Read Sembeleke Dioni 13 Bible Online

Dioni 13 - Sembeleke bible

Dioni 13

¹Mo hande Lombei Pupa Yapeeke natena꞉ ne pambuluekema꞉ hata꞉ta꞉ Yesuma꞉ do kenke mina꞉pa꞉lao Ateke pa꞉ta꞉ polo pieke di amba꞉ tunkula꞉la꞉me hone wiekeme. Ipikana꞉ma꞉ do kenkena꞉ haemeke ipika꞉ wanda꞉hali pa꞉ta꞉ pukima꞉ homo hao paeyaalo pulu hata꞉ make iki pa꞉ta꞉ pukima꞉ homeekeme.

²Welealo nane Yesu ipika꞉ disaipolo haliweki ame̱le̱ ne no pitimikime. Isekatioti hali Saimonona꞉ eiyeke Diudasima꞉ta꞉ Yesu mina꞉yeke a꞉nda꞉ lombolo pieke honeta꞉ ipiki pa꞉ta꞉ Sadanima꞉ amba꞉ mea wiaeyekeme.

³Yesuma꞉ta꞉ hande ipika꞉ Atekema꞉ ala꞉ta꞉ ala꞉ta꞉ paeyao ipiki pa꞉ta꞉ haleekeeki make ipikita꞉ Koda꞉ yaapo hao a꞉pa Koda꞉ pa꞉ta꞉ polo piekeeki make hone wiekeme.

⁴Koto ekina꞉ Yesuma꞉ mo teipolo mina꞉pa꞉lao tiaota꞉ manda pambaeyeke dau hola꞉ mea wiaata꞉ dawelo mea tonkaeyekeme.

⁵Kutupata꞉ ma꞉tiki pa꞉ta꞉ ikali hola꞉ pambaata꞉ mo disaipolo haliweki ika꞉ ankemanu homeke pa꞉ta꞉ pua꞉tiki pea tanda꞉pa꞉tiki pea hande tonkaeyeke daweloma꞉ honia꞉tiki piekeme.

⁶Kutupata꞉ Saimono Pida pitieke pa꞉ta꞉ peekepate ipikana꞉ma꞉ Yesu pa꞉ta꞉ alota꞉ Tekehali nakana꞉ma꞉ ya anke tanda꞉puluekema꞉ pi leekeme.

⁷Yesuma꞉ ipika꞉ pi hombo peaaso alota꞉ Ame do pitolo ekita꞉ nakana꞉ma꞉ hone na witelepate wetepena꞉ta꞉ hone wilipikie leekeme.

⁸Pidama꞉ ipiki pa꞉ta꞉ alota꞉ Yaka anke nakana꞉ma꞉ hoto homeke a꞉nda꞉ tanda꞉pa꞉peke na ya꞉la꞉me leekeme. Yesuma꞉ ipika꞉ pi hombo peaaso alota꞉ I̱ma꞉ naka꞉ anke na tanda꞉poa꞉ka꞉na꞉ta꞉ kota꞉ neketa꞉ yaka disaipolo hali hapeke na yelieke leekeme.

⁹Saimono Pidama꞉ ipika꞉ pi hombo peaaso alota꞉ Tekehalio. Kota꞉ yaka anke homeke dia꞉me laata꞉ Yaka kiki you tonka꞉na꞉ tanda꞉pae leekeme.

¹⁰Yesuma꞉ ipiki pa꞉ta꞉ alota꞉ Hali epima꞉ ipika꞉ loke paeyao tenke lao ikali peiya hata꞉ta꞉ ipika꞉ loke paeyao wamo pea haluekema꞉ ikali pa na peiyiki ipika꞉ anke homeke pa tanda꞉pa꞉peke ya꞉la꞉me. Iki paeyao amba꞉ wamo pea halemepate hali homeketa꞉ dia꞉me leekeme.

¹¹Yesuma꞉ ipiki a꞉nda꞉ lombolo pieke hali amba꞉ hone witolo hata꞉ koto pi leekeme. Koto ekina꞉ Iki paeyao amba꞉ wamo pea halemepate hali homeke dia꞉me leekeme.

¹²Yesuma꞉ ika꞉ anke tanda꞉pa paeyeketa꞉ ipika꞉ dau paa mea pambao ipika꞉ amba꞉ pitieke teipolo pa꞉ta꞉ paa pua tepiao pitiekeme. Mo haliweki paeyao pa꞉ta꞉ ipikana꞉ma꞉ lota꞉ pitolo

¹³Ikana꞉ma꞉ I̱ biki yaapo alo hata꞉ Disa make Tekehali make aleme ekita꞉ ana꞉piki pi alememe. I̱ta꞉ koto polome.

