Read Sembeleke Loma꞉ 6 Bible Online

Loma꞉ 6 - Sembeleke bible

Loma꞉ 6

¹Koto poloma꞉ ekina꞉ nikana꞉ma꞉ eki pi loluma꞉pe. Koda꞉ma꞉ pa hameke a꞉ta꞉ma꞉ homa꞉la꞉eki daeya꞉tia pena꞉yeke nikana꞉ma꞉ hoke haumanu pa pu tia pomana꞉pe.

²A꞉pa꞉e. Dia꞉me. Hoke hau pita꞉la꞉eki pa꞉ta꞉ nikita꞉ amba꞉ homoma꞉me. Ekipeke paa putia pua꞉tiki pumana꞉pe.

³Do pa꞉la꞉ ekita꞉ hone na witelemepe. Yesu Ketiso yaapo ta꞉ma꞉ni pea hata꞉ bapitaisi puma꞉ pita꞉ta꞉ ipika꞉ homeeke ekina꞉ make ta꞉ma꞉ni pea hata꞉ puma꞉me.

⁴Koto bapitaisi puma꞉ ekita꞉ ipiki yaapo mandakena꞉ homa pa lapa꞉ pa꞉ta꞉ make mandake uma꞉me. Panake hau pu hata꞉ haluekema꞉ bapitaisi puma꞉me. Hande nika꞉ Apa꞉ma꞉ ipika꞉ honkopu hala꞉eki epekema꞉ Ketiso paa mea da꞉taeyeke tupa꞉ pitoloma꞉me.

⁵Nikita꞉ ipika꞉ homeeke ekina꞉ ipiki ame̱le̱ mandakena꞉ homomeke handaata꞉ koto tupa꞉ kone Koda꞉ma꞉ ipiki mea da꞉taeyeke ekima꞉ niki make ipiki ame̱le̱ mandakena꞉ hamonoyeke mea da꞉taalieke.

⁶Doeki make hone witoloma꞉me. Amba꞉ niki hao hoeyaoma꞉ ekita꞉ hande a꞉ka꞉tei wape piki tina꞉ Yesu ame̱le̱ mandakena꞉ lia homeekeme. Nikana꞉ma꞉ hoke hau puluekema꞉ hone wotu pa꞉la꞉ ekimanu Koda꞉ma꞉ hoeyaaluekema꞉ pa꞉la꞉me. Kutupa hoke hau pita꞉la꞉ ekima꞉ niki paa a꞉nda꞉ na lu tombuaena꞉yeke pa꞉la꞉me.

⁷Hali ma꞉nda꞉ a꞉nda꞉ homea꞉ka꞉na꞉ta꞉ kota꞉ mo hoke hauma꞉ koto halita꞉ paa lu tumbaapeke na ya꞉la꞉me.

⁸Nikita꞉ Ketiso homeeke ekita꞉ ipiki ame̱le̱ mandakena꞉ homomeke handa nika꞉ hone tulaasoma꞉ ekita꞉ dupa uluma꞉me. Ipiki ame̱le̱ hao halumeke hone witoloma꞉me.

⁹Ketisota꞉ homeekepate Koda꞉ma꞉ ipiki paa mea da꞉taeyeketa꞉ paa na homa꞉peke yekeeki nikana꞉ma꞉ hone witoloma꞉me. Homaasa꞉ ekima꞉ honkopu hao Ketiso ipiki pa꞉ta꞉ pa eki a꞉nda꞉ paa pea꞉peke na ya꞉la꞉me.

¹⁰Ketiso ipika꞉ homeeke ekita꞉ dupa. Hoto homeke pita꞉ kone ipiki homeekepate hoke hau pita꞉la꞉ ekina꞉ wele pita꞉la꞉ ekita꞉ paeyaeyekeme. Kutupa ame ipiki hake hauta꞉ Koda꞉ yaapo mandakena꞉ halepeme.

¹¹Koto pa꞉la꞉ tupa꞉ ikana꞉ma꞉ta꞉ ika꞉ kone hone dupa wipe. Niki make homoloma꞉me laa hone wipe. Hoke hau pita꞉la꞉ ekina꞉ wele pita꞉la꞉ ekima꞉ iki pa꞉ta꞉ eki a꞉nda꞉ pea꞉peke na ya꞉la꞉ ekina꞉ loa꞉me. Koto tupa꞉ halemepate Yesu Ketiso yaapo ta꞉ma꞉ni pea haleme ekina꞉ Koda꞉ yaapo mandakena꞉ da꞉ta halememe.

¹²Ika꞉ loke tieke paeyaona꞉ hoke hone u tiaasa꞉ ekimanu pa putia pulu hamono hoke hau pita꞉la꞉ ekima꞉ ika꞉ homa꞉peke ya꞉la꞉ loke tieke paeyao lu tombuaasa꞉me. Kutu pa꞉la꞉pate koto hau manuma꞉ iki paa na lu tombuaena꞉ lapa꞉pekema.

¹³Ika꞉ lokena꞉ haleme alemanu ma꞉nda꞉ta꞉ hoke hau pina꞉ na lapa꞉peke. Dia꞉me. Homa paa da꞉ta a꞉pa hala꞉ wanda꞉hali leke hata꞉ ika꞉ ika꞉ kone Koda꞉ pa꞉ta꞉ hala꞉pa꞉peke. Tikitiki haumanu pina꞉yeke ika꞉ loke tieke paeyao Koda꞉ pa꞉ta꞉ hala꞉pa꞉peke.

