Read Sembeleke Dioni 14 Bible Online

Dioni 14 - Sembeleke bible

Dioni 14

¹Yesuma꞉ iki pa꞉ta꞉ alota꞉ Ikana꞉ma꞉ pomoma꞉ na homeke hone eleke eleke na wiki hata꞉ Koda꞉ pa꞉ta꞉ hone tulao hata꞉ make I̱ pa꞉ta꞉ tonka꞉na꞉ hone tulao hapa꞉peke.

²Yaka Apa꞉na꞉ da pa꞉ta꞉ta꞉ da panda꞉ eleke eleke wotu ula꞉me. Kutupa I̱ puata꞉ ika꞉ a꞉pa halo peleme alena꞉ wamo peaalo pula꞉me. Do aloeki na wia꞉ka꞉na꞉ yoluta꞉ I̱ma꞉ iki pa꞉ta꞉ amba꞉ la kulu pua꞉me laa leekeme.

³Kutupa I̱ pua ika꞉ halo peleme alena꞉ wamo peaota꞉ I̱ halo alena꞉ mandake pa꞉ta꞉ a꞉pa hamina꞉yeke I̱ paa a꞉pa iki a꞉pa handa꞉ mulueke.

⁴Kutupa I̱ pulueeki make pota꞉ make ikana꞉ma꞉ handelememe laa leekeme.

⁵Tomasima꞉ ipiki pa꞉ta꞉ alota꞉ Tekehalio. Neke polo pele ekita꞉ nikana꞉ma꞉ na handoloma꞉me. Koto ekina꞉ pota꞉ta꞉ ekipa handomonope laa leeke handaa

⁶Yesuma꞉ ipika꞉ pi hombo peaaso alota꞉ I̱ta꞉ hande pota꞉e. I̱ ota꞉ekie laa I̱ta꞉ da꞉ta꞉la꞉ekie. Hali epima꞉ yaka Apa꞉ pa꞉ta꞉ polueke hone wia꞉ka꞉na꞉ta꞉ pota꞉ ma꞉nda꞉ dia꞉me. I̱ pa꞉ta꞉ homeke epena꞉e leekeme.

⁷Ikana꞉ma꞉ I̱ handemeka꞉na꞉ta꞉ yaka Apa꞉ make handilimikie. Ameta꞉ ipiki handolo pelemeeki ameta꞉ kini pitelememe laa ipikita꞉ amba꞉ handelememe la leekeme.

⁸Pilipima꞉ ipiki pa꞉ta꞉ alota꞉ Tekehalio. Naka꞉ Apa꞉ta꞉ niki pa꞉ta꞉ wala꞉e. Kutu pika꞉na꞉ta꞉ ana꞉ pilieke leekeme.

⁹Yesuma꞉ ipika꞉ pi hombo peaaso alota꞉ Pilipio. Iki paeyao ame̱le̱ nate wopu haowa꞉pate nakana꞉ma꞉ I̱ta꞉ hone na wia alepe. I̱ handilia꞉ halima꞉ta꞉ yaka Apa꞉ make handilieke laa ekipeke handa naka꞉ Apa꞉ wala꞉e alepe.

¹⁰Yaka Apa꞉ma꞉ I̱ yaapo hala꞉eki make I̱ma꞉ make yaka Apa꞉ yaapo haloeki make hone na witelepe leekeme. Koto laa Yesuma꞉ mo disaipolo haliweki pa꞉ta꞉ alota꞉ Iki pa꞉ta꞉ loa꞉ pi manuta꞉ ya hone wia na loa꞉me laa hande I̱ yaapo hala꞉ Apa꞉ma꞉ ipikana꞉ma꞉ kone ipika꞉eki pita꞉la꞉me.

¹¹Yaka Apa꞉ma꞉ I̱ yaapo hala꞉ ekina꞉ make I̱ma꞉ta꞉ yaka Apa꞉ yaapo halo ekina꞉ make I̱ma꞉ do alo pita꞉ ikana꞉ma꞉ ota꞉ opua꞉pa꞉peke ya꞉la꞉pate pa do aloeki na opimika꞉na꞉ta꞉ kota꞉ I̱ma꞉ hande pua꞉ ekimanu hone witolo hata꞉ I̱ pa꞉ta꞉ hone tulao hapa꞉peke laa leekeme.

