Read Sembeleke Aposolo 5 Bible Online

Aposolo 5 - Sembeleke bible

Aposolo 5

¹Kutu piekepate A꞉na꞉naisi ipika꞉ wanda꞉ Sapaita yaapo ipilika꞉ kenketa꞉ ma꞉nda꞉ma꞉ hambena꞉ lepekeme.

²Kutupa mo hande mipiki manita꞉ mandaneeki ipilika꞉ hone wia mea panka꞉ wiaata꞉ mandaneeki ipikana꞉ma꞉ mo hande aposolo haliweki pa꞉ta꞉ mea epeekeme.

³Kutu piekepate Pidama꞉ alota꞉ A꞉na꞉naisio. Ekipeke Holi Sipitidi pa꞉ta꞉ yayapiki pi alepe leekeme. Sadani naka꞉ you pa꞉ta꞉ a꞉pa pita꞉ka꞉na꞉ mo naka꞉ kenkena꞉ mele manita꞉ pa ekipeke mandaneeki panka꞉ wina꞉ laa pipe leekeme.

⁴Amba꞉ nakana꞉ma꞉ wia hae dina꞉ta꞉ naka꞉eki na yekepe leekeme. Kutupa mo hambena꞉ le dina꞉ make mo manita꞉ naka꞉ honkopuna꞉ kone na pelepe leekeme. Nakana꞉ma꞉ hali pa꞉ta꞉ yayapiki hau na pelepate Koda꞉ pa꞉ta꞉ kone peleme. Do hauta꞉ ekipa handa꞉ wia pelepe leekeme.

⁵Do leeke ekimanu opuaata꞉ A꞉na꞉naisi kenkena꞉ honda꞉pa lopa homeekeme. Kutupa koto hao yapeeke haliwekima꞉ doeki opimiki haliwekima꞉ make paala꞉ma꞉ homolo hata꞉ leke opo handa꞉hake wimikime.

⁶Kutupa pa꞉pa꞉na꞉ wekitonu a꞉pa ipika꞉ toko mea dauma꞉ tonkao hoilu pemekeme.

⁷Hosiki pitu pitu pea mo awa tepomanu paeyeke ipika꞉ wanda꞉ mo hande pieke ekimanu hone make na wiki honda꞉ pambolo epeekeme.

⁸Pidama꞉ mo wanda꞉ pa꞉ta꞉ alota꞉ Mo ipilika꞉ kenke hambena꞉ lepe mani manuta꞉ ota꞉ dupiki wopu mipipe leeke mo wanda꞉ma꞉ alota꞉ Aowe. Koto tupa꞉ mupa꞉me leekeme.

⁹Pidama꞉ mo wanda꞉ pa꞉ta꞉ alota꞉ Ipiliki yaapoma꞉ ipilika꞉ honema꞉ mo Tekehalina꞉ Holi Sipitidi pa꞉ta꞉ hoke hone mea wialuekema꞉ ekipeke pipipe leekeme. Handa꞉e. Naka꞉ haliki mea hoilu pa꞉la꞉ haliwekita꞉ neke mea hoilu puluekema꞉ amba꞉ do pota꞉ kake pa꞉ta꞉ do a꞉pa haleme handa꞉e leekeme.

¹⁰Kutupa koto kone mo wanda꞉ Pidana꞉ anke teke pa꞉ta꞉ honda꞉pa lopa꞉niao homeekeme. Kutupa mo hande wekihali tonu a꞉pa handemekepate homeeke handa ipika꞉ toko mea tia pua haliki hoiyeke ale pa꞉ta꞉ pua hoimikime.

¹¹Kutupa koto siosi wanda꞉hali paeyaota꞉ pa mo opimiki wanda꞉hali make paala꞉ma꞉ homolo hata꞉ kone leke opa꞉ mina꞉ bepi pu alu alu pimikime. Na hando haemeke haumanu

¹²Mo aposolo haliwekima꞉ wanda꞉hali pa꞉ta꞉ na hando haemeke ekimanu wotu pimikime. Kutupa paeyaoma꞉ mo tembolona꞉ kalale ma꞉nda꞉ biki Solomonona꞉ Kapu pa꞉ta꞉ mombela꞉tiki pimikime.

