Read Sembeleke Dioni 4 Bible Online

Dioni 4 - Sembeleke bible

Dioni 4

¹Koto natena꞉ta꞉ mo hande Pa꞉tisi haliweki pa꞉ta꞉ pi dupa la꞉niaeyekeme. Yesuma꞉ disaipolo wanda꞉hali wopu meaata꞉ bapitaisi peao pita꞉la꞉ ekima꞉ Dionima꞉ pita꞉la꞉ ekita꞉ wetepe yaasa꞉me laa la꞉niaeyekeme.

²Koto la꞉niaeyekepate Yesu ipikana꞉ma꞉ bapitaisi na peaake ipika꞉ disaipolo haliwekima꞉ homeke bapitaisi peatiki pimikime.

³Koto la꞉niaeyeke pita꞉ Yesuma꞉ make opuaata꞉ mo hande Diudia nane mina꞉pa꞉lao mo Ka꞉lili nane peekeme.

⁴Koto nane pulu hata꞉ Sametia nanema꞉ lopa꞉la꞉ peekeme.

⁵Kutupa Sametia lopa꞉la꞉ puaata꞉ daoni homeke pa꞉ta꞉ opolo peekeme. Koto daoni bikita꞉ Saika lemekeme. Mo da teketa꞉ hande Dieikopema꞉ ipika꞉ eiyeke Diosepe pa꞉ta꞉ haleeke kenke teke pa꞉ta꞉ hayeke dae.

⁶Koto kenke pa꞉ta꞉ Dieikopema꞉ aweeke naku pa꞉ta꞉ ikali pitiekeme. Kutupa Yesuta꞉ pota꞉na꞉ ipu hao anke litu pieke mo naku ikali teke pa꞉ta꞉ pitiekeme. Nate you tikekena꞉ haena꞉ pitiekeme.

⁷Kutupa pitina꞉ Sametia wanda꞉ homekema꞉ ikali nolo epeekeme. Yesuma꞉ ipiki pa꞉ta꞉ alota꞉ Ikali ma꞉nda꞉ nono kie leekeme.

⁸Ipika꞉ disaipolo haliwekima꞉ mo daoni pa꞉ta꞉ ne hambolo pena꞉ pita꞉ leekeme.

⁹Mo Sametia wanda꞉ma꞉ Yesuna꞉ pi hombo peaaso alota꞉ I̱ta꞉ Sametia wanda꞉ halopate neketa꞉ Diu hali hata꞉ kone ekipeke I̱ pa꞉ta꞉ Ikali ma꞉nda꞉ nono kie laa honke alepe leekeme. Koto Sametia wanda꞉halima꞉ ika꞉ ne ikali no haemeke kawaso manuta꞉ mo Diu wanda꞉halima꞉ yola꞉ alu pea napeke na yeeke handa loa꞉me.

¹⁰Yesuma꞉ ipika꞉ pi hombo peaaso alota꞉ Nakana꞉ma꞉ta꞉ Koda꞉ma꞉ kita꞉la꞉ ale make neke pa꞉ta꞉ Ikali ma꞉nda꞉ nono kie laa honke ala꞉ halina꞉ biki make hone wika꞉na꞉ yoluta꞉ kota꞉ naka꞉ honke aleeki ipikana꞉ma꞉ opua da꞉ta꞉la꞉ ikali kulu pia꞉me leekeme.

¹¹Mo wanda꞉ma꞉ ipiki pa꞉ta꞉ alota꞉ Aneke halio. Do nakuta꞉ ota꞉ oni pa꞉ta꞉ leke awa꞉niaala꞉me. Koto pa꞉la꞉ ekina꞉ neketa꞉ ipi kanake na wia halepate da꞉ta꞉la꞉ ikali ekipa naa kuluekema꞉ alepe laata꞉

¹²Nika꞉ apa꞉mei Dieikopema꞉ta꞉ do naku ikali niki pa꞉ta꞉ ka꞉la꞉me. Do ikalita꞉ ipikana꞉ma꞉ make ipika꞉ eiyeke titima꞉ make ipika꞉ ma꞉na꞉ manuma꞉ make na꞉tiki pu haemekeme. Neketa꞉ Dieikope ankulaluekema꞉ alepe leekeme.