¹²I̱ma꞉ta꞉ iki pa꞉ta꞉ ota꞉ pi alome laa I̱ pa꞉ta꞉ hone tulao hala꞉ halima꞉ta꞉ I̱ma꞉ pitoloeki manuta꞉ ipikana꞉ma꞉ make pilieke. Kutupa yaka Apa꞉ pa꞉ta꞉ I̱ polue ekina꞉ta꞉ I̱ma꞉ pitolo ekimanu kone mo halima꞉ ankulao hau tiekemanu pilieke leekeme.

¹³Kutupa ala꞉ta꞉ ma꞉nda꞉ yaka bikima꞉ honke alo hata꞉ lemeka꞉na꞉ta꞉ hande Atekema꞉ hande Eiyeke pa꞉ta꞉ yama꞉ pa̱a̱ peaena꞉yeke I̱ma꞉ peaalueke leekeme.

¹⁴Ala꞉ta꞉ ma꞉nda꞉ yaka biki alo hata꞉ I̱ pa꞉ta꞉ honke lemeka꞉na꞉ta꞉ I̱ma꞉ peaalueke leekeme. Mo hande la꞉ wieke Holi Sipitidi

¹⁵I̱ pa꞉ta꞉ pukima꞉ homekena꞉ta꞉ yaka pi ula꞉ ekimanu opua pilimikie.

¹⁶Kutupa I̱ma꞉ yaka Apa꞉ pa꞉ta꞉ honke loa꞉ka꞉na꞉ta꞉ ipikana꞉ma꞉ mo iki ame̱le̱ hao haena꞉ lelia꞉ mo Tamba꞉ Mu Halo Pa꞉la꞉ Hali kilieke. Ipikita꞉ mo ota꞉eki pu hala꞉ Epeke Temoko konee. Kenke wanda꞉halima꞉ta꞉ ipiki na handolo hata꞉ make hone na witolo hata꞉ make ipiki handa꞉ mea꞉peke na yolo pa꞉la꞉pate iki ame̱le̱ mandake hata꞉ iki tukiki pa꞉ta꞉ hala꞉ ekina꞉ta꞉ ipiki handelememe.

¹⁸I̱ma꞉ ikita꞉ pa honumake hamina꞉ na lolueke. Iki pa꞉ta꞉ paa la꞉ka꞉la ipulueke laa

¹⁹hosiki hao kenke wanda꞉halima꞉ I̱ pa na handolo pelemepate ikana꞉ma꞉ wetepe I̱ handilimikie. Koto ekina꞉ I̱ da꞉ta꞉ halo ekima꞉ta꞉ iki make da꞉ta꞉ halimikie.

²⁰Kutupa koto dina꞉ta꞉ I̱ta꞉ yaka Apa꞉ tukiki pa꞉ta꞉ haloeki make ikita꞉ I̱ tukiki pa꞉ta꞉ halemeeki make iki tukiki pa꞉ta꞉ I̱ haloeki make handilimikie laa leekeme.

²¹Hali epima꞉ yaka pi ulu ekimanu opua pia꞉ka꞉na꞉ta꞉ kota꞉ koto halima꞉ I̱ pa꞉ta꞉ pukima꞉ homa꞉la꞉me. Kutupa I̱ pa꞉ta꞉ pukima꞉ homilie halita꞉ yaka Apa꞉ma꞉ ipiki pa꞉ta꞉ pukima꞉ homilieke. Kutupa make I̱ma꞉ ipiki pa꞉ta꞉ pukima꞉ homolo hata꞉ I̱ halo ekita꞉ peneme yaalueke laa leekeme.

²²Yesuma꞉ koto leeke handaata꞉ Diudasi hande Isekatioti hali Diudasi pa꞉ta꞉ na loa꞉ma꞉ ipikana꞉ma꞉ Yesu pa꞉ta꞉ alota꞉ Tekehalio. Ekipa kenke wanda꞉halima꞉ na handena꞉ leke niki pa꞉ta꞉ homeke peneme yao walipikipe leekeme.

