Read Sembeleke Loma꞉ 1 Bible Online

Loma꞉ 1 - Sembeleke bible

Loma꞉ 1

¹Do wapeta꞉ I̱ Poloma꞉ pua꞉me. Yesu Ketiso ipika꞉ e pokaaso hali halome. Koda꞉ ipika꞉ Pi Seliapo walonoyeke ipikana꞉ma꞉ I̱ wi la꞉ meaata꞉ aposolo hali hano la꞉la꞉me.

²Do hande Pi Seliapota꞉ Koda꞉ma꞉ amba꞉ kiake pi la꞉ witolo hata꞉ ipika꞉ pi la꞉ mea halo haemeke potopede haliweki pa꞉ta꞉ la halaata꞉ yakopiki Baibolo bukana꞉ make wape pina꞉ leekeme.

³Do Pi Seliapota꞉ ipika꞉ Eiyeke hande nika꞉ Tekehali Yesu Ketisoma꞉ pulu pieke ekina꞉ eki loa꞉me. Ipikita꞉ kenke hali leke hayeke ekita꞉ Deipidina꞉ tapake hali hayekeme.

⁴Kutu piekepate ipikita꞉ Koda꞉ yaapo hao a꞉pa yakopiki hali hayeke ekita꞉ kota꞉ Koda꞉ma꞉ wele wotu pitolo hata꞉ ipikita꞉ Koda꞉na꞉ Eiyekee laa peneme yaluekema꞉ homeeke pa꞉ta꞉ kone paa mea tiaeyekeme.

⁵Koda꞉ma꞉ Yesu Ketiso pa꞉ta꞉ hone witolo hata꞉ I̱ aposolo hali halo pua꞉eki kia꞉me. Kutupa Ketisona꞉ bikina꞉ kenke ta꞉ta꞉ ta꞉ta꞉ pa꞉ta꞉manu haeme wanda꞉hali paeyao hatuku pua ipika꞉ pi hone tulao opua pina꞉yeke kia꞉me.

⁶Loma꞉ wanda꞉halio. Do alo ekita꞉ iki pa꞉ta꞉ make alome. Iki make Yesu Ketiso pa꞉ta꞉ hamina꞉yeke Koda꞉ma꞉ wi la꞉la꞉me.

⁷Koto pa꞉la꞉ ekina꞉ Koda꞉ma꞉ pukima꞉ homaata꞉ ota꞉ ipika꞉ wanda꞉hali hamina꞉ wi la꞉la꞉ Loma꞉ wanda꞉halio. Iki paeyao pa꞉ta꞉ wape do pitolome. Nika꞉ Apa꞉ Koda꞉ma꞉ make pa Tekehali Yesu Ketisoma꞉ make iki pa꞉ta꞉ a꞉ta꞉ma꞉ homolo hata꞉ ika꞉ puki lopao hamina꞉ lepeka꞉na꞉ta꞉ epelieke. Poloma꞉ Koda꞉ pa꞉ta꞉ keiyae pi ala꞉eki

⁸Do pi kini pitolo hata꞉ doeki alome. Ika꞉ Yesu Ketiso pa꞉ta꞉ hone tulaasemeeki kenke wanda꞉hali paeyaoma꞉ opiteleme ekina꞉ I̱ma꞉ iki paeyao pa꞉ta꞉ hone wia Yesu Ketisona꞉ bikina꞉ yaka Koda꞉ pa꞉ta꞉ keiyae pi alome.

⁹Do alo ekita꞉ ota꞉ pi aloeki Koda꞉ma꞉ handa꞉la꞉me. Do Koda꞉ta꞉ ipika꞉ Eiyekena꞉ Pi Seliapo walolo hata꞉ yaka tieke pukima꞉ ipika꞉ e pokao halome. Hoto paeyao iki pa꞉ta꞉ hone witolo hata꞉

¹⁰I̱ma꞉ yeni pu haloeki Koda꞉ma꞉ handa꞉la꞉me. Koda꞉ma꞉ hone pia꞉ka꞉na꞉ta꞉ I̱ta꞉ ame iki pa꞉ta꞉ a꞉pa hosiki haluekema꞉ Koda꞉ma꞉ peaena꞉yeke honke alome.

