Read Sembeleke Dioni 18 Bible Online

Dioni 18 - Sembeleke bible

Dioni 18

¹Yesuma꞉ koto pi lo paeyaota꞉ ipika꞉ disaipolo haliweki ame̱le̱ pua mo Kidotoni mukiki lombei pupa pemekeme. Koto pa꞉ta꞉ta꞉ Yesu ipika꞉ disaipolo haliweki ame̱le̱ e ma꞉nda꞉ pa꞉ta꞉ honda꞉ pambolo pemekeme.

²Amba꞉ta꞉ Yesuma꞉ koto pa꞉ta꞉ ipika꞉ disaipolo haliweki manda꞉hande pu hayeke handaata꞉ kutu pu hayeke ekita꞉ hande Yesu a꞉nda꞉ lombeeke hali Diudasima꞉ koto alena꞉ handeekeme.

³Koto ekina꞉ Diudasima꞉ta꞉ mandane ami haliweki make mo yeni peao haemeke you haliweki mo Pa꞉tisi haliweki yaapoma꞉ tapaemeke tembolo da handeteke haemeke haliweki make hande e pa꞉ta꞉ hatuku peekeme. Mo haliwekima꞉ ola꞉pake make a꞉ndelimanu make mutia pemekeme.

⁴Yesuma꞉ta꞉ ipiki pa꞉ta꞉ epolo pieke hau paeyao hone wia mo haliweki pa꞉ta꞉ pua lota꞉ pitolo alota꞉ Epi weitelemepe leekeme.

⁵Koto leeke handa mo haliwekima꞉ ipika꞉ pi hombo peaaso alota꞉ Mo hande Na꞉sa꞉tete hali Yesu wei mea epoma꞉me lemekeme. Ipikana꞉ma꞉ alota꞉ Koto halita꞉ I̱ dota꞉ leekeme. Hande Yesu a꞉nda꞉ lombeeke hali Diudasita꞉ mo haliweki ame̱le̱ apa꞉tao hayekeme.

⁶Yesuma꞉ta꞉ Koto halita꞉ I̱ dota꞉ leeke pita꞉ta꞉ mo haliwekita꞉ yola꞉ pamba kenkena꞉ lopemekeme.

⁷Yesuma꞉ paa lota꞉ pitolo alota꞉ Epi weitelemepe leekeme. Mo haliwekima꞉ alota꞉ Mo hande Na꞉sa꞉tete hali Yesu weitoloma꞉me lemekeme.

⁸Yesuma꞉ alota꞉ I̱e laa iki pa꞉ta꞉ amba꞉ la kua꞉me. I̱ weitolo lemeka꞉na꞉ta꞉ kota꞉ do haliweki pao pena꞉ lape leekeme.

⁹Ipikana꞉ma꞉ dupiki pi leeke ekita꞉ amba꞉ la꞉ ula꞉eki yaena꞉yeke leekeme. Dupae. Apa꞉o. Nakana꞉ma꞉ I̱ pa꞉ta꞉ ki haliweki paeyao pa꞉ta꞉ hali homeke kone na alupia꞉me leekeme.

¹⁰Saimono Pidama꞉ta꞉ kepete hokulu panka꞉niao hayekeeki yolo tia mo yeni peao haemeke you haliwekina꞉ you halina꞉ e pokaeyeke hali pokeekepate ipika꞉ popeke nane katake tunkula꞉ pokeekeme. Mo pokaeyeke halina꞉ bikita꞉ Ma꞉likusie.

