Read Sembeleke Aposolo 18 Bible Online

Aposolo 18 - Sembeleke bible

Aposolo 18

¹Kutupa A꞉ta꞉ni da mina꞉pa꞉lao mo Kotindi da nane puaata꞉

²Diu hali homeke Akuila mo Pondasi da nane hali kone pua handeekeme. Koto halita꞉ ipika꞉ weteke Pisila yaapo mo Ideli nane mina꞉pa꞉lao panake a꞉pa haepekeme. Mo Sisa Kolodiusima꞉ Diu wanda꞉hali paeyaota꞉ Loma꞉ da mina꞉pa꞉lao pupe leeke handa epepekeme. Poloma꞉ta꞉ ipiliki handuluekema꞉ ipilika꞉ da pa꞉ta꞉ peekepate

³mo tooli make Polo make homeke e poko haemeke handa Polota꞉ ipiliki ame̱le̱ pelia hao hatiki peaata꞉ palai damanu epeaaso tumbulu haemekeme.

⁴Kutupa Hoto Pila꞉ Nate paeyaona꞉ mo pi hotu haemeke da pa꞉ta꞉ Diu haliweki make Kitiki haliweki make ika꞉ hone la꞉ka꞉laluekema꞉ pi yokaalu pia꞉tiki pu hayekeme.

⁵Kutupa Sailasi Timodi yaapo Ma꞉sedonia nane hao opolo epepeke pita꞉ta꞉ Poloma꞉ mo Diu haliweki pa꞉ta꞉ Yesuta꞉ Ketisoe la waluekema꞉ hone wotu wia wala꞉tiki pu hayekeme.

⁶Kutu piekepate ipiki tolu luekema꞉ pi la la pimiki pita꞉ Poloma꞉ ipika꞉ dau tandela iki pa꞉ta꞉ alota꞉ I̱ dia꞉me. Ika꞉ youna꞉ ika꞉ we mendia꞉pa꞉peke leekeme. Ya ketete dia꞉me leekeme. Ameta꞉ Diendaili wanda꞉hali pa꞉ta꞉ pulume leekeme.

⁷Kutupa Diu haliweki mina꞉pa꞉lao Koda꞉ pa꞉ta꞉ panda꞉puniao yeni pu hayeke hali homeke Taitasi Diasedasina꞉ da pa꞉ta꞉ peekeme. Mo halina꞉ data꞉ mo hande pi hotu haemeke da nepoko nane kone hayekeme.

⁸Mo pi hotu haemeke da you hali Kitisipusima꞉ ipika꞉ weki wanda꞉ ame̱le̱ pi mimikime. Kutupa Kotindi wanda꞉hali wopuma꞉ make Poloma꞉ waleeke pi opua meaata꞉ bapitaisi pimikime.

⁹Kutupa Tekehalima꞉ timba upama꞉ tupa꞉ Polo pa꞉ta꞉ leekeme. Dupa. Paala꞉ma꞉ homolo hata꞉ neke pa na pitiki ya pi wala꞉tiki pu hapeke leekeme.

¹⁰Pa ekipeke I̱ta꞉ neke yaapo halome. Kutupa neke luekema꞉ hali ma꞉nda꞉ na tiaalieke leekeme. Do da pa꞉ta꞉ ya wanda꞉hali wotu halememe laa leekeme.

¹¹Koto ekina꞉ Poloma꞉ ba pi homekena꞉ sumba꞉ yunki mindiki hata꞉ haota꞉ koto pa꞉ta꞉ Koda꞉na꞉ pi alemanu iki pa꞉ta꞉ wala꞉tiki pu hayekeme.

¹²Kutu piekepate Ka꞉liota꞉ mo Akaya nane kapomani tieke haena꞉ leeke pita꞉ta꞉ mo Diu haliwekima꞉ Polo luekema꞉ apa꞉tao pi yokaalu puluekema꞉ mea pua alota꞉

¹³Do halima꞉ta꞉ haliwekima꞉ Lo Pimanu yambolo hata꞉ Koda꞉ pa꞉ta꞉ panda꞉puniaena꞉yeke ika꞉ hone la꞉ka꞉lao hala꞉me lemekeme.

¹⁴Koto lemekepate Poloma꞉ pi loluekema꞉ haena꞉ Ka꞉lioma꞉ mo Diu haliweki pa꞉ta꞉ alota꞉ Diu haliwekio. Hoke hau ketete tieke piekena꞉ yoluta꞉ I̱ma꞉ ika꞉ pi opulu pua꞉pate

¹⁵ika꞉ Lo Pi manuna꞉ lota꞉ pita꞉la꞉ ekita꞉ kota꞉ ika꞉ kone epeaapa꞉peke. Koto pi manuna꞉ta꞉ I̱ma꞉ na lalueke. Ki pa꞉la꞉me leekeme.