¹⁴Hande Lo Pi manuna꞉ dupa꞉pe laa wala꞉la꞉eki ika꞉ wenoko tikitikina꞉ na mea wikita꞉ hande Koda꞉na꞉ pa a꞉ta꞉ma꞉ homa꞉la꞉eki homeke ika꞉ wenoko tikitikina꞉ mea wina꞉ aleme ekina꞉ kota꞉ hoke hau pita꞉la꞉ ekima꞉ iki paa a꞉nda꞉ na lu tombuaena꞉ lapa꞉pekema. Nikana꞉ma꞉ e pokaaso hata꞉ tikitiki hau ota꞉ pea꞉pekeeki

¹⁵Koto ekina꞉ eki pumana꞉pe. Hande Lo Pi manuma꞉ dupa꞉pe laa wala꞉la꞉eki nika꞉ wenokona꞉ na wiki hande Koda꞉na꞉ pa a꞉ta꞉ma꞉ homa꞉la꞉eki homeke nika꞉ wenokona꞉ wina꞉ aloma꞉ ekina꞉ hoke hau pumana꞉pe. A꞉pa꞉e. Dia꞉me.

¹⁶Do ekita꞉ ikana꞉ma꞉ hone na witelemepe. Koto a꞉nda꞉ ikana꞉ma꞉ ika꞉ kone hali ma꞉nda꞉ pa꞉ta꞉ ta̱la̱꞉ liao hata꞉ ipika꞉ e pa hameke pokaaseme wanda꞉hali hamena꞉ lemeka꞉na꞉ta꞉ kota꞉ ikita꞉ mo hande teke halina꞉ pi opitolo hata꞉ ipika꞉ pa hameke e pokaaseme wanda꞉hali halimikie. Hoke hau pita꞉la꞉eki ikana꞉ma꞉ opu haemeka꞉na꞉ta꞉ kota꞉ homa꞉la꞉eki milimikie. Koda꞉na꞉ pi opu haemeka꞉na꞉ta꞉ kota꞉ ikita꞉ ipiki yaapo tikitiki yao hamina꞉ lelieke.

¹⁷Koda꞉ pa꞉ta꞉ keiyae pi lomana꞉e. Do ekina꞉yeke loa꞉me. Ikita꞉ amba꞉ hone pa꞉la꞉eki pitolo hata꞉ hoke hau pu haemeke ekina꞉ pa hameke e pokaaseme haliweki leke haemekepate ikana꞉ma꞉ hande waleekeeki opua handa꞉ wimiki ota꞉ pimanu wotu pimikime.

¹⁸Hoke hauna꞉ wele pita꞉la꞉ ekina꞉ iki mea tonkao wieke ekita꞉ Koda꞉ma꞉ iki ka꞉la꞉pa꞉ tapaowala꞉me. Kutupa iki ameta꞉ tikitiki haumanu puluekema꞉ Koda꞉ ipika꞉ pa hameke e pokaaseme wanda꞉hali halememe.

¹⁹Ika꞉ hone a̱i̱ na tikitiki yao wimi ekina꞉ I̱ma꞉ da wanda꞉halima꞉ lo haleme tupa꞉ alome. Amba꞉ ikita꞉ hoke hoke haumanu paeyao puluekema꞉ pa hameke e pokaaseme wanda꞉hali leke hata꞉ suseke haasa꞉ haumanu make hoke haumanu make ika꞉ hone wia wenoko tikitikina꞉ mea wia hata꞉ pu haemekeme. Koto tupa꞉ kone ame ikita꞉ yakopiki haumanu puluekema꞉ yeke koto hauna꞉ e pa hameke pokaaseme wanda꞉hali leke hata꞉ tikitiki haumanu ika꞉ hone wia wenoko tikitikina꞉ mea wia hata꞉ pu hapa꞉peke ya꞉la꞉me.

²⁰Ikita꞉ e pa hameke pokaaseme wanda꞉hali leke hata꞉ hoke haumanu pu haemeke dina꞉ta꞉ Koda꞉na꞉ tikitiki haumanu puemena꞉yeke ma꞉nda꞉ma꞉ iki na su tiaeyekeme.

²¹Kutupu haeme hau manuma꞉ ameta꞉ iki yaala꞉ma꞉ homelemepate iki epeaaso na pia꞉me. Kutu piki hau manuma꞉ta꞉ wanda꞉hali homao halememe.

²²Kutupa halemepate hoke hauna꞉ wele pita꞉la꞉ ekima꞉ iki mea tonkao wieke ekita꞉ Koda꞉ma꞉ iki ka꞉la꞉pa꞉ tapaowala꞉me. Kutupa ikita꞉ ipika꞉ pa hameke e pokaaseme wanda꞉hali leke halememe. Koto peleme ekina꞉ ikana꞉ma꞉ ika꞉ loke tieke paeyao ipiki pa꞉ta꞉ halaata꞉ deto hala꞉eki make milimikie.

²³Hoke hau piteleme ekina꞉ mea꞉peke yenkita꞉ homa꞉la꞉ekie. Kutu pa꞉la꞉pate Koda꞉ma꞉ pa hameke kita꞉la꞉ ekita꞉ da꞉ta hao hala꞉ekie. Nika꞉ Tekehali Yesu Ketiso yaapo ta꞉ma꞉ni pea hamono kita꞉la꞉me.