Read Sembeleke Aposolo 8 Bible Online

Aposolo 8 - Sembeleke bible

Aposolo 8

¹Sidipeni limiki ekita꞉ Soloma꞉ lina꞉e hone wiekeme. Koto limiki pita꞉ kone mo Diutuseleme nane haemeke siosi wanda꞉halita꞉ tanda wotu mulu pimikieki kini pea mimikime. Kutu pieke handa Ketiso wanda꞉hali paeyaota꞉ mo Diudia Sametia koto potopinisi yaapo pa꞉ta꞉manu haloendi pimikipate mo aposolo haliwekita꞉ Diutuseleme nane pa ha pelia haemekeme.

²Koda꞉ pa꞉ta꞉ panda꞉puniao yeni pu haemeke mandane haliwekima꞉ Sidipeni toko mea pua hoitolo hata꞉ e̱ tieke lemekeme.

³Kutu pimikipate Soloma꞉ siosi wanda꞉hali hoeyaaluekema꞉ taapeekeme. Ipikana꞉ma꞉ta꞉ da ma꞉nda꞉ ma꞉nda꞉ pa꞉ta꞉ pominolo hata꞉ siosi wanda꞉hali kiki yola꞉ mea hama꞉ nane mea batiki pea dipula mea lopatiki piekeme. Mo hande Pi Seliapo Sametia nane waleekeeki

⁴Koto ekina꞉ mo hande pindipa ta꞉ta꞉ ta꞉ta꞉ pea pemeke wanda꞉halima꞉ mo hande Koda꞉na꞉ Pi Seliapo latia tia pomimikime.

⁵Pilipima꞉ mo Sametia daoni nane pua Ketisona꞉ pi mo wanda꞉hali pa꞉ta꞉ waleekeme.

⁶Kutupa mo wanda꞉halima꞉ ipikana꞉ma꞉ leeke pi opuaata꞉ ipika꞉ wele pieke ekimanu hando pitolo hata꞉ta꞉ pea꞉ma꞉ homeke hone witolo hata꞉ Pilipima꞉ leeke pi opimikime.

⁷Wanda꞉hali wopuna꞉ weleke pa꞉ta꞉ pitimiki hoke temokomanu e̱ wi la꞉ paleke paleke pea opolu bepi pea yapemekeeki make kiki anke homa pa wieke wanda꞉hali wopu make ankena꞉ pua꞉peke na yeke wanda꞉hali wopu make tiaemekeeki handolota꞉ ipika꞉ pi opimikime.

⁸Kutupa koto daoni pa꞉ta꞉ ta꞉na꞉ tieke homo haemekeme.

⁹Kutu piekepate hali ma꞉nda꞉na꞉ bikita꞉ Saimonota꞉ oni da amba꞉ yopua hata꞉ ti̱o̱ haumanu moka꞉la꞉ hande hande pitolo hata꞉ mo Sametia wanda꞉halina꞉ leke mea opaaso hata꞉ta꞉ ipika꞉ kutu pita꞉la꞉ ekima꞉ Tieke halueke hone wiekeme.

¹⁰Mo wanda꞉hali tieke tiekema꞉ make hosiki wanda꞉halima꞉ make mo leeke ekimanu opitolo hata꞉ alota꞉ Do halina꞉ bikita꞉ Koda꞉na꞉ wele pita꞉la꞉eki kone ya꞉ka꞉ta꞉me lemekeme.

¹¹Mo haliwekima꞉ta꞉ mo ti̱o̱ halima꞉ nate paeyao pia꞉tiki pieke ekima꞉ ika꞉ leke opo handake wia꞉tiki pitolo hata꞉ make ipika꞉ pi opua꞉tiki pimikime.

¹²Kutu piekepate wanda꞉halima꞉ Pilipima꞉ mo Koda꞉na꞉ epeke Kilu Tombuao Hala꞉ ekina꞉ pi seliapo Yesu Ketisona꞉ biki tonka꞉na꞉ pua waleekeeki pa꞉ta꞉ hone tulaemeke handaata꞉ kota꞉ haliweki make wanda꞉weki make paeyao bapitaisi pimikime.

¹³Kutupa Saimono make Koda꞉na꞉ pi minolo haena꞉ ipiki bapitaisi peaeyekeme. Kutupa Saimonota꞉ Pilipi yaapo hata꞉ mo wele pita꞉la꞉ ekimanu make na hando haemeke ekimanu make hando haota꞉ leke opa꞉ mina꞉ bepi piekeme.