¹³Yesuma꞉ mo wanda꞉ pa꞉ta꞉ alota꞉ Hali epima꞉ do naku ikali naa haota꞉ wetepena꞉ make ikali nena꞉ pa pea꞉tiki pilieke.

¹⁴Kutu piliepate hali epima꞉ I̱ma꞉ halolo ikali naa haya꞉ka꞉na꞉ta꞉ koto halita꞉ ikali nena꞉ paa na pilieke. I̱ma꞉ do alo ekita꞉ do ekina꞉ yeke loa꞉me. I̱ma꞉ halolo ikalita꞉ mo hali tukiki pa꞉ta꞉ pita꞉ opa꞉la꞉ ikali kone pitilieke. Kutupa hande ikalima꞉ta꞉ opolo hata꞉ mo halita꞉ da꞉tao haena꞉ lelieke leekeme.

¹⁵Mo wanda꞉ma꞉ ipiki pa꞉ta꞉ alota꞉ Aneke halio. Nakana꞉ma꞉ koto ale ikalita꞉ I̱ ma꞉nda꞉ kie leekeme. Kutupa wetepena꞉ ikali nena꞉ paa na pitolo hata꞉ do naku ikali nolo paa na ipulueke leekeme.

¹⁶Yesuma꞉ ipiki pa꞉ta꞉ alota꞉ Naka꞉ haliki amba꞉la wi lolo puaata꞉ do pa꞉ta꞉ paa a꞉pa꞉peke leekeme.

¹⁷Mo wanda꞉ma꞉ alota꞉ I̱ta꞉ hali dia꞉me leekeme. Koto leeke handaa Yesuma꞉ ipiki pa꞉ta꞉ alota꞉ Nakana꞉ma꞉ I̱ta꞉ hali dia꞉me ale ekita꞉ ota꞉ pi aleme.

¹⁸Neketa꞉ yunki hata꞉ haliwekina꞉ da amba꞉ pekepate ame do halepe hali make ota꞉ naka꞉ haliki dia꞉me laata꞉ Nakana꞉ma꞉ ale ekita꞉ ota꞉ekie leekeme.

¹⁹Mo wanda꞉ma꞉ ipiki pa꞉ta꞉ alota꞉ Aneke halio. Ameta꞉ neke handolome laa Koda꞉na꞉ pi la꞉ mea halo hale hali ya꞉ka꞉ta꞉me leekeme.

²⁰Nika꞉ apa꞉mei amedama꞉ niki Sametia wanda꞉hali pa꞉ta꞉ Do pote pa꞉ta꞉ pua mombela Koda꞉ pa꞉ta꞉ yeni pea꞉pa꞉peke laa lemekepate Diu haliweki ikana꞉ma꞉ alota꞉ Diutuseleme da pa꞉ta꞉ pua mombela Koda꞉ pa꞉ta꞉ yeni pea꞉pa꞉peke alememe leekeme.

²¹Yesuma꞉ ipiki pa꞉ta꞉ alota꞉ Wanda꞉o. I̱ma꞉ do aloeki opua꞉peke. Nate ma꞉nda꞉ ipilieke laa koto nate epea꞉ka꞉na꞉ta꞉ kota꞉ do pote pa꞉ta꞉ hata꞉ make oli Diutuseleme da pa꞉ta꞉ hata꞉ make wanda꞉halima꞉ta꞉ hande Apa꞉ pa꞉ta꞉ yeni na pilimikie laata꞉

²²Iki Sametia wanda꞉hali ikana꞉ma꞉ yeni piteleme ekita꞉ epi pa꞉ta꞉ pitelemepe. Ikana꞉ma꞉ wopu na handelememe. Kutu pitelemepate niki Diu wanda꞉hali nikana꞉ma꞉ yeni pitoloma꞉ ekita꞉ epi pa꞉ta꞉ pitoloma꞉pe kota꞉ ota꞉ handoloma꞉me. Pa ekipeke mo wanda꞉hali da꞉taasa꞉ ekita꞉ Diu wanda꞉hali pa꞉ta꞉ kini pea ipula꞉eke handa loa꞉me leekeme.

