Yesu hayeke alena꞉ opolo pua Yesu handolo ipika꞉ anke pa꞉ta꞉ lopa꞉niao alota꞉ Tekehalio. Neke do pa꞉ta꞉ haeka꞉na꞉ yoluta꞉ ya ana꞉ na homolo pia꞉me leekeme.

³³Metima꞉ e̱ leekeeki make mo ipiki ame̱le̱ pemeke Diu wanda꞉halina꞉ e̱ lemekeeki make handaata꞉ ipikana꞉ma꞉ ka꞉nda꞉ma꞉ homolo hata꞉ ipika꞉ puki tetoma꞉ homeekeme.

³⁴Yesuma꞉ alota꞉ Ipikita꞉ hando pa꞉ta꞉ wilimipe leeke handaa ikana꞉ma꞉ alota꞉ Tekehalio. Handolo epoe lemekeme.

³⁵Kutupa Yesuma꞉ e̱ leekeme.

³⁶Koto ekina꞉ mo Diu wanda꞉halima꞉ pi hotiolo alota꞉ Handa꞉pe. Do halima꞉ La꞉satesi pa꞉ta꞉ pukima꞉ wotu homolo pita꞉la꞉me lemekepate

³⁷mandane wanda꞉halima꞉ alota꞉ Do halima꞉ta꞉ hande leke holupiki halina꞉ leketa꞉ kilaeya꞉ tupa꞉ mo halina꞉ homa꞉la꞉eki make sa꞉sa꞉ pia꞉peke yolo pia꞉me hone witoloma꞉me lemekeme. La꞉satesi paa mea tiaeyekeeki

³⁸Yesuma꞉ pa puki tetoma꞉ homolo hata꞉ mo lapa꞉ pimiki alena꞉ peekeme. Mo lapa꞉ pimiki ekita꞉ tikene da pa꞉ta꞉ toopima꞉ a꞉mba wimikime.

³⁹Yesuma꞉ alota꞉ Mo toopi pa nane mea wipe leekepate hande hoieke halina꞉ beliki Madama꞉ alota꞉ Tekehalio. Punku wotu pilieke. Mo lapa꞉ pea hamonota꞉ hoto tonkopu paeya꞉me leekeme.

⁴⁰Yesuma꞉ ipiki pa꞉ta꞉ alota꞉ Nakana꞉ma꞉ hone tulao haeka꞉na꞉ta꞉ Koda꞉na꞉ pa̱a̱ pa꞉la꞉eki handilipikie pita꞉ na loa꞉pe leekeme.

⁴¹Kutupa hande toopi pa nane mea wimikime. Yesuma꞉ handa꞉liao hata꞉ alota꞉ Apa꞉o. Nakana꞉ma꞉ yaka pi opu hale ekina꞉ neke pa꞉ta꞉ keiyae pi alome.

⁴²Nakana꞉ma꞉ I̱ma꞉ aloeki opu hale ekita꞉ handolopate pa do haleme wanda꞉halima꞉ nakana꞉ma꞉ I̱ tapaaleeki handa꞉ hone tulaena꞉yeke neke pa꞉ta꞉ do pi alome leekeme.

⁴³Yesuma꞉ koto laa anekema꞉ wi alo hata꞉ alota꞉ La꞉satesio. Hama epoe leekeme.

⁴⁴Hande homeeke halita꞉ kiki anke leke popeleke ipika꞉ dauma꞉ ambula wimiki tupa꞉ tiao hama epeekeme. Kutupa Yesuma꞉ iki pa꞉ta꞉ alota꞉ Dau leisi mea bao epena꞉ tapaape leekeme. Yesu lulu pimiki ekina꞉ pota꞉ weimikieki

⁴⁵Meti handolo pemeke Diu wanda꞉hali wopuma꞉ta꞉ Yesuma꞉ piekeeki handaata꞉ ipiki pa꞉ta꞉ hone tulaemekeme.

⁴⁶Kutu pimikipate mandane haliwekima꞉ta꞉ Yesuma꞉ pieke ekita꞉ mo Pa꞉tisi haliweki lolo pemekeme.