¹⁴Koto ekina꞉ I̱ma꞉ta꞉ ika꞉ Tekehali make Disa make hata꞉ ika꞉ anke tandepoa꞉ ekina꞉ ikana꞉ma꞉ make ika꞉ ika꞉ kone ika꞉ ankemanu tanda꞉pa꞉ alualu pea꞉pa꞉peke aleo.

¹⁵I̱ma꞉ iki pa꞉ta꞉ peaowa꞉ ekita꞉ ikana꞉ma꞉ make puemena꞉yeke wala꞉ tiaaso pua꞉me.

¹⁶Iki pa꞉ta꞉ ota꞉ pi alome. Pa hameke e pokaasa꞉ halima꞉ta꞉ ipika꞉ e teke hali ankulapeke na ya꞉la꞉me. Kutupa pi lolo pena꞉ tapaasa꞉ halima꞉ make ipiki tapaasa꞉ hali kone ankulaapeke na ya꞉la꞉me.

¹⁷Do walo ekita꞉ hone wimika꞉na꞉ta꞉ kota꞉ pitolo hata꞉ kone ta꞉na꞉ma꞉ homilimikie.

¹⁸I̱ma꞉ iki paeyao pa꞉ta꞉ na alome. Ya talopu molo haliweki amba꞉ handoa꞉me. Kutu pa꞉la꞉pate mo Baibolo bukana꞉ wape pa꞉la꞉ ekita꞉ yaapeke ya꞉la꞉me dupae. Dika꞉ mandakena꞉ pita꞉ ne nopa꞉ halima꞉ kone I̱ yaapo a꞉nda꞉ tunkula hala꞉me.

¹⁹Dupiki hau a̱i̱ na piki haena꞉ kone iki pa꞉ta꞉ ame do kone la kitolome. Koto ekina꞉ wetepena꞉ koto hau pia꞉ka꞉na꞉ta꞉ yaka halo ekita꞉ ota꞉ halome. I̱ pa꞉ta꞉ hone wilimikie.

²⁰Iki pa꞉ta꞉ ota꞉ pi alome. Hali epima꞉ I̱ma꞉ tapaaso hali handa꞉ mia꞉ka꞉na꞉ta꞉ I̱ make handa꞉ minolo pita꞉la꞉me. Kutupata꞉ I̱ handa꞉ mina꞉la꞉ halima꞉ I̱ tapaeya꞉ hali kone handa꞉ mina꞉la꞉me leekeme. Yesuma꞉ ipiki pa꞉ta꞉ a꞉nda꞉ lombolo pulu piekeeki la꞉ wiekeeki

²¹Kotoeki laa Yesuma꞉ ka꞉nda꞉ma꞉ wopu homolo hata꞉ mo haliweki pa꞉ta꞉ la halolo alota꞉ Iki pa꞉ta꞉ ota꞉ pi alome. Iki ame̱le̱ hala꞉ hali homekema꞉ I̱ mina꞉yeke a꞉nda꞉ lombelieke leekeme.

²²Mo disaipolo haliweki pa penkili pitolo hata꞉ ika꞉ kone ane handa꞉ mone handa꞉ pitolo epi pa꞉ta꞉ ala꞉pe hone wimikime.

²³Disaipolo hali homeketa꞉ Yesuma꞉ puki pieke halita꞉ Yesu yaapo lopu la꞉ alu pea pitiekeme.

²⁴Saimono Pidama꞉ mo hali pa꞉ta꞉ so la꞉ mea alota꞉ Epi pa꞉ta꞉ alepe. Lota꞉ pie leekeme.

²⁵Koto leeke handaa mo disaipolo halima꞉ teke pa꞉ta꞉ panda꞉pea pita꞉ Yesu pa꞉ta꞉ lota꞉ pitolo alota꞉ Tekehalio. Epi pa꞉ta꞉ alepe leekeme.

²⁶Yesuma꞉ ipika꞉ pi hombo peaaso alota꞉ Do palaowata꞉ kawaso pa꞉ta꞉ tenke lao halue halita꞉ koto halie leekeme. Kotoeki la ipikana꞉ma꞉ palaowa meata꞉ tenke lao mo Isekatioti hali Saimono ipika꞉ eiyeke Diudasi pa꞉ta꞉ haleekeme.

²⁷Diudasima꞉ hande palaowa mieke pita꞉ kone Sadanita꞉ ipiki tukiki pa꞉ta꞉ pitulu epeekeme. Yesuma꞉ ipiki pa꞉ta꞉ alota꞉ Naka꞉ pulu peleeki a̱i̱ pua pea꞉peke leekeme.