²³Koto pa꞉la꞉pate wetepe hande epolo pa꞉la꞉ nateta꞉ ame amba꞉ a꞉pa꞉la꞉me. Kutu pa꞉la꞉ ekina꞉ ota꞉ yeni piteleme wanda꞉halima꞉ta꞉ Apa꞉ pa꞉ta꞉ yeni pimika꞉na꞉ta꞉ ika꞉ temokoma꞉ make ota꞉ hau pitolo hata꞉ make yeni pilimikie leekeme. Koto tupa꞉ ipiki pa꞉ta꞉ yeni piteleme wanda꞉halita꞉ Apa꞉ma꞉ hone pa꞉la꞉me.

²⁴Koda꞉ta꞉ temoko tekee. Koto pa꞉la꞉ ekina꞉ ipiki pa꞉ta꞉ yeni piteleme wanda꞉halima꞉ta꞉ ika꞉ temokoma꞉ make ota꞉ hau pitolo hata꞉ make ipiki pa꞉ta꞉ yeni pea꞉peke ya꞉la꞉me leekeme.

²⁵Mo wanda꞉ma꞉ ipiki pa꞉ta꞉ alota꞉ Mo hande Mesaya ipika꞉ biki ma꞉nda꞉ta꞉ Ketiso epolo pa꞉la꞉eki hone witolome. Ipiki a꞉paata꞉ hau paeyao pita꞉la꞉eki la kilieke leekeme.

²⁶Yesuma꞉ ipiki pa꞉ta꞉ alota꞉ Nakana꞉ma꞉ koto ale halita꞉ I̱ konee laata꞉ Neke yaapo do pi alopa꞉ halie leekeme.

²⁷Koto pi alo haena꞉ta꞉ ipika꞉ disaipolo haliweki paa opolo epemekepate Yesu mo wanda꞉ yaapo pi alo haepekeeki handaata꞉ hone ta꞉ta꞉ ta꞉ta꞉ wimikipate hali homeke ma꞉nda꞉ma꞉ Aleke muluekema꞉ alepe o Ipiki yaapo ekipeke pi alepe laa pa na lota꞉ piekeme.

²⁸Kutupa mo wanda꞉ma꞉ ipi kanake mina꞉pa꞉lao mo daoni nane puaata꞉ koto pa꞉ta꞉ haemeke wanda꞉hali pa꞉ta꞉ alota꞉

²⁹Hali ma꞉nda꞉ handoemena꞉ ipupe laata꞉ I̱ma꞉ amba꞉ pua꞉ ekimanu paeyaota꞉ ipikana꞉ma꞉ la kia꞉me laata꞉ Ipikita꞉ hande Ketisope leekeme.

³⁰Koto leeke ekina꞉ mo wanda꞉halita꞉ daoni mina꞉pa꞉lao Yesu handolo pemekeme.

³¹Koto hau pitolo haena꞉ta꞉ hande disaipolo haliwekima꞉ Yesu honke alo alota꞉ Disao. Ne ma꞉nda꞉ nae lemekepate

³²Yesuma꞉ ika꞉ pi hombo peaaso alota꞉ Ya neta꞉ ma꞉nda꞉ ula꞉pate ikana꞉ma꞉ na handeleme leekeme.

³³Koto leekeeki opuaata꞉ mo disaipolo haliwekima꞉ ika꞉ kone ane la꞉ mone la꞉ pitolo alota꞉ Ma꞉nda꞉ma꞉ ipika꞉ ne mea a꞉pao halea꞉pe lemekeme.