¹¹Iki handuluekema꞉ I̱ma꞉ hone wotu pa꞉la꞉me. Mo hande Holi Sipitidina꞉ epeaasa꞉eki ma꞉nda꞉ iki pa꞉ta꞉ teli teli pealuekema꞉ ika꞉ puki taka꞉lao hamina꞉yeke loa꞉me.

¹²Do alo ekita꞉ dupae. Yaka hone tulaalo ekima꞉ iki tamba꞉ mina꞉ make ika꞉ hone tulaaleme ekima꞉ I̱ tamba꞉ mina꞉ make niki paeyaoma꞉ tamba꞉ mu alualu pumana꞉yeke loa꞉me.

¹³Yaka kame titio doeki hone wia꞉pa꞉peke. I̱ta꞉ iki ame̱le̱ hosiki halo ipuluekema꞉ hoto elekeeleke pua꞉pate ale ma꞉nda꞉ma꞉ yaka pota꞉ sa꞉sa꞉ pu hala꞉me. Iki ame̱le̱ haleme mandane wanda꞉halima꞉ pi mina꞉ puki la꞉ka꞉laluekema꞉ mo mandane Diendaili wanda꞉hali pa꞉ta꞉ pua꞉ tupa꞉ puluekema꞉ I̱ma꞉ hone pa꞉la꞉me.

¹⁴Kapomanina꞉ pita꞉la꞉ hau handeleme wanda꞉hali pa꞉ta꞉ make na handeleme wanda꞉hali pa꞉ta꞉ make wape handeleme wanda꞉hali pa꞉ta꞉ make wape na handeleme wanda꞉hali pa꞉ta꞉ make paeyao pa꞉ta꞉ I̱ma꞉ pi wala꞉peke ya꞉la꞉me.

¹⁵Koto ekina꞉ Loma꞉ wanda꞉hali iki pa꞉ta꞉ make mo Pi Seliapo waluekema꞉ tiki tiki hao halome. Mo Pi Seliapona꞉ wele pa꞉la꞉eki

¹⁶Mo hande Pi Seliapoma꞉ Koda꞉ma꞉ta꞉ ipiki pa꞉ta꞉ hone tulaaseme wanda꞉halita꞉ Diu wanda꞉hali amba꞉la Diendaili wanda꞉hali wetepena꞉ paeyao ipikana꞉ma꞉ wele pitolo hata꞉ da꞉taapeke ya꞉la꞉me. Koto ekina꞉ mo Pi Seliapo pa꞉ta꞉ I̱ta꞉ ota꞉ ti lao halome.

¹⁷Mo hande Pi Seliapoma꞉ doeki wala꞉leke handa loa꞉me. Koda꞉ma꞉ wanda꞉hali ipiki pa꞉ta꞉ tiki tiki haena꞉ ala꞉eki wala꞉la꞉me. Mo Koda꞉ma꞉ do pita꞉la꞉ ekita꞉ wanda꞉halima꞉ hone tulao hatiki puo pu hao paeyaalo pulu make pilieke. Mo Baibolo bukana꞉ wape pea ula꞉ tupa꞉ Hali epima꞉ Koda꞉ pa꞉ta꞉ hone tulao haya꞉ka꞉na꞉ta꞉ Koda꞉ma꞉ ipiki pa꞉ta꞉ mo hali tiki tiki haena꞉ lelieke. Kutupa mo halita꞉ da꞉ta halieke. Wanda꞉hali paeyao pa꞉ta꞉ hoke haumanu ula꞉eki

¹⁸Kutupa Koda꞉ma꞉ta꞉ wanda꞉hali paeyaoma꞉ ipikita꞉ hoki nane yao ika꞉ hoke hau paeyao pimiki ekina꞉ ipikana꞉ma꞉ mineke pankolo hata꞉ iki ame̱le̱ pi yokaalu pulu pelemeeki make wala꞉la꞉me. Kutu piki wanda꞉halima꞉ ika꞉ hoke hau piteleme ekina꞉ mandane wanda꞉halima꞉ Koda꞉na꞉ ota꞉ hala꞉eki handaama꞉na꞉ sa꞉sa꞉ pu halememe.

