Read Sembeleke Loma꞉ 10 Bible Online

Loma꞉ 10 - Sembeleke bible

Loma꞉ 10

¹Yaka kame titio. Yaka puki pa꞉ta꞉ witolo hone tieketa꞉ yaka tapake hande Diu wanda꞉halima꞉ da꞉ta꞉la꞉eki muemena꞉yeke hone witolo ekina꞉ loa꞉me. I̱ma꞉ iki pa꞉ta꞉ hone witolo hata꞉ Koda꞉ pa꞉ta꞉ yeni pu halome.

²Ikana꞉ma꞉ Koda꞉na꞉ hau puluekema꞉ hone wotu peleme ekita꞉ I̱ma꞉ handa alome. Kutu pitelemepateta꞉ ikana꞉ma꞉ Koda꞉na꞉ hau puluekema꞉ hone peleme ekita꞉ ota꞉eki hando hoeyaaso hata꞉ pitelememe.

³Wanda꞉hali Koda꞉ma꞉ ipiki yaapo tikitiki yao haena꞉ la꞉la꞉ pota꞉ ikana꞉ma꞉ na handa꞉ wiki ikana꞉ma꞉ ika꞉ kone Koda꞉ yaapo tikitiki haluekema꞉ pimikime. Kutu pimiki ekina꞉ Koda꞉ma꞉ wanda꞉hali ipiki yaapo tikitiki yao haena꞉ la꞉la꞉ pota꞉ta꞉ kiao haemekeme.

⁴Mo hande Lo Pimanu wieke dita꞉ Ketisoma꞉ paeyaala꞉ ekina꞉ ameta꞉ hone tulaaseme wanda꞉halita꞉ Koda꞉ma꞉ ipiki yaapo tikitiki yao haena꞉ ala꞉me. Wanda꞉hali paeyaoma꞉ da꞉ta꞉la꞉eki mea꞉pa꞉peke ya꞉la꞉eki

⁵Mo hande wieke Lo Pimanu opieke halita꞉ Koda꞉ yaapo tikitiki yao haluekema꞉ pita꞉la꞉eki pa꞉ta꞉ Mosesima꞉ dupa wape pa꞉la꞉me. Hali epima꞉ mo hande Lo Pimanu opua pu haya꞉ka꞉na꞉ta꞉ kota꞉ da꞉ta꞉la꞉eki milieke.

⁶Koto la꞉la꞉pate hande Koda꞉ pa꞉ta꞉ hone tulao hata꞉ ipiki yaapo tikitiki yao haluekema꞉ pita꞉la꞉eki pa꞉ta꞉ mo Baibolo bukana꞉ wape pa꞉la꞉ ekita꞉ dupae. Nakana꞉ma꞉ naka꞉ kone dupa lota꞉ na pea꞉peke. Oli hepeni naneta꞉ epi a꞉meiliepe laa lea꞉ka꞉na꞉ta꞉ kota꞉ mo Ketiso niki pa꞉ta꞉ hola꞉pa꞉niao epena꞉yeke honke lolo a꞉meilu pele ekina꞉ loa꞉me.

⁷Dupa make na lota꞉ pea꞉peke. Oni homemeke wanda꞉hali pambo hao haleme alena꞉ epi hola꞉pa꞉niao peliepe. Kotota꞉ mo Ketisota꞉ niki pa꞉ta꞉ paa la꞉ka꞉la opa꞉liaena꞉yeke honke lolo hola꞉pa꞉niao lolo pele ekina꞉ loa꞉me.

⁸Mo Baibolo bukana꞉ wape pa꞉la꞉ ekima꞉ta꞉ doeki ala꞉me. Koda꞉ma꞉ la꞉la꞉ pita꞉ papate na ulu pa꞉la꞉me. Ika꞉ puki pa꞉ta꞉ make mendiata꞉ ika꞉ kakema꞉ make lapa꞉peke ya꞉la꞉me laa wape pa꞉la꞉me. Hande pita꞉ nikana꞉ma꞉ walo haloma꞉ pi kone wanda꞉halima꞉ hone tulaena꞉ la꞉la꞉ ekita꞉ dupa.

⁹Nakana꞉ma꞉ naka꞉ kakema꞉ Yesuta꞉ Tekehali hala꞉me laa peneme yao alo make naka꞉ puki pa꞉ta꞉ Koda꞉ma꞉ Yesu homa lapa꞉ pa꞉ta꞉ wieke alena꞉ paa mea tiaeyekeme laa hone tulaeka꞉na꞉ta꞉ kota꞉ da꞉ta halipikie.

¹⁰Do ekina꞉yeke loa꞉me. Nika꞉ puki pa꞉ta꞉ hone tulaasoma꞉ ekina꞉ Koda꞉ma꞉ nikita꞉ ipiki yaapo tikitiki yao hamono ala꞉me. Nika꞉ kakema꞉ peneme yao aloma꞉ ekina꞉ nikita꞉ da꞉ta haloma꞉me.

¹¹Kota꞉ mo hande Baibolo bukana꞉ wape pa꞉la꞉ ekita꞉ dupaHali epima꞉ ipiki pa꞉ta꞉ hone tulaeya꞉ka꞉na꞉ta꞉ kota꞉ hone ka꞉nda꞉ma꞉ homa na halieke laa wape pa꞉la꞉me.

