Read Sembeleke Aposolo 28 Bible Online

Aposolo 28 - Sembeleke bible

Aposolo 28

¹Kutupa kenke nane epeke opolo pua hata꞉ koto hokina꞉ bikita꞉ Molota lemeeki opuma꞉me.

²Koto pa꞉ta꞉ haeme haliwekima꞉ niki petololo hata꞉ ti kita kiki kimime. Lako ipulu hata꞉ kosa꞉ pieke handa pimime.

³Poloma꞉ tisunu mu tonko pea tina꞉ wia꞉pate titipu pieke handa hoke ketoma꞉ a꞉pa ipika꞉ kikina꞉ hapulia꞉me.

⁴Mo da haliwekima꞉ hande keto ipika꞉ kikina꞉ hapulia꞉eki handaata꞉ ika꞉ kone ane mone pitolo hata꞉ alota꞉ Do halima꞉ta꞉ ketete pea hali ma꞉nda꞉ litolo pa꞉la꞉me lememe. Dawala pa꞉ta꞉ na homea꞉pate pa ipika꞉ ketetena꞉ homilieke lememe.

⁵Koto lemepate Poloma꞉ ipika꞉ kiki tande tande laa mo keto ti pa꞉ta꞉ lopaeya꞉me. Kutupa ipika꞉ lokena꞉ ekia꞉nda꞉ na pia꞉me.

⁶Mo haliwekima꞉ Polo pombei yao tako pea lopena꞉ patema꞉ handoma꞉ handoma꞉ pimipate ekia꞉nda꞉ na pieke handa ika꞉ hone la꞉ka꞉la alota꞉ Do halita꞉ koda꞉ ma꞉nda꞉ ya꞉ka꞉ta꞉me lememe.

⁷Koto alena꞉ tekepa꞉ta꞉ mo hokina꞉ haeme wanda꞉halina꞉ hamoko tumiki hali Pubiliusita꞉ ipika꞉ emanu pokea꞉me. Ipikana꞉ma꞉ niki handa꞉ mea nate tepona꞉ ipika꞉ da pa꞉ta꞉ niki handeteke haya꞉me.

⁸Ipika꞉ ateketa꞉ ki yeni tiputu hatu yamaasa꞉ yeni make hao homa꞉pa wia꞉me. Kutupa Poloma꞉ ipika꞉ da panda꞉ pa꞉ta꞉ pua Koda꞉ pa꞉ta꞉ yeni pea ipika꞉ kiki yaapo mo halina꞉ lokena꞉ wia yeni tandelaeya꞉me.

⁹Kutu pieke handa mo hokina꞉ yeni haeme wanda꞉hali paeyao epemepate ika꞉ yeni make tandelena꞉ lea꞉me.

¹⁰Niki pa꞉ta꞉ ala꞉ta꞉ ala꞉ta꞉ wopu kiaata꞉ kutupa palai kawaso ma꞉nda꞉na꞉ paa poluekema꞉ hamono nika꞉ mea pua꞉peke yea꞉ alemanu kimime. Mo Molota hao Loma꞉ nane pemekeeki

¹¹Sumba꞉ tepo yapeeke handa mo A꞉lekesa꞉ndia da hao epea꞉ palai kawaso homekena꞉ poma꞉me. Mo kawaso bikita꞉ Temoko Manda꞉e. Mo kosa꞉ dina꞉ta꞉ hande hoki pa꞉ta꞉ hando haya꞉me.

¹²Kutupa pua mo Sitakusi daoni pa꞉ta꞉ opolo pua nate tepo koto pa꞉ta꞉ haowa꞉me.

¹³Koto pa꞉ta꞉ mina꞉pa꞉lao puoopu hao mo Lidiumi daoni pa꞉ta꞉ opolo poma꞉me. Da kelepea꞉ pita꞉ta꞉ mo dawala nane po ipulu haena꞉yeke nate yaapo puata꞉ mo Puteoli daoni pa꞉ta꞉ opolo poma꞉me.

¹⁴Koto pa꞉ta꞉ mandane Ketiso tapake wanda꞉hali handa꞉ uma꞉pate pula homekena꞉ niki ame̱le̱ hamana꞉e laa honke lememe. Koto ekina꞉ puata꞉ Loma꞉ da pa꞉ta꞉ opolo poma꞉me.

¹⁵Kutupa mo Loma꞉ Ketiso kame titima꞉ niki ipuluma꞉me pi opuata꞉ mo Apiusina꞉ makedi pa꞉ta꞉ make mo Kimisu Hali Polu Hala꞉ Da Tepo pa꞉ta꞉ make niki manda꞉hande pulu epememe. Kutupa Poloma꞉ iki handaata꞉ Koda꞉ pa꞉ta꞉ keiyae pi laata꞉ honkopu haya꞉me. Loma꞉ pa꞉ta꞉ hayekeeki

¹⁶Kutupa mo Loma꞉ daoni pa꞉ta꞉ opolo poma꞉pate pa Polota꞉ ipika꞉ kone honumake haena꞉ mo ami hali homekema꞉ ipiki handeteke haena꞉ lememe.

¹⁷Kutupa nate tepo paeyeketa꞉ Poloma꞉ koto pa꞉ta꞉ haeme tondiki Diu haliweki wi la꞉ mepi peaata꞉ kutupa momba꞉la haena꞉ ipikana꞉ma꞉ alota꞉ Kametitio. I̱ma꞉ta꞉ nika꞉ wanda꞉hali pa꞉ta꞉ make nika꞉ apa꞉mei manuna꞉ peleme ekimanu pa꞉ta꞉ make ekia꞉nda꞉ na pua꞉pate mo Diutuseleme haliwekima꞉ I̱ meaata꞉ Loma꞉ haliweki pa꞉ta꞉ halememe.