¹⁹Kutupiki wanda꞉halita꞉ Koda꞉ma꞉ panisi peaalieke. Do ekina꞉yeke loa꞉me. Koda꞉ hala꞉ ekita꞉ wanda꞉hali paeyao pa꞉ta꞉ na a꞉mbala꞉me. Ikana꞉ma꞉ handa꞉pa꞉peke ya꞉la꞉me. Pa ekipeke Koda꞉ma꞉ kone iki pa꞉ta꞉ peneme yaala꞉me.

²⁰Koda꞉ma꞉ kenke ala꞉ta꞉ ala꞉ta꞉ paeyao wepia wina꞉ la꞉la꞉ dina꞉ kini pu mea a꞉pa ame haloma꞉ pa꞉ta꞉ kone wanda꞉hali paeyaoma꞉ta꞉ Koda꞉ ota꞉ hala꞉eki make ipika꞉ wele pu hao halo pa꞉la꞉eki make hone epeke tupa꞉ wia꞉pa꞉peke ya꞉la꞉me. Koto Koda꞉na꞉ hau yaapota꞉ lekema꞉ peneme handa꞉pa꞉peke na ya꞉la꞉pate pa hone wia꞉pa꞉peke ya꞉la꞉me. Wanda꞉hali paeyaoma꞉ta꞉ Koda꞉ma꞉ wepia wina꞉ la꞉la꞉ ekimanu lekema꞉ handolo hata꞉ hone wia꞉pa꞉peke ya꞉la꞉me. Koto ekina꞉ wanda꞉hali paeyaoma꞉ pi ma꞉nda꞉ lapa꞉peke na ya꞉la꞉me.

²¹Iki paeyaoma꞉ta꞉ Koda꞉ hala꞉eki hone witelemepate ipiki pa꞉ta꞉ Neketa꞉ ota꞉ Koda꞉ haleme pi na leke ipika꞉ pi laaluekema꞉ make kiao halememe. Kutupa ipiki pa꞉ta꞉ keiyae pi make na lo halememe. Kutu pu haleme ekina꞉ iki hone wopu na wiki hata꞉ ika꞉ hone teke pa꞉ta꞉ timba꞉ lo pamba꞉la꞉eki tumbulu baena꞉ halememe.

²²Ikana꞉ma꞉ alota꞉ Nikita꞉ hone wopu uluma꞉ wanda꞉hali haloma꞉me laa lo halemepate ikita꞉ hone na wiki wanda꞉hali hata꞉ta꞉

²³hande na homeke pa hao hala꞉ Koda꞉ pa꞉ta꞉ panda꞉puniao yeni na piki pa mo wanda꞉halima꞉ wa꞉pa꞉la꞉ alemanu pa꞉ta꞉ kone panda꞉puniao yeni pu halememe. Koto ale manuta꞉ mo homa꞉la꞉eki pila꞉ halima꞉ make ba titima꞉ make kenkena꞉ pomineleme ale manuma꞉ make kutupiki ekima꞉ handeke ekimanu pa꞉ta꞉ panda꞉puniao yeni pu halememe. Hoke hau ta꞉ta꞉ ta꞉ta꞉ pita꞉la꞉eki

²⁴Hone na wiki kutupiki haliweki haleme ekina꞉ Koda꞉ma꞉ kiao ika꞉ hone pa꞉la꞉ suseke haasa꞉ haumanu pa putia pena꞉ ala꞉me. Kutupa ikana꞉ma꞉ yaala꞉ piki haumanu pu alualu pu halememe.

²⁵Kutu piki haliwekima꞉ta꞉ Koda꞉ ota꞉ hala꞉ ekita꞉ na miki pa topo pea yayapikieki melememe. Kutupa Koda꞉ma꞉ pa wepia wina꞉ la꞉la꞉ alemanu pa꞉ta꞉ panda꞉puniao yeni pu hata꞉ ika꞉ hau peao halemepateta꞉ hande ala꞉ta꞉ ala꞉ta꞉ paeyao wepia wina꞉ la꞉la꞉ Koda꞉ pa꞉ta꞉ta꞉ na pitelememe. Koto Koda꞉ta꞉ wanda꞉halima꞉ ipika꞉ pi laatiki pu hapa꞉peke ya꞉la꞉me. Ota꞉ loa꞉me.