¹³Kutupa ikina꞉ mo pa haemeke wanda꞉halima꞉ pi laemekepate paala꞉ma꞉ homolo hata꞉ iki ame̱le̱ haluekema꞉ hone na wimikime.

¹⁴Kutu pimikipate amba꞉ na pu haemeke tupa꞉ ma꞉nda꞉ ma꞉nda꞉ lo wanda꞉weki make haliweki make Yesu pa꞉ta꞉ ta꞉ma꞉ni puluendi pimikime.

¹⁵Mo aposolo haliwekima꞉ koto haumanu pu haemeke ekina꞉ da wanda꞉halima꞉ yeni hapa papu wimiki wanda꞉halita꞉ tu mea pua pota꞉na꞉ yapa꞉ta꞉ yamaoma꞉ yamaoma꞉ peaata꞉ mandaneeki bedina꞉ uma꞉ uma꞉ pea paeyao pota꞉na꞉ wimikime. Koto hau pimiki ekita꞉ Pida pota꞉na꞉ yopulu hata꞉ ipika꞉ suasuama꞉ kone mo wimiki mandane wanda꞉hali ankulatiki yapena꞉ pimikime.

¹⁶Mo Diutuseleme da teke pa꞉ta꞉ haemeke daonimanu pa꞉ta꞉ haemeke wanda꞉hali paeya tapaoma꞉ ika꞉ yeni haemeke wanda꞉hali make hoke temoko pitieke wanda꞉hali make hatuku mea epemekeme. Kutu pieketa꞉ paeyao ika꞉ yeni tandeleekeme. Aposolo haliwekima꞉ tanda pa꞉la꞉eki mimikieki

¹⁷Kutu pieke handaata꞉ mo yeni peao haemeke you haliwekina꞉ you halima꞉ ipiki ame̱le̱ mandakena꞉ haemeke haliweki tonka꞉na꞉ mo Sa꞉dusi tapake mandane haliweki kone ikana꞉ma꞉ta꞉ mo aposolo haliweki pa꞉ta꞉ hoke hone witolo hata꞉ soka꞉la꞉ma꞉ homemekeme. Hau ma꞉nda꞉ pulumeke hone wimikime.

¹⁸Kutupa mo aposolo haliweki da꞉ka꞉pa꞉ minina꞉ laata꞉ dipula mea lopaemekeme.

¹⁹Kutu pimikipate koto timbata꞉ Tekehali ipika꞉ enisolo ma꞉nda꞉ma꞉ mo dipula da pota꞉ lomba꞉ mea hande aposolo haliweki hama꞉ nane hatuku pua iki pa꞉ta꞉ alota꞉

²⁰Mo tembolo da tukiki pa꞉ta꞉ honda꞉ pamba pua hata꞉ do panake da꞉ta꞉la꞉ pi wanda꞉halima꞉ opina꞉ wala꞉pa꞉peke leekeme.

²¹Mo hande aposolo haliwekima꞉ koto leeke pi opuaata꞉ da panake ka꞉la꞉polo haena꞉ mo tembolo da tukiki pa꞉ta꞉ honda꞉ pamba pua pi walemekeme. Mo yeni peao haemeke you haliwekina꞉ you halima꞉ ipiki ame̱le̱ mandakena꞉ haemeke haliweki tonka꞉na꞉ ikana꞉ma꞉ Diu ka̱le̱sete haliweki paeyaoma꞉ pi tieke hotuluekema꞉ mombelena꞉ lemekeme. Kutupa mo dipula da nane make pi tapaaso alota꞉ Koto hande haliwekita꞉ niki pa꞉ta꞉ hatuku mea ipupe laa lemekeme.

²²Mo tembolo da handeteke haemeke haliwekima꞉ dipula da pa꞉ta꞉ opolo pua handemekepate pa mo aposolo haliweki na pitimikieki handaata꞉ paa la꞉ka꞉la pua mo ka̱le̱sete haliweki pa꞉ta꞉ la halolo alota꞉

²³Nikita꞉ mo dipula da pa꞉ta꞉ opolo poma꞉ pita꞉ta꞉ pota꞉ setepe pu pamba pota꞉ kake pa꞉ta꞉ handeteke haena꞉ leeke haliweki haema꞉eki handoma꞉me. Kutu puma꞉pate pota꞉ lomba tukiki nane handolo poma꞉pate hali ma꞉nda꞉ na pitia꞉eki handoma꞉me laa lemekeme.

