Read Sembeleke Aposolo 26 Bible Online

Aposolo 26 - Sembeleke bible

Aposolo 26

¹Akatipama꞉ Polo pa꞉ta꞉ alota꞉ Naka꞉ kone pi lapeke ya꞉la꞉me. Lae lea꞉me. Kutupa Poloma꞉ ipika꞉ kiki tindipao pi alo alota꞉

²Kini Akatipao. I̱ma꞉ta꞉ neke pa꞉ta꞉ hata꞉ kone mo hande Diu haliwekima꞉ I̱ ba꞉sa꞉ pimi ekimanu yaka pi alo ekina꞉ a꞉pa꞉la꞉me.

³Nakana꞉ma꞉ mo hande Diu haliwekina꞉ peleme ekimanu make ika꞉ pi yokaalu pu haleme hauna꞉ ekimanu handolo hata꞉ yaka pi yopu opu pita꞉peke lea꞉me.

⁴Yaka wanda꞉hali pa꞉ta꞉ weki hata꞉ pua꞉eki make Diutuseleme da pa꞉ta꞉ haowa꞉eki make Diu wanda꞉hali paeyaoma꞉ handememe lea꞉me.

⁵I̱ta꞉ hande Pa꞉tisi tapake haowa꞉ ekita꞉ mo haliwekima꞉ amba꞉ kone handata꞉ neke pa꞉ta꞉ lapeke ya꞉la꞉me lea꞉me.

⁶Kutupa Koda꞉ma꞉ nika꞉ apa꞉ ameda pa꞉ta꞉ la꞉ wiekeeki pa꞉ta꞉ hone uluma꞉ ekina꞉ ame I̱ ba꞉sa꞉ pitelememe lea꞉me.

⁷Koto pi la꞉ wiekeeki muluekema꞉ nika꞉ tapake 12 wanda꞉halima꞉ Koda꞉ pa꞉ta꞉ panda꞉puniao yeni pu halememe lea꞉me. Kini halio. Koto pi la꞉ wieke ekina꞉ hone ulu ekina꞉ mo Diu haliwekima꞉ I̱ ba꞉sa꞉ pitelememe.

⁸Koda꞉ma꞉ ota꞉ homa꞉la꞉ wanda꞉hali paa mea tiaapeke ya꞉la꞉me laa ikana꞉ma꞉ta꞉ ekipeke koto hone na witelemepe lea꞉me.

⁹Mo hande Na꞉sa꞉tete hali Yesuna꞉ bikina꞉ pita꞉la꞉ ekimanu sa꞉sa꞉ puluekema꞉ I̱ma꞉ta꞉ hau ma꞉nda꞉ wotu puluekema꞉ hone wopu wiaata꞉

¹⁰Diutuseleme da pa꞉ta꞉ kutu pua꞉me. Mo yeni peao haleme you haliwekima꞉ pea꞉peke lemeke handaata꞉ I̱ma꞉ mo Koda꞉na꞉ yakopiki wanda꞉hali woputa꞉ dipula homeke na pitaake ota꞉ litolo haena꞉ make I̱ma꞉ make kiki mea a꞉meiyaowa꞉me lea꞉me.

¹¹Kutupa mo wanda꞉halita꞉ pi hotu haleme da paeyao pa꞉ta꞉ panisi wotu peatiki peaata꞉ Yesu pa꞉ta꞉ hoke pi lena꞉yeke la handetiki pua꞉me. Kutupa mo wanda꞉hali pa꞉ta꞉ mineke wotu pankolo hata꞉ mandane damanu pa꞉ta꞉ kone tolu lia꞉tiki pua꞉me. Poloma꞉ ipika꞉ hone la꞉ka꞉la꞉ miniekeeki la꞉la꞉eki

¹²Koto ekina꞉ mo yeni peao haleme teke haliwekima꞉ I̱ tapaemeke handa I̱ta꞉ Damasikasi da nane poa꞉pate

¹³Ya tiekeo. Nate you tikekena꞉ haena꞉ pota꞉na꞉ pulu hamono oli ya nanema꞉ pa̱a̱ tieke nate tupa꞉ dia꞉me mo I̱ ame̱le̱ mandakena꞉ poma꞉ haliweki hande pa̱a̱ tiekema꞉ niki dopuaeya꞉eki handoa꞉me lea꞉me.