¹⁸Kutupa ya hau weiya lota꞉ pimipate I̱ homaalo pia꞉ hau ma꞉nda꞉ na handa꞉ u haota꞉ I̱ta꞉ da tapaaluekema꞉ hone wimime.

¹⁹Kutu pimipate mo Diu haliwekima꞉ Na tapaapeke lemeke handa yaka wanda꞉hali pa꞉ta꞉ samani puluekema꞉ hone na ua꞉pate Sisa pa꞉ta꞉ kone wi loluekema꞉ pua꞉me.

²⁰Koto ekina꞉ I̱ma꞉ iki wi la handolo pi loluekema꞉ loa꞉me. Isulai wanda꞉halima꞉ hone wilimi ekina꞉ do seni puma꞉ I̱ tonkaeya꞉me lea꞉me.

²¹Kutupa ikana꞉ma꞉ ipiki pa꞉ta꞉ alota꞉ Diudia nanema꞉ neke pa꞉ta꞉ wape pea ipula꞉ pasemanu na muma꞉me. Kutupa do ane epea꞉ kame homekema꞉ pi ma꞉nda꞉ hoke pi make neke pa꞉ta꞉ na la꞉la꞉me lememe.

²²Kutu pa꞉la꞉pate mo kenke paeyao nane do hande tapake pa꞉ta꞉ la la pu halemeeki opoloma꞉me. Koto ekina꞉ naka꞉ hone witele ekimanu opuluekema꞉ hone pa꞉la꞉me lememe.

²³Kutupa nate wiata꞉ ipika꞉ haya꞉ da pa꞉ta꞉ haliweki wopu pua mombelememe. Kutupa Poloma꞉ mo haliweki pa꞉ta꞉ mo hande Koda꞉na꞉ Kilu Tombuao Hala꞉ pimanu walo haya꞉eki da ka꞉la꞉paaso la pua timba꞉ laeya꞉me. Yesuna꞉ pi opua mina꞉yeke ipikana꞉ma꞉ hande Mosesina꞉ wape pa꞉la꞉ Lo Pimanu make mo potopede haliwekina꞉ wape pelemeeki pa꞉ta꞉ make laa walea꞉me.

²⁴Mandane haliwekima꞉ ipikana꞉ma꞉ lea꞉ pi opimipate mandaneeki manuma꞉ na opimime.

²⁵Koto ekina꞉ ika꞉ kone hone ta꞉ta꞉ ta꞉ta꞉ wia pi ta꞉ta꞉ ta꞉ta꞉ alo hata꞉ poluekema꞉ haena꞉ Poloma꞉ pi homeke ma꞉nda꞉ dupa lea꞉me. Mo Holi Sipitidima꞉ hande potopede hali Aisaya pa꞉ta꞉ la halolo hata꞉ ika꞉ atekemanu pa꞉ta꞉ do leeke pita꞉ ota꞉ alo pia꞉me.

²⁶Ipikana꞉ma꞉ leeke ekita꞉ dupaIkana꞉ma꞉ opitolo opitolo halo pelemepate ika꞉ hone pa꞉ta꞉ na wilimikie.Kutaa make handolo handolo halo pelemepate ika꞉ honema꞉ta꞉ na handilimikie.

²⁷Pa ekipeke. Do wanda꞉halina꞉ hone manuta꞉ timba꞉ lo make ika꞉ katakemanu poko make ika꞉ lekemanu handupu pa꞉la꞉me.Koda꞉ma꞉ alota꞉Kutu piki haumanu na pia꞉ka꞉na꞉ yoluta꞉ ika꞉ lekema꞉ epeke hando make ika꞉ katakema꞉ epeke opu make ika꞉ honema꞉ epeke hone wia hata꞉ ikana꞉ma꞉ I̱ pa꞉ta꞉ la꞉ka꞉la epolo pimika꞉na꞉ yoluta꞉ kota꞉ I̱ma꞉ iki wamo pulu pua꞉me laa la꞉la꞉me leekeme lea꞉me.

²⁸Kutupa Poloma꞉ lo paeyaaso hata꞉ alota꞉ Hone wia꞉pa꞉peke. Koda꞉ma꞉ ipika꞉ da꞉taasa꞉ pita꞉ mo Diendaili wanda꞉hali pa꞉ta꞉ tapaasa꞉ma꞉ opilimikie laa lea꞉me.

²⁹[Koto pi lea꞉ ekita꞉ mo Diu haliwekima꞉ mina꞉pa꞉lao pulu hata꞉ pi la alu alu pulu pimime.]

³⁰Kutupa koto pa꞉ta꞉ bapi yaapo Poloma꞉ ipika꞉ hambo haya꞉ da pa꞉ta꞉ta꞉ hao hata꞉ ipiki handolo epemeke wanda꞉hali paeyao handa꞉ meaata꞉

³¹ma꞉nda꞉ma꞉ sa꞉sa꞉ na pitolo haena꞉ ipikana꞉ma꞉ honkopu haaso hata꞉ Koda꞉na꞉ Kilu Tombuao Hala꞉ ekina꞉ make mo Tekehali Yesu Ketisona꞉eki make pi wala꞉tiki pu hayekeme.