²⁴Mo tembolo da handeteke hayeke you halima꞉ make mo yeni peao haemeke you haliwekima꞉ make koto lemeke pi opuaata꞉ koto hau pa꞉la꞉ ekita꞉ ekipa pa꞉la꞉pe laa hone elekeeleke wimikime.

²⁵Kutu pimikipate hali ma꞉nda꞉ honda꞉ pamba a꞉pa iki pa꞉ta꞉ alota꞉ Opua꞉pe. Hande ikana꞉ma꞉ dipula mea lopaeme haliwekima꞉ta꞉ mo tembolo da tukiki pa꞉ta꞉ hata꞉ wanda꞉hali pa꞉ta꞉ pi walolo pitelememe laa leekeme.

²⁶Koto ekina꞉ mo hande tembolo da handeteke hayeke you halima꞉ ipika꞉ haliweki ame̱le̱ puaata꞉ mo aposolo haliweki hatuku mulu pua epemekeme. Wanda꞉halima꞉ toopima꞉ iki liaama꞉na꞉yeke mo haliweki yopu hatuku mea epemekeme.

²⁷Mo aposolo haliweki hatuku mea a꞉pa mo ka̱le̱sete haliwekina꞉ leke minekena꞉ haena꞉ leekeme. Kutupa mo yeni peao haemeke you haliwekina꞉ you halima꞉ iki lota꞉ pitolo alota꞉

²⁸Mo hande halina꞉ bikina꞉ wanda꞉hali pa꞉ta꞉ pi ma꞉nda꞉ na wala꞉pa꞉peke laa iki pa꞉ta꞉ na lapa꞉peke laa ta꞉e leke pi loma꞉pate ikana꞉ma꞉ pimieki hone wia꞉pa꞉peke. Do Diutuseleme da paeyao pa꞉ta꞉ ika꞉ pi yama꞉ tumbulu bao ula꞉me. Kutupa make mo hande hali homea꞉ ekita꞉ ikana꞉ma꞉ niki tulaasememe laa leekeme.

²⁹Pidama꞉ mo aposolo haliweki ame̱le̱ hata꞉ ipika꞉ pi hombo peaaso alota꞉ Nikana꞉ma꞉ta꞉ haliwekina꞉ pi amba꞉la na opiki Koda꞉na꞉ pi opua꞉pa꞉peke ya꞉la꞉me.

³⁰Ikana꞉ma꞉ Yesu a꞉ka꞉tei wapepiki tina꞉ ikoko lia homaemepate nika꞉ apa꞉ amedana꞉ Koda꞉ma꞉ Yesu lapa꞉ pa꞉ta꞉ kone paa mea tiaeyekeme.

³¹Koda꞉ma꞉ Yesu paa mea tiaota꞉ ipikita꞉ Titina꞉ Pula꞉ Hali make Da꞉taasa꞉ Hali make ipika꞉ popeke kiki nane haena꞉ laata꞉ Isulai wanda꞉halima꞉ hone ma꞉nda꞉ la꞉ka꞉la mina wiaata꞉ ika꞉ hoke hau peleme ekimanu pa tumbaena꞉yeke piekeme.

³²Nikana꞉ma꞉ do hande piteleme haumanu handaata꞉ la haloloma꞉ haliweki haloma꞉me. Nikana꞉ma꞉ homeke dia꞉me. Holi Sipitidima꞉ make nikana꞉ma꞉ make la haloloma꞉me. Koda꞉ma꞉ ipika꞉ pi opu hala꞉ wanda꞉hali pa꞉ta꞉ Holi Sipitidi halo hala꞉me.

