Read Sembeleke Dioni 7 Bible Online

Dioni 7 - Sembeleke bible

Dioni 7

¹Kutu pieke hoki naneta꞉ Diu haliwekima꞉ ipiki lu pimiki hone wimiki handaa Yesuta꞉ Diudia nane pomuluekema꞉ hone na wiki mo Ka꞉lili nane pomiekeme.

²Hande Sale damanu pa꞉ta꞉ haemeke ekina꞉ ne pambolo pimiki di tekepa꞉ta꞉ yeekeme.

³Koto ekina꞉ Yesuna꞉ hameke titima꞉ ipiki pa꞉ta꞉ alota꞉ Naka꞉ disaipolo haliwekima꞉ naka꞉ pitele ekimanu handena꞉yeke do pa꞉ta꞉ mina꞉pa꞉lao Diudia nane pua꞉peke.

⁴Hali ma꞉nda꞉ma꞉ ipika꞉ honema꞉ wanda꞉hali paeyaoma꞉ yaka pitoloeki handena꞉e hone wia꞉ka꞉na꞉ta꞉ kota꞉ a꞉mbao hata꞉ pea꞉peke na ya꞉la꞉me. Do haumanu pitele ekita꞉ wanda꞉hali paeyaona꞉ leke popelekena꞉ hata꞉ pea꞉peke lemekeme.

⁵Kota꞉ ipika꞉ hameke titima꞉ kone Yesu pa꞉ta꞉ hone na tulaemekeme.

⁶Yesuma꞉ mo haliweki pa꞉ta꞉ alota꞉ Yaka nate a̱i̱ na a꞉pa꞉la꞉me laata꞉ ika꞉ ekita꞉ amba꞉ a꞉pa꞉la꞉me.

⁷Kenke wanda꞉hali paeyaoma꞉ iki pa꞉ta꞉ ota꞉ ki hone wia꞉peke na ya꞉la꞉pate I̱ma꞉ ika꞉ piteleme haumanu hoke ekie laa lo halo ekina꞉ I̱ pa꞉ta꞉ ki hone witelememe.

⁸Ikita꞉ hande ne pambolo pa꞉la꞉ ekina꞉ pua꞉pa꞉peke. I̱ta꞉ yaka nate a̱i̱ na a꞉pa꞉la꞉ ekina꞉ na polueke leekeme.

⁹Koto pi laata꞉ Yesuta꞉ Ka꞉lili nane pa hayekeme. Yesuta꞉ hande Sale da manuna꞉ ne pambaemeke pa꞉ta꞉ hayekeeki

¹⁰Ipika꞉ hameke titi hande ne pambolo pimikieki pa꞉ta꞉ pemeke hoki naneta꞉ Yesu make peneme yao na peke a꞉mbao peekeme.

¹¹Mo Diu haliwekima꞉ta꞉ hande ne pambeeke alena꞉ hata꞉ Yesu weitolo hata꞉ lota꞉ pitolo alota꞉ Yesuta꞉ hando pa꞉ta꞉ hala꞉pe lemekeme.

¹²Mo wanda꞉hali paeyaoma꞉ Yesu pa꞉ta꞉ pi alo hata꞉ hambiliki hambilikima꞉ pimikime. Mandane wanda꞉halima꞉ta꞉ Ipikita꞉ epeke halie lemekepate mandane wanda꞉halima꞉ta꞉ Dia꞉me laa Wanda꞉hali pa꞉ta꞉ ya pi lo hala꞉ halie lemekeme.

¹³Koto lemekepate wanda꞉hali paeyaoma꞉ Diu haliweki pa꞉ta꞉ paala꞉ma꞉ homolo hata꞉ pa hali homeke ma꞉nda꞉ma꞉ Yesu pa꞉ta꞉ pi loluekema꞉ peneme yao na leekeme.

¹⁴Hande ne pambemekeeki tukiki pa꞉ta꞉ Yesuma꞉ mo tembolo da pa꞉ta꞉ pua hata꞉ pi waleekeme.

¹⁵Mo Diu haliwekima꞉ penkilipitolo hata꞉ alota꞉ Do halita꞉ sukulu na piki halima꞉ kone wopu handa ula꞉ ekita꞉ ekipa pa꞉la꞉pe lemekeme.