²⁸Yesuma꞉ Diudasi pa꞉ta꞉ leeke ekita꞉ mo teipolo pa꞉ta꞉ pitimiki haliweki homeke a꞉nda꞉ma꞉ hone na wimikime.

²⁹Mandane disaipolo haliwekima꞉ ika꞉ honema꞉ta꞉ Diudasima꞉ mo mani pausa handeteke hayeke ekina꞉ ika꞉ ne pambuluekema꞉ ala꞉ta꞉ ma꞉nda꞉ hambolo pena꞉ tapaeya꞉pe o natehali wanda꞉hali pa꞉ta꞉ ala꞉ta꞉ ma꞉nda꞉ halo pu la tapaeya꞉pe hone wimikime.

³⁰Diudasima꞉ mo palaowa meata꞉ kuta kone hama opolu bao peekeme. Koto dina꞉ta꞉ timba꞉ la꞉ pambeekeme. Mo panake pi ula꞉eki

³¹Diudasi peeke hoki nane Yesuma꞉ alota꞉ Ameta꞉ Wanda꞉halina꞉ Eiyekema꞉ta꞉ ipika꞉ pa̱a̱ pa꞉la꞉eki milieke. Kutupa Koda꞉na꞉ pa̱a̱ pa꞉la꞉ ekita꞉ Wanda꞉halina꞉ Eiyeke pa꞉ta꞉ handulumeke.

³²Kutupa Koda꞉na꞉ pa̱a̱ pa꞉la꞉eki Wanda꞉halina꞉ Eiyeke pa꞉ta꞉ peaeya꞉ka꞉na꞉ta꞉ kota꞉ Koda꞉ma꞉ ipikana꞉ma꞉ kone Wanda꞉halina꞉ Eiyekena꞉ pa̱a̱ pa꞉la꞉eki peaalieke. Kutupa kuta kone peaalieke.

³³Yaka weki wandikio. Iki ame̱le̱ halo poloma꞉pateta꞉ hosiki halueke. Kutupa ikana꞉ma꞉ I̱ weilimikipate pa amba꞉ mo Diu wanda꞉hali pa꞉ta꞉ loa꞉ ekita꞉ ameta꞉ iki pa꞉ta꞉ make alome. I̱ polue da naneta꞉ iki a꞉pa꞉peke na ya꞉la꞉me la leekeme.

³⁴Ameta꞉ I̱ma꞉ iki pa꞉ta꞉ panake pi ula꞉eki la꞉ wiaasome dupa. Ika꞉ kone pukima꞉ homaalu alu pea hapa꞉peke. I̱ma꞉ iki pa꞉ta꞉ pukima꞉ homao tupa꞉ ikana꞉ma꞉ make pukima꞉ homaalu alu pea꞉pa꞉peke laa

³⁵ikana꞉ma꞉ pukima꞉ homaalu alu pimika꞉na꞉ta꞉ ikita꞉ yaka disaipolo haliweki haleme ekita꞉ paeyaoma꞉ handilimikie la leekeme. Pidama꞉ Yesuna꞉ biki hoeyaaso pulu pieke ekita꞉ Yesuma꞉ pi la꞉ wiekeeki

³⁶Saimono Pidama꞉ Yesu pa꞉ta꞉ lota꞉ pitolo alota꞉ Tekehalio. Neketa꞉ hane poluekema꞉ alepe leeke handaa Yesuma꞉ alota꞉ I̱ polue naneta꞉ ame I̱ telia꞉ mea a꞉pa꞉peke na yolo pa꞉la꞉pate wetepena꞉ta꞉ telia꞉ mea ipilipikie leekeme.

³⁷Koto ekina꞉ Pidama꞉ paa lota꞉ pitolo alota꞉ Tekehalio. Ekipeke neke na telia꞉ mea ipilipiki la alepe laata꞉ I̱ma꞉ neke tamba꞉ muluekema꞉ yaka da꞉ta꞉la꞉eki homaoa꞉ka꞉na꞉ make ana꞉ pilieke laa leekepate

³⁸Yesuma꞉ ipika꞉ pi hombo peaaso alota꞉ Nakana꞉ma꞉ I̱ pa꞉ta꞉ homoluekema꞉ ota꞉ pi alepe laa neke pa꞉ta꞉ ota꞉ pi do alome. Mo hali koka꞉la꞉ma꞉ e̱ a̱i̱ na leke haena꞉ta꞉ nakana꞉ma꞉ hoto tepona꞉ I̱ Yesu na handolome laa lelipikie leekeme.