Read Sembeleke Dioni 21 Bible Online

Dioni 21 - Sembeleke bible

Dioni 21

¹Wetepena꞉ta꞉ Yesuma꞉ ipika꞉ disaipolo haliweki pa꞉ta꞉ ipiki peneme yao paa waleekeme. Mo tunkula꞉ pa pitieke ikali Taibitiasi pa꞉ta꞉ pua hata꞉ dupa piekeme.

²Saimono Pida make hande Manda꞉e lemeke hali Tomasi make hande Ka꞉lili nane Keina da hao epeeke hali Nada꞉niele make Sepedi ipika꞉ eiyeke yaapo make Yesuna꞉ disaipolo hali yaapo ma꞉nda꞉ make paeyao mandake pa꞉ta꞉ momba꞉la haemekeme.

³Saimono Pidama꞉ mo hande mandane haliweki pa꞉ta꞉ alota꞉ Ta꞉peli mulu pulume leeke handaa mo haliwekima꞉ ipiki pa꞉ta꞉ alota꞉ Niki make neke ame̱le̱ mandakena꞉ pomana꞉e lemekeme. Koto la pua kawasona꞉ pita pemekepate koto timbaata꞉ ta꞉peli homeke a꞉nda꞉ na mimikime.

⁴Nate panake opolo haena꞉ Yesuta꞉ mo ikali tea꞉na꞉ a꞉pa hayekepate mo disaipolo haliwekima꞉ta꞉ Yesue hone na wimikime.

⁵Ipikana꞉ma꞉ iki pa꞉ta꞉ alota꞉ Weki tonuo. Ta꞉peli ma꞉nda꞉ mimipe leekeme. Ikana꞉ma꞉ ipika꞉ pi hombo peaaso alota꞉ Dia꞉me lemekeme.

⁶Ipikana꞉ma꞉ iki pa꞉ta꞉ alota꞉ Kawasona꞉ popeke nane tenkinu mea lopaemeka꞉na꞉ta꞉ ta꞉pelimanu milimikie leekeme. Koto leeke handaa mo haliwekima꞉ tenkinu mea lopaemekepate ta꞉pelimanu wotu mendieke handaa mo tenkinu paa yola꞉ mia꞉peke na yeekeme.

⁷Hande Yesuma꞉ pukima꞉ homeeke disaipolo hali homekema꞉ Pida pa꞉ta꞉ alota꞉ Dota꞉ Tekehalie leekeme. Saimono Pidama꞉ Dota꞉ Tekehalie leekeeki opuata꞉ amba꞉ ipika꞉ dau hola wieke handaa ipika꞉ manda tonkaeyekeeki paa mea tonkao ikali pa꞉ta꞉ ponkaeyekeme.

⁸Mo hande mandane disaipolo haliwekima꞉ta꞉ kawasona꞉ ipulu hata꞉ mo tenkinu ta꞉peli manuma꞉ tumba wina꞉ yolo tia ikali tea꞉ nane opolo epemekeme. Mo haliwekita꞉ ikali tea꞉ nane opolo ipuluekema꞉ makata꞉ 100 midamanu kone epemekeme.

⁹Kenkena꞉ opolo a꞉pata꞉ ti to hayeke alena꞉ ta꞉peli palaowa yaapo to hayekeeki handemekeme.

¹⁰Yesuma꞉ iki pa꞉ta꞉ alota꞉ Ika꞉ ame do mimi ta꞉peli mandaneeki mea ipupe leekeme.

¹¹Saimono Pidama꞉ kawasona꞉ pua mo tenkinu kenkena꞉ yola꞉ mea epeekeme. Mo nu mendia tumbulu baeyeke ta꞉peli manuta꞉ paeyao 153 mendiekeme. Ta꞉peli wopu mendiekepate kone mo tenkinuta꞉ na titipila꞉niaeyekeme.

¹²Yesuma꞉ iki pa꞉ta꞉ alota꞉ Ne nolo ipupe leekepate mo disaipolo haliweki paeyaoma꞉ ipikita꞉ Tekehalie hone wimiki handaa hali ma꞉nda꞉ma꞉ Neketa꞉ epika꞉ta꞉pe laa lota꞉ na piekeme.

¹³Koto ekina꞉ Yesuma꞉ palaowa mulu pua iki pa꞉ta꞉ hale hale pea ta꞉peli make koto tupa꞉ kone haleekeme.

¹⁴Do hau pieke ekita꞉ Yesuma꞉ homa paa tiao hata꞉ ipika꞉ disaipolo haliweki pa꞉ta꞉ hoto tepo peao ipiki peneme yao waleekeekie. Yesu Pida yaapo

¹⁵Ne no paeyeketa꞉ Yesuma꞉ Saimono Pida pa꞉ta꞉ alota꞉ Dionina꞉ eiyeke Saimonoo. I̱ pa꞉ta꞉ pukima꞉ homolo hata꞉ do haliweki ankulalipikipe leekeme. Pidama꞉ ipika꞉ pi hombo peaaso alota꞉ Aowe Tekehalio. I̱ma꞉ neke hone pa꞉la꞉ ekita꞉ handeleme leekeme. Yesuma꞉ ipiki pa꞉ta꞉ alota꞉ Kota꞉ ya sipisipi ma꞉na꞉ ikikisunu nakana꞉ma꞉ punao hapeke leekeme.

