Read Sembeleke Loma꞉ 12 Bible Online

Loma꞉ 12 - Sembeleke bible

Loma꞉ 12

¹Koto pa꞉la꞉ ekina꞉ yaka kame titio. Koda꞉ma꞉ niki pa꞉ta꞉ a꞉ta꞉ma꞉ wotu homo haleke handaata꞉ I̱ma꞉ iki pa꞉ta꞉ honke aloeki ma꞉nda꞉ta꞉ dupa. Hande hotekemanu lia Koda꞉ pa꞉ta꞉ halemeke tupa꞉ ame ikana꞉ma꞉ta꞉ ika꞉ loke manuta꞉ pa da꞉ta hata꞉ kone Koda꞉ pa꞉ta꞉ hala꞉pa꞉peke. Ikana꞉ma꞉ kutu pimika꞉na꞉ta꞉ kota꞉ ikita꞉ ipika꞉eki hata꞉ta꞉ ipika꞉ e pokaaluekema꞉ make ipiki ta꞉na꞉ma꞉ homaaluekema꞉ make pilimikie. Kutu pita꞉la꞉ hauta꞉ Koda꞉ pa꞉ta꞉ panda꞉puniao ika꞉ temokoma꞉ ota꞉ yeni pita꞉la꞉eki pea꞉pa꞉peke aleo.

²Ikana꞉ma꞉ta꞉ pa kenke wanda꞉halima꞉ pu haleme ekimanu tonka꞉na꞉ apa꞉tao puluekema꞉ hone na wia꞉pa꞉peke. Koto pa꞉la꞉pate Koda꞉ma꞉ ika꞉ hone topo pea wiaaso ika꞉ puki make la꞉ka꞉laena꞉ lapa꞉peke. Ipikana꞉ma꞉ kutu pia꞉ka꞉na꞉ta꞉ kota꞉ ikana꞉ma꞉ Koda꞉na꞉ hone pa꞉la꞉ ekita꞉ handilimikie. Kutu pita꞉la꞉ ekita꞉ epekeeki make Koda꞉ ta꞉na꞉ma꞉ homaasa꞉eki make eki a꞉nda꞉ na piki ota꞉ seliapo pea ula꞉eki make pita꞉la꞉me.

³Koda꞉ma꞉ ipika꞉ pa hameke a꞉ta꞉ma꞉ homa꞉la꞉eki I̱ pa꞉ta꞉ kieke handaata꞉ kota꞉ I̱ma꞉ iki paeyao pa꞉ta꞉ pi dupa alome. Naka꞉ kone neke pa꞉ta꞉ hone witolota꞉ I̱ta꞉ ya handoloeki ya haloeki make wanda꞉halina꞉eki ankulao halome laa koto hone na wia꞉peke. Iki homeke homekema꞉ta꞉ ika꞉ ika꞉ kone hosiki yao hone wia hata꞉ Koda꞉ma꞉ ka꞉la꞉ hone tulaasa꞉eki ana꞉na꞉ handaata꞉ hone u hapa꞉peke.

⁴Niki paeyaona꞉ loke pa꞉ta꞉ta꞉ tuna tuna pea hala꞉ alemanu hao hala꞉pate ika꞉ piteleme haumanu ta꞉ta꞉ ta꞉ta꞉ lo pu halememe.

⁵Koto tupa꞉ niki make wanda꞉hali wopu haloma꞉pate Ketiso yaapo ta꞉ma꞉ni pea hata꞉ homeke loke tupa꞉ haloma꞉me. Kutupa hata꞉ta꞉ koto lokena꞉ tuna tuna pa꞉la꞉ ekimanu ya꞉leke handaata꞉ niki make tuna alualu pea haloma꞉me.