³⁴Yesuma꞉ iki pa꞉ta꞉ alota꞉ Yaka neta꞉ dupae. I̱ tapaala꞉ halina꞉ hone pa꞉la꞉eki puluekema꞉ make ipikana꞉ma꞉ I̱ pa꞉ta꞉ walea꞉ e make pokao paeyawaaluekema꞉ loa꞉me leekeme.

³⁵Kota꞉ ika꞉ aleme pita꞉ dupae. Sumba꞉ tonkopu yapea꞉ka꞉na꞉ta꞉ ne napeke naa pilie natena꞉ poka꞉ mepi pilimikie lo halemepate I̱ma꞉ iki pa꞉ta꞉ alota꞉ Emanu lekema꞉ lekema꞉ pea꞉pa꞉peke. Ame kone ne napeketa꞉ naa pa꞉leke handaa poka꞉ mepi pia꞉pa꞉peke ya꞉la꞉me leekeme.

³⁶Ne napeke poka꞉ mepi pita꞉la꞉ halima꞉ta꞉ ipika꞉ yenki minolo hata꞉ mo hande ne napekemanu mea pua momba꞉la wia꞉ka꞉na꞉ta꞉ da꞉ta hao hala꞉eki kone yelieke. Kutu pia꞉ka꞉na꞉ta꞉ ne wae noka꞉pa꞉la꞉ hali make napeke poka꞉ mepi pita꞉la꞉ hali make ipiliki telipina꞉ma꞉ ta꞉na꞉ma꞉ homilipipikie leekeme.

³⁷Kutu pita꞉la꞉ ekima꞉ mo hande lo haloma꞉ pi ma꞉nda꞉ dupa yaasa꞉me. Hali ma꞉nda꞉ma꞉ta꞉ ne wae noka꞉pa꞉la꞉pate pa hali ma꞉nda꞉ma꞉ta꞉ mo ne napeke poka꞉ mepi pita꞉la꞉me aloma꞉me laata꞉

³⁸Ikana꞉ma꞉ na pokeme e pa꞉ta꞉ kone ne napekemanu poka꞉ mepi puemena꞉yeke iki tapaalome. Kutupa mandane haliwekima꞉ pokeme e pa꞉ta꞉ kone ikana꞉ma꞉ ne napeke poka꞉ mepi pulu pelemepateta꞉ mo amba꞉ haliwekima꞉ honkopu hao pu wilimi hauna꞉ pitelememe leekeme.

³⁹Mo hande wanda꞉ma꞉ I̱ma꞉ pua꞉ ekimanu paeyao ipikana꞉ma꞉ la kia꞉me leeke ekina꞉ mo daoni pa꞉ta꞉ haemeke Sametia wanda꞉hali wopuma꞉ Yesu pa꞉ta꞉ hone tulaemekeme.

⁴⁰Koto ekina꞉ mo hande Sametia wanda꞉halima꞉ta꞉ Yesu pa꞉ta꞉ puaata꞉ Niki ame̱le̱ hosiki hao polena꞉e laa honke lemekeme. Koto lemeke handa hoto yaapo Yesu koto pa꞉ta꞉ haemekeme.

⁴¹Kutupa mandane wanda꞉hali wopuma꞉ ipikana꞉ma꞉ waleeke pi opitolo hata꞉ ipiki pa꞉ta꞉ hone tulaaso hata꞉ mo wanda꞉ pa꞉ta꞉ alota꞉

⁴²Ameta꞉ ipiki pa꞉ta꞉ hone tulaasoma꞉ ekita꞉ nakana꞉ma꞉ lele ekina꞉ hone na tulaake nikana꞉ma꞉ kone ipika꞉ pi opuaata꞉ ipikita꞉ kenke wanda꞉hali hande mea Da꞉taasa꞉ Hali ota꞉ hala꞉me hone witoloma꞉me lemekeme. Yesuma꞉ mo kapomani halina꞉ eiyeke mea tiaeyekeeki

⁴³Yesuta꞉ hoto yaapo koto pa꞉ta꞉ hao pa Ka꞉lili nane peekeme.