²⁶Kutupu haemeke ekina꞉ Koda꞉ma꞉ta꞉ ika꞉ yaala꞉ piki haumanu pa putia pena꞉ la꞉la꞉me. Wanda꞉wekima꞉ kone haliweki pa꞉ta꞉ hone na wiki pa ika꞉ wanda꞉ yankeke pa꞉ta꞉ ana꞉ na piki haumanu pu halememe.

²⁷Koto tupa꞉ kone mo haliwekima꞉ make wanda꞉weki pa꞉ta꞉ hone na wiki ika꞉ hali yankeke pa꞉ta꞉ kone ana꞉ na piki haumanu pu alualu puluekema꞉ puki pa꞉ta꞉ ti leke talo hata꞉ pu halememe. Mo haliwekima꞉ta꞉ ika꞉ kone yaala꞉piki haumanu pu alualu pu haleme ekina꞉ Koda꞉ma꞉ ika꞉ ana꞉ na piki hauna꞉ yenkita꞉ hokeeki kone halo hala꞉me.

²⁸Mo haliwekima꞉ta꞉ Koda꞉ ota꞉ hala꞉eki hone ma꞉nda꞉ uluekema꞉ kiaasemeke ekina꞉ta꞉ Koda꞉ma꞉ ika꞉ kone hone u hoeyao pa haena꞉ la꞉la꞉me. Koto pa꞉la꞉ ekina꞉ mo haliwekima꞉ ana꞉ na piki haumanu pu halememe.

²⁹Koto wanda꞉halita꞉ hoke hau manuma꞉ make pasa꞉tei hau manuma꞉ make ma꞉nda꞉ pa꞉ta꞉ hokeeki puluekema꞉ hone witelemeeki manuma꞉ make ta꞉ta꞉ ta꞉ta꞉ pikieki manuma꞉ tumbulu bao halememe. Soka꞉la꞉ pita꞉la꞉ ekima꞉ make hali luekema꞉ pita꞉la꞉ ekima꞉ make a꞉nda꞉ lita꞉la꞉ ekima꞉ make yayapiki hau pita꞉la꞉ ekima꞉ make ma꞉nda꞉ pa꞉ta꞉ hoke hone wita꞉la꞉ ekima꞉ make tumbulu bao hata꞉ pa pimanu la꞉tiki pu halo hata꞉

³⁰ika꞉ ika꞉ kone pi la la pu alualu pia꞉tiki pu halememe. Koda꞉ hoki wala leke pa꞉ta꞉ sa꞉take pu hambiliki hoepitolo make tanda pea hatiki pu halememe. Hakoko litolo hata꞉ Koda꞉na꞉ pi kone la꞉tiki pitolo hata꞉ hoke ekimanu puluekema꞉ panake pota꞉manu weiya꞉tiki pu halememe. Kutupa ateke inkiki yaapona꞉ pi tunkula꞉tiki pu halememe.

³¹Ikana꞉ma꞉ ya꞉la꞉ma꞉ na homolo hata꞉ ika꞉ la꞉ wimiki pimanu pa tunkula꞉tiki pu pitolo hata꞉ make ma꞉nda꞉ pa꞉ta꞉ epeke hone na wiki pa a꞉ta꞉ma꞉ na homa꞉tiki pu halememe.

³²Koda꞉na꞉ pi ula꞉ ekima꞉ alota꞉ Mo kutu piki haumanu pu haleme wanda꞉halita꞉ homa꞉la꞉eki mea꞉pa꞉peke ya꞉la꞉me laa la꞉la꞉me. Koto la꞉la꞉ pi mo wanda꞉halima꞉ opitelemepate ika꞉ hande hoke ekimanu paa pia꞉tiki pu hao kutupa make mandane wanda꞉halima꞉ koto hande hoke ekimanu pimika꞉na꞉ta꞉ a꞉pa꞉la꞉ma꞉ pa pipe laa lo halememe.