Read Sembeleke Aposolo 3 Bible Online

Aposolo 3 - Sembeleke bible

Aposolo 3

¹Kutupa Pida Dioni yaapota꞉ ipilika꞉ yeni pu haepeke nate lekena꞉ 3 okoloko nate oni pambolo pulu haena꞉ oli tembolo da pa꞉ta꞉ yeni puluekema꞉ pepekeme.

²Kutupa hali homeke mendieke pa꞉ta꞉ kone pota꞉ ota꞉ pomua꞉peke na yeke hali nate paeyao mea tia pua꞉tiki pea mo tembolo da pota꞉ kake bikita꞉ Seliapopiki Pota꞉ Kake koto pa꞉ta꞉ mo tembolo da tukiki pa꞉ta꞉ yopua꞉tiki pimiki wanda꞉hali pa꞉ta꞉ mani ma꞉nda꞉ kipee laa honke la꞉tiki pina꞉ yeke pua tu wia꞉tiki pimikime.

³Mo hande pota꞉ pua꞉peke na yeke halima꞉ta꞉ Pida Dioni yaapo mo tembolo da pa꞉ta꞉ honda꞉ pambuluekema꞉ haena꞉ alota꞉ Mani ma꞉nda꞉ kipee laa honke leekeme.

⁴Koto leeke Pida Dioni yaapoma꞉ mo hande hali handa꞉moneaaso hata꞉ Pidama꞉ alota꞉ Diki handa꞉e leekeme.

⁵Mo hande pota꞉ pomua꞉peke na yeke halima꞉ hone witolota꞉ do hali yaapoma꞉ ala꞉ta꞉ ma꞉nda꞉ ota꞉ kilieke hone witolo hata꞉ mo hali yaapo ota꞉ wopu handa꞉hake wiekepate

⁶Pidama꞉ alota꞉ I̱ta꞉ kolo o silipamanu make ma꞉nda꞉ dia꞉ya꞉la꞉pate I̱ma꞉ wia halo aleta꞉ kionoe. Mo Na꞉sa꞉tete hali Yesu Ketisona꞉ bikina꞉ loa꞉ma꞉ pota꞉ pue leekeme.

⁷Kutupa Pidama꞉ popeke nane kiki mina mea a꞉meiyaeyekeme. Kutupa koto kone mo halina꞉ anke ma̱lekemanu honkopu honkopu hao hayekeme.

⁸Kutupa mo hande hali tialu bao anke hao peekeme. Kutupa mo hali yaapo ame̱le̱ mo tembolo da pa꞉ta꞉ puaata꞉ mo hande pota꞉ pua꞉peke na yeke halita꞉ pua꞉tiki ponka꞉da꞉da꞉ pua꞉tiki pitolo hata꞉ Koda꞉na꞉ biki make mea a꞉meiyatiki peekeme.

⁹Kutupa da pa꞉ta꞉ pitimiki wanda꞉halima꞉ mo hande hali yopulu hata꞉ Koda꞉na꞉ biki mea a꞉meiyatiki yapeekeeki handemekeme.

¹⁰Kutupa mo wanda꞉halima꞉ hone wimikime. Do halita꞉ mo hande tembolona꞉ Seliapopiki Pota꞉ Kake pa꞉ta꞉ pita꞉ mani honke lo hala꞉ halie hone wimikime. Kutupa puki keapa anemone pitolo haena꞉ alota꞉ Do halita꞉ ekipa pa꞉la꞉pe lemekeme. Pidama꞉ tembolo da pa꞉ta꞉ pi waleekeeki

¹¹Mo hande halima꞉ Pida Dioni yaapona꞉ kiki pa wia haena꞉ iki tepota꞉ mo tembolona꞉ kalale ma꞉nda꞉ biki Solomonona꞉ Kaputa꞉ haemekeme. Kutupa mo wanda꞉hali paeyao leke opo handa꞉hake witolo hata꞉ koto pa꞉ta꞉ anke hao pua mombelemekeme.

¹²Pidama꞉ doeki handa mo haliweki pa꞉ta꞉ alota꞉ Isulai haliwekio. Do ekina꞉ ekipeke leke opo handa꞉hake wia yopilimipe o diki make ekipeke handa꞉hake witemepe. Dikana꞉ma꞉ dika꞉ wele pita꞉la꞉ ekina꞉ o nika꞉ yakopiki hauma꞉ do hali mea pota꞉ pena꞉ lolopa꞉pe leekeme.

¹³Eipoloha꞉ma꞉ Aisa꞉ke Dieikope ika꞉ Koda꞉ta꞉ nika꞉ apa꞉ titina꞉ Koda꞉ma꞉ kone mo wele pita꞉la꞉eki ipika꞉ e pokaeyeke hali Yesuna꞉ biki mea a꞉meiyaaso hata꞉ haleekeme. Kutu pa꞉la꞉pate ikana꞉ma꞉ Pailedi pa꞉ta꞉ luekema꞉ hatuku pua Pailedima꞉ta꞉ paa pena꞉ loluekema꞉ taapolo haena꞉ kone ikana꞉ma꞉ luekema꞉ taapeme hali ipikina꞉ loa꞉me.

¹⁴Kutu pa꞉la꞉pate ikana꞉ma꞉ Epeke Yakopiki Hali kiao pa Pailedi pa꞉ta꞉ lota꞉ pitolo alota꞉ Ika꞉ hone pa꞉la꞉ ekita꞉ mo hande hali lita꞉la꞉ hali kone pa pena꞉ lae lememe leekeme.