¹⁶Yesuma꞉ ika꞉ pi hombo peaaso alota꞉ Do walolo ekita꞉ I̱ma꞉ hone wia yakaeki na walolome. I̱ tapaala꞉ hali Koda꞉ ipika꞉eki kone walolome.

¹⁷Hali epima꞉ Koda꞉na꞉ hone pa꞉la꞉ hau puluekema꞉ hone pia꞉ka꞉na꞉ta꞉ kutu pita꞉la꞉ halima꞉ta꞉ I̱ma꞉ do waloloeki Koda꞉na꞉eki kone walaasoeki make o yaka hone wia waloloeki make handa꞉ wilieke.

¹⁸Hali epima꞉ ipika꞉ hone wia pi lea꞉ka꞉na꞉ta꞉ kota꞉ ipika꞉ biki kone a꞉meiyaasa꞉me. Koto pa꞉la꞉pate hali epima꞉ ipika꞉ biki kone na a꞉meiyaake ipiki tapaala꞉ halina꞉ biki a꞉meiyaluekema꞉ pia꞉ka꞉na꞉ta꞉ kota꞉ koto halita꞉ yayapiki hau pita꞉la꞉ hali dia꞉me. Ota꞉ hau pita꞉la꞉ halie.

¹⁹Hande Lo Pi manuta꞉ Mosesima꞉ iki pa꞉ta꞉ na ka꞉la꞉pe. Koto pa꞉la꞉pate iki pa꞉ta꞉ hali homeke a꞉nda꞉ma꞉ hande Lo Pimanu na opitolo pita꞉la꞉me. I̱ lia homaaluekema꞉ ekipeke pitelemepe.

²⁰Mo wanda꞉hali paeyaoma꞉ ipika꞉ pi hombo peaaso alota꞉ Neke tukiki pa꞉ta꞉ hoke temoko pila꞉me. Neketa꞉ epima꞉ luekema꞉ taapa꞉la꞉pe lemekeme.

²¹Yesuma꞉ ika꞉ pi hombo peaaso alota꞉ I̱ma꞉ta꞉ wele pita꞉la꞉ hau homeke pua꞉ ekina꞉ iki paeyaoma꞉ penkilipimime.

²²Mosesima꞉ ika꞉ wekisunu pa꞉ta꞉ sekemesaisi hau pea꞉pa꞉peke laa leeke ekina꞉ mo Hoto Pila꞉ Natena꞉ make weki ma꞉nda꞉ pa꞉ta꞉ sekemesaisi hau pilimikie. Mosesima꞉ leeke ekina꞉ loa꞉pate pa Mosesima꞉ do hau na kini pu miekeme. Ika꞉ amba꞉ atekemeima꞉ kini pu mimikime.

²³Mosesima꞉ waleeke Lo Pimanu yamba꞉laama꞉na꞉ Hoto Pila꞉ Natena꞉ kone weki ma꞉nda꞉ pa꞉ta꞉ sekemesaisi hau pimika꞉na꞉ta꞉ kota꞉ I̱ma꞉ make Hoto Pila꞉ Natena꞉ hali homeke epeaowa꞉ ekina꞉ ekipeke I̱ pa꞉ta꞉ mineke pankelemepe.

²⁴Pa lekema꞉ handolo hata꞉ hone na wiki tiki tiki hau pa꞉la꞉ ekina꞉ hone wia꞉pa꞉peke aleo. Ipikita꞉ ota꞉ hande Ketisope

²⁵Mandane Diutuseleme wanda꞉halima꞉ alota꞉ Hande luekema꞉ taapeleme halita꞉ do hali ya꞉ka꞉ta꞉pe.

²⁶Handa꞉pe. Ipikana꞉ma꞉ wanda꞉halina꞉ leke popelekena꞉ hata꞉ pi ala꞉pate ipiki pa꞉ta꞉ hali ma꞉nda꞉ma꞉ pi na ala꞉me. Nika꞉ you haliwekima꞉ta꞉ do halita꞉ ota꞉ Ketiso hone witelemepe.

²⁷Pate do hali hao epa꞉la꞉ alena꞉ nikana꞉ma꞉ handoloma꞉pate hande Ketiso epea꞉ka꞉na꞉ta꞉ ipika꞉ hao epa꞉la꞉ alena꞉ hali ma꞉nda꞉ma꞉ handa꞉peke na yelieke laa lemekeme.