¹²Koto wape pa꞉la꞉ ekita꞉ wanda꞉hali paeyao pa꞉ta꞉ la꞉la꞉me. Diu wanda꞉hali make Diendaili wanda꞉hali make paeyaota꞉ homeke tupa꞉ da꞉ta hapa꞉peke ekina꞉ loa꞉me. Wanda꞉hali paeya tapaona꞉ Tekehali homeke kone hala꞉me. Kutupa make epi ameda paeyaoma꞉ ipika꞉ biki laa honke lemeka꞉na꞉ta꞉ kota꞉ ipikana꞉ma꞉ iki wotu epeaalieke.

¹³Mo hande Baibolo bukana꞉ wape pa꞉la꞉ ekita꞉ dupaEpi ameda paeyaoma꞉ Tekehalina꞉ biki laa honke lemeka꞉na꞉ta꞉ kota꞉ da꞉ta halimikie laa wape pa꞉la꞉me.

¹⁴Kutu pulu pelemepate ikana꞉ma꞉ta꞉ hone na tulaake hata꞉ta꞉ ekipa ipika꞉ biki alo hata꞉ honke lelimikipe. Kutupa make hande la꞉la꞉ pita꞉ na opiki hata꞉ta꞉ ekipa hone tulaalimikipe. Kutupa hali ma꞉nda꞉ma꞉ hande pi na walea꞉ka꞉na꞉ta꞉ kota꞉ ekipa opilimikipe.

¹⁵Kutupa hande pi mea pua walaaseme wanda꞉hali na tapaemeka꞉na꞉ta꞉ kota꞉ ekipa pi walaalimikipe. Mo hande Baibolo bukana꞉ wape pa꞉la꞉ ekita꞉ dupa.Mo ota꞉ epeke pi seliapo mea a꞉paaseme wanda꞉halina꞉ anke manuta꞉ ota꞉ yole pea ula꞉me laa la꞉la꞉me.

¹⁶Kutu pa꞉la꞉pate hande Pi Seliapota꞉ pea꞉ paeyaoma꞉ opua puki pa꞉ta꞉ na mea mendielememe. Aisayama꞉ ipikana꞉ma꞉ kone alota꞉Tekehalio. Do nikana꞉ma꞉ waloma꞉ pita꞉ epima꞉ opua hone tulaala꞉pe laa leekeme.

¹⁷Koto ekina꞉ pi opita꞉la꞉ ekima꞉ wanda꞉halima꞉ hone tulaasememe. Kutupa hali ma꞉nda꞉ma꞉ Ketisoma꞉ pa꞉la꞉eki wala꞉la꞉ ekima꞉ wanda꞉halima꞉ pi opitelememe.

¹⁸Kutu pitelemepate I̱ma꞉ lota꞉ pitoloeki dupae. Hande pita꞉ wanda꞉halima꞉ na opelememe ala꞉ ekita꞉ ota꞉ alemepe. Dia꞉me amba꞉ opimime. Hande Baibolo bukana꞉ wape pa꞉la꞉ ekita꞉ dupaMo pi mea puaaseme haliwekina꞉ kakema꞉ lemeke pi manuta꞉ kenke paeyao pa꞉ta꞉ amba꞉ pa꞉la꞉me.Ikana꞉ma꞉ lemeke pi manuta꞉ kenke honiki pa꞉ta꞉ haleme wanda꞉halima꞉ amba꞉ opelememe laa wape pa꞉la꞉me.

¹⁹I̱ma꞉ paa lota꞉ pitolo ekita꞉ dupa. Isulai wanda꞉halima꞉ta꞉ hande pita꞉ hone na wimikipe. Dia꞉me. Ikana꞉ma꞉ opua kone halememe. Mosesima꞉ta꞉ Koda꞉na꞉ pi lawaaso hata꞉ ipikana꞉ma꞉ amba꞉la pi alo alota꞉I̱ma꞉ta꞉ pa ika꞉ ta꞉ta꞉ pea hao haleme wanda꞉hali ota꞉ tapake tieke na haleme wanda꞉hali kone mea haena꞉ loa꞉ka꞉na꞉ta꞉ ikana꞉ma꞉ hoke hone witolo hata꞉ I̱ma꞉ pitolo ekina꞉ sokulama꞉ homilimikie.Kutupa mo hone wopu na witeleme wanda꞉hali I̱ma꞉ mea haena꞉ loa꞉ka꞉na꞉ta꞉ ikana꞉ma꞉ kutu pitolo ekina꞉ mineke pankelimikie laa wape pa꞉la꞉me.

²⁰Kutupa Aisayama꞉ Koda꞉na꞉eki lawaaso hata꞉ doolema꞉ na homeke dupa leekeme.I̱ na weimi wanda꞉halima꞉ kone I̱ handa꞉ wimime laata꞉ I̱ haloeki lota꞉ na pimi wanda꞉hali pa꞉ta꞉ kone yaka kone peneme yao waloa꞉me laa leekeme.

²¹Koto leekepate paa ipikana꞉ma꞉ mo Isulai wanda꞉hali pa꞉ta꞉ Koda꞉na꞉eki lawaaso hata꞉ alota꞉Yaka pi na opiki I̱ kiaaseme wanda꞉hali pa꞉ta꞉ kone I̱ma꞉ta꞉ epoe la alo hano nate opa pa pambolo yapea꞉me laa leekeme.