¹⁴Kutupa mo Diutuseleme da haemeke aposolo haliwekima꞉ Sametia wanda꞉halima꞉ Koda꞉na꞉ pi mineleme pi opu haota꞉ Pida Dioni yaapo pupa꞉ laa tapaemekeme.

¹⁵Kutupa mo hande Pida Dioni yaapo Sametia da opolo puata꞉ mo wanda꞉halima꞉ Holi Sipitidi mina꞉yeke yeni pua pipikime.

¹⁶Pa ekipeke mo Holi Sipitidita꞉ mo wanda꞉halina꞉ weleke pa꞉ta꞉ a̱i̱ na a꞉pa pitiekeme. Mo ika꞉ bapitaisi pimiki hau make Tekehali Yesuna꞉ bikina꞉ homeke bapitaisi pimikime.

¹⁷Pida Dioni yaapoma꞉ ipilika꞉ kiki mo wanda꞉halina꞉ youna꞉ wia hata꞉ yeni pipiki handa Holi Sipitidita꞉ mo wanda꞉halina꞉ weleke pa꞉ta꞉ a꞉pa pitiekeme.

¹⁸Kutupa Saimonoma꞉ mo aposolo hali yaapoma꞉ kiki wieke ekina꞉ hande Holi Sipitidi epeekeeki handolo hata꞉ kota꞉ ipikana꞉ma꞉ manimanu mutia a꞉pa wia hata꞉ alota꞉

¹⁹I̱ma꞉ make yaka kiki hali ma꞉nda꞉na꞉ youna꞉ ua꞉ka꞉na꞉ Holi Sipitidi mina꞉ loa꞉me do wele pita꞉la꞉eki ma꞉nda꞉ kipe leekeme.

²⁰Koto leekepate Pidama꞉ alota꞉ Koda꞉ma꞉ pa kita꞉la꞉ ale naka꞉ honema꞉ hambuluekema꞉ hone witele ekina꞉ neke tonka꞉na꞉ naka꞉ mani tonka꞉na꞉ ma꞉nda꞉ma꞉ hoeyaena꞉e.

²¹Du pitele ekina꞉ neketa꞉ niki ame̱le̱ na hake. Pa ekipeke naka꞉ pukita꞉ Koda꞉na꞉ leke popelekena꞉ tikitiki na pa꞉la꞉me.

²²Do hoke hau pi ekina꞉ hone ma꞉nda꞉ la꞉ka꞉la wiaata꞉ yeni pea꞉peke. Tekehalima꞉ naka꞉ hoke hone witele ekimanu paa mea tombualiepe mata꞉la꞉me leekeme.

²³I̱ma꞉ta꞉ neketa꞉ teto pita꞉la꞉ alema꞉ handeleke handolome. Kutupa naka꞉ hoke hau pitele ekima꞉ neke tonkao ula꞉me leekeme.

²⁴Saimonoma꞉ alota꞉ Nakana꞉ma꞉ koto ale pimanu I̱ pa꞉ta꞉ a꞉paapa꞉na꞉ Tekehali pa꞉ta꞉ yeni peae leekeme.

²⁵Kutupa Pida Dioni yaapoma꞉ mo Tekehalina꞉ pi walolo hata꞉ la hala꞉tiki peaata꞉ mo Diutuseleme da nane paa la꞉ka꞉la pulu hata꞉ mandane Sametia da pa꞉ta꞉manu mo Pi Seliapo wala꞉tia tia pepekeme. Pilipi mo Idiopia kapomani hali yaapo

²⁶Tekehalina꞉ enisoloma꞉ Pilipi pa꞉ta꞉ alota꞉ Tiao. Oni Diutuseleme kini pea Kasa nane pula꞉ pota꞉ teli mea pue leekeme. Koto pota꞉ta꞉ ota꞉ hapu hayeke ale tukiki pa꞉ta꞉ peeke pota꞉e.

²⁷Kutupa Pilipi tiaota꞉ peekeme. Pulu haena꞉ta꞉ mo pota꞉na꞉ Idiopia yuniki hali ma꞉nda꞉ ipikita꞉ mo Idiopia Kuini wanda꞉na꞉ mani paeyao handeteke hae leeke hali tieke manda꞉hande piekeme.

²⁸Mo halita꞉ Diutuseleme da nane Koda꞉ pa꞉ta꞉ yeni pulu yopua ipika꞉ da la꞉ka꞉la yopulu piekeme. Ipikita꞉ mo hosima꞉ yola꞉la꞉ bokisi pita pota꞉na꞉ pulu hata꞉ potopede hali Aisayama꞉ wape piekeeki yata꞉po pitiekeme.