⁶Koto pa꞉la꞉ ekina꞉ mo Koda꞉ma꞉ pa hameke a꞉ta꞉ma꞉ homolo hata꞉ niki homeke homeke pa꞉ta꞉ ka꞉la꞉ ekimanu handaa mea mo Ketiso tapake ame̱le̱ hata꞉ pia꞉tiki pumana꞉e. Koda꞉ma꞉ta꞉ mo ipika꞉ pi lawaasa꞉ ekita꞉ niki pa꞉ta꞉ kia꞉ka꞉na꞉ta꞉ kota꞉ ekipiki hone tulaasa꞉eki niki pa꞉ta꞉ pitia꞉ka꞉na꞉ta꞉ koto ekima꞉ lawamana꞉e.

⁷Koda꞉ma꞉ta꞉ mo Ketiso wanda꞉hali tamba꞉ mea꞉peke ekita꞉ niki kia꞉ka꞉na꞉ta꞉ kota꞉ nikana꞉ma꞉ tamba꞉ mea꞉peke ya꞉la꞉me. Koda꞉ma꞉ta꞉ mo pi wala꞉la꞉ ekita꞉ niki pa꞉ta꞉ kia꞉ka꞉na꞉ta꞉ kota꞉ nikana꞉ma꞉ ipika꞉ pi wala꞉peke ya꞉la꞉me.

⁸Koda꞉ma꞉ta꞉ mo wanda꞉hali sutiaasa꞉ ekita꞉ niki pa꞉ta꞉ kia꞉ka꞉na꞉ta꞉ kota꞉ sutiatiki pumana꞉e. Hali ma꞉nda꞉ma꞉ ipika꞉ wia hala꞉ alemanu kone wanda꞉hali pa꞉ta꞉ teli teli peaeya꞉ka꞉na꞉ta꞉ kota꞉ epeke moke pitolo hata꞉ pea꞉peke ya꞉la꞉me. Hali ma꞉nda꞉ ipikita꞉ biki ula꞉ hali haya꞉ka꞉na꞉ta꞉ kota꞉ honkopu hao e poka꞉peke ya꞉la꞉me. Hali ma꞉nda꞉ma꞉ wanda꞉hali pa꞉ta꞉ a꞉ta꞉ma꞉ homolo hata꞉ pa꞉ta꞉lea꞉ka꞉na꞉ta꞉ kota꞉ ta꞉na꞉ma꞉ homolo hata꞉ pa꞉ta꞉la꞉peke ya꞉la꞉me.

⁹Wanda꞉hali pa꞉ta꞉ pukima꞉ homemeka꞉na꞉ta꞉ kota꞉ ota꞉ pukima꞉ homa꞉pa꞉peke. Ikana꞉ma꞉ hokeeki handaata꞉ linka꞉ la꞉pa lopa hapa꞉peke. Epeke ekita꞉ mea mina hapa꞉peke.

¹⁰Ikana꞉ma꞉ ika꞉ Ketiso kametiti ame̱le̱ ika꞉ kone pukima꞉ homa alualu pea hapa꞉peke. Kutupa ika꞉ ika꞉ kone lu mina꞉nia alualu puluekema꞉ taapo hapa꞉peke.

¹¹E pokolo hata꞉ta꞉ soka꞉la꞉ homa hata꞉ na pokeke honkopu hao hata꞉ poka꞉pa꞉peke. Tekehalina꞉ e pokaaso hata꞉ta꞉ puki loke paeyao ipiki pa꞉ta꞉ halolo hata꞉ pokaapa꞉peke.

¹²Tekehalima꞉ pulu pa꞉la꞉ ekina꞉ handeteke hata꞉ ta꞉na꞉ma꞉ homa hapa꞉peke. Ka꞉nda꞉piki haumanu iki pa꞉ta꞉ epea꞉ka꞉na꞉ta꞉ kota꞉ honkopu hao hata꞉ handeteke hapa꞉peke. Hoto paeyao yeni pea꞉tiki pu hapa꞉peke.

¹³Mandane Ketiso yankeke manuma꞉ ota꞉ mea꞉peke yelia꞉ alemanu mea꞉peke na ya꞉ka꞉na꞉ta꞉ kota꞉ ikana꞉ma꞉ ika꞉ wia haleme ekimanu kone telipa ma꞉nda꞉ hala꞉pa꞉peke. Da ma꞉nda꞉ nane haleme Ketiso wanda꞉hali kimisu a꞉pa pitimika꞉na꞉ta꞉ kota꞉ ika꞉ da pa꞉ta꞉ handa꞉ mea peliaapa꞉peke.