¹⁴Kutupa niki paeyao kenkena꞉ honda꞉pa lopa wiomono I̱ma꞉ta꞉ Hibulu pima꞉ kone pi ho̱la̱꞉make I̱ pa꞉ta꞉ lea꞉eki opua꞉me dupae. Solo. Solo. Ekipeke I̱ pa꞉ta꞉ a꞉nda꞉ litelepe lea꞉me. Kanake etima꞉ awa꞉la꞉eki kiaase ekina꞉ tanda koto minele handa꞉e lea꞉me.

¹⁵Kutupa I̱ma꞉ alota꞉ Tekehalio. Neketa꞉ epika꞉ta꞉pe loa꞉me. Kutupa Tekehalima꞉ alota꞉ I̱ta꞉ Yesue. Nakana꞉ma꞉ I̱ pa꞉ta꞉ a꞉nda꞉ liteleme.

¹⁶Kutu pitelepate neke tiao hapeke laata꞉ Nakana꞉ma꞉ ya e pokaalena꞉ I̱ma꞉ ya kone neke pa꞉ta꞉ peneme yaowa꞉me lea꞉me. I̱ma꞉ pua꞉ hau nakana꞉ma꞉ handa la haloelena꞉ make I̱ma꞉ neke pa꞉ta꞉ peneme yaalo polo ekina꞉ la haloelena꞉ make neke halena꞉ alome lea꞉me lea꞉me.

¹⁷Kutupa mo Diu Diendaili yaapo tapake haliwekima꞉ neke na mina꞉ laata꞉ mo Diendaili wanda꞉hali pa꞉ta꞉ neke tapaasome lea꞉me lea꞉me.

¹⁸Ika꞉ leke kilaowalena꞉ yeke neke tapaasome lea꞉me. Ikana꞉ma꞉ timba꞉ lo pamba꞉la꞉eki la꞉ka꞉la mina꞉pa꞉lao pa̱a̱na꞉ epoemena꞉yeke pua꞉me. Hande Sadanina꞉ wele pa꞉la꞉eki la꞉ka꞉la mina꞉pa꞉lao Koda꞉na꞉eki hamina꞉yeke pua꞉me. Koto ekina꞉ ika꞉ hoke hau pita꞉la꞉ ekimanu Koda꞉ma꞉ pa tombuao hala꞉eki muemena꞉yeke pua꞉me. Kutupa ikana꞉ma꞉ yaka pi mina꞉leke handa talopu mea haena꞉ lolo wanda꞉hali ame̱le̱ tukiki pa꞉ta꞉ a꞉pa hamina꞉yeke pua꞉me lea꞉me. Poloma꞉ ipika꞉ e pokeekeeki la꞉la꞉eki

¹⁹Koto ekina꞉ Kini Akatipao. I̱ma꞉ oli ya nanema꞉ peneme yao la꞉niaeya꞉eki opuata꞉ pi na tunkuliki ota꞉ pua꞉me.

²⁰Mo Damasikasi da wanda꞉hali pa꞉ta꞉ amba꞉la wala kutupa Diutuseleme da pa꞉ta꞉ make mo Diudia nane paeyao make kutupa Diendaili wanda꞉hali pa꞉ta꞉ make iki paeyaoma꞉ Koda꞉ pa꞉ta꞉ la꞉ka꞉lolo hata꞉ hone ma꞉nda꞉ la꞉ka꞉la witolo epeke haumanu pina꞉yeke pi waloendi pu haowa꞉me.