¹⁶Kutupa hama tolu liekeme.

¹⁷Kutupa paeyaoma꞉ mo hande pi hotu haemeke da handeteke hayeke hali Sosenisi da꞉ka꞉pe minaata꞉ mo pi yokaalu pu haemeke da hama꞉ nane hata꞉ yombua baemekepate Ka꞉lioma꞉ pi ma꞉nda꞉ na leekeme. A꞉ndioko da nane paa pemekeeki

¹⁸Polota꞉ nate mandane ekimanu koto pa꞉ta꞉ haota꞉ mo Ketiso wanda꞉hali mina꞉pa꞉lao hande Pisila Akuila tooli ame̱le̱ palai kawasona꞉ pita Sitia nane pemekeme. Senkitia da nane hata꞉ pi la꞉ wiekeeki loluekema꞉ ipika꞉ itiki tunkuliekeme.

¹⁹Kutupa Epesese opolo a꞉paata꞉ ipiliki koto pa꞉ta꞉ haena꞉ laata꞉ ipika꞉ kone mo pi hotu haemeke da pa꞉ta꞉ honda꞉ pamba pua Diu haliweki ame̱le̱ pi yokaalu pimikime.

²⁰Mo haliwekima꞉ Hosiki hapeke aleo lemekepate Poloma꞉ Dia꞉me laaka꞉na꞉

²¹mo haliweki mina꞉pa꞉lao pulu hata꞉ alota꞉ Koda꞉ma꞉ hone pia꞉ka꞉na꞉ta꞉ iki pa꞉ta꞉ pa ipulueke leekeme. Kutupa palai kawasona꞉ pita Epesese da mina꞉pa꞉lao peekeme.

²²Sesatia da opolo a꞉paata꞉ mo siosi tapake handuluekema꞉ a꞉meiya puata꞉ oni A꞉ndioko da nane hola꞉pa꞉niao peekeme.

²³Koto pa꞉ta꞉ hosiki hao hao peaata꞉ mina꞉pa꞉lao mo Ka꞉leisia Pitikia yaapo nane hone tulaasa꞉ wanda꞉halima꞉ honkopu haena꞉ titipu peaaso hata꞉ pomu lopo hayekeme. Apolosita꞉ Epesese Kotindi da yaapo pa꞉ta꞉ hayekeeki

²⁴Diu hali ma꞉nda꞉ Apolosita꞉ A꞉lekesa꞉ndia da hali mo Epesese da pa꞉ta꞉ epeekeme. Ipikita꞉ Baibolo buka pi hone wotu wia pi wotu yoka la꞉tiki pieke halie.

²⁵Hali ma꞉nda꞉ma꞉ ipiki pa꞉ta꞉ Tekehalina꞉ hau amba꞉ waleeke handa ipikana꞉ma꞉ wele pieke hali hata꞉ Yesuma꞉ pieke ekimanu tikitiki yao walo hayekepate Dionima꞉ bapitaisi peaeyekeeki pa꞉ta꞉ homeke hone wiekeme.

²⁶Mo pi hotu haemeke da pa꞉ta꞉ ipikana꞉ma꞉ taka꞉lao hata꞉ pi honda꞉ mea waleekepate Pisila Akuila toolima꞉ ipika꞉ pi opuaata꞉ ipiki hatuku mea pua Koda꞉na꞉ hau wopu walepekeme.

²⁷Ipikita꞉ Akaya da nane poluekema꞉ hone pieke pita꞉ mo Ketiso haliwekima꞉ A꞉pa꞉la꞉ma꞉ polena꞉e laa oli da nane haemeke Ketiso haliweki pa꞉ta꞉ pase wape pea alota꞉ Do hali handa꞉ mea꞉pa꞉peke lemekeme. Kutupa opolo puaata꞉ Koda꞉ma꞉ a꞉ta꞉ma꞉ homa꞉la꞉ ekina꞉ pi mimiki wanda꞉halita꞉ ipikana꞉ma꞉ wotu petelo hayekeme.

²⁸Hande Baibolo buka pi walolo hata꞉ Yesuta꞉ ota꞉ Ketisoe laa mo Diu haliwekita꞉ penemena꞉ hata꞉ pima꞉ bepolao hayeke handaa piekeme.