²⁸Yesuma꞉ mo tembolo da tukiki pa꞉ta꞉ hata꞉ pi walolo wi la alota꞉ I̱ta꞉ ota꞉ handelemepe. I̱ hao epolo alena꞉ make handelemepe. Yaka kone hone wia na epoa꞉me. Koto pa꞉la꞉pate I̱ tapaeya꞉ halima꞉ta꞉ ota꞉ pi lo hala꞉me.

²⁹Koto halita꞉ ikana꞉ma꞉ na handelemepate ipiki yaapo hao epoa꞉ ekina꞉ make ipikana꞉ma꞉ I̱ tapaeya꞉ ekina꞉ make I̱ma꞉ ota꞉ handolome leekeme.

³⁰Koto leeketa꞉ ipiki da꞉ka꞉pa꞉ minuluekema꞉ pimikipate ipika꞉ nate a̱i̱ dia꞉yeke handaa hali ma꞉nda꞉ma꞉ ipiki na miniekeme. Wanda꞉hali wopuma꞉ ipiki pa꞉ta꞉ hone tulaaso hata꞉ alota꞉

³¹Hande Ketiso epea꞉ka꞉na꞉ta꞉ do halina꞉ wele pita꞉la꞉ ekimanu ankulaliepe lemekeme. Haliwekima꞉ Yesu da꞉ka꞉pa꞉ minulu pa꞉na꞉ tapaeyekeeki

³²Mo wanda꞉halima꞉ Yesu pa꞉ta꞉ koto pi lemeke ekimanu mo Pa꞉tisi haliwekima꞉ opuata꞉ mo yeni peao haemeke you haliweki ame̱le̱ apa꞉tao Yesu da꞉ka꞉pa꞉ minulu pena꞉ mo tembolo da handeteke haemeke haliweki tapaemekeme.

³³Yesuma꞉ alota꞉ Iki ame̱le̱ hosiki haota꞉ wetepena꞉ta꞉ I̱ tapaeya꞉ hali pa꞉ta꞉ polueke.

³⁴I̱ weilu pelemepate I̱ halo polo alena꞉ iki epa꞉peke na ya꞉la꞉ ekina꞉ I̱ na handa꞉ wilimiki leekeme.

³⁵Mo Diu haliwekima꞉ ika꞉ ika꞉ kone pi la꞉ alu alu pitolo hata꞉ alota꞉ Ipikita꞉ mo nikana꞉ma꞉ na handolo poloma꞉ tupa꞉ hane poluekema꞉ ala꞉pe. Ipikita꞉ mo nika꞉ wanda꞉hali haleme Kitiki daoni pa꞉ta꞉manu mo Kitiki wanda꞉hali walo peliekepe.

³⁶Ipikana꞉ma꞉ alota꞉ I̱ handa꞉ uluekema꞉ weilu pelemepate I̱ na handa꞉ wilimikie laa kutupa I̱ halo polo alena꞉ ikita꞉ a꞉pa꞉peke na ya꞉la꞉me la lea꞉me lemekeme. Eki epina꞉ lea꞉pe lemekeme. Deto hala꞉ ikalina꞉ pi

³⁷Mo hande ne pambemekeeki paeyeke natena꞉ nate tieke yeekeme. Koto natena꞉ Yesuma꞉ tia liao hata꞉ pi anekema꞉ alota꞉ Hali epima꞉ ikali nena꞉ pia꞉ka꞉na꞉ta꞉ I̱ pa꞉ta꞉ a꞉pa nea꞉ka꞉na꞉ta꞉ epelieke.

³⁸Mo Baibolo bukama꞉ la꞉la꞉ ekita꞉ dupae. Hali epima꞉ I̱ pa꞉ta꞉ hone tulaeya꞉ka꞉na꞉ta꞉ ipika꞉ puki pa꞉ta꞉ da꞉ta꞉la꞉ ikali opa wotu yapilieke la꞉la꞉me leekeme.