²¹Koto ekina꞉ta꞉ mo Diu haliwekima꞉ mo tembolo da pa꞉ta꞉ I̱ da꞉ka꞉pa꞉ mina luekema꞉ taapemepate

²²Koda꞉ma꞉ I̱ pa tamba꞉ mina꞉la꞉eki mu hata꞉ ame make do pa꞉ta꞉ hata꞉ hali tieke pa꞉ta꞉manu make hosiki halisunu pa꞉ta꞉ make la hala꞉tiki pitolome. Hande Mosesima꞉ make mo potopede haliwekima꞉ make pulu pa꞉la꞉ ekimanu lemeke tupa꞉ I̱ma꞉ make do la halo halome.

²³Dupa. Ketisota꞉ titina꞉ amba꞉la tanda pa꞉la꞉eki meaata꞉ kutupa titina꞉ homa paa tiaalo pa꞉la꞉ hali hata꞉ mo Diu wanda꞉hali pa꞉ta꞉ make mo Diendaili wanda꞉hali pa꞉ta꞉ make pa̱a̱ pita꞉la꞉eki wala꞉tiki pilieke leleme pi kone I̱ma꞉ make alome leekeme.

²⁴Kutupa Poloma꞉ koto pi alo haena꞉ Pesitasima꞉ pi anekema꞉ alota꞉ Polo neketa꞉ keaase lea꞉me. Nakana꞉ma꞉ hau paeyao pitele ekima꞉ neke koto mea keaasa꞉ handa꞉e lea꞉pate

²⁵Poloma꞉ alota꞉ Hali keilekeo. I̱ta꞉ siaka꞉hali dia꞉me. I̱ma꞉ta꞉ ota꞉ pi alome.

²⁶Kini hali Akatipama꞉ do haumanu handeleke handa ipiki pa꞉ta꞉ pa pi alo hata꞉ yaka honema꞉ta꞉ koto hau paeyao handa꞉la꞉me. Pa ekipeke mo hau manuta꞉ a꞉mbao na piki peneme yao pia꞉ ekina꞉ loa꞉me.

²⁷Kini hali Akatipao. Hande potopede haliwekima꞉ wape pelemeeki manuta꞉ opitele laa naka꞉ opua pitele hauta꞉ handolome laa leekeme.

²⁸Kutupa Akatipama꞉ Polo pa꞉ta꞉ alota꞉ Naka꞉ honema꞉ta꞉ I̱ta꞉ paa koto kone Ketiso hali hanoyeke alepe laa leekeme.

²⁹Koto leeke Poloma꞉ alota꞉ Ame dope o wetepena꞉pe o Koda꞉ pa꞉ta꞉ ya hone pa꞉la꞉ ekita꞉ neke make do pita yapa꞉la꞉ wanda꞉hali paeyao make do I̱ma꞉ walolo pi opuata꞉ I̱ tupa꞉ hamina꞉yeke loa꞉pate pa do seni pu manuma꞉ I̱ tonkao halo tupa꞉ na loa꞉me lea꞉me.

³⁰Kutupa mo hande kini hali tiaota꞉ mo kapomani you hali make Benisi make mo iki ame̱le̱ pitimiki wanda꞉hali make tiao mina꞉pa꞉lao puaata꞉

³¹ika꞉ kone pi la alu alu pitolo alota꞉ Do halita꞉ dipula pitina꞉ homaapeketa꞉ ana꞉ na pa꞉la꞉me. Eki a꞉nda꞉ na pia꞉me laa lemekeme.

³²Kutupa Akatipama꞉ Pesitasi pa꞉ta꞉ alota꞉ Do halima꞉ta꞉ Sisa pa꞉ta꞉ wi na lea꞉ka꞉na꞉ yoluta꞉ da nane pa pua꞉peke yolo pia꞉me laa leekeme.