⁴⁷Koto ekina꞉ mo Pa꞉tisi haliweki make mo yeni peao haemeke you haliweki make mo Ka̱le̱sete tapake ame̱le̱ momba꞉lalo hata꞉ alota꞉ Nikana꞉ma꞉ta꞉ eki pumana꞉pe. Do hande halima꞉ wele wotu pa꞉la꞉ ekimanu pita꞉la꞉me.

⁴⁸Pa pina꞉ paoma꞉ka꞉na꞉ta꞉ wanda꞉hali paeyaoma꞉ ipiki pa꞉ta꞉ hone tulaalimikie. Kutupa make mo Loma꞉ haliwekima꞉ a꞉paata꞉ nika꞉ tembolo da make nika꞉ tapake make telipina꞉ hoeyaalimikie lemekeme.

⁴⁹Iki pa꞉ta꞉ hayeke hali Kaiya꞉pasita꞉ koto bapina꞉ yeni peao haemeke you haliwekina꞉ you hali hata꞉ kone ipikana꞉ma꞉ alota꞉ Ikita꞉ ala꞉ta꞉ ma꞉nda꞉ na handelememe.

⁵⁰Wanda꞉hali paeyao pa꞉ta꞉ hali homeke homea꞉ka꞉na꞉ta꞉ iki pa꞉ta꞉ epekeeki ipilieke. Kutupa nika꞉ tapake paeyao hoeyaapeke na yelieke. Kutu pulu pa꞉la꞉ ekita꞉ hone na witelemepe leekeme.

⁵¹Do leeke ekita꞉ Kaiya꞉pasima꞉ kone pa na leke koto bapina꞉ yeni peao haemeke you haliwekina꞉ you hali hata꞉ Yesuta꞉ mo Diu wanda꞉hali pa꞉ta꞉ homolo piekeeki la halolo hata꞉ leekeme.

⁵²Kutupa make mo Diu wanda꞉hali pa꞉ta꞉ homeke na homeke mo Koda꞉na꞉ weki wandikita꞉ pa hata꞉ pepi pea haena꞉ kone paeyao handa꞉ mea homeke tapake kone apa꞉tao haena꞉yeke Yesu homolo pa꞉la꞉eki la halolo hata꞉ leekeme.

⁵³Koto leeke ekina꞉ mo Diu wanda꞉halina꞉ you haliwekima꞉ koto natena꞉ kini pea Yesu lulu peleme pota꞉ weimikime.

⁵⁴Koto ekina꞉ Yesuta꞉ koto pa꞉ta꞉ pominolo hata꞉ peneme yao na pomiekepate Diudia nane mina꞉pa꞉lao mo hapu hayeke alena꞉ teke pa꞉ta꞉ hayeke da Ipoteimi da pa꞉ta꞉ puaata꞉ ipika꞉ disaipolo haliweki ame̱le̱ koto pa꞉ta꞉ haemekeme.

⁵⁵Mo Diu wanda꞉halina꞉ Lombei Pupa Yapeeke nate tunkulieke handaa papate da ta꞉ta꞉ ta꞉ta꞉ wanda꞉halima꞉ ne a̱i̱ na pambeke haena꞉ ika꞉ loke wamo puluekema꞉ oli Diutuseleme da nane pemekeme.

⁵⁶Mo wanda꞉halima꞉ Yesu weitolo hata꞉ mo tembolo da pa꞉ta꞉ momba꞉la ika꞉ ika꞉ kone lota꞉ lota꞉ pu alualu pitolo alota꞉ Eki hone witelemepe. Do hande ne pamba꞉la꞉ ekita꞉ na ipilieke hone witoloma꞉pate eki hone witelemepe la leekeme.

⁵⁷Kota꞉ mo yeni peao haemeke you haliweki make mo Pa꞉tisi haliweki tonka꞉na꞉ ikana꞉ma꞉ pi alo alota꞉ Hali epima꞉ Yesu hala꞉eki handea꞉ka꞉na꞉ta꞉ Yesu da꞉ka꞉pa꞉ minomonoyeke niki a꞉pa la kia꞉pa꞉peke lemekeme.