³⁹Yesuma꞉ koto leeke ekita꞉ Holi Sipitidi pa꞉ta꞉ kone leekeme. Ipiki pa꞉ta꞉ hone tulao haemeke wanda꞉halima꞉ mo Holi Sipitidi muluekema꞉ haena꞉ leekeme. Koto natena꞉ta꞉ Yesuma꞉ ipika꞉ halo pieke kapu tieke a̱i̱ dia꞉yeke handaa mo Holi Sipitidi a̱i̱ na epena꞉ leekeme. Wanda꞉hali putupa alu alu pea ta꞉ta꞉ haemekeeki

⁴⁰Mo momba꞉la haemeke wanda꞉hali pa꞉ta꞉ mandane wanda꞉halima꞉ koto leekeeki opua alota꞉ Do halita꞉ hande Koda꞉na꞉ Potopede hali ota꞉ ya꞉ka꞉ta꞉me lemekeme.

⁴¹Mandane wanda꞉halima꞉ alota꞉ Ipikita꞉ hande Ketisoe lemekepate mandane wanda꞉halima꞉ alota꞉ Ketiso epea꞉ka꞉na꞉ta꞉ mo Ka꞉lili nane hao na ipilieke lemekeme.

⁴²Pa ekipeke mo Baibolo bukana꞉ la꞉la꞉ ekita꞉ Ketisota꞉ Deipidi tapake hali hata꞉ta꞉ hande Deipiti hao hayeke daoni pa꞉ta꞉ Beteleha꞉ma꞉ daoni pa꞉ta꞉ mendilieke la la꞉la꞉me lemekeme.

⁴³Koto leeke ekina꞉ wanda꞉halima꞉ Yesu pa꞉ta꞉ hone ta꞉ta꞉ ta꞉ta꞉ witolo hata꞉ putupa alualu pea ta꞉ta꞉ haemekeme.

⁴⁴Mandane haliwekima꞉ta꞉ Yesu da꞉ka꞉pa꞉ minuluekema꞉ hone wimikipate hali ma꞉nda꞉ma꞉ ipiki na miniekeme. You haliwekima꞉ Yesu pa꞉ta꞉ hone na tulaemekeeki

⁴⁵Kutu pieketa꞉ mo tembolo da handeteke haemeke haliwekita꞉ mo yeni peao haemeke you haliweki make mo Pa꞉tisi haliweki ame̱le̱ haemeke alena꞉ paa la꞉ka꞉la pemekepate mo haliwekima꞉ hande tembolo da handeteke haemeke haliweki pa꞉ta꞉ alota꞉ Mo hande halita꞉ ekipeke da꞉ka꞉pa꞉ mina na hatuku ipulimipe lemekeme.

⁴⁶Mo tembolo da handeteke haemeke haliwekima꞉ ika꞉ pi hombo peaaso alota꞉ Amba꞉ hata꞉ make do halima꞉ ala꞉ tupa꞉ ma꞉nda꞉ma꞉ dupiki pi na leekeme.

⁴⁷Mo Pa꞉tisi haliwekima꞉ ika꞉ pi hombo peaaso alota꞉ Iki pa꞉ta꞉ make makeao pia.

⁴⁸Nika꞉ you hali ma꞉nda꞉ma꞉ make Pa꞉tisi hali ma꞉nda꞉ma꞉ make ipiki pa꞉ta꞉ hone tulao pia. Dia꞉me.

⁴⁹Do da wanda꞉halita꞉ Koda꞉na꞉ Lo Pimanu na handeleme ekina꞉ Koda꞉ma꞉ hoeyaaluekema꞉ hone amba꞉ wiekeme.

⁵⁰Hande amba꞉ kone Yesu handolo peeke hali Nikodimasima꞉ta꞉ mo haliweki ame̱le̱ hata꞉ta꞉ iki pa꞉ta꞉ alota꞉

⁵¹Nika꞉ Lo Pi manuma꞉ta꞉ hali ma꞉nda꞉ pa hameke pi yokaalu pea꞉peke na ya꞉la꞉me. Ipika꞉ pi opuata꞉ ipika꞉ pieke hau handa꞉ wia pitolota꞉ ana꞉ pa꞉la꞉me leekeme.

⁵²Mo haliwekima꞉ ipiki lu pambaaso alota꞉ Neke make mo hande Ka꞉lili hali yekea. Mo Baibolo buka yata꞉pata꞉ mo Koda꞉na꞉ potopede hali ma꞉nda꞉ta꞉ oli Ka꞉lili nane hao epolo pa꞉la꞉eki na handilipikie lemekeme.

⁵³[Kutupa wanda꞉hali paeyao da pemekeme.]