²⁹Kutupa mo Holi Sipitidima꞉ Pilipi pa꞉ta꞉ alota꞉ Mo hosima꞉ yola yopula꞉ ale teke pa꞉ta꞉ leke pua pita꞉peke leekeme.

³⁰Koto ekina꞉ Pilipi a̱i̱ya pua mo hali pa꞉ta꞉ peekepate mo halima꞉ mo Aisayama꞉ wape pa꞉la꞉ buka yata꞉polo pitiekeeki opua alota꞉ Naka꞉ koto yata꞉pele ekita꞉ hone witelepe leekeme.

³¹Mo halima꞉ alota꞉ Ma꞉nda꞉ma꞉ na waleke haena꞉ ekipa hone wiono alepe leekeme. Kutupa mo halima꞉ Pilipi pa꞉ta꞉ alota꞉ Do I̱ pilu pa꞉ta꞉ lopulao pitupana꞉ epoe leekeme.

³²Mo hande halima꞉ mo Baibolo bukana꞉ yata꞉polo pitieke ekita꞉ doeki yeekeme.Ipikita꞉ sipisipi pita꞉la꞉ tupa꞉ kia kia pi na leekeme.Kutupa mo sipisipima꞉ mo itiki tunkulu hala꞉ halina꞉ leke popeleke nane a꞉pa haena꞉ kake a꞉mbaaso hata꞉ pi na la꞉lie tupa꞉ kota꞉ ipikana꞉ma꞉ ipika꞉ kake na a̱a̱ leekeme.

³³Ipika꞉ hande tieke hayekeeki mea lopao pita꞉ta꞉ pi yokaalu epeke tupa꞉ na pimikime.Kutupa ipika꞉ kini pu mieke tapake epima꞉ lapeke ya꞉la꞉pe.Ipika꞉ da꞉ta꞉la꞉ ekita꞉ ma꞉nda꞉ma꞉ hoeyaasa꞉me la꞉la꞉eki yata꞉polo pitiekeme.

³⁴Kutupa mo hande kapomani halima꞉ Pilipi pa꞉ta꞉ alota꞉ Do potopede halima꞉ta꞉ pilisi epi pa꞉ta꞉ ala꞉pe leekeme. Ipika꞉ kone ala꞉pe o ma꞉nda꞉ pa꞉ta꞉ ala꞉pe leekeme.

³⁵Koto leeke Pilipima꞉ pi alo hata꞉ta꞉ mo Baibolo buka a̱i̱ koto kone yata꞉pea꞉ ekimanu pa꞉ta꞉ kini pea mo some pa꞉ta꞉ Yesu Ketisona꞉ epeke Pi Seliapo la haleekeme.

³⁶Ameta꞉ mo pota꞉ hokuluna꞉ pu hao ikali pa꞉ta꞉ opolo pua kutupa mo yuniki halima꞉ alota꞉ Handa꞉e. Ikali doe leekeme. Epima꞉ ya bapitaisi pulu poloeki sa꞉sa꞉ piliepe leekeme.

³⁷[Kutupa Pilipima꞉ alota꞉ Nakana꞉ma꞉ naka꞉ puki paeyaoma꞉ hone wikina꞉ta꞉ kota꞉ naka꞉e leekeme. Kutupa mo halima꞉ alota꞉ I̱ma꞉ta꞉ Yesu Ketisota꞉ Koda꞉na꞉ Eiyeke hala꞉me hone witolome leekeme.]

³⁸Kutupa mo hande hosima꞉ yola yopula꞉ ale dataiwa hali pa꞉ta꞉ alota꞉ Koto pate hae laa Pilipi mo hali yaapo telipina꞉ ikali pa꞉ta꞉ pua kutupa Pilipima꞉ hande hali bapitaisi peaeyekeme.

³⁹Kutu piekepate ipilikana꞉ma꞉ mo ikali mina꞉pa꞉lao yopulu haena꞉ Tekehalina꞉ Sipitidima꞉ Pilipita꞉ pa a꞉pa a̱i̱ tamba꞉ mea peekeme. Kutupa mo bapitaisi pieke halima꞉ Pilipi ota꞉ paa na handeekepate ipikana꞉ma꞉ ta꞉na꞉ma꞉ homa꞉paleke ipika꞉ da peekeme

⁴⁰Kutu piekepate Pilipita꞉ A꞉sidoti da pa꞉ta꞉ hao pulu hata꞉ mandane damanu pa꞉ta꞉ mo Pi Seliapo waloma꞉ waloma꞉ putialo hata꞉ Sesatia nane peekeme.