³³Koto lemekeeki ka̱le̱sete haliwekima꞉ opuaata꞉ mineke wotu pankolo hata꞉ mo aposolo haliweki lia homaalumeke hone wimikipate

³⁴ka̱le̱sete hali homeke ma꞉nda꞉ta꞉ Pa꞉tisi hali ipika꞉ bikita꞉ Kamaliele pitiekeme. Ipikana꞉ma꞉ mo hande Lo Pimanu wala꞉la꞉ hali hata꞉ wanda꞉hali paeyaoma꞉ Ipikita꞉ epeke halie laa ipika꞉ pi lao haemekeme. Koto hali ipikana꞉ma꞉ta꞉ mo ka̱le̱sete haliweki momba꞉la pitina꞉ ipiki tiao hata꞉ alota꞉ Mo aposolo haliweki hama꞉ nane hatuku pupe laa

³⁵mo ka̱le̱sete haliweki pa꞉ta꞉ dupa leekeme. Isulai haliwekio. Koto haliweki pa꞉ta꞉ hau ma꞉nda꞉ puluekema꞉ta꞉ titina꞉ amba꞉la hone wopu wia꞉pa꞉peke.

³⁶Amba꞉ta꞉ Teudasi tiaota꞉ ipika꞉ honema꞉ I̱ta꞉ hali tiekee hone wiekeme. Koto ekina꞉ 400 haliweki ipiki ame̱le̱ ta̱lemekeme. Kutupa haemekepate mo hande hali lieke handaata꞉ ipiki ame̱le̱ ta̱la̱ haemeke haliwekita꞉ ta꞉ta꞉ ta꞉ta꞉ pea tankulupu alu alu pea pulu hata꞉ ika꞉ tumiki haemekeeki alu piekeme.

³⁷Kotoeki pieke hoki naneta꞉ mo Ka꞉lili nane hao epeeke hali Diudasita꞉ kapomanima꞉ wanda꞉halina꞉ biki minolo haena꞉ Diudasi ipiki tiaeyekeme. Ipikana꞉ma꞉ make haliweki wopu yola꞉ mea hatuku peekepate pa koto hali make lieke handa ipiki ame̱le̱ ta̱lemeke haliweki make ta꞉ta꞉ ta꞉ta꞉ pea tankulupu alu alu pimikime.

³⁸Koto ekina꞉ ame make do pita꞉la꞉ ekima꞉ I̱ma꞉ iki pa꞉ta꞉ do alome. Do haliweki pa꞉ta꞉ ikana꞉ma꞉ hau ma꞉nda꞉ na pea꞉pa꞉peke. Pa haena꞉ paape. Do ekina꞉yeke loa꞉me. Do haliweki ika꞉ piteleme hau manuta꞉ kenke halima꞉ hone wia ika꞉ e walea꞉ka꞉na꞉ta꞉ kota꞉ pa alema꞉ handilieke.

³⁹Kutu pulu pia꞉pate Koda꞉ma꞉ pina꞉ lea꞉ka꞉na꞉ta꞉ kota꞉ ikana꞉ma꞉ mo haliweki bepolaapeke na ya꞉la꞉me. Kutu pimika꞉na꞉ta꞉ Koda꞉ ame̱le̱ a꞉nda꞉ lita꞉la꞉eki handilimikie leekeme. Kamalielema꞉ mana꞉ leeke pita꞉ mo ka̱le̱sete haliwekima꞉ opimikime.

⁴⁰Mo aposolo haliweki epena꞉ wi la꞉ mepi peaata꞉ yombua bao alota꞉ Pa hoto ma꞉nda꞉ a꞉nda꞉ Yesuna꞉ bikina꞉ pi ma꞉nda꞉ na lapa꞉peke laa ta꞉e ta꞉e lo laata꞉ pao da tapaemekeme.

⁴¹Mo aposolo haliwekita꞉ ka̱le̱sete haliweki mina꞉pa꞉lao pulu hata꞉ Koda꞉ma꞉ ikita꞉ Yesuna꞉ bikina꞉ tanda pa꞉la꞉eki ana꞉na꞉ mea꞉pa꞉peke ya꞉la꞉me laa iki pa꞉ta꞉ hone wieke ekina꞉ ta꞉na꞉ma꞉ wopu homolo hata꞉ pemekeme.

⁴²Kutupa tembolo da pa꞉ta꞉ make wanda꞉halina꞉ da pa꞉ta꞉manu make mo haliwekima꞉ hande Yesuta꞉ ota꞉ Ketiso hala꞉me laa mo Pi Seliapo nate paeyao wala꞉tiki pu haemekeme.