⁴⁴Yesuma꞉ ipika꞉ kone leekeme dupae. Potopede halita꞉ ipika꞉ ota꞉ da teke pa꞉ta꞉ haya꞉ka꞉na꞉ta꞉ ipika꞉ biki na wilieke leekeme.

⁴⁵Ipikana꞉ma꞉ mo Ka꞉lili nane opolo peeke dina꞉ta꞉ wanda꞉hali paeyaoma꞉ ipiki handa꞉ mimikime. Do ekina꞉ yeke loa꞉me. Mo wanda꞉hali ika꞉ kone Diutuseleme nane puaata꞉ hande Lombei Pupa Yapeeke pita꞉ta꞉ ne nalo hata꞉ Yesuma꞉ pieke haumanu paeyao amba꞉ handemekeme.

⁴⁶Kutupa Yesuta꞉ mo Ka꞉lili nane hayeke da Keina pa꞉ta꞉ opolo peekeme. Amba꞉ta꞉ koto da pa꞉ta꞉ hata꞉ Yesuma꞉ ota꞉ ikali kone waini ikali pitina꞉ leekeme. Koto da pa꞉ta꞉ta꞉ kapomani hali homeke hayekepate ipika꞉ wekita꞉ Kapeneami da pa꞉ta꞉ yeni hayekeme.

⁴⁷Koto halima꞉ta꞉ Yesuta꞉ Diudia nane mina꞉pa꞉lao Ka꞉lili nane a꞉pa hala꞉me leekeeki opuaata꞉ Yesu pa꞉ta꞉ peekeme. Yesuma꞉ mo Kapeneami nane pua ipika꞉ homoluekema꞉ taapo pitieke weki mea tiaena꞉yeke honke leekeme.

⁴⁸Yesuma꞉ mo hali pa꞉ta꞉ alota꞉ Ikana꞉ma꞉ hau tieke ipula꞉eki handolo homeke pa hone tulaasememe leekeme.

⁴⁹Mo hande kapomani halima꞉ alota꞉ Aneke halio. Yaka weki homaapa꞉na꞉ dika꞉ mandakena꞉ pana꞉e laa leekeme.

⁵⁰Yesuma꞉ ipiki pa꞉ta꞉ alota꞉ Naka꞉ weki tiaaliekema꞉ pue leekeme. Hande halima꞉ Yesuma꞉ leeke pi opua hone tulao hao peekeme.

⁵¹Mo ipika꞉ da nane paa poluekema꞉ pulu haena꞉ ipika꞉ e pokaemeke haliwekima꞉ pota꞉na꞉ manda꞉hande pea alota꞉ Naka꞉ weki tiao pila꞉me lemekeme.

⁵²Ipikana꞉ma꞉ mo haliweki pa꞉ta꞉ lota꞉ pitolo alota꞉ Ya weki hosiki tiaeyeke hauta꞉ nate hando pa꞉ta꞉ haena꞉ piekepe laa lota꞉ pieke handaa mo haliwekima꞉ ipika꞉ pi hombo peaaso alota꞉ Ambaneke nate lekelo yopulu haena꞉ta꞉ ipika꞉ hoputiti yenita꞉ tandelea꞉me lemekeme.

⁵³Atekema꞉ hone witolota꞉ Ambaneke koto natena꞉ kone Yesuma꞉ I̱ pa꞉ta꞉ alota꞉ Naka꞉ weki tiaalieke laa lea꞉me hone wiekeme. Koto ekina꞉ mo halima꞉ make ipika꞉ weki wanda꞉ma꞉ make hone tulaemekeme.

⁵⁴Yesuta꞉ Diudia nane mina꞉pa꞉lao Ka꞉lili nane pua hayeke pita꞉ta꞉ do wele wopu pieke ekita꞉ hoto yaapo peaoeki piekeme.