¹¹Kutu pieketa꞉ Yesuma꞉ Pida pa꞉ta꞉ alota꞉ Naka꞉ kepete hokulu pao mea dake pa꞉ta꞉ panka꞉niae. Yaka Apa꞉ma꞉ I̱ ka꞉la꞉ kapo ikalita꞉ na noluepe leekeme. Yesuma꞉ A꞉nasina꞉ leke popelekena꞉ hayekeeki

¹²Mo ami haliweki ika꞉ you hali tonka꞉na꞉ mo Diu wanda꞉halina꞉ tembolo da handeteke haemeke haliweki make ikana꞉ma꞉ Yesu da꞉ka꞉pa꞉ minaata꞉ puma꞉ tonkao

¹³A꞉nasi pa꞉ta꞉ amba꞉la꞉ hatuku pemekeme. Ipikita꞉ koto bapina꞉ yeni peao haemeke you haliwekina꞉ you hali Kaiya꞉pasi ipika꞉ meiyeke hayekeme.

¹⁴Kaiya꞉pasita꞉ ipikana꞉ma꞉ hande Diu wanda꞉hali pa꞉ta꞉ dupa leeke halie. Wanda꞉hali paeyao homaama꞉na꞉ hali homeke kone homea꞉ka꞉na꞉ epelieke laa leekeme. Pidama꞉ Yesuna꞉ biki hoeyaeyekeeki

¹⁵Saimono Pida make disaipolo hali ma꞉nda꞉ make Yesu telia꞉ mea pepekeme. Mo hande disaipolo hali ma꞉nda꞉ta꞉ mo yeni peao haemeke you haliwekina꞉ you halima꞉ hando hatiki pieke handaa ipikita꞉ mo yeni peao haemeke you haliwekina꞉ you halina꞉ da hama pa꞉ta꞉ Yesu ame̱le̱ peekeme.

¹⁶Pidata꞉ mo pota꞉ kake hama꞉ nane pa hayekeme. Mo disaipolo hali ma꞉nda꞉ta꞉ hande yeni peao haemeke you haliwekina꞉ you halima꞉ hando hatiki pieke halima꞉ paa la꞉ka꞉la puaata꞉ mo pota꞉ kake pa꞉ta꞉ hayeke wandiki pa꞉ta꞉ pi laata꞉ Pida tukiki pa꞉ta꞉ hatuku epeekeme.

¹⁷Mo pota꞉ kake pa꞉ta꞉ hayeke wandikima꞉ Pida pa꞉ta꞉ alota꞉ Neketa꞉ do hande halina꞉ disaipolo hali ma꞉nda꞉ pate ya꞉la꞉me laa leekepate Pidama꞉ alota꞉ I̱ta꞉ dia꞉me leekeme.

¹⁸Kosa꞉ pieke handa mo e pokaemeke haliweki make mo tembolo da handeteke haemeke haliweki make paeyaoma꞉ punu lankake momba꞉lao ta꞉na꞉ laata꞉ titipuna꞉ pambo haemekeme. Pida make ipika꞉ loke titipu pina꞉ alo mo haliweki haemeke alena꞉ pua hayekeme. Mo yeni peao hayeke you halima꞉ Yesu lota꞉ piekeeki

¹⁹Mo yeni peao haemeke you haliwekina꞉ you halima꞉ta꞉ Yesu ipika꞉ disaipolo haliweki haemekeeki make ipika꞉ wala꞉tiki piekeeki make Yesu pa꞉ta꞉ lota꞉ piekeme.

²⁰Yesuma꞉ ipika꞉ pi hombo peaaso alota꞉ Wanda꞉halina꞉ leke popelekena꞉ hata꞉ wanda꞉hali paeyao pa꞉ta꞉ walo haowa꞉me. Kutupa Diu wanda꞉hali mombolo haleme alena꞉ make mo pi hotu haleme da pa꞉ta꞉manu make mo tembolo da pa꞉ta꞉ make I̱ma꞉ koto pa꞉ta꞉ hata꞉ pi wala꞉tiki pua꞉me. Pi ma꞉nda꞉ na a꞉mbao loa꞉me.

²¹Kutu pua꞉ ekina꞉ I̱ ekipeke lota꞉ pitolo alepe laa I̱ma꞉ waloeki opimi wanda꞉hali pa꞉ta꞉ lota꞉ pie. I̱ma꞉ iki pa꞉ta꞉ loa꞉eki manuta꞉ hone wia halememe. Koto ekina꞉ I̱ma꞉ waloeki opuelena꞉ iki pa꞉ta꞉ lota꞉ pie leekeme.