¹⁴Iki pa꞉ta꞉ a꞉nda꞉ liteleme wanda꞉halita꞉ Koda꞉ma꞉ koto wanda꞉hali epeaena꞉ ikana꞉ma꞉ yeni pea꞉pa꞉peke. Koda꞉ma꞉ hoeyaena꞉ laa yeni na piki epeaena꞉ laa yeni pea꞉pa꞉peke.

¹⁵Wanda꞉hali epi amedama꞉ ta꞉na꞉ma꞉ homemeka꞉na꞉ta꞉ kota꞉ ikana꞉ma꞉ make iki ame̱le̱ mandakena꞉ ta꞉na꞉ma꞉ homa꞉pa꞉peke. E̱ aleme wanda꞉hali make ikana꞉ma꞉ make iki ame̱le̱ mandakena꞉ e̱ lapa꞉peke.

¹⁶Ikana꞉ma꞉ ika꞉ homeke homekema꞉ ika꞉ ika꞉ kone hone witolo piteleme tupa꞉ ma꞉nda꞉ ma꞉nda꞉ pa꞉ta꞉ make mandake tupa꞉ kone pa hone wia꞉pa꞉peke. Ikana꞉ma꞉ I̱ handaena꞉ hau na piki hosiki wanda꞉halima꞉ piteleme ekimanu make handa꞉ mea pea꞉pa꞉peke. Ikana꞉ma꞉ta꞉ I̱ homeke hone wotu ulu halie laa hone na wia꞉pa꞉peke.

¹⁷Hali ma꞉nda꞉ma꞉ iki pa꞉ta꞉ hoke hau pia꞉ka꞉na꞉ta꞉ kota꞉ ikana꞉ma꞉ ipiki make hombo peaaso hata꞉ hoke hau na pea꞉pa꞉peke. Wanda꞉hali paeyaoma꞉ta꞉ Do hauta꞉ epeke ekie laa hone witelemeeki kone pea꞉pa꞉peke.

¹⁸Wanda꞉hali paeyao ame̱le̱ a꞉nda꞉ pelia hao haluekema꞉ mo koto hauna꞉ pota꞉manu handa꞉ uluekema꞉ honkopu hao weiya꞉pa꞉peke.

¹⁹Ya yankeke titio. Ma꞉nda꞉ma꞉ iki pa꞉ta꞉ hokeeki pia꞉ka꞉na꞉ta꞉ kota꞉ yenki mulu peleme hone na wia꞉pa꞉peke. Ika꞉ yenki meaake hauta꞉ Koda꞉ma꞉ mineke panka꞉la꞉ ekima꞉ peaowaena꞉ lapa꞉peke. Hande Baibolo bukana꞉ wape pa꞉la꞉ ekita꞉ dupaTekehalima꞉ alota꞉ Yenki meaake hauta꞉ I̱ma꞉ pulueke laa wape pa꞉la꞉me.

²⁰Hande Baibolo bukana꞉ paa ma꞉nda꞉ wape pa꞉la꞉ ekita꞉ dupaNaka꞉ a꞉nda꞉ tunkuliki halita꞉ tea꞉ma꞉ homea꞉ka꞉na꞉ta꞉ kota꞉ ne hala꞉peke.Ikali na꞉na꞉ma꞉ make homea꞉ka꞉na꞉ta꞉ kota꞉ ikali naa hala꞉peke.Kutupiki hau pika꞉na꞉ta꞉ kota꞉ mo hali ipika꞉ you mandata꞉ ti lankake mea momba꞉lalipikie laa wape pa꞉la꞉me.

²¹Hoke hauma꞉ iki mea lopaena꞉ handa꞉ pelia na hake epeke hau piteleme ekima꞉ta꞉ hoke hau bepolaena꞉ lapa꞉peke.