¹⁵Ikana꞉ma꞉ mo da꞉taasa꞉ hali limipate Koda꞉ma꞉ mea tiaeyekeme. Kutupa nikana꞉ma꞉ wekitisi do halualu pitoloma꞉ handa꞉e leekeme.

¹⁶Mo hande ipika꞉ bikina꞉ wele pita꞉la꞉ ekima꞉ mo pota꞉ pomua꞉peke na yeke hali honkopu haena꞉ lopa꞉me. Ame do handeleme ekita꞉ mo hande ipika꞉ hone tulaasa꞉ ekima꞉ pita꞉la꞉me. Ame do handeleme ekita꞉ Yesu pa꞉ta꞉ hone tulaasa꞉ ekima꞉ ipiki epeaala꞉me leekeme.

¹⁷Ya kametitio. Ikana꞉ma꞉ make ika꞉ you haliwekima꞉ tonka꞉na꞉ Yesu pa꞉ta꞉ pimiki ekita꞉ teke na handa꞉ wiki hata꞉ pimi ekita꞉ I̱ma꞉ hone witolome.

¹⁸Amba꞉ kiaake Koda꞉ma꞉ta꞉ ipika꞉ Ketisona꞉ tanda mulu pa꞉la꞉eki mo potopede haliweki paeyaoma꞉ la hale hale pina꞉ leekeme. Kutupa hande Koda꞉ma꞉ la꞉ wiekeeki kone ota꞉ yao ikana꞉ma꞉ do pimime.

¹⁹Koto pa꞉la꞉ ekina꞉ ika꞉ hoke hau peleme ekimanu Koda꞉ma꞉ honi mea baena꞉yeke ikana꞉ma꞉ hone ma꞉nda꞉ la꞉ka꞉la꞉ mina wiaata꞉ Koda꞉ pa꞉ta꞉ la꞉ka꞉la꞉ mina pua꞉pa꞉peke.

²⁰Dupimika꞉na꞉ta꞉ ika꞉ temoko manuna꞉ honkopu ha tiaasa꞉eki Koda꞉ma꞉ kiaata꞉ kutupa Yesuta꞉ Koda꞉ma꞉ amba꞉ mea ika꞉ Ketiso hali haena꞉ leeke hali iki pa꞉ta꞉ tapaalieke.

²¹Yesuta꞉ hepeni nane pua hao hala꞉pate Koda꞉ma꞉ ala꞉ta꞉ ala꞉ta꞉ paeyao panake ekimanu wopulu pa꞉la꞉ nate handeteke hala꞉me. Amba꞉ kiaake Koda꞉ma꞉ ipika꞉ yakopiki potopede haliwekima꞉ la hale hale pieke tupa꞉ loa꞉me.

²²Mosesima꞉ dupa leekeme. Ika꞉ Koda꞉ hande Tekehalima꞉ I̱ tapaeya꞉ tupa꞉ iki pa꞉ta꞉ make potopede hali ma꞉nda꞉ tapaalieke. Koto halita꞉ ika꞉ tapake hali kone tapaalieke. Ipikana꞉ma꞉ eki pimanu iki pa꞉ta꞉ lea꞉ka꞉na꞉ta꞉ ota꞉ opua꞉pa꞉peke.

²³Hali epima꞉ mo hande potopede halima꞉ lelie pi na opia꞉ka꞉na꞉ta꞉ koto halita꞉ Koda꞉na꞉ wanda꞉hali ame̱le̱ ta꞉ma꞉ni pea na hake Koda꞉ma꞉ hoeyaalieke leekeme.

²⁴Kutupa make mo potopede haliwekima꞉ta꞉ Samuele make ipika꞉ hoki nane haemeke potopede haliweki make pi la꞉ mea hala꞉pa꞉peke yeeke haliweki paeyaoma꞉ta꞉ ame do pitoloma꞉ haumanu kone amba꞉ la hale hale pimikime.

²⁵Mo potopede haliwekima꞉ Koda꞉ma꞉ la꞉ wieke pimanu la hale hale pimiki ekita꞉ ika꞉eki kone ula꞉me. Kutupa make Koda꞉ma꞉ ika꞉ apa꞉mei ameda ame̱le̱ pi la꞉ wieke ekita꞉ iki pa꞉ta꞉ make la꞉ ula꞉me. Koda꞉ma꞉ Eipoloha꞉ma꞉ pa꞉ta꞉ leeke tupa꞉ dupae. Naka꞉ hoki nane monduma꞉ monduma꞉ pilimi wanda꞉halima꞉ kenke wanda꞉hali paeyao I̱ma꞉ epeaalueke laa leekeme.

²⁶Koto ekina꞉ Koda꞉ma꞉ ipika꞉ e pokaasa꞉ hali mea haena꞉ laata꞉ iki pa꞉ta꞉ amba꞉la tapaeyekeme. Koto tapake hauta꞉ iki epeaaluekema꞉ piekeme. Ikana꞉ma꞉ ika꞉ hoke haumanu mina꞉pa꞉lao ika꞉ puki ipikana꞉ma꞉ la꞉ka꞉laasa꞉ ekima꞉ iki epeaaluekema꞉ piekeme laa leekeme.