²³Kutupa Yesuma꞉ ipika꞉ pi hombo peaaso alota꞉ Hali epima꞉ I̱ pa꞉ta꞉ pukima꞉ homea꞉ka꞉na꞉ta꞉ I̱ma꞉ alo pi opua pilieke. Kutupa yaka Apa꞉ma꞉ koto hali pa꞉ta꞉ pukima꞉ homilieke. Kutupa yaka Apa꞉ dikita꞉ mo hali pa꞉ta꞉ a꞉pa ipiki ame̱le̱ hao halumeke.

²⁴Pate hali epima꞉ I̱ pa꞉ta꞉ pukima꞉ na homea꞉ka꞉na꞉ta꞉ I̱ma꞉ alo pi manuta꞉ na opilieke. Ikana꞉ma꞉ do opueleme pita꞉ yakaeki dia꞉me pa I̱ tapaala꞉ hali yaka Apa꞉ pa꞉ta꞉ ipula꞉me leekeme.

²⁵Iki ame̱le̱ halo dina꞉ta꞉ do pimanu la kitolome.

²⁶Kutu pitolopate hande iki Tamba꞉ Mulu pa꞉la꞉ Hali yaka Apa꞉ma꞉ yaka bikina꞉ tapaalo pa꞉la꞉ halita꞉ Holi Sipitidi kone ala꞉ta꞉ paeyao ipikana꞉ma꞉ walieke. Kutupa make I̱ma꞉ hande iki pa꞉ta꞉ walo ekimanu paeyaota꞉ ikana꞉ma꞉ hone uemena꞉yeke ipikana꞉ma꞉ ika꞉ hone u tiaalieke.

²⁷I̱ma꞉ iki mina꞉pa꞉lao pulupate puki lopa꞉niaasa꞉ ekita꞉ iki pa꞉ta꞉ pa wina꞉ laa pulume. Yaka puki lopa꞉niaasa꞉eki kone iki pa꞉ta꞉ kitolome. Kutupa mo kenke wanda꞉halima꞉ iki pa꞉ta꞉ kita꞉la꞉ tupa꞉ pa na kitolome. Koto ekina꞉ hone eleke eleke na wiki paala꞉ma꞉ na homa꞉pa꞉peke laa leekeme.

²⁸I̱ma꞉ iki mina꞉pa꞉lao polueke laa loa꞉pateta꞉ paa la꞉ka꞉la ipulueke laa loa꞉ pita꞉ amba꞉ opimime. Ikana꞉ma꞉ I̱ pa꞉ta꞉ pukima꞉ homemeka꞉na꞉ yoluta꞉ mo yaka Apa꞉ pa꞉ta꞉ I̱ pulume loa꞉ ekina꞉ ta꞉na꞉ma꞉ homolo pimime. Pa ekipeke yaka Apa꞉ta꞉ I̱ ankulao hala꞉ ekina꞉ loa꞉me leekeme.

²⁹Do alo ekimanu a̱i̱ na epeke haena꞉ kone iki pa꞉ta꞉ la kitolome. Pa ekipeke ota꞉ yaeya꞉ka꞉na꞉ta꞉ ikana꞉ma꞉ hone tulaalimikie leekeme.

³⁰Do kenkena꞉ you hali epolo pa꞉la꞉ ekina꞉ I̱ma꞉ta꞉ iki pa꞉ta꞉ pi wotu na lolueke. Ipikana꞉ma꞉ta꞉ I̱ pa꞉ta꞉ hau ma꞉nda꞉ pea꞉peke na ya꞉la꞉pate

³¹Pa I̱ma꞉ yaka Apa꞉ pa꞉ta꞉ pukima꞉ homolo ekita꞉ do kenke wanda꞉halima꞉ handena꞉ loluekema꞉yeke ipikana꞉ma꞉ I̱ pa꞉ta꞉ doeki pea꞉peke lea꞉ haumanu paeyao pu halome laata꞉ Tiao do pa꞉ta꞉ mina꞉pa꞉lao pomana꞉e laa leekeme.