¹⁶Hoto yaapo peao Yesuma꞉ ipiki pa꞉ta꞉ alota꞉ Dionina꞉ eiyeke Saimonoo. I̱ pa꞉ta꞉ pukima꞉ homelepe leeke handaa Pidama꞉ ipika꞉ pi hombo peaaso alota꞉ Aowe Tekehalio. I̱ma꞉ neke pa꞉ta꞉ hone pa꞉la꞉ ekita꞉ nakana꞉ma꞉ handeleme leekeme. Yesuma꞉ ipiki pa꞉ta꞉ alota꞉ Kota꞉ ya sipisipi ma꞉na꞉manu nakana꞉ma꞉ punao hapeke leekeme.

¹⁷Hoto tepo peao Yesuma꞉ ipiki pa꞉ta꞉ alota꞉ Dionina꞉ eiyeke Saimonoo. Nakana꞉ma꞉ I̱ pa꞉ta꞉ hone pa꞉la꞉pe leekeme. Pidama꞉ta꞉ Yesuma꞉ Nakana꞉ma꞉ I̱ pa꞉ta꞉ hone pa꞉la꞉pe pi ipiki pa꞉ta꞉ hoto tepo peao lota꞉ pieke ekina꞉ta꞉ ka꞉nda꞉ma꞉ homolo hata꞉ ipiki pa꞉ta꞉ alota꞉ Tekehalio. Ala꞉ta꞉ ala꞉ta꞉ paeyao nakana꞉ma꞉ handeleme. I̱ma꞉ neke pa꞉ta꞉ hone pa꞉la꞉ ekita꞉ nakana꞉ma꞉ handeleme leekeme. Yesuma꞉ ipiki pa꞉ta꞉ alota꞉ Ya sipisipi ma꞉na꞉ manuta꞉ nakana꞉ma꞉ punao hapeke.

¹⁸I̱ma꞉ neke pa꞉ta꞉ ota꞉ pi alome. Neke wekihali hae dina꞉ta꞉ nakana꞉ma꞉ ba꞉ta꞉ido hako yama naka꞉ hone pia꞉ nane pomu hayekeme. Kutupu hayekepate wetepena꞉ta꞉ neke koke yolo pa꞉la꞉ dina꞉ naka꞉ kiki yaapo tindipa moneaalo pelepate hali ma꞉nda꞉ma꞉ naka꞉ kiki mea tonkao naka꞉ hone na pa꞉la꞉ nane kone neke hatuku pelieke leekeme.

¹⁹Yesuma꞉ do leeke ekima꞉ Pidama꞉ Koda꞉na꞉ biki mea a꞉meiyaluekema꞉ ipika꞉ homolo pieke ekina꞉ la hololo leekeme. Yesuma꞉ kotoeki laa Pida pa꞉ta꞉ alota꞉ I̱ telia꞉ mea epoe leekeme. Yesu make mo hande disaipolo hali ma꞉nda꞉ make

²⁰Pidama꞉ la꞉ka꞉la꞉moneao Yesuma꞉ pukima꞉ homeeke halita꞉ ipika꞉ hoki nane epeekeeki handeekeme. Mo halita꞉ hande ne nalo pita꞉ Yesu teke pa꞉ta꞉ panda꞉puniao lota꞉ pitolo alota꞉ Tekehalio. Neke a꞉nda꞉ lombolo pa꞉la꞉ hali epipe leeke halie.

²¹Pidama꞉ koto hali handaa Yesu pa꞉ta꞉ alota꞉ Tekehalio. Do hali pa꞉ta꞉ta꞉ eki hau ipiliepe leekeme.

²²Yesuma꞉ ipika꞉ pi hombo peaaso alota꞉ Do halita꞉ pa hatiki puoopu hao I̱ paa eponoyeke ya hone wia loa꞉ka꞉na꞉ta꞉ kota꞉ naka꞉eki dia꞉me. Neketa꞉ I̱ telia꞉ mea epoe leekeme.

²³Koto leeke ekina꞉ Yesuna꞉ hoki nane telimiki haliwekima꞉ dupiki pi lo haemekeme. Mo hande disaipolo halita꞉ na homilieke laa lo haemekepate Yesuma꞉ mo hande hali na homilieke pi na leke ipikana꞉ma꞉ alota꞉ Do halita꞉ pa hatiki puoopu hao I̱ paa eponoyeke ya hone wia loa꞉ka꞉na꞉ta꞉ kota꞉ naka꞉eki dia꞉me leekeme.

²⁴Mo hande disaipolo hali doe. Kutupa koto pieke ekimanu pa꞉ta꞉ laa kutupa make wape pia꞉me. Ipikana꞉ma꞉ lea꞉ alemanu paeyaota꞉ nikana꞉ma꞉ ota꞉ ekie hone witoloma꞉me. Paeyaasoeki

²⁵Yesuma꞉ hau mandane ekimanu wopu piekeme. Hali ma꞉nda꞉ma꞉ hande Yesuma꞉ pieke ekimanu paeyao homeke homeke lo wape pia꞉ka꞉na꞉ta꞉ kota꞉ yaka honema꞉ta꞉ mo wape pia꞉peke buka manuma꞉ta꞉ do kenke tumbulu baaso ana꞉ na pilieke hone witolome.