²²Yesuma꞉ koto pi leeke handaa mo tembolo da handeteke hayeke hali homekema꞉ ipika꞉ kadapoma꞉ lia alota꞉ Do yeni peao haleme you haliwekina꞉ you halina꞉ pi hombo peaaso hata꞉ ekipeke kutupiki pi alepe leekeme.

²³Yesuma꞉ ipika꞉ pi hombo peaaso alota꞉ I̱ma꞉ pi lo hoeyaowa꞉eki opika꞉na꞉ta꞉ kota꞉ do haliweki paeyao opina꞉ la hala꞉e laata꞉ kutupulu pelepate ota꞉ pi loa꞉ ekina꞉ kone pika꞉na꞉ kota꞉ I̱ta꞉ ekipeke lipe leekeme.

²⁴Koto ekina꞉ A꞉nasima꞉ta꞉ Yesuta꞉ tonkao pelia haena꞉ kone mo yeni peao haemeke you haliwekina꞉ you hali Kaiya꞉pasi pa꞉ta꞉ tapaeyekeme. Pidama꞉ Yesuna꞉ biki paa hoeyaeyekeeki

²⁵Pidama꞉ ipika꞉ loke titipu pina꞉ alo koto pa꞉ta꞉ pa ha pelia hayekeme. Kutupu haena꞉ mo mandane haliwekima꞉ ipiki pa꞉ta꞉ alota꞉ Neketa꞉ mo hande halina꞉ disaipolo hali ma꞉nda꞉ na halepe lemekepate Pidama꞉ a꞉mbaaso alota꞉ I̱ta꞉ dia꞉me leekeme.

²⁶Mo yeni peao haemeke you haliwekina꞉ you halina꞉ e pokao hayeke hali ma꞉nda꞉ta꞉ Pidama꞉ katake tunkula꞉ pokeeke halina꞉ tapake hayeke halima꞉ pi alota꞉ Neketa꞉ mo hande hali ame̱le̱ mo e pa꞉ta꞉ haemekeeki I̱ma꞉ na handoa꞉pe laa lota꞉ piekeme.

²⁷Pidama꞉ Dia꞉me pi paa alo haena꞉ kone mo hali koka꞉la꞉ma꞉ e̱ leekeme. Yesuta꞉ Pailedina꞉ leke popelekena꞉ hayekeeki

²⁸Kaiya꞉pasi hayeke alena꞉ mina꞉pa꞉lao mo Kapomani You halina꞉ da pa꞉ta꞉ Yesu hatuku mea pemekeme. Da panake ka꞉la꞉polo haena꞉ mea pemekeme. Diu haliwekima꞉ta꞉ mo Lombei Pupa Yapeeke ekina꞉ ne pambemekeeki noluekema꞉ iki hoeyaama꞉na꞉ ika꞉ nindi pelemeeki hone witolo hata꞉ mo da tukiki pa꞉ta꞉ na peke hama꞉ nane pa haemekeme.

²⁹Koto ekina꞉ Pailedima꞉ hama꞉ nane pua iki pa꞉ta꞉ alota꞉ Do halima꞉ eki hau pa꞉la꞉ ekina꞉ samani pulu epemepe leekeme.

³⁰Mo haliwekima꞉ ipika꞉ pi hombo peaaso alota꞉ Do halima꞉ ketete na pia꞉ka꞉na꞉ yoluta꞉ neke pa꞉ta꞉ na hatuku epolo puma꞉me lemekeme.

³¹Pailedima꞉ iki pa꞉ta꞉ alota꞉ Ikana꞉ma꞉ ika꞉ kone hatuku pua ika꞉ pi wilimi alena꞉ hata꞉ pi yokaalu pea꞉pa꞉peke leekeme. Mo Diu haliwekima꞉ ipika꞉ pi hombo peaaso alota꞉ Nikana꞉ma꞉ kone nika꞉ hone wia hali ma꞉nda꞉ lia homaapeke na ya꞉la꞉me lemekeme.

³²Koto lemeke ekima꞉ta꞉ Yesu ipikana꞉ma꞉ amba꞉ pi la꞉ witolo hata꞉ ipika꞉ homolo pa꞉la꞉ tupa꞉ kone yaaluekema꞉ lemekeme.

³³Pailedima꞉ da tukiki pa꞉ta꞉ la꞉ka꞉la pua hata꞉ Yesu epena꞉ wi laa ipiki pa꞉ta꞉ lota꞉ pitolo alota꞉ Neketa꞉ Diu wanda꞉halina꞉ kini hali halepe leekeme.

³⁴Yesuma꞉ ipika꞉ pi hombo peaaso alota꞉ Nakana꞉ma꞉ naka꞉ hone wia I̱ lota꞉ pitolo alepe o mandane haliwekima꞉ I̱ma꞉ poloeki neke pa꞉ta꞉ la kia꞉pe leekeme.

³⁵Pailedima꞉ ipika꞉ pi hombo peaaso alota꞉ Naka꞉ honema꞉ta꞉ I̱ta꞉ Diu hali patema꞉ alepe. Naka꞉ wanda꞉halima꞉ make ika꞉ yeni peao haleme you haliwekima꞉ make I̱ pa꞉ta꞉ neke hatuku mea epememe. Nakana꞉ma꞉ eki hau pelepe leekeme.

³⁶Yesuma꞉ ipika꞉ pi hombo peaaso alota꞉ Yaka Kilu Tombuao Halo ekita꞉ do kenkena꞉eki dia꞉me. Yaka Kilu Tombuao Halo ekita꞉ do kenkena꞉eki yoluta꞉ I̱ telia꞉ mea pomineleme haliwekima꞉ta꞉ mo Diu haliwekima꞉ I̱ minaama꞉na꞉ yaka a꞉nda꞉ liaalo pimime. Dia꞉me. Yaka Kilu Tombuao Halo ekita꞉ do pa꞉ta꞉eki dia꞉me leekeme.

³⁷Koto leeke ekina꞉ Pailedima꞉ ipiki lota꞉ pitolo alota꞉ Kota꞉ neketa꞉ kini hali ya꞉ka꞉ta꞉pe leekeme. Yesuma꞉ ipika꞉ pi hombo peaaso alota꞉ I̱ pa꞉ta꞉ kini halie ale ekita꞉ naka꞉ alee. I̱ta꞉ hau homeke puluekema꞉ epoa꞉me. Mo ota꞉ pi waluekema꞉ loa꞉me. Kutu pionoyeke yaka ama꞉ma꞉ I̱ mendieke do kenkena꞉ epoa꞉me. Kutupa mo ota꞉ pi opuluekema꞉ katake na a꞉mba haleme wanda꞉halima꞉ I̱ma꞉ pi alo ekita꞉ opu halememe.

³⁸Pailedima꞉ alota꞉ Ota꞉ pi ala꞉ ekita꞉ handoekipe leekeme. Yesuta꞉ homena꞉yeke pi leekeeki

³⁹kutu pua꞉pate hande Lombei Pupa Yapeeke pita꞉ pa꞉ta꞉ pu haleme tupa꞉ I̱ma꞉ dipula hali homeke pa tapao halome. Koto ekina꞉ do Diu wanda꞉halina꞉ kini hali pa tapawanope leekeme.

⁴⁰Mo haliwekima꞉ ipika꞉ pi hombo peaaso wi la alualu pea alota꞉ Dia꞉me. Ipikita꞉ dia꞉me. Nika꞉ hone pa꞉la꞉ ekita꞉ Batabasie lemekeme. Mokoto Batabasita꞉ hali lu ta꞉ta꞉na꞉ ala꞉ta꞉ ala꞉ta꞉ pa yola꞉